Etûm ágbán~í jisos, echî 25

Esup í Pol é kí ji ka ochî Festus

1Mfín a kpo chíŋ ésá nji Ntûfâm i Festus a bháe ebhat eték njí, a mághe Sesariya a jak Jerusarem. 2Ka Jerusarem, ane-echî akará-agore Obhasi na ane-echî ane Jus á sə́re ntûfâm nnyó obhí Pol. 3Á góre yê kpe-eji sê a nyáŋé ábho a túm ábho Pol nnyi Jerusarem. Á bhop ekubhi sê Pol á bha, á kí yui yê ka mbá.

4Kən Ntûfâm i Festus a táme ábho se, “Pol a ri ka ókúmí ka Sesariya. Mme ḿfoné n kí chəbhé njəm ágo mkpât ebhú. 5Deê ane-echî abhə́né á tóp ə̂m á bhá, á bhá sə́ré obhí nne nnyó ágo, ájoé a yîm obhí.”

6Festus a kpô ká na ábho mfín kpe ófó, a mághe a chə́bhe njəm nnyi Sesariya. Ofú ó kpó che, a kúmi se yê a táŋ esup í Pol. A káre ikom á kô yê á bhak. 7Á kpó to á kó Pol a bhá, ane Jus mba á bháe nnyi Jerusarem á róghe esə́rə́m sê nâ achot mma Pol a yimî, kən á ká bhik etóŋóm ájoé achot mmá á rî ka echî.

8Pol a gyími a kí taŋ biji se, “Kpe ebhín ane Jus ń ka gbo. Kpe ejûm ebhí ń ka yim m kpê na ókʉ́rí achot Obhasi kpe na Ntûfâm i Rom.”

9Kən Festus ngá a kí wom kə́n se yê a gyé a ri njəm ane Jus, a bhə̂p Pol se, “O kí wom é jî Jerusarem é táŋ nchot eya nnyí ágo ka ochî obhámé a?”

10Pol se, “Ḿfa n gyím áno ka óchâm esup í Ntûfâm i Rom. Ḿfa nâ kpe etáŋám á tâŋ nchot amé. We ḿfoné ó tʉri oməŋé se ń ka yim ane Jus obhí kpe bhə́t. 11Ájoé mme ń yim obhí kpe bhə́t mbi é nóbhe sê ḿ kpó, ḿ bó be ekʉ̂. Kən ájoé ń ka yim achot mma á sə́ra áno sê ń yîm, nne nnyo a kí gbip ə̂m a karé mbâ ábho cháŋ. N kí wom á kó nchot nnyí á jî ka ochî Ntûfâm i Rom.”

12Ntûfâm i Festus á kúbhi na atem-atúi-ofâm, a sə́re Pol se, “Ó səre se á jî na nchot ka ochî Ntûfâm i Rom. Ágo fə́ne nâ n kí tum wâ.”

Pol ka ochî Ntûfâm Agripa

13Mfín a kpo chíŋ kpe áno, Ntûfâm Agripa na mmon-i-nnyen owe nnyo nne-nkáé sê Benis á bhak ejen Sesariya á bhá kup Ntûfâm i Festus. 14Á kpó ka mô mfín a jak, Ntûfâm i Festus a sə́re yê nchot i Pol se, “Nne yót a ri nnyo Ntûfâm i Feris a maghê ka ókúmí. 15Nji n jiî Jerusarem, ane-echî akará-agore Obhasi na ane-akúí ane Jus á sə́re sê a yîm obhí, á yúí yê. 16Kən n sə́re ábho bəre áno asík ane Rom á yíma. Bəre ebhín í Rom é rî sê, ta ane mba á sə́ra sê nne a yîm obhí, na nne nchane nnyo sê a yîm obhí, á kpúghi ochî na ochî, kpe énê a chôt ejê, nne á ka fon ikom mfi a kí kpəré nne kpe yót. 17Á bhak mân mfá na mme. Nji a bháe ń ka bhíbhí ebhú, n kî esup njí ntem-ofú, á kô nne nnyó á bhak. 18Kən ane mba á sə́ra sê a yîm obhí á ká kpo səre kpe ejûm etat nji n kére kə́n bəre nâ obhí nchane. 19Kən á fóne mô áfírí ágo na atem, nchot Obhasi ábho na nne yót sê Jisos. Nne nnyó sê a kpô, kən Pol se a nyə́me ka ekʉ̂. 20Nji n yéne bəre é chiŋi ə̂m kpá ń ka məŋé nji n kí chot, m bə̂p Pol ájoé tîk a kôt e jak nnyi Jerusarem é jí táŋ nchot ányi ágo. 21Kən Pol á ka kam, se ta Ntûfâm i Rom a sə́re ifê íkíkéré. N sə́re fə́ne bəre á kî yê tata m fôn ebhú n tûm yê mbâ Ntûfâm i Rom.”

22Ntûfâm Agripa a kpô yúk chénchén achot mmá, a sə́re Festus se yê tîk a kôt a yên Pol na amê amə̂t.

Festus se, “Nâ ójô tîk o yûk nchot eye.”

23Ofú ó kpó to ó ché, Agripa na Benis á gyê óchâm eték na ekpatə́m ejík, ane-enok á bhabha. Atúi-ofâm ane-enok na ane ayúp chénchén ka eték á rî áfo fə́ne. Festus a tûm á jî kô Pol á bhak.

24Nji á kóe Pol á bhak, Festus se, “Ntûfâm Agripa, na ên chénchén mba o ri na êt mfá, ńgyê ên nne nchane. Ane Jus ndə́m ka Jerusarem, na mfá ka Sesariya, á sə́ra sê a yîm obhí. Á kí kughâ fə́ne sê á ka bhik nji á kí kpo ki yê ekpin. 25Ń yen mme ḿfoné bəre á ka yim kpe ejûm etat nji é bhíghi á yúi yê. Kən ka eji yê ḿfoné se é kó nchot eye é jî ka ochî Ntûfâm i Rom, ń kam fə́ne na yê. 26Kən ejûm jə́t é rî. Ń ka məŋé kpe ejûm nji n kí seŋ ń túm Ntûfâm i Rom bəre nne nnyó a yîm. Nâ ńjə́ne ń ko yê áno ḿ ba ka ochî obhə́né, títí we Ntûfâm Agripa, bəre é kpó kep nchot nnyí kən ḿ fôn kpe ejûm n kí seŋ. 27Echî aŋ? É kí joé énə́mé íkíkéré nji ó tum nne mkpokobhé mbâ Ntûfâm i Rom, ó ka séŋ nwet ó sə́ré nji a yimî nji bhí.”

Currently Selected:

Etûm ágbán~í jisos, echî 25: ETUNT

Highlight

Compare

Copy