Ane rom, echî 13
13
Karê kpe énê nji é fóne yê
1Kpe énê a fonê ka ejíghím otúi eték, ka kpe otúi bhə́t cháŋ mbi ó kí kumí nji Obhasi á ka kam. Otúi eték mbi ó rî áno mfá-mfá, a ri Obhasi nâ a karê. 2É fap sê, nne nnyo á ka kam na otúi eték, deê a məŋé se á taŋá áno ejûm nji Obhasi a káre ikom se é gyími. Á woma fə́ne áno mbá nnyi eték á kí bhibhi yê. 3Echî aŋ? Ájoé ó ka yim obhí, ó bhó fup otúi eték. Ó yim obhí, o kí fon efup. Ájoé ó wom se o kâ fûp ane mba á fíi otúi eték, o ri ó yîm ono, tîk otúi eték ó jíghi wâ. 4Echî é rî sê, ane mba á fíi otúi eték á rî sê á tʉ́k Obhasi, we ó fôn ekəp. Kən ó kpo kumí o yimá obhí, o kí fon efup. Echî aŋ? Otúi eték ó bhik wâ ekpərə́m ka ejûm ebhí nji o yimî. Ane mba á fíi otúi eték á rî sê á tʉ́k Obhasi á kpə́re ane mba á yíma obhí. 5Ka obhô mbí mân, o ri ó jíghí ên ane mba á fíi otúi eték. Kən o kâ jíghi ên ka nchot efup ńnyə́ne-nnyənê. Jíghi ên o foná ên ḿbə́ŋé jáé.
6Nâ echî eróŋ nji o ri ó káre ntí-echî imâ, ka ane mba á fíi otúi eték á tʉ́gha Obhasi ka etûm ábho.#Mat 22.21; Mak 12.17; Luk 20.25. 7Karê kpe énê nji é fóne yê. Kpe é rî ntí-echî, karê. Kpe é fábhe sê á túp ntí ka eték, tûp. Kpe ekûp, karê. Kpe ejík, karê. Kpe nkat, karê.
Joê ên noŋ atem-abhon-í-nnyen ka etʉri
8Nne a kâ kâm se arə́m á kə́t yê ka biji é ká chiŋi a ri okot na ntem-nne. Nne nnyo á kot ntem-nne, a kí top ebhín Obhasi. 9Chénchén ebhín Obhasi nji sê “ka gbo ekun, ka yúí nne, ka jʉ́ ejʉ̂, ka kí amə̂t ka ejûm í ntem,” chénchén bibhín mbí na mbi tat í chəm ebhín jə́t nji sê “O ri ó kôt ntem-nne noŋ o korê biji ibhâ.”#Ane 20.13-15,17; Otira 5.17-19,21; Mat 19.18. 10Ó fon okot, ó bhó yim obhí na ntem-nne. Nâ ńjə́ne ó fi ebhín okot, ó fi chénchén ebhín Obhasi.
11O ri ó fî ên ebhín njí, ka ó məŋe ên sê ebhú áji é si. Nyəmê ên eyô, ka ebhú Obhasi a kí yim êt é sém é kpiri mfá-mfá é chiŋi nji ebhú e róghe ḿbə́ŋé ekíím na yê.
12Atʉ́ á chiŋ, ofú ó che chén. Deê é mághe achot mma é korá e yimá ka ejírim, é tʉ́ri biji é fáp ka ebhát. 13Deê é jíghí biji ibhə́ré noŋ ane mba á yíma ekpin ka ebhát. E kâ gyê kpe-eji ka énə́mé aməm egwóóm na kpe achot akôp enuŋúm na ane. E kâ káre biji ka eyimím achot mma á kə́ bha êt na akôp ka biji. E kâ gyê ka okpóŋe na atem, e kâ kî atem amə̂t ka biji. 14Deê é góre Ńtâ Jisos Krayis a yim êt é fôn ekpin noŋ yê. É mághe eyimím ekpin obhí ka ekpak e wóme ka ḿbə́ŋé eyəré.
Currently Selected:
Ane rom, echî 13: ETUNT
Highlight
Share
Compare
Copy
Want to have your highlights saved across all your devices? Sign up or sign in
Ejagham New Testament © Bible Society of Nigeria and Bible Society of Cameroon, 1996.
