Etûm ágbán~í jisos, echî 28

Eji e tə́me a ri eji ngûm á bhíŋa sê Mata

1Nji e kpo sém áno chénchén é chəbhe ka ngun, e mə́ŋe mân sê á bhíŋa eji njí sê Mata. 2Ane eték njí á fî êt, kpe ache á ká chaghé. Á fə́ghe ngûn sê é yóbhé, ka mbúta a róghe enaám, egyʉk é kí yim. 3Nji Pol a bhúbhi akpât í nkún a kâk ka ngun, nnyô nnyi a kí be efû ngûn, a fâp a bhâ yûm yê ka obhô, amə̂ŋ á kə̂t. 4Ane eték njí á kpó yen, á chə́bhe á chorá na atem sê, “Ka etʉri, nne nnyó a ri nyúa-nne. A bê ekʉ̂ ka aya, kən ndibhí nnyi á yimá, á bhó kam yê a kpin.” 5Kən Pol a mə̂t obhô obhê ńgô, nnyô nnyí a gbô ka ngûn mmí, kpe ejûm etat nji é yími yê cháŋ. 6Ane mbá á kí chik sê ebhú tat obhô Pol tîk ó nʉ̂t, na kpe ebhú tat tîk a gbô a kpô. Kən á kpo chik tata kpe ejûm nji é fábhe na yê cháŋ, á chə́bhe á səra sê Pol a ri njom.

7Kpírí-kpírí na eji njí, etʉ̂ mbin a ri nnyi ntûfâm eték, a kamá se Pubriyus. Ntûfâm nnyó a kî êt ka njû eye, a gyê êt nono ka mfín ésá. 8Ńsé Pubriyus a nuŋ a maŋá osám na egyʉk. Nji Pol a jî yên yê, a góre Obhasi, a kúni yê obhô ka biji, nne-ndûm nnyó a sôn. 9A kpo yim njí, chénchén ane mba ngá mba á fóne bimaŋé á bhak mbâ eye, a yîm fə́ne ábho á sôn. 10Ane eték mbá á kə̂p êt iyîm ka mkpak ka mkpak. Ebhú e yəbhê sê é jî, á káre êt iyîm mbi kə́n e wôm ka ejen aya ejə́ré.

É kí maghé Mata se é jî Rom

11E káe eték njí nnyam-ósô ésá kən e kí maghé na ńsughîkaŋ nnyi a káe fə́ne áfo ka nchot egyʉk. Á bhíŋa ńnyə́ne sê, “Abhon Afât Ajom.” Ńsughîkaŋ nnyí a dʉ nnyi Areksandriya. 12E sî Sirakiyus, e kâ áfo mfín ésá. 13E kpô maghé áfo e bhúghi e sî eték í Rejiyum. Ofú ó kpó chíŋ ndə́m, mfêp a róghe enoghóm njəm óséré, ntem-ofú e sî eték í Putori. 14E yên atem-abhon-í-nnyen mfá mba á bhíŋi êt fə́ne sê é ká na ábho. E kâ fə́ne ogəm ndə́m áfo kən é bhá sí mân Rom.

15Nji atem-abhon-í-nnyen ka Rom á yúghi sê e kə́ bha, á bhak ta á sî Ogəm Apiyus na eji Nju Esa nnyi ajéné á sʉ́a. A bháe sê á bhá tábhe êt. Pol a kpo yén ábho, a káre ekûp mbâ Obhasi, ḿbə́ŋé a sôn yê.

16Nji e síi Rom á maghe Pol a kumí ka ibhê biji təm na nne-enok yót nnyo á bhabha yê.

Pol a kí roghe otîp Obhasi esə́rə́m ka Rom

17Nji mfín a chíŋi ésá, Pol a bhîŋ ane-echî ane Jus, a chə́me ábho, a sə́re se, “Atem-abhon-í-nnyen, mme kpe ejûm ebhí ń ka yim mbâ ane abhə́ré, na kpe ń yîm ḿ kpê na erû ane éməné abhə́ré. Kən á fi ə̂m áno ka Jerusarem, á kare ane Rom. 18Kən ábho fə́ne á kpó taŋ nchot amé á ká yen obhí mbi n yimî kən sê á yúí ə̂m. Á wóme kə́n sê á nyáŋe ə̂m obhô. 19Kən atúi-ofâm ane Jus á ká kam. Nâ ńjə́ne bəre deê esup é bhá ka ochî Ntûfâm i Rom. Ń ka fon kpe oyámá-ḿbə́ŋé kpe bhə́t m kpê na eték ejámé.#Etûm 25.11. 20Nâ ńjə́ne n wóme bəre ń yén ên, é kúbhi na atem, ka á fíi ə̂m áno nji ń yuŋ ḿbə́ŋé ń ki na nne nnyo Obhasi a chimî ane Isrel.”

21Ane mbá á sə́re yê sê, “Nwet kpe yə́t nnyi a dʉ Judiya a bhák mfá a kpê na we cháŋ. Kpe ane Jus mba á dʉ̂ ágo á bhak na nchot i mbí a kpê na we cháŋ. 22Kən é kí wom kpá é yúk ka imâ nnyo. Ájoé a ri echəme efê nji é kpô chəm nná, é məŋe sê kpe nne nnyo á chorá onono a kpek na ńjə́ne cháŋ.”

23Á kî ofú sê á bhá chə́me ka njû nnyi Pol á kumá. Á bhak fə́ne á tî nnyen etíím. Na ofú kpát ta egu é sî, Pol a gyê ane mbá esə́rə́m nchot otúi Obhasi a noghá se yê a yim ábho á kâm na Jisos. A bhiŋá a sə́rá ábho ekpak ebhín í Mosis é sə́re é kpê na nchot nnyí, na ekpak fə́ne nji akará-otîp Obhasi á chóre. 24Etʉ̂ ábho á kâm, kən etʉ̂ á ká kam na nchot i Pol. 25Ekumi é chât ka áfírí. Nji á rúi ngyím sê á mághe á kʉ́rí, Pol a sə́re ábho se, “Obhasi Ebhare Ntʉgantʉ a chorê ka etʉri nji a sə́re ásé abhə́né ka nnyo nkara-otîp a kamá se Asaya se,

26‘Choŋ osə́ré ane mbá se,

“Tîk oyúghá ên ka etʉri,

kən é bhó jae ên.

Tîk o yéná ên ka etʉri,

kən nji ó yena ên ó bhó məŋé ên.

27Echî aŋ? Énə́mé é faŋ ane mbá ka ḿbə́ŋé é chiŋ,

atûŋ ábho á kuŋ, mbá á ro yúk.

Amə̂t ábho á tan.

Áno asík, kə́n á mə́ŋe nji á yéna, á məŋe nji á yúgha.

Énə́mé fə́ne é mân ábho ka íkíkéré,

á kpíghi mbâ amé, n yîm fə́ne ábho á sôn.” ’ ”#Asa 6.9-10.

28Pol a kpô chot se, “Məŋê ên mân sê Obhasi a tûm otîp obhê mbâ ajéné. Ḿbə́ne nâ ó kí yim ane á sém. Ajéné mbá nâ á kí yuk otîp mbí.” [ 29Pol a kpo man echoróm, ane Jus á mághe á kpoŋa kpe-eji á jak.]

30Pol a káe ka Rom nyâ ébháe ndə́m, yê ḿfoné nâ á kará ntí ka njû nnyi yê á kumá. Na ogyebhá-ḿbə́ŋé, a tabhá fə́ne ane chénchén mba á bhak mbâ eye. 31Á səra ane nchot otúi Obhasi na nchot i Ńtâ Jisos Krayis. Á kpik jáé-jáé, mgbʉ́a yê cháŋ.

Currently Selected:

Etûm ágbán~í jisos, echî 28: ETUNT

Highlight

Compare

Copy