Etûm ágbán~í jisos, echî 26

Pol a kí bhup eye nchot ka ochî Agripa

1Agripa a sə́re Pol se, “Chot, êt é yúk.” Pol fə́ne a tə́ne obhô obhê kən a róghé echoróm se,

2“Ntûfâm Agripa, ń kere bəre ḿ fon ofa ka égyé njí, nji n kí səre ejámé eyum í nchot ka ochî obhâ, é kpê na achot chénchén mma ane Jus á sə́ra sê ń yimá. 3Echî aŋ? We ó ka kpó joé njéné na erû ane Jus na bibhín ábho. Nâ na mân biji, yûk mân nchot nnyi n kí chot mfá.

4“Ekpin ejámé ta ka obhóné ka eték ejámé na ka Jerusarem, nne Jus nnyo a rô məŋé cháŋ. 5Á káma á sə́ré kə́n á sə́re wâ ábho áfoné sê mme m fiî erû ejə́ré Farasi mba é bhó chaghé ache bhúghí-bhúghí ka nchot ebhín Obhasi. Á məŋe ejûm njí ebhú é rap.#Etûm 23.6; Fir 3.5. 6Kən égyé, ńgyê mme n gyím ka ochî esup ka ń yuŋ ḿbə́ŋé ń ki ka ejûm nji Obhasi a chimî ásé abhə́ré éməné. 7Ejûm nji ndə́p-i-njû eyəré ófó na ébháe á kî ḿbə́ŋé sê tîk á fôn, á jigha Obhasi atʉ́ na efín. Ntûfâm, a ri ka ejûm njí jə́t na ane Jus á sə́ra áno sê ń yîm obhí. 8Jen kən nne owəné kpe yót a kí kere se Obhasi á bhó yim ane á nyə́me ka ekʉ̂?

9“Mme ḿfoné ebhú áji n kére bəre n di ń yîm kpe bhaghé ejûm ḿ gbʉ́í ane á kâ kâm na mbiŋ i Jisos nnyo nne Nasaret.#Etûm 8.3; 22.4-5. 10N yîm fə́ne ejûm ka Jerusarem. Na ikom mfi ane-echî akará-agore á káre ə̂m, n kâk ane Obhasi etî-etî ka ókúmí. Ebhú á gbut esup ábho sê á yúí ábho, mme eróŋ ń kam. 11Ntə̂m etî-etî ń jená ka óchâm Obhasi m kpərá ábho, n noghá bəre á yíghi ḿbə́ŋé nnyi á kíi na Jisos. Oyámá-ḿbə́ŋé mbi m fonê na ábho ó fáŋe ó chîŋ ochíŋ nji ta n túbhá ábho nchot n sík bifun.

Pol a chə́bhe ntóbhá Jisos

(Etûm 9.1-19; 22.6-16)

12“Ofú bhə́t, ka ntʉ́ghi ejen í bifun njí, n yə̂p n kí ji Damakus na ikom mfi ane-echî akará-agore Obhasi á káre ə̂m sê ń jí fî ábho. 13Ntûfâm, ń səra wâ áno bəre n di ka mbá n jená n jak na nchên ányi, kən m kpo to ń yén ebhát etat é dʉ̂ ka ósô, é gbô ə̂m áfo na ane mba á jéna na mme. Ebhát njí é son é chiŋi njúí. 14Êt chénchén é gbo ka nsi, n yûk eyum é chorá na mme ka eyum Ibru se, ‘Sol, Sol, ó kará ə̂m oseŋe jen? O kí karé biji ibhâ oseŋe nji ó bhó yuk ə̂m, noŋ mfoŋ nnyi a kí nok na nne nnyo á bhima ńnyə́ne na ítí.’

15“Ḿ bəp bəre, ‘Ntâ, we a re énê?’

“Yê se, ‘Mme a ri Jisos nnyo ó kará áno oseŋe mbí. 16Kən duî ngyím gyími, ka m fábhe wâ ka ochî bəre ń sáŋ wâ ó tʉ́k ə̂m. Tîk o gyími ntî-isê omé ka iyîm mbi we ó yen ə̂m na mbi tîk o kpô yén. 17Tîk n nyáŋe wâ ka obhô ane abhâ, na obhô ajéné mba n kí tum wâ mbâ ábho. 18N kí tum wâ bəre ó rə́bhe ábho amə̂t. Ó yîm áno kən ábho á kpíghí njəm á káre ejírim á kép ebhát. Á kpíghi njəm á káre ikom í Satan, á kép mfi Obhasi. Ka ḿbə́ŋé nnyi á kíi na mme, á yîm Obhasi a ri nsôn a su obhí ábho, á fôn nji ábho echəme noŋ ane mba Obhasi a sáŋe.’

19“Ntûfâm Agripa, ekpak nji n kí taŋé eyum nji é dʉ̂ ka ósô cháŋ. 20N jak fə́ne n jî róghe etûm ejámé kpá ka Damakus, kən m bák nnyi Jerusarem, n jên m fáre Judiya ndə́m, n jak fə́ne ka nték ajéné. M kpík ábho bəre á yóŋé ḿbə́ŋé, á mághe obhí ábho, á kép Obhasi. Bəre á yimá fə́ne ntûm nnyi a kí toŋe se nsôn a kí yim ábho na obhí ábho.#Etûm 9.20,28-29. 21Ńgyê echî nji ane Jus á bháe áno á bhâ fî ə̂m ka ókʉ́rí achot Obhasi sê á yúí ə̂m. 22Ta é si égyé, a ri Obhasi nâ á nyaŋa ə̂m. Ńgyê mme n gyím mfá n kí səre noŋ ntî-isê mbâ ane-ayúp oo, na ane chichi. Ejûm etat ń səra cháŋ a ri nji akará-otîp na onwet í Mosis á sə́re sê tîk é fâp. 23Á sə́re sê Krayis, nne nnyo Obhasi a túmi a bhá yim ngun á sém, a ri a yén oseŋe. Sê yê nâ a kí joé ndaŋa-mbá ka enyəmə́m ka ekʉ̂. Sê á nyəmé ka ekʉ̂, a kí karé mân ebhát mbâ ane Jus, é kpê na ajéné.”#Asa 42.6; 49.6; 1 Korin 15.20.

24Pol a kpô chot áno nchot nnyí, Festus a kûk se, “Pol o kí gbe ekí. Ekpatə́m í nwet nnyi o kpíi a kí yim wâ ó gbê ekí.”

25Kən Pol se, “Ntûfâm i Festus, ḿ bó gbe ekí. Kən ń chorá ejûm nji é rî ka echî, ekpak etáŋám cháŋ. 26Kpe Ntûfâm Agripa a mə́ŋe achot mmá chénchén. Ńgyê mme n gyím n chorá, kpe efup ḿ bó fon. Ń kam bəre ka iyîm mbí ń chorá nná, kpe jə́t nji yê a rô məŋé cháŋ, ka í ká fap ka ebhə̂t.”

27A bhə̂p Ntûfâm Agripa se, “Ó kam na achot akará-otîp Obhasi kən ó ka kam? Ḿ məŋe bəre we ó kam.”

28Ntûfâm Agripa a táme yê ka ebhə̂p se, “Pol ó kere se mô ekîm ebhú nnyó kə́n o kpíghi ə̂m n chə́bhe ntem-nne Krayis?”

29Pol se, “Kpe ebhú é rábhe orap na é kâ râp, n kí goré Obhasi bəre é kâ jóe we átíŋ nâ o kí chəbhé noŋ mme, kən chénchén ane mba á yúgha ə̂m áno mfá égyé. A ri á kâ kâk ên ka ókúmí noŋ mme.”

30Ntûfâm Agripa, na mmon-i-nnyen owe Benis, na Ntûfâm i Festus, na atúi-ofâm chénchén mba á kûn áfo, á rúi mân ngyím á jak. 31Nji á kpó kət ábho-ábhô, á kí chot se, “Nne nnyó á ka yim kpe ejûm nji á kí kak yê kpe ka ókúmí na kpe eyúúm yê.”

32Ntûfâm Agripa a sə́re Festus se, “Nne nnyó á ka sə́ré nná se esup é jî ka ochî Ntûfâm i Rom, kə́n e nyáŋe yê obhô.”

Currently Selected:

Etûm ágbán~í jisos, echî 26: ETUNT

Highlight

Compare

Copy