Etûm ágbán~í jisos, echî 16

Timoti a kí chem Pol na Sayiras

1Pol a jak nnyi Debe na Litra. Ka Litra, ntóbhá Jisos yót a ri áfo a kamá se Timoti. Nnyen owe a kî ḿbə́ŋé na Jisos eróŋ. A ri nne-nkáé Jus, kən ńsé a ri nne Grik. 2Atem-abhon-í-nnyen chénchén ka Ikoniyum na Litra, kpe énê á chóra sê Timoti a fôn nnyen erû. 3Pol a bhâ kére se yê a kó Timoti á jî ejen etûm Obhasi, kən a kîm yê kpá nkîm. A kími yê nkîm, ka chénchén ane Jus mba á rî ka ebhat áji á məŋe sê ńsé Timoti a ri nne Grik.

4Nji á yə́bhe á kí ji, kpe á síi njə́n eték, á sə́re atem-abhon-í-nnyen áfo ekpak í ngyím nnyi ágbán í Jisos na ane-echî ka Jerusarem á kóe. Á səre fə́ne ábho sê á fíi ka ńgyímí nnyí. 5Ka obhô mbí, echəme atóbhá Jisos ka ngûm ka ngûm, é kə̂t é soná ka ḿbə́ŋé ekíím, é kua ka mfan.

Pol a kí yen ndem

6BaPol á jak ebhat í Frijiya na Garasiya. Obhasi Ebhare Ntʉgantʉ á ka kam se á kpí achot Obhasi ka ebhat Esiya. 7Nji á jéne á sî ndini Misiya á nôk sê á gyé Bitiniya kən Ntʉgantʉ Jisos á ka kam ábho á gyé. 8Á chîŋ mân Misiya á jak nnyi Troyas. 9Na atʉ́ Pol a yên ndem. Nne Masedoniya a gyím áfo a gorá yê se, “Bhák nnyi Masedoniya, bhá nyáŋe êt.” 10A kpo to a yén áno ndem nnyí, e kére ágo ejiím ntə̂m yə́t, ka e kâm sê Obhasi a bhîŋ êt se é jí kpí ane otîp ogyebhá-ḿbə́ŋé obhê ágo.

Lidiya a kí chəbhé ntóbhá Jisos

11E bhâ yə̂p mân aya-áyâ ka Troyas e bhúghi tə́níní e sî Samotra. Ofú etat ó kpó che e sî Niyaporis. 12E mághe áfo, e jak Firipi nnyi a ri eték eyúp jə́t ebhat í Masedoniya. Ane Rom nâ á fíi otúi eték áji. E kə̂t ka eték njí ka mô mfín.

13Ka ofú oyoá-biji, e mághe eték, e jak ka mkpe aya. Íkíkéré ifə́ré í rî sê eji Obhasi egoróm tîk é jóe ágo. E kpô sí mkpe aya, e kúmi e kubhá ekubhi na ane-akáé mba á chə́me áfo. 14Nne-nkáé yót a ri áfo nnyo a yúghi nchot eyəré, a kamá se Lidiya. Nne-nkáé nnyó a dʉ Tayitira, á jená ogəm ábhí ḿfô. A ri njígha-Obhasi fə́ne. Ńtâ Jisos a rə́bhe ḿbə́ŋé nne-nkáé nnyó se a tʉrí oməŋé nchot nnyi Pol á chorá. 15Á fûk yê na ndə́p-i-njû eye ayép. Nne-nkáé nnyó a sə́re êt se, “Ájoé ó yen ên sê mme ń ki ḿbə́ŋé na Ńtâ Jisos ka etʉri, nâ bhák ên bhá kumî ên ka njû amé.” A góre ta e jak fə́ne na yê.

BaPol á kí gye ókúmí ka Firipi

16Ofú bhə́t é yəp e kí ji ka eji Obhasi egoróm. Mmon i nkáé yót, nsʉ́ŋ, a kpúghi êt. Ojê ó rî yê ka ḿbə́ŋé, ó kára yê ikom a yéná nji é kí fap ójô. Na ojê obhê mbí, a kí yimâ ntí a kará ane mba á náme yê. 17A kpô yen êt, a róghe etóbhóm a gyʉá se, “Ane mbá a ri ágbán Obhasi Ósô. Á kpîk áno achot mma á kí yim ên ó sém.” 18Mmon nnyó a yîm ejûm njí ka mfín etî-etî.

Kən ofú bhə́t é yâm Pol kpe-eji, a kpíghi a sə́re ojê mmon nnyó se, “N kí səre wâ ka mbiŋ i Jisos Krayis, duî mmon nnyó ka biji.” Ojê mbí fə́ne ó mághe mmon ányo ka ngyím ányi.

19Ane mba á fóne nsʉ́ŋ nnyó, á kpó yen sê eji ntí ábho eyimím é bhip, á fî Pol na Sayiras á jak mbâ atáŋá-eték ka éré ogəm. 20Nji á kóe ábho, á fâp ka ochî esup, á róghe enyerém ábho achot sê, “Ane mbá a ri ane Jus, á bha á kí karé onyʉk ka eték. 21Á kə́ bha na erû etat nji é ká gyimi ka ebhín ejə́ré. Êt ane Rom é bhó kam na ntʉ́ghi ebhín njí, é bhó top fə́ne ńjə́ne bhúghí-bhúghí.”

22Ane etî-etî fə́ne á chə̂m á kí bhibhi mbiŋ i baPol. Atáŋá-eték mbá á káre ikom sê á yíghi ḿfô baPol, á tə̂m ábho. 23Á kpó təm ábho nnyen etəmə́m, á kô ábho á kâk ka ókúmí. Á sə́re fə́ne mbábha-ókúmí sê a bhábhé ábho, a kâ chághe ache. 24Nji á sére yê áno, a kô baPol a kâk ka mmon-i-njû nnyo etím, a bhôp akát ábho a sə̂t na ejûm etat se á kâ bê.

25Kən na étíŋanti, Pol na Sayiras á kí goré Obhasi á kona nkôn mbâ eye. Atem-ane ókúmí á rî á yugha ábho. 26Á kpó to á yúgha ka ngyím ányi, nsi a rə̂m nji ta nsə́n ábhághé-ojû njû ókúmí mbí, á kí nyiŋí. Etʉri-étʉ́ri áji anyo-obhá njû ókúmí ó rə́bhe, kpe énê nnyo a ri ka etím, mkpokobhé eye a wâ. 27Mbábhá-ókúmí a kpo to a nyəmé, a yên anyo-obhá ókúmí chénchén á kət fóŋ. A yə̂p akparanja amê se yê a yúí biji, ntit eye se ane-ókúmí á be fép.

28Kən Pol a gyʉ́i se, “Ka yúí biji ibhâ chichi! Êt chénchén e ri ngá.”

29Nne nnyó a bhîŋ, á kô eyâŋ á bhâ káre yê. A bhéne a gyê ka etím ágo, efup é sui biji, a kə̂t a choghá ka biji. A gbô áfo ka ochî baPol. 30A kô ábho a fábhá ka éré, a bhə̂p ábho se, “Ásé, n kí yim jen kən ń sém?”

31Á sə́re yê sê, “Yuŋ ḿbə́ŋé eya, kî na Ńtâ Jisos, tîk we na ndə́p-i-njû eya chénchén o sêm ên.” 32Á róghe mân yê na ane chénchén mba á rî ka njû eye esə́rə́m achot í Ńtâ Jisos. 33Ka áwa áma, nne-ndûm nnyó a kô baPol a sû bifú ábho, kən á fûk yê ayép, é kpê na ndə́p-i-njû eye. 34Á kpó to á fúk ábho ayép, a kô ábho á gyʉ̂t ka eye njû, a káre ábho édî, á dî. A fôn ekpatə́m ogyebhá-ḿbə́ŋé na ane abhê chénchén, ka á yuŋ ḿbə́ŋé á ki na Obhasi.

35Ofú ó kpó che, atáŋá-eték á sə́re anyaghá-orə́p á nyáŋe baPol abhô. 36Mbábhá-ókúmí nnyó a sére baPol se, “Ntáŋa-esup se á nyáŋe ên abhô. Nâ choŋ ên mân ka osoná-biji.”

37Kən Pol a sə́re ábho se, “Á ká bhup nchot a gbô êt, kən á tə̂m êt kpe énê a yéná, á kâk êt ka ókúmí. Ńga êt eróŋ a ri ane Rom. Á kí yim nan á sə́ré êt sê é kʉ́rí a ri ka ebhə̂t. Áfúbhí! Deê ábho á bhá ábho áfoné á bhá yíghi êt.”

38Nji anyaghá-orə́p á yúghi ejûm njí, á jî sə́re atáŋá-eték. Atáŋá-eték á kpó to á yúk sê baPol a ri ane Rom, efup é gyê ábho. 39Á bhâ góre mân baPol, á yíghi ábho ka ókúmí. Á góre ábho sê á mághe eték. 40BaPol á fabha mân ókúmí á jak á jî yên Lidiya ka njû eye. Á kpó to á kpúghí atem-abhon-í-nnyen ágo, á chôt achot á kâk ábho ḿbə́ŋé kən á kí maghé mân eték áji.

Currently Selected:

Etûm ágbán~í jisos, echî 16: ETUNT

Highlight

Compare

Copy