Ane rom, echî 14

Nne a kâ kô ntem-nne Krayis noŋ énə́mé nne

1Ájoé nne owəné kpe yót a ri nnyo ḿbə́ŋé nnyi a kíi na Jisos Krayis a nyə́ne á ka son nono, deê ó kó ên yê ka ekam ejə́né, obhúp ó kâ jóe.#Kor 2.16. 2Kpe énê a fonê áno eye ńgyímí egyê ka nchot édî. Nne nnyo tat kə́n a jóe se kpe njə́n-njə́n ejûm yê a dî odí. Nnyo tat nnyo ḿbə́ŋé nnyi a kíi na Obhasi a nyə́ne á ka tʉrí oson, se yê nnyam á bhó di, á dik təm nyʉŋ. 3Ájoé eya ńgyímí a ri se kpe bhaghé ejûm o dî odí, áji é kâ yîm wâ ó kó ntem nnyo á bhó di noŋ énə́mé nne. We nnyo o fonê eya ńgyímí se ó bhó di kpe njə́n-njə́n ejûm, deê o kâ tâŋ ntem nnyo á dik áno odí, ka Obhasi a kô yê eróŋ noŋ nne owe. 4We a ri énê kpá títí nnyo o kí tâŋ ḿgbán i nne etat. Ńsé owe nâ a fonê ikom mfi a kí səre se ḿgbán nnyó a mə́ŋe oyim na ebhú tat se á ka məŋé oyim. Ḿgbán nnyó eróŋ a ri ka eyéném echî, ka Ńtâ Obhasi kə́n a yîm yê a yên echî.

5Nne nnyo tat kə́n a kî se ofú mbí ó faŋ ó chiŋi mbi tat. Kən nnyo tat se mfín chénchén a ri ekan. Kpe énê a kam na ejê nji é rî yê ka ḿbə́ŋé. 6Nne nnyo a kíi mfín etat se a ri nnyi yúp, á yimá áno se yê a karé ejík mbâ Ńtâ Jisos Krayis. Nnyo a kí di kpe njə́n-njə́n ejûm, á yimá áno se yê a karé ejík mbâ Ńtâ Jisos Krayis. Ka nan? A kí karé ekûp mbâ Obhasi ka édî njí. Nne nnyo a kí saŋ édî, á yimá áno se yê a karé ejík mbâ Ńtâ Jisos, ka yê fə́ne a kí karé ekûp mbâ Obhasi. 7Echî aŋ? Ekpin ejə́ré na ekʉ̂ nji e kí kpo cháŋ ka obhô obhə́ré. 8Kpe e ri ka ekpin, e ri ka obhô Ńtâ Jisos. Kpe e kpóe okpó, e kpóe ka obhô obhê. Nâ mân kpe e kpóe okpó, kpe e ri mbít, e ri ka obhô Ńtâ Jisos.

9Nâ ńjə́ne Jisos Krayis a kpóe, a chə́bhe njəm ka ekpin se yê a joé ntûfâm ane mba á kpóe okpó na mba á ká kpo. 10Nâ ńjə́ne fə́ne á sə́re sê ntem-mmon-i-nnyen a kâ bhíbhi ntem kpák. Nne a kâ kêp ntem-mmon-i-nnyen se echâk í nne. Echî aŋ? Êt fép tîk e gyími ka ochî Obhasi, a tâŋ êt.#2 Korin 5.10. 11Ka ekpak nji á séŋe sê,

“Ńtâ Obhasi se, ‘Ka eji mme n di mfoné Obhasi,

kpe énê a ri a tə́m arúŋ ka ochî obhámé,

kpe énê a ri a sə́ré ka nnyo imê se mme a ri Obhasi.’ ”#Asa 45.23.

12Nâ é fap sê êt fép e ri é tóŋé nji e yimî ka nsi nnyí mbâ Obhasi yê ḿfoné.

Ntem-mmon-i-nnyen a kâ yôp ntem

13Ka ekpak njí, deê é mághe mân atem ebhíbhím. Kən deê é fôn ka ḿbə́ŋé sê e kâ yîm kpe ejûm jə́t nji é kí yim ntem-mmon-i-nnyen a kobhé a gbo ka obhí. 14Ochəma-biji obhámé na Ńtâ Jisos ó yim ə̂m ń kam ka etʉri bəre kpe édî akôp cháŋ. Kən nne á kere se ekpak édî njí, yê á di tîk é bhak yê na akôp, nâ mbâ eye, édî áji a ri édî akôp. 15Ájoé fə́ne etʉ̂ iyîm mbi ó dik í kí yimâ ntem-mmon-i-nnyen owa a fôn nsae ka ḿbə́ŋé, áfo nâ ó ka tóŋé okot na yê. O kâ kâm se édî nji ó dik, é bhíbhí ekpin í ntem-nne nnyo Jisos Krayis a kpóe nná ka echî ejê. 16Deê o kâ kâm se nji we o kébhe se a ri ejûm eno, é fôn mbiŋ i mbí. 17Echî aŋ? Otúi Obhasi, édî áji ńjə́ne-njənê na aməm egwóóm asík, kən a ri otúi ekpin eyimím ka nnyen-i-mbá. A ri otúi ekone na ogyebhá-ḿbə́ŋé nâ Obhasi Ebhare Ntʉgantʉ á kará. 18Ó top Jisos Krayis ka ekpak njí, é kí gyebhé Obhasi ka ḿbə́ŋé. Atem-ane eróŋ á kí karé wâ ejík.

19Ka obhô mbí, deê íkíkéré ifə́ré í jóe sê é yîm iyîm mbi í kə́ bha na ekone ka eji, é kâk atem-abhon-í-nnyen ikom ka achot Obhasi. 20Ka obhô édî, deê o kâ bhíbhi ejûm nji Obhasi a yimî. Kpe édî akôp cháŋ, kən a ri ejûm ebhí ájoé ó di ejûm nji é kí yim nne etat a kóbhe a gbo ka obhí. 21É nóbhe sê ó mághe kpe nnyam edíím, kpe aməm egwóóm na kpe ejûm etat eyimím nji é kí yim ntem-mmon-i-nnyen owa a gbo ka obhí.

22Deê ekpak íkíkéré ifâ í kpê na achot mmá, í jóe wâ ka ḿbə́ŋé na Obhasi Ńsé owa. Ogyebhá-ḿbə́ŋé ó rî na nne nnyo á bhó fon efup se yê a gbô nji á yim ejûm nji a kâm se é rî nono. 23Kən ájoé o kí fon efup se ó gbo ka ejûm nji ó dik, Obhasi a kí bhibhi wâ ebhú ó di, ka ḿbə́ŋé eya á ka joé jáé. Məŋê ên sê kpe bhaghé ejûm nji nne a yimî nji ḿbə́ŋé eye á ká joé jáé ka Obhasi, ejûm áji a ri obhí.

Currently Selected:

Ane rom, echî 14: ETUNT

Highlight

Compare

Copy