Etûm ágbán~í jisos, echî 20

Pol a kí maghé Efesus

1Achot mmá á kpó man, Pol a tûm á bhîŋ atóbhá Jisos chénchén. Nji á bháe, a kâk ábho ḿbə́ŋé, a kûp ábho “O kâ ên” kən a mághe a kí ji nnyi Masedoniya. 2A jên a fáre ngûm nnyí chénchén, a kaghá ane ḿbə́ŋé ka nchot Obhasi, kən a bhâ sî eték ane Grik. 3A kâ nnyam-ósô ésá. Nji a kére se a ji aya-áyâ a sí ebhat í Siriya, ane Jus á tími yê á kâk ka ḿbə́ŋé. Ńji é yîm yê a kô mbá Masedoniya. 4Mmon i Pirus, nne Beriya a kamá se Sopata, a tôp yê a jak. Aristakus na Sekundus mba á rʉ̂ Tesaronika, na Gayus nnyo nne Debe, na Timoti á jak fə́ne na yê. Ane Esiya ábháe, Techikos na Trofimus á tôp yê fə́ne. 5Ekam njí á jak á jî chîk êt ka Troyas. 6Kən e maghê Firipi aya-áyâ nji mfín Erom Édî Ábhiî-Ábhíi Eyámám a chíŋi. E kô mfín érôn e sî Troyas. E kâ ka Troyas mfín enígisá.

7Ka ofú oyoá-biji, e kpo chəmé sê é dí édî Obhasi, Pol a sə́re ane achot tata étíŋanti atʉ́ é sî, ka a kére se ofú ó che yê a maghé. 8Á nyóe agûn etî-etî á kî ka mmon-i-njû nnyo ósô, eji e chuî. 9Mmon-i-ndûm yót a kamá se Utikus a kun ka wíndo. Nji Pol á chorá áno, amə̂t á róghe mmon nnyó ejiím ka eyô, ta a gbô fə́ne ka eyô. A rôt ágo ta ka ósô enyóŋ nji njû ésá, a gbô ka nsi, kən á bhâ yûŋ yê, á yên sê a kpô. 10Pol a bhə̂t a jî kábhe, a táme mmon nnyó ngaŋ a chôt se, “Ka fûp ên, ka a nyə́ne á ka kpó.” 11A chə́bhe njəm a gyʉ̂t, á kíri édî á dî. A kpô róghé ekubhi ejê ta ó chê, a mághe mân a jak mbâ ejen. 12Á kô mmon nnyo a gboê nná ka osoná-biji á jak á kʉra na ekpatə́m ogyebhá-ḿbə́ŋé.

E kí maghé Troyas, é jî nnyi Meritus

13Pol a sə́re êt se é chíŋ nnyi aya é kpúghí yê ka Asos, yê a kí chiŋ nnyi ngun. 14E kpô kpúghí yê ka Asos, e kə̂n yê e jak nnyi Meterin. 15Ofú ó kpó che, e mághe eték í Meterin, e bhúghi kpát ntáé ófó, e sî Kiyos. Ofú etat ó kpó che, e sî Samos, ntem-ofú e sî Meritus. 16Pol a kére se yê a ji aya-áyâ, a chíŋ nnyi Efesus a kâ bhâ obhíbhí ebhú ka ebhat í nték Esiya. Á noghá yê a jî wát-wát a sí Jerusarem, kpe é fóghe é kêt, ka ofú erom í Pentekos.

Pol a kí kup ane-echî echəme atóbhá Jisos ka Efesus, “O kâ ên”

17Nji Pol a ri ka Meritus, a tûm se ane-echî echəme atóbhá Jisos ka Efesus á bhá kpúghí yê. 18Nji á bháe, ńgyê nchot nnyi a sə́re ábho.

Se, “Ên áfoné, ó məŋe ekpak ekpin nji m fiî na ên é róghé ta ka ndaŋa-mbá ofú mbi n chemê ekát ka eték Esiya, ta é si égyé. 19N tʉ́ghi Ńtâ Jisos na chénchén ejík, kpe na oseŋe, kpe na onyʉk mbi ane Jus á káre ə̂m. 20Ó məŋe ên sê ń ka bé kpe ofú bhə́t bəre n kâ kpî ên chénchén ejûm nji é kí nyaŋe ên. M kpík ên ka eyâ-eték, m kpík ên ka ojû ka ojû. 21N sə́rá noŋ ntî-isê bəre ane, kpe ane Jus oo, kpe ajéné oo, á yóŋe ḿbə́ŋé, á mághe obhí ábho, á kpíghí á tóp Obhasi, á kí ḿbə́ŋé na Ntûfâm owəré Jisos.

22“Mfá-mfá, Obhasi Ebhare Ntʉgantʉ se ń jî nnyi Jerusarem. Ń ka məŋé nji é kí fap na mme ágo. 23Kən ejûm jə́t nji m məŋê é rî sê, kpe n síi bhaghé eték, Obhasi Ebhare Ntʉgantʉ a kí səre ə̂m se tîk á káre ə̂m oseŋe, tîk á kâk ə̂m ka ókúmí. 24Kən ń ko ekpin ejámé bəre kpe ejûm é ká fap, bəre ń nôk ń jéghe a ri etûm nji Ńtâ Jisos a karê ə̂m. Se ń sə́ré otîp ogyebhá-ḿbə́ŋé mbi onobhá-eji obhê.#2 Tim 4.7.

25“Ḿ məŋe bəre chénchén ên mbá, mba n jenê nná n sə́rá otîp otúi Obhasi, kpe nne nnyo a kí kpo yen ə̂m cháŋ. 26Ka obhô mbí, n kí səre ên ó yúk ên bəre abhô amámé cháŋ ka etím ájoé nne owəné kpe yót á tan. 27Echî aŋ? Mme ń ka bé bəre n kâ sə́re ên chénchén nji Obhasi a wóme ên ó yîm, na ekpak a wóme ên ó jóe. 28Nâ kó ên mân ebhú ka biji ibhə́né, bhábhe ên ane mba Obhasi Ebhare Ntʉgantʉ a sáŋe a káre ên se ó jóe ên ane-echî mbâ ábho, se ó fî ên echəme atóbhá Jisos, echəme ane nji Obhasi a fonê na agyʉ́ŋ í Mmon owe. 29Ḿ məŋe bəre ḿ maghe mfá n jak, ane etat á kə́ bha á bhá nôk á yíghi ḿbə́ŋé eyəné na Jisos noŋ mgbe a bhərê ka ekam obhúi, a dí. 30Ane tîk á fâp ka ekam ejə́né mba á kí chot achot áfúbhí á kpek na Jisos sê á nôk atem-abhon-í-nnyen á tóp a ri ábho. 31Nâ fiî ên mân biji, o tirá ên sê atʉ́ na efín, ḿ fin ḿbə́ŋé ka nyâ ésá, ń ka maghé ên ekpíím, n tʉk ên obhô ka otûŋ.

32“Mfá-mfá n kí karé ên ka obhô Obhasi na ka obhô otîp onobhá-eji obhê. Ḿbə́ne nâ ó kí yim ên ó kúi ka achot Obhasi, ó káre ên fə́ne enare nji yê Obhasi a kíi mbâ ane abhê chénchén. 33Nji n di na ên, nne nnyo m bə́bhe a káre ə̂m ntí cháŋ, nnyo m bə́bhe a káre ə̂m éfô cháŋ. 34Ên áfoné o mə́ŋe ên sê na abhô amámé mmá ń yim etûm nji é káre ə̂m édî é kpê na ane abhámé. 35Ka chénchén iyîm, ń toŋe ên bəre eyimím etûm áno, e fonê enyáŋám ane mba á ká fon ikom. Nne a tirá a ri se Ńtâ Jisos a chôt se, ‘O kí fon ogyebhá-ḿbə́ŋé nji ó kará ane ekəp ó chíŋi nji ane á kí karé wâ.’ ”

36A kpo chot a man, a tə̂m achî-arúŋ ka nsi á góre Obhasi na ábho áfo chénchén. 37Ane mbá chénchén á gbô ka ekʉ̂, á tamá Pol ngaŋ, á kubha yê “O kâ a.” 38É gáre é yîm ábho nsôn nji Pol a toê se nne ábho nnyo a kí kpo yen yê cháŋ. Á sîk Pol ta á sî ńsughîkaŋ.

Currently Selected:

Etûm ágbán~í jisos, echî 20: ETUNT

Highlight

Compare

Copy