Ane rom, echî 10
10
1Atem-abhon-í-nnyen, ka ndə́p-i-ḿbə́ŋé amé, ń woma kə́n bəre Obhasi a yim ane Isrel abhámé á sém ka oyámá-ḿbə́ŋé obhê. N kí goré Obhasi ka obhô mbí kpe-eji. 2Kə́n n gyími ntî-isê n chôt bəre ḿbə́ŋé nnyi ane abhámé á fóne sê á tóp Obhasi, a sôn kpe-eji. Kən á ká tʉrí oməŋé ekpak eyimím. 3Á ka məŋé noŋ Obhasi á kok ekpin í nne se é rî ka nnyen-i-mbá. Á ká karé fə́ne biji se Obhasi a tóŋé ábho mbá. Á kí top mân a ri íkíkéré ábho sê á nôk Obhasi a kó ekpin ábho se é rî ka nnyen-i-mbá. 4Kən Jisos Krayis a bhâ jéghe nji ebhín é wóme, ikom ebhín í man. Ka obhô mbí, kpe énê nnyo á ki ḿbə́ŋé na yê, Obhasi a kí ko ekpin í nne ányo se é rî ka nnyen-i-mbá.
Obhasi á bhó fon oyámá-ḿbə́ŋé na nne nnyo á ki ḿbə́ŋé na Jisos
5Ka nchot se nne a fôn ekpin ka nnyen-i-mbá, Mosis a séŋe a kpê na ebhín efiím se, “Nne nnyo á yimá chénchén nji ebhín é wóme, á foná ekpin fə́ne na ńjə́ne.”#Mbín 18.5.
6Kən ka nchot se Obhasi a kí ko se ekpin í nne é rî ka nnyen-i-mbá, nne a ri a kí ḿbə́ŋé na Jisos Krayis. Á séŋe sê, “O kâ bhə̂p ka ḿbə́ŋé eya se, ‘Énê nâ tîk a jak ka ósô?’ ” Se a jí ko Jisos Krayis, a bhət a bhá.#Otira 30.12-14. 7Sê “O kâ bhə̂p fə́ne se, ‘Énê nâ tîk a jak ka eték akə́bha-nsi?’ ” Se a jí sʉk Jisos Krayis a bhá.#10.7 “O kâ bhə̂p” é fâp sê nne á ka fon eyimím ejûm nji é chíŋi yê kən a fôn ekpin ka nnyen-i-mbá ka ochî Obhasi. Obhasi nâ a kí karé. 8Nji é rî ka etím a ri sê, “Otîp Obhasi ó ká rap mbá na we, ó rî ka nnyo imâ na ḿbə́ŋé eya.” Otîp mbí a ri ḿbə́ŋé ekíím na Jisos. E sə́re ên nná sê, 9ó səre ka nnyo imâ se Jisos nâ a ri Ntûfâm, o kâm ka ḿbə́ŋé eya se Obhasi a yim yê a nyəmé ka ekʉ̂, Obhasi tîk a yîm wâ o sêm. 10Echî aŋ? O kí ki ḿbə́ŋé na Jisos kən Obhasi a kô se ekpin ejâ é rî ka nnyen-i-mbá. É kí dʉ fə́ne ka esə́rə́m njí ka nnyo imâ kən Obhasi a yîm wâ o sêm. 11Obhasi a sə́re ka nwet eye se, “Kpe énê nnyo á ki ḿbə́ŋé na yê, tîk á bhó to se, ‘A tok ə̂m eé.’ ”#Asa 28.16. 12Ka nan? Ka nchot nnyí, ane Jus na ajéné chénchén á rî ekan. Obhasi a ri Ntûfâm ane chénchén. A kí karé enare joók mbâ ane chénchén mba á góra yê. 13Ka ekpak nji yê a chorê ka nwet eye se, “Kpe énê nnyo á goré Ńtâ Obhasi, tîk á yîm yê a sêm.”#Jow 2.32.
14Kən tîk nne a yîm nan a góre Obhasi nji á ka kí ḿbə́ŋé na yê. Nne a kí yim nan a kí fə́ne ḿbə́ŋé nji á bhó yuk otîp obhê. Nne a kí yim nan a yúk otîp obhê nji á ká səre yê. 15Á kí yim nan fə́ne á sə́ré otîp í nchane nji á ká tum ane á jí sə́ré. Á séŋe ka nwet Obhasi sê, “Ane á kí fon ekpatə́m ogyebhá-ḿbə́ŋé á kpê na ane mba á bháe ábho na otîp ogyebhá-ḿbə́ŋé Obhasi.”#Asa 52.7.
16Kən chénchén ane asík mba á yúghi otîp mbí nâ á fóne ebhú na ḿbə́ne. Ka ekpak nji Asaya a séŋe se, “Ńtâ Obhasi, ane ábhík nâ á yuk okpígha-ejûm obhə́ré á kam na ḿbə́ne?”#Asa 53.1. 17Nâ é rî sê kən nne a kí ḿbə́ŋé na Jisos Krayis, a râŋ mbá a yûk otîp obhê. Nne a kí yuk otîp mbí nji á səre yê ḿbə́ne.
18Deê ḿ bə́p ên kpá ebhə̂p. É rî ka etʉri sê á ká yuk otîp Obhasi a? Nne nnyo a rô yúk cháŋ. Á séŋe ka nwet Obhasi sê,
“Okpígha-ejûm ábho ó jen ó jabhe ngun ndə́m.
Ayum í nchot ábho á si ntə̂m i ngun.”#Nkôn 19.4.
19Ḿ kpó bhəp ebhə̂p jə́t. Nâ-ngá nji ane Isrel á yúghi otîp mbí, ó ká jáé ábho a? Ó jáe ábho, ka Mosis se Obhasi a toê se,
“Tîk n yîm ên o kî ên amə̂t na nték etat
nnyi ó kebha ên sê á ká fap kpe ejûm.
Tîk n yîm ên o fôn ên oyámá-ḿbə́ŋé
na nték etat nnyi kpe ejûm á ká məŋé.”#Otira 32.21.
20Ka ofaŋá-ḿbə́ŋé mbi ó chiŋi ochíŋ, Asaya a sêŋ fə́ne se Obhasi a toê se,
“Mba kpe enóróm á ká not ə̂m, á məŋe ə̂m.
Ḿ fap ka ochî ane mba kpe ebhə́bhə́m
á bhó bhəp sê á yén ə̂m.”#Asa 65.1.
21Kən a sêŋ a kpê na ane Isrel se Obhasi a toê se,
“Ń kət n nyoghá biji bəre
é jóe ka ekone na ane mba á bhó yuk ə̂m,
kən á gyíma a ri ngyím i nchot na mme.”#Asa 65.2.
Currently Selected:
Ane rom, echî 10: ETUNT
Highlight
Share
Compare
Copy
Want to have your highlights saved across all your devices? Sign up or sign in
Ejagham New Testament © Bible Society of Nigeria and Bible Society of Cameroon, 1996.
