Ane rom, echî 9
9
Nsôn a kí yim Pol na atem-ane Isrel
1Nji ḿ bak ochot é rî ka echî. Ń chorá ńjə́ne noŋ nne nnyo a chə̂m na Jisos Krayis. Ḿ bó chot na áfúbhí ka etím. Ḿbə́ŋé amé nnyi a ri ka obhô Obhasi Ebhare Ntʉgantʉ a sə́re ə̂m se ḿ bó səre áfúbhí. 2Nsae a súi ə̂m ka ḿbə́ŋé kpe-eji na abhon-í-nnyen abhámé ane Isrel. Onoghá-ḿbə́ŋé obhámé ka echî ábho, ntə̂m cháŋ. 3Ka echî ane Isrel mba á rî nâ abhon-í-nnyen abhámé, agyʉ́ŋ amə́ré mát, kə́n n wôm bəre deê Obhasi a bhíbhí ə̂m esup. A gbút ə̂m a yighí na Jisos Krayis, ájoé eyimím ka ekpak njí kə́n n yîm ábho á sém. 4Obhasi a kóe ábho noŋ abhon abhê a tóŋe ábho ejík ejê. A chími ábho otem ka ńgyímí etat. A káre ábho ebhín ejê, a tóŋe ábho ekpak nji á kí jighi yê. A chími fə́ne ábho onono.#Ane 9.4. 5Ábho a ri biyábhé-abhon ane Obhasi éməné. Krayis yê ḿfoné, ebhú á bháe noŋ nne ka nsi nnyí, á jíi yê ka ndə́p-i-njû nnyí yə́t. Yê, ka Obhasi nnyo a faŋê a chîŋ ochíŋ, a fonê fə́ne ejík ka ótúm-ótúm. Áno.
Obhasi a yîm ka ekpak nji yê a chimî
6Nâ é fap mân sê Obhasi á ka yim nji a chimî a? Bhúghí-bhúghí! É ká fap sê chénchén ane Isrel nâ Obhasi a sáŋe noŋ ane abhê. 7É ká fap fə́ne sê chénchén biyábhé-abhon Abraham nâ á rî abhon Obhasi. Echî aŋ? Obhasi nâ a sə́re Abraham se, “Təm abhon mba mmon owa Isak nâ á kí joé mfoné-mfoné abhon abhámé.”#Eróghá 21.12. 8Nâ é ká joé sê ka eji á jíi wâ ka etʉri ka ndə́p-i-njû Abraham, we ó chəbhe mmon Obhasi. A ri ane mba á kíi ḿbə́ŋé noŋ Abraham ka ejûm nji Obhasi a chimî, nâ á rî mfoné-mfoné biyábhé-abhon. 9Obhasi a chimî Abraham se, “Ebhú é bhik, tîk m bák ejen mbâ eya. Ḿ ba, nkáé owa Sara tîk a jî mmon.”#Eróghá 18.10.
10É ká man njí. Ńsé abhon í Rebeka a ri yót, Isak nnyo ńsé-nkúí owəré. Kən ebhú Rebeka a nyə́ne na oya, 11-12Obhasi a sə́re yê se, “Mmon nnyo ndaŋa-mbá tîk a jóe ḿgbán mbâ nnyo nsígha-njəm.” A sə́re yê kən kpe Rebeka a bhá ji ofât obhê, kən kpe abhon mbá á bhá mə́ŋe obhí na ono. A chorê nchot nnyí se yê a tóŋé se osáŋa-ejûm obhê, nji é gbʉ́a cháŋ. Echî aŋ? Yê á bhó saŋ a kóŋ etûm nji nne a yimî. É dʉ̂k a ri ka ekpak nji yê a wóme.#Eróghá 25.23. 13Á séŋe fə́ne sê Obhasi a toê se, “Ka Jakop na Isa, ń kot Jakop, ń taŋe Isa.”#Mar 1.2-3.
14E kí səre mân sê nâ ekpin Obhasi cháŋ ka nnyen-i-mbá a? Áfúbhí! 15É kó nchot nnyi Obhasi a chorê na Mosis. A sə́re Mosis se, “N kí yim onono n káre ane mba n wóme, n dî fə́ne nsôn na ane mba n korê.”#Ane 33.19. 16É yen mân sê ebhú Obhasi á saŋ nne, é ká joé sê nne ányo nâ a wóme, na kpe a yîm ejûm nji é bhíghi kən Obhasi a kí saŋ yê. Esáŋám Obhasi é dʉ̂k ka nsôn nnyi yê a kí ri nne. 17Echî aŋ? Ka nwet Obhasi á sə́re ntûfâm eték í Ijip sê, “A ri ka obhô mbí nâ n kóe wâ n yîm otúi. Bəre ń tóŋé ekpatə́m ikom ifámé. Ń yîm fə́ne ngun ndə́m á yúk mbiŋ amé.”#Ane 9.16. 18Deê é mə́ŋe mân sê Obhasi a kí ri nsôn na ane mba yê a wóme a ri. Ebhú á wom fə́ne se yê a yim nne a son echî na yê, a yîm.
Obhasi á yimá ekpak nji é rî yê ka ḿbə́ŋé
19Ebhú tat tîk nne owəné a bhə̂p ə̂m se, “Ájoé ekpak Obhasi á səre se é jóe, nyóŋá cháŋ, jen mân kən a kí fi nne se a gbô?” 20Ntem, we ka nne, o fonê kpá bhaghé ikom mfi o kí bhəp ntʉ́ghi ebhə̂p njí mbâ Obhasi? Nne nnyo a kô otop a kí moŋe ebhí ka ekpak nji a kére, eji o nôk oyúk ebhí áji é bhə̂p se, “Jen é yími kən o kí yim ə̂m ekpak njí” a ri fan?#Asa 29.16; 45.9. 21Nyima-ebhí nâ a fonê ikom mfi a kí ko otop mbí, a yim nji-nji é kóre yê. A kí ko ekpək otop jə́t a yîm abhí ábháe. A korê a yîm jə́t a kí se təm ka ofú erom kən á yîm kpe ejûm ka etím. Nji tat se kpe bhaghé ebhú á kô á yîm nji-nji á kóre.
22Nâ noŋ fə́ne é rî na Obhasi. Kpe noŋ á woma a tóŋé oyámá-ḿbə́ŋé obhê na ekpatə́m ikom ifê, a kí kəbhâ ḿbə́ŋé, a kaghá biji na ane nchane bhát mba á yíma yê a yámá ḿbə́ŋé. Á rî mba kə́n á bhíbha obhíbhí. 23Á kəbhá áno ḿbə́ŋé a kaghá biji na ábho ka obhô ane mba ngá, mba yê a wóme a ri nsôn. Á woma a tóŋé fə́ne ábho efaŋ nji é rî ka ejík ejê. Nâ ane mba yê a yîm se á jóe na yê ka ekpatə́m ejík ejê. 24Êt a ri ane nchane mba Obhasi a sáŋe ta ebhú áji. Á ka sáŋ mbâ ane Jus átíŋ, a sáŋe fə́ne mbâ ane nték ajéné. 25Nâ ekpak fə́ne Obhasi a chorê ka nwet Oseya se,
“Ane mba ebhú áji á ká joé ane abhámé,
tîk m bîŋ ábho mfá-mfá bəre, ‘Ane abhámé.’
Nték nnyi ka ebhú áji ń ka kot,
mfá-mfá tîk m bîŋ ńnyə́ne bəre ‘Nték okot amé.’ ”#Ose 2.23.
26A kpô chot se, “Ka nkúbhi eji nji n sə́re ábho bəre
‘Ên ane abhámé asík,’
áfo nâ tîk á bhîŋ ábho sê
‘Abhon í mfoné-mfoné Obhasi.’ ”#Ose 1.10.
27Nkara-otîp Obhasi nnyo á kamá se Asaya a kûk a kpê na ane Isrel se,
“Kpe ane Isrel á tíi noŋ ésébhe ka mkpe aya,
mba Obhasi a kí yim á sém, á bhó ti.
28Echî aŋ? Ebhú é bhó rap,
Ńtâ Obhasi a kí gbut esup ejê
a karé ane ngun.”#Asa 10.22-23.
29Asaya nnyó yót a sə́re ebhú áji se,
“É ro joé sê Ńtâ Obhasi ka ósô
a maghé etʉ̂ biyábhé-abhon abhə́ré asík,
kə́n ebhú njí, é man chénchén
noŋ ane Sodom na Gomora.”#Asa 1.9.
Ane Jus á ká ko mfoné mbá á mə́ŋe Obhasi
30E kí sə́re mân sê jen? É tô sê ane mba á ká dʉ ka nték i Jus, á ká nok ka biji ábho sê Obhasi a kó ekpin ábho se é rî ka nnyen-i-mbá, á fôn ekpin áji. Á fóne ńjə́ne ka ḿbə́ŋé nnyi á kí ki na Jisos Krayis. 31Kən mân ane Jus á woma sê Obhasi a kó ekpin ábho se é rî ka nnyen-i-mbá ka ebhín ekíím, kən kpe echî na ndə́p á ká yen. 32Echî a ri jen? Á ká ki ḿbə́ŋé na Jisos Krayis. Á kən ḿbə́ŋé ábho chénchén á kuni ka ntûm eno eyimím. Á kobhe á gbo ka nchot i ḿbə́ŋé ekíím na Jisos nnyo a ri nâ ntáé nnyi 33Obhasi a chorê ka nwet eye se,
“Ńgyê, ń ki ntáé amé ka eték í Sayon
nnyi a kí yim ane á kóbhe.
Ekpatə́m í ntáé nnyi a kí yim ane á gbô.
Kən nne nnyo á ki ḿbə́ŋé na ńnyə́ne,
tîk á bhó kuk se, ‘A tok ə̂m eé.’ ”#Asa 28.16.
Currently Selected:
Ane rom, echî 9: ETUNT
Highlight
Share
Compare
Copy
Want to have your highlights saved across all your devices? Sign up or sign in
Ejagham New Testament © Bible Society of Nigeria and Bible Society of Cameroon, 1996.
