Etûm ágbán~í jisos, echî 17

Ejûm nji é kí fap eték í Tesaronika

1BaPol á kpó to á chíŋ Amfiporis na Aporoniya, á sî Tesaronika. Óchâm Obhasi ane Jus ó rî áfo. 2Nji á síi, ka ekpak erû ejê, Pol a jená ka óchâm mbí a fírá achot Obhasi mma á séŋe á kâk ka nwet Obhasi. Á yîm ekpak njí mfín oyoá-biji ésá. 3A tóŋá jáé se Krayis, nne nnyo Obhasi a túmi se a bhá yim ngun á sém, a fonê ka eyéném oseŋe, a kpô a nyə́me ka ekʉ̂. A sə́rá ábho se, “Jisos nnyó, nnyo ń səra ên áno mfá, nâ a ri Krayis ányo.” 4Etʉ̂ ábho á kâm sê Pol á chorá ka echî, á chə̂m yê na Sayiras. Mba á chə́me ochəm é kpée ane Grik etî-etî mba á jígha Obhasi, na etî-etî ane-akáé ayúp ka eték.

5Kən ejûm njí é ká gyebhé etʉ̂ ane Jus ka ḿbə́ŋé. Ane Jus mbá á fâp á chə̂m etʉ̂ ane mba á jéna á bhuŋa ka eték, nji ábho ejûm á yíma cháŋ sê á tûp ekpatə́m onyʉk ka eték. Á kə̂n enok á tôp Jason ka njû eye. Nâ eji nji baPol á sʉ́i. Á jíi sê á jí fî baPol. 6Nji á kpó ji á ká yen ábho, á fî Jason na etʉ̂ atem-abhon-í-nnyen, á kô á bhak ka ochî atáŋá-eték, á kugha se, “Ane mbá mba á kpíghi ngun ntəp-echî na okpígha-ejûm ábho, á bha fə́ne mfá. 7Jason nnyó a kô ábho a kâk ka njû. A ri ane mbá nâ á bhó kam na bibhín mbi Ntûfâm i Rom. Á sə́ra ane sê ekpatə́m í ntûfâm etat a ri a kamá se Jisos.”

8Nji ane na atáŋá-eték á yúghi nchot nnyí, íkíkéré í chíŋi ábho kpá. 9Á fî baJason á káre ntí noŋ ngom kən á nyáŋe ábho abhô.

BaPol á kə́ bha ka eték í Beriya

10Etʉri-étʉ́ri nji ó nyághe, atem-abhon-í-nnyen á yîm Pol na Sayiras á bê á jak nnyi Beriya. BaPol á kpó to á sí ágo, á jî gyê óchâm Obhasi ane Jus. 11Ane Jus ka eték njí, ḿbə́ŋé ábho a ri jáé a chíŋi ane Jus ka Tesaronika. Ka nan? Á wóma owóm sê ábho á yúk achot Obhasi, á bhiŋá fə́ne ka onwet chénchén ofú, á yén ájoé nji Pol á chorá é rî ka echî. 12Ka obhô mbí, etî-etî ane Jus á kî ḿbə́ŋé na Jisos. Etʉ̂ ane-arûm na ane-akáé ayúp eróŋ mba á rʉ̂ ka ebhat í Grik á yûŋ fə́ne ḿbə́ŋé á kî na Jisos.

13Ane Jus ka Tesaronika á kpó yuk sê Pol a ri Beriya a sə́rá achot Obhasi, á jak ágo á jî kâk anyoghe, á tûp nchot. 14Kən atem-abhon-í-nnyen á yíghi Pol ntə̂m yə́t á tûm ebhat aya-áyâ etat. Kən Sayiras na Timoti á kə̂t áfo. 15Ane mba á kóe Pol á bê, á kô yê á bhak ta á sî Aten. Nji á kí chəbhé njəm, Pol a sə́re ábho se á sə́re Sayiras na Timoti á bhá kpúghí yê, á kâ bhíbhi ebhú.

Ejûm nji é kí fap na Pol ka eték Aten

16Nji Pol á chighá baSayiras ka Aten, ḿbə́ŋé a rúi yê ngyím nji a yéne se ane eték njí á kot nchot ajom á chíŋi ochíŋ. 17A róghe efírím na ane Jus áfo na etʉ̂ ane Grik mba á kóra nchot Obhasi é kpek na achot mmá. Á firá fə́ne kpe bhaghé ofú ka ífá na kpe énê nnyo á kpughi yê áfo. 18Echəme akpíghá-ane achot etat mba á bhíŋa sê Epikʉriya na Stoyik á bhâ kpúghi Pol. Etʉ̂ ábho nâ á chóra áno mbâ Pol sê, “Énə́mé nne nnyó á chorá kpá jen ka nnyo?” Etʉ̂ sê, “A bháe okpí tîk nchot ajom etat ńgô, mma êt é ka məŋé.” Á chóra áno ka Pol á chorá a kpek na Jisos na enyəmə́m ka ekʉ̂.#17.18 Jisos na enyəmə́m ka ekʉ̂: Ka eyum í Grik, kə́n ane á kére sê enyəmə́m ka ekʉ̂ a ri mbiŋ i nkáé njom nnyi tat.

19Á kô yê mân á bhak ka ochî atáŋá-eték etat mba á bhíŋa sê Eriyapagos. Á bhə̂p yê mân sê, “Okpígha-ejûm mbi fê mbi o bháe nná na ḿbə́ne, ó dʉ̂ nan? 20E kí yuk achot mma á bhó jae êt ka ḿbə́ŋé, sə́re êt kpá echî.”

21Ekpin ane Aten na kpe ajéné mba á rî ka Aten é rî sê á kóra á bhíbha ebhú ábho, ejûm á yíma cháŋ təm esə́re esə́rə́m, á yugha fə́ne achot afê.

22Pol a bhâ gyími mân ka étíŋanti echəme njí a róghe echoróm se, “Ane Aten, ń yen bəre o kî ên echî ka nchot Obhasi kpe-eji. 23Nan? Ń jen ḿ fare, ń yen ojû ajom amə́né mma ó bhiŋá ên sê Obhasi obhə́né. Ń yen fə́ne eji etat nji o séŋe ên áfo sê, ‘Ḿfa a ri njû Obhasi nnyo ane á ká məŋé.’ Obhasi ányo nnyo ó ka məŋé ên áno kən o jíghá ên yê nâ ń səra ên áno achot m kpek na yê. 24Obhasi nnyó nâ a yimî ngun na chénchén ejûm nji é rî ka ngun. Yê nâ a ri Ntûfâm ósô na nsi. Á bhó kumí ka njû njom nnyi nne a gbeê na abhô.#1 Atúi 8.27; Asa 42.5; Etûm 7.48-50. 25Ane asík á tʉ́gha yê ka kpe ejûm nji yê a ri ka eket, kpe jə́t cháŋ. Kən yê ḿfoné nâ á kará ane ekpin, a kará ane éjʉ́ghí nji á fêk na chénchén ejûm. 26Ka nne yót, a yîm nték i ngun chénchén se á kúmi ngun ndə́m. Kən kpe a bhá yim ane, yê ḿfoné a tʉ́ri ebhú na ngûm nnyi ane mbá egyê-egyê á kí kumí, a yîm se ńnyo nne a kí ka nná, ńnyô nná. 27Se ane á wóm yê, ebhú tat, á kpúghí yê, á yén yê. Kən yê Obhasi nnyó á ka joé mbá a garé orap na êt. 28Nan? Nne etat a sə́re se,

‘É kpiná ka yê, e jená ka yê,

ekpin ejə́ré ndə́m, é rî na yê.’

Nâ noŋ etʉ̂ atúbhá-ngan abhə́né á séŋe sê,

‘Ka etʉri, êt a ri biyábhé-abhon abhê.’

29“Ka nji e ri biyábhé-abhon Obhasi, deê e kâ kpô kéré mân sê Obhasi ebhú tat a ri gûl kpe sírbha na kpe ebhú tat a ri atáé mma á kóe á móŋe noŋ nne a kére kən a tʉ́ri a kî. 30Ebhú áji nji Obhasi a maghê achot se ane á ká məŋé, é chiŋ. Mfá-mfá a chôt se deê kpe énê a yóŋé ḿbə́ŋé a maghé obhí obhê. 31Echî aŋ? Yê a sâŋ ofú a kî mbi a kí taŋ esup í ngun ka nnyen-i-mbá. Nne a ri áfo nnyo a sáŋe a kî ka etûm njí. A yîm yê a nyə́me ka ekʉ̂. Ka ekpak njí a tóŋe ane chénchén á məŋe sê nâ nne nchane áno.”

32Echəme ane njí á kpó yuk nnyi enyəmə́m ka ekʉ̂ njí, etʉ̂ ábho á chə́bhe á kaghá Pol a ri ntuŋ. Kən etʉ̂ á sə́re yê sê a kí a kpó chiŋ a sə́re ábho nchot ányi ábho á kpó yuk. 33Pol a mághe ábho, a fábhá yê. 34Etʉ̂ ane á jak na yê, á kî ḿbə́ŋé na Jisos. Etʉ̂ mbá a ri Dayonisiyos, ntáŋa-eték yót ka echəme ane Eriyapagos, na nne-nkáé yót a kamá se Damaris. Etʉ̂ ane fə́ne á chə̂m ábho.

Currently Selected:

Etûm ágbán~í jisos, echî 17: ETUNT

Highlight

Compare

Copy