Etûm ágbán~í jisos, echî 27

Ane-enok á kí ko Pol á jî nnyi Rom

1Nji á kúbhi á kâm sê é jî nnyi Itariya aya-áyâ, atúi-ofâm mbá á kô Pol na ane mkpokobhé etat á káre ka obhô ntûfâm ane-enok etat a kamá se Juriyos. Juriyos a ri ka ekam ane-enok mba á bhábha Ntûfâm i Rom. 2E yə̂p mân áfo ka ńsughîkaŋ nnyi a dʉ Adramitiyum, a kə́ bha ochíŋ aya-áyâ ebhat Esiya a tə́má ka ngûm a jak. Nne Masedoniya yót nnyo a dʉ Tesaronika, a kamá se Aristakus a tôp êt e jak. 3Ntem-ofú, e tə́me ka eték í Sidon. Juriyos a tóŋe Pol onobhá-eji, a nyáŋe yê abhô se a gyé eték a yén atem abhê mba á kí gye yê. 4E kpo maghé eték njí, e kí bhughi e chíŋá mkpe aya nnyi Sayiprus nnyi a ri nyamḿ, ka mfêp á noghá a nyerá êt onyeré. 5E yáŋe aya Sirisiya na Pamfiriya e tə́me Mayira ka ebhat í Lisiya. 6Ka eték áji, ntûfâm ane-enok nnyó a yên ńsughîkaŋ nnyi a dʉ Areksandriya, a kí ji nnyi Itariya, a kâk êt ka ńnyə́ne.

7E yə̂p, e kí ji kən e yên oseŋe kpe-eji ka mfín kən é bhá sí kpe Nidus. Kən mfêp a gbʉ́i êt, é ka ji ochî. E kpíghi e chə́bhe e chíŋá akpe-ákpê ka aya Krit, ka mkpe egúí Saramon. 8Ebhúghúm akpe-ákpê e dâŋ e sî mmon eték etat á bhíŋa sê, Aya Abho-chubhi. Eji njí é rî kpít na eték í Lasiya.

Oseŋe mbi e kí fon ka aya

9Kən e bhá si mfá, é bhibhi ebhú é rap é chiŋ. Mfín a sî nnyi ó to se ó bhúghí ó jî ochî, oseŋe kə́n ó fâp. Ka nan? Mfín erom ane Jus nji á bhíŋa sê Obhí Ane Esuúm#27.9 Mfín erom ane Jus nji á bhíŋa sê Obhí Ane Esuúm: Á fîk erom njí ebhú Ayép Atʉ́. Mfêp a sôn ka ebhú njí, é ká nop ane á bhúghí ka aya. ta a chîŋ. Pol a tâ mân ane etí se, 10“Atem, oseŋe tîk ó fâp ka ejen njí. É ro məŋé iyîm ibhə́ré na ńsughîkaŋ nnyí na kpe ekpin ejə́ré í kí tan.” 11Kən ntûfâm ane-enok á ka fon kpe ebhú na nchot i Pol nnyí, á kebha a ri mbúghá-bhúghá na mfone ńsughîkaŋ ka ochî. 12Egae nji á bhíŋa nná sê Aya Ábhó-chubhí, é ká nop etə́mə́m ebhú egyʉk nji ekpatə́m í mfêp á roghe. Ka obhô mbí, etî-etî ane á kéra sê é jí tə́mé ka eték í Fonik ebhú mfín enae. Fonik a ri egae Krit jə́t é kébha ósô na óséré.

13Ebhú mfêp a róghe enoghóm óséré ka tebhe, ane mbá á kera sê nchot a mân, á kâk ńsughîkaŋ ka aya e yə̂p nnyi akpe-ákpê e kí ji nnyi Krit. 14Kən etʉri-étʉ́ri áji, ndûm i mfêp ka agúí Krit a róghe enoghóm. Á bhíŋa ndûm i mfêp nnyí sê Mfêp Ebhat Ósô ka Obhô-orûm. 15A sûm ńsughîkaŋ. E kpô nok chichi, e kpére e káre biji sê a kə́n êt a ji mbá-mbá. 16E chîŋ ka mkpe eji ngun etat á bhíŋa sê Koda, e nôk e bhôp mmon okpi owəré ka ńsughîkaŋ a kâ kpât. 17Ane mbá á yûŋ ḿbə́ne ka ayép á kúni ka ńsughîkaŋ. A bhôp fə́ne ńsughîkaŋ na arík á fáre. Á fúbha sê ńsughîkaŋ a kí ji okáŋ ka ésébhe njəm i Libiya. Ka obhô mbí, á bhî esené ńsughîkaŋ ka ayép, á mághe mân sê kpe fan-fan a kə́n ábho á jî. 18Kən ndûm i mfêp nnyí á ka kímí. Ka ntem-ofú, ane mbá á róghe eyighím iyîm ogəm ka ńsughîkaŋ, á bhumá. 19Ofú etat ó kpó che ka osúí mfín ésá, á yíghi etʉ̂ iyîm mbi í fíi ńsughîkaŋ, á bhûm. 20Kən nji mfín a chíŋá a jak, njúí é ka yén, kpe ńdʉnândʉ-ósô é ka yén, mfêp fə́ne nnyi á noghá, a kí son oson a bhák, e yíghi ḿbə́ŋé sê é kpo.

21Nji é ka ebhú é rap, édî é ka dí, Pol a rúi ngyím a sə́re ábho se, “Atem, ó yuk ên nná nchot amé, kə́n é ka maghé Krit é bhá gyé ka achot mmá, 22kən nchot cháŋ. Mfá-mfá n kí goré ên bəre o kâ fûp ên. Echî aŋ? Nne owəné kpe yót á bhó kpo, ńsughîkaŋ nâ tîk a tân. 23Ka atʉ́ mma á chíŋi nná égyé, Obhasi omé nnyo ń jigha a tûm énjel owe yót a bhâ gyími ə̂m ka mkpe biji a sə́re ə̂m se, 24‘Pol, ka fûp. O ri ó sí ta ó gyímí ka ochî Ntûfâm i Rom a táŋ wâ. Obhasi a káre chénchén ane ka ńsughîkaŋ nnyí ka obhô obhâ.’ 25Atem, nâ ka fûp ên mân, ka ń ki ḿbə́ŋé na Obhasi omé bəre tîk é jóe ka ekpak nji yê a sə́re ə̂m nná. 26Kən tîk e kâŋ ên ka eji ngun etat.”

27Ka osúí atʉ́ ófó na ánî, mfêp a nyə́ne a chóá êt ka aya ayúp Meditereniya. Ka étíŋanti atʉ́ abhúghá-ńsughîkaŋ á róghe egyʉ́nʉ́m ngun. 28Á gáe eji aya nji e ri á mə́ŋe ekpak é rə́me. Á yên sê a ri nsam abhô ébháe. Nji e kpô jen e jak ochî á kpô gaé, sê nsi a kə̂t abhô esam njəm ófó. 29Kən efup é kpô yim ábho sê tîk ńsughîkaŋ a jî tə̂p ntáé etat, á bhî nsené ńsughîkaŋ énî ka ayép mbâ njəm i ńsughîkaŋ, á gorá sê ofú ó ché. 30Abhúghá-bhúghá mbá á kí nok sê ábho á bé. Á bhî okpi ka ayép, á yimá bəre ábho á nógha esené ńsughîkaŋ a tʉrí obhət ka aya, mbá-ochî. 31Kən Pol a sə́re ntûfâm ane-enok na ane-enok abhê se, “Ó kam se ane mbá á gyê ka mmon okpi nnyó, kpe ejûm nji é kí nyaŋe êt cháŋ.” 32A kpô sə́ré ábho áno, ane-enok mbá á jî gbût aríghí okpi mbí á mághe ḿbə́ne ó kí se.

33Kən ofú ó ché, Pol a góre ane chénchén se á dí édî. A sə́re ábho se, “Na égyé nâ mfín ófó na énî nnyi ó kət ên na obhô ka ḿbə́ŋé, édî ó ka dí ên. 34N kí goré ên bəre ó dí ên iyîm, ó fôn ên ikom, o kâ bhâ okpó ên. Kpe nne owəné yót nnyo a kí tane kpe ekát í nnyʉ̂ ejê kpe jə́t cháŋ.”

35Nji a chorê áno, a kô brêt a yâ, a káre ekûp mbâ Obhasi, ábho chénchén á yena, a kô a kí di. 36Ḿbə́ŋé a nâ chénchén ábho, á tábhe fə́ne édî ábho áfoné á dî. 37E ri ane nsam ófó na ésá njəm ekû na jə́t (276) ka ńsughîkaŋ nnyí. 38Á kpó di édî chénchén, á róghe mân eyighím otâk í nkʉi á bhumá, sê ńsughîkaŋ a fép.

Ńsughîkaŋ eyəré a kí wa

39Ofú ó kpó che, nne nnyo a məŋê eji nsi nji e ri cháŋ, kən á yên mô eji ésébhe na egae, á kére sê á bhá tə́mé áfo. 40Á yíghi mân nsené ńsughîkaŋ á bhî ka aya, á kpât fə́ne aríghí mma á fíi asom í ńsughîkaŋ, á yûŋ éfô nji á táŋa kən mfêp a kə́ná ńsughîkaŋ a jená, á tâŋ ebhat nji mfêp á noghá, á róghe mân ebháám ka egae njí. 41Kən e gbə́ne ka ekpu ésébhe etat, ńsughîkaŋ a kâŋ mbá-ochî, a kə̂t ngyím. Ebhúghí-aya é wâ mbá ndə́p i ńsughîkaŋ nnyí jóghé-jóghé-jóghé.

42Íkíkéré ane-enok í jóe sê nji ejûm njí é fâp áno ábho á yúí chénchén ane mkpokobhé, á kâ bhâ oyok, á bé. 43Kən ntûfâm ábho na íkíkéré se yê a bhábhé ekpin í Pol, a sə́re ane abhê se á kâ yîm. A sə́re ane mba kə́n á mə́ŋe nyôk oyok, á yôk á gyʉ́t ngun. 44Mba á ká məŋé aŋ, se á fî abhat átí na abhat í ńsughîkaŋ nnyi a waê, á nyáŋé biji ábho, á sí ngun. Ka ekpak njí, ane chénchén kpe énê a sî ngun, ejûm nji é yími yê cháŋ.

Currently Selected:

Etûm ágbán~í jisos, echî 27: ETUNT

Highlight

Compare

Copy