Etûm ágbán~í jisos, echî 19

Pol ka Efesus

1Ebhú Aporos a ri ka Korin, Pol a jak ngun-ńgûn ta a sî Efesus. Nji a síi ágo, a kpúghi atóbhá Jisos. 2A bhə̂p ábho se, “Ebhú o kíi ên ḿbə́ŋé, Obhasi Ebhare Ntʉgantʉ a bhák ên ka biji a?”

Á táme sê, “Ée, êt kpe ntʉ́ghi ejûm áji sê Obhasi Ebhare Ntʉgantʉ é ka nok oyúk bhúghí-bhúghí.”

3Kən a bhə̂p ábho se, “Á fúghi ên mân ayép nan?”

Á táme sê, “Ka ekpak nji Jon á fugha ane ayép.”

4Pol se, “Ofúgha-ayép í Jon ó rî sê ane á yóŋé ḿbə́ŋé, á mághe obhí ábho. Á səra ane se á yûŋ ḿbə́ŋé á kí na yê nnyo á bhak yê mbá-njəm. Nâ Jisos.”#Mat 3.11; Mak 1.4,7-8; Luk 3.4,16; Jon 1.26-27.

5Á kpó səre ábho njí, á fûk ábho ayép ka mbiŋ i Ńtâ Jisos. 6Pol a kpo to a kuní ábho obhô ka echî, Obhasi Ebhare Ntʉgantʉ a bhák ábho ka biji. Á róghe fə́ne echoróm nyum i nték etat nnyi á ká məŋé, á kará otîp Obhasi. 7Ábho á rî ane-arûm á sî kpe ófó na ábháe.

8Ka nnyam-ósô ésá Pol a gyék óchâm Obhasi a chorá, kpe efup á bhó fon, a fírá achot Obhasi na ane Jus, a daŋá ane á mə́ŋe nchot otúi Obhasi. 9Kən etʉ̂ ábho á chə́bhe á soná echî, á bhó wom á yûŋ ḿbə́ŋé á kí na Jisos. Á chorá a ri achot abhí ka ekam ane á kpek na Mbá nnyi Ńtâ Jisos. Pol a mághe mân ábho, a kô atóbhá Jisos fə́ne á ruá. Chénchén ofú a jená a kpík ane achot ka óchâm í Tarinus. 10A yimî ekpak njí ka nyâ ébháe ta ane chénchén ebhat Esiya, ane Jus oo, ane nték ajéné oo, á yûk nchot i Ńtâ Jisos.

Mbiŋ i Jisos a chíŋi ikom ojê, kən ane á mághe ajom ábho

11Obhasi a kí yim Pol a yimá ntûm okpógha-biji. 12Kpe abhat í ḿfô mma á kə́me yê kən á kô á jî kə́me ane bimaŋé, á sôn. Mba ojê ó kára ábho oseŋe, ojê mbí ó kí maghé ábho.

13Etʉ̂ ane Jus á rî mba á jéna á fará á yighá ane ojê ka ḿbə́ŋé eróŋ. Ane mbá á kére á kó mbiŋ i Ńtâ Jisos á nyán ojê ó fáp ane ka ḿbə́ŋé. Á kpughi nne nnyo ojê ó kára yê oseŋe, á kí səre ojê nne nnyó sê, “N kí səre wâ ka mbiŋ i Jisos nnyo Pol á səra ane, fâp.” 14Abhon í ntûfâm akará-agore Obhasi nnyo á kama se Sewa, ábho anígisá nâ á jéna áno á yimá achot mmá.

15Kən ofú bhə́t ojê nne etat ó táme ábho se, “Ḿ məŋe Jisos, ḿ məŋe Pol, kən ên a ri bhaghé ane?” 16Ka ikom ojê mbí, nne nnyó a tə̂m a rúi ngyím a jî fî ábho chénchén ka ekpatə́m enok. A tə̂m ábho ta á bê á fabha oyán, bifú í súi biji.

17Nchot nnyí a jên a fáre Efesus ndə́m, ane Jus na ajéné á yûk. Efup é súi chénchén ane biji na ntʉ́ghi nchot nnyí. É yîm mbiŋ i Ńtâ Jisos a fôn ekpatə́m ejík. 18Etî-etî ane mba ta á ki ḿbə́ŋé na Jisos á râk obhí ábho jáé. 19Etî-etî mba á jená á yimá ajom, á kə̂n onwet ajom ábho á yô, ane chénchén á yena. Iyîm ábho chénchén mbi á bhíbhi, á gurí ogurí á kí fon ntí ntâk a sî kpe ntem-esam ébhík-ébhík. 20Ka ekpak njí, nchot Obhasi a kúi a sə́ne nnyen esənə́m, a jabhá fə́ne ngûm.

21Achot mmá á kpó chiŋ, Pol a bhâ kére ka ḿbə́ŋé se yê tîk a chîŋ nnyi Masedoniya na Akaya a jak Jerusarem. A kére se, “Ń nok m mân áfo, n di ń jî nnyi Rom.” 22Ane ábháe mba á kágha yê obhô, Timoti na Eratus, á rî na yê. A tûm ábho ochî nnyi Masedoniya, yê ḿfoné a kpô ká mkpât ebhú ka Esiya.

Onyʉk mbi ó kí gbo ka Efesus

23Ka ebhú njí, ekpatə́m onyʉk ó bhâ gbô ka Efesus ka obhô achot í Mbá nnyi Ńtâ Jisos. 24Nne yót a kamá se Demetriyus, ntʉ́a-nsené. Nne nnyó á tʉrá iyîm na esené sírbha, a gurá ane se Efin Atemis. Ogəm mbí ó bhâk na ekpatə́m í ntí mbâ atʉ́á-nsené. 25Kən Demetriyus a bhâ chə́me chénchén atʉ́á-nsené na ayimá-etûm í nsené mba tat a sə́re ábho se, “Atem, ó məŋe ên sê ogəm mbí nâ ó kára êt ntí. 26O kí yuk ên, o kí yen ên ejûm nji nne nnyó sê Pol a kí yim. A yóŋe ḿbə́ŋé etî-etî ane ḿfa ka Efesus, na mba ebhat Esiya á sîk oman. A kí səre ane se efin nji ane á yim na abhô, mfoné Obhasi asík. 27Na ntʉ́ghi nchot nnyí, ó ro məŋé ên ogəm obhə́ré mbí ó kí fon mbiŋ i mbí. Ókʉ́rí ekpatə́m obhasi obhə́ré nnyo nne-nkáé, Atemis, ó ro kpó fap fə́ne kpe ejûm. Ekpatə́m ono obhê ó kí tan, yê nnyo ane ka ebhat Esiya na ngun ndə́m á jígha.”

28Nji ane á yúghi nchot nnyí, ḿbə́ŋé a yâm ábho kpe-eji á kí gyʉí sê, “Atemis, Obhasi ane Efesus, we ó faŋ ó chiŋi abhô.” 29Anyôp á súi eték. Ane á rə̂m á gyê ka óchâm ache eték á tʉ̂ Gayus na Aritakus, ane Masedoniya ábháe mba á jéna na Pol, á gyê ágo ka etím. 30Pol se yê a kí fap ka ochî ekam njí, kən atóbhá Jisos á ká kam. 31Kpe etʉ̂ atúi-ofâm fə́ne ka ebhat áji mba á rî atem abhê, á tûm á sə́re yê se a kâ gáe se yê a ji ka óchâm ache eték.

32Ka obhô anyôp mmá ka eték, ekam nji é chə́me nná ka óchâm, etî-etî ábho á ká məŋé ejûm nji é yími ábho á chə́me. Kpe énê a chorá eye nchot. 33Etʉ̂ ane á kí kere a ri sê Areksanda nâ a kóe nchot a bhák, ka ane Jus á ki yê ochî sê a chot. A yûŋ obhô se á mághe ejok yê a táŋ biji. 34Kən ane á kpó məŋé sê yê Areksanda a ri nne Jus, á róghe ekúghúm sê, “Atemis! Njom ane Efesus! We ó faŋ ó chiŋ!” Á kûk áno ka áwa ábháe.

35Nséŋa-achot eték a dâŋ tata ane á mághe ejok, kən a róghe echoróm na ábho se, “Ane Efesus, yûk ên. Ḿ bəp ên kpá, énê a ri ka ngun nnyo á ka məŋé se eték Efesus nâ á gbée njû njom mbâ ekpatə́m Atemis? Ḿfa fə́ne nâ á kîk ntáé njom ányi nnyi a dʉ ka ósô, a gbô. 36Nji ó məŋe ên sê nne cháŋ nnyo a kí taŋ se achot mmá cháŋ áno, é rî nji ó kik ên biji nyamḿ, nne a kâ kâk nchot ka biji. 37Echî aŋ? Ane mbá á ká chot kpe ejûm ebhí jə́t á kpê na obhasi obhə́ré nnyo nne-nkáé, á ká jʉ kpe ejûm jə́t ka ókʉ́rí obhê, kən ó fi ên áno ábho ó bhâ ên mfá. 38Ájoé mân Demetriyus na atem-atʉ́á-nsené á fon ejûm nji sê ane mbá á yim ábho, ojû esup ó rî, atáŋá-eték á rî. Deê á kó ábho á jî ágo, tîk á jî nyére atem nchot. 39Kən ájoé ejûm etat é rî nji ó woma ên, tîk á tâŋ áji ebhú-ebhú eték á chəmé. 40Echî ń chorá njí a ri jen? Ó ro məŋé ên á kí fi êt ka égyé njí sê é tup onyʉk ka eték. Á yim áno, é bhó məŋé otáŋ biji ibhə́ré, ka echî cháŋ nji e kóe nchot nnyí mfá e bhák ka eték.” 41A kpo man nchot eye, a sə́re ane se á kʉ́rí.

Currently Selected:

Etûm ágbán~í jisos, echî 19: ETUNT

Highlight

Compare

Copy