Etûm ágbán~í jisos, echî 18

Echəme ane Obhasi é kí roghe ka eték í Korin

1Nji achot mmá á chíŋi, Pol a mághe eték í Aten a jak eték í Korin. 2Ka eték áji, a kpúghi nne Jus yót a kamá se Akira, a dʉ eték í Pontus. Yê na nkáé owe, Prisiriya, á dʉ̂ nnyi Itariya á bhak áfo, é ká ka. É dʉ̂ nan? Ntûfâm i Rom nnyo á kamá se Krodiyus a bhími ane Jus chénchén ka Rom.

Nji Pol a síi Korin, a jî sʉ́i ka njû Akira. 3Á yimá obhô-etûm bhə́t na yê, á gbek ntəm. Ka obhô mbí, a sʉ́i ka njû ábho, á yimá etûm ábho chəm-chəm. 4Kpe mbə́n ofú oyoá-biji, Pol a jená fə́ne ka óchâm Obhasi a noghá yê a yim ane Jus na ane nték ajéné á yûŋ ḿbə́ŋé á kí na Jisos.

5Kən Sayiras na Timoti á kpô bhá nnyi Masedoniya á kpúghi Pol. Nji á kpúghi yê, a káre mân biji fép ka achot Obhasi ekpíím mbâ ane Jus, a tóŋá jáé se Jisos nâ a ri Krayis, nne nnyo Obhasi a túmi se a bhá yim ngun á sém. 6Kən nji ane Jus mbá á táŋe á ká wom á yúk, á chorá achot abhí á kpek na yê, é yam yê a kʉ̂t ebhəm ka ḿfô eye nnyi a kaghê nná. A sə́re ane se, “Nne owəné é kpo bhip yê, a ri etûm ejê. Mme ń yim ejámé. Éróghé ka mfá-mfá, mme n kí ji mbâ ajéné.” 7A mághe óchâm mbí a jak ka njû njéné yót nnyo á kamá se Titiyus Justus. Nne nnyó á jigha Obhasi eróŋ. Njû eye a ri ka mkpe óchâm Obhasi. 8Ntûfâm óchâm Obhasi a kamá se Kripus na ndə́p-i-njû eye chénchén á yûŋ ḿbə́ŋé á kî na Ńtâ Jisos. Ane Korin etî-etî mba á yúghi Pol a chorá, á yûŋ fə́ne ḿbə́ŋé á kî na Jisos á fûk ábho ayép.

9Atʉ́ mát, Ńtâ Jisos a fâp Pol ka ndem a sə́re yê se, “Ka fûp kpe ejûm. Chot, o kâ kúmi kpák. 10Nne nnyo a kí yim wâ kpe ejûm cháŋ, ka mme n di na we. Ḿ fon ane etî-etî ka eték njí.”

11Pol a kâ mân ka eték njí eyâ na nnyam-ósô eságasá a kpík ane achot Obhasi.

12Ebhú nne Rom yót a kamá se Gariyo a kpô gbo ntûfâm ka Akaya, ane Jus á chə̂m ndə́p á yîm nchot na Pol. Á kô yê á bhak ka ochî ntûfâm nnyó. 13Á sə́re sê, “Nne nnyó a gbô ebhín ejə́ré ka ekpak á səra ane á jíghí Obhasi. É ká joé ka ekpak ebhín ejə́ré é fíi.”

14Kən Pol a kpo to se yê a róghé nchot, ntûfâm nnyó a sə́re ane Jus se, “Ńgyê ên, ebhú sê o sə́re ên ə̂m sê nne nnyó a gbô ebhín eték, kpe é chébhe nan, kə́n n kúmi n yûk. 15Kən ka eji é rî a ri nchot obhiŋ iyîm na mbi ane na ebhín ejə́né, məŋê ên ekpak o kí yim ên, ên áfoné. Mme ń ka wóm ń táŋ ntʉ́ghi achot mmá.”

16Nji a chorê áno, a bhîm ábho se á rúi yê ka ochî. 17Kən ábho chénchén á fî ntûfâm óchâm Obhasi ábho, a kamá se Sotenes, á tə̂m áfo ka ochî njû esup, kən Ntûfâm Gariyo á ka kak kpe echî ágo.

Pol a kí chəbhé njəm ka Antiyok Siriya

18Achot mmá á kpó chiŋ, Pol a kpô ká Korin ka mô ebhú kən a bhá maghé mân atem-abhon-í-nnyen a jak aya-áyâ nnyi Siriya. Prisiriya na Akira á tôp yê á jak. Ka eték í Kenkriya, kən Pol a bhá gye kpe okpi, a kpâm echî ejê noŋ eriŋ ka ejûm etat nji a chimî Obhasi.#18.18 Ejûm etat nji a chimî Obhasi: Ka erû ane Jus, ebhú ane á yim ekpak nji á chími Obhasi sê tîk á yîm, á kpâm echî noŋ eriŋ sê echimím njí é man.#Mfana 6.18. 19Á bhâ sî Efesus, a mághe mba Prisiriya na Akriya áfo, kən a gyê óchâm Obhasi a jî róghe efírím áfírí achot Obhasi na ane Jus. 20Á kpó səre yê sê a té a ká na ábho ebhú é râp, a táŋe. 21Kən nji a kí maghé ábho, a sə́re se, “Obhasi á kam, tîk n chə́bhe njəm m bák.” A bhâ mághe mân Efesus nnyi aya-áyâ.

22A kpo to a sí Sesariya, a gyʉ̂t ka eték a jî kûp ane echəme atóbhá Jisos áfo. A chîŋ a jak nnyi Antiyok. 23A kpô ká Antiyok ka mô ebhú, a róghe ejeném a fará ebhat í Garasiya na Frijiya, a kaghá atóbhá Jisos ḿbə́ŋé ka etûm ábho.

Aporos na nchot i Ńtâ Jisos

24Nne Jus yót a kamá se Aporos, nne Areksandriya, a bhák ka Efesus. A fonê aron í nchot kpe-eji, a məŋê achot mma á séŋe á kâk ka nwet Obhasi nono. 25Á kpi yê nchot i Mbá nnyi Ńtâ Jisos. Na onyiŋá-ḿbə́ŋé ányi fə́ne, a gyê a kpík ane nchot i Jisos. Nchot eye a ri nnyi a ri ka echî. Kən a məŋê a ri ofúgha-ayép mbi Jon. 26A jená a gyék óchâm Obhasi a kpík ane, á bhó fup.

Prisiriya na Akira á kpó yuk yê a kí kpi ane, á bhîŋ yê á jak ka njû ábho, á tʉ́ri okpí yê achot Obhasi.

27Nji nne nnyó a kére se yê a ji nnyi Akaya, atem-abhon-í-nnyen ka Efesus á kâm sê a ji. Á sêŋ nwet á tûm mbâ atem-abhon-í-nnyen mba ágo sê á fî yê nono. A kpô ji a sî ágo, a nyáŋe ane mba á mə́ŋe onobhá-eji Obhasi, á kíi ḿbə́ŋé na yê. A nyáŋe ábho kpe-eji. 28Ka nan? A fíri nchot Obhasi na ane Jus ka ochî atem-ane, a kô érûm, a ri a tóŋá jáé ka nwet Obhasi se Jisos nâ a ri Krayis, nne nnyo Obhasi a túmi se a bhá yim ngun á sém.

Currently Selected:

Etûm ágbán~í jisos, echî 18: ETUNT

Highlight

Compare

Copy