2 Ane tesaronika, echî 2
2
Ntə́ma-ndə́p eriŋ kən Jisos a bhá
1Atem-abhon-í-nnyen, ka nchot ebháám nji Ntûfâm owəré Jisos Krayis a kə́ bha, na echəmə́m ejə́ré na yê, e kí goré ên sê,#1 Tes 4.15-17. 2o kâ kâm ên na ane mba á kí səre ên se ofú Ńtâ Jisos ó si. Kpe o yúghi ên á kí səre sê a ri otîp Obhasi, kpe á kpíi ên okpí, kpe á sə́re ên sê êt nâ e séŋe e tûm, deê ḿbə́ŋé a kâ rə̂m ên, efup é kâ yîm ên. 3O kâ kâm ên nne kpe yót a rirí ên kpe ka ejûm jə́t.
Ń chorá áno ka kən ofú ábhi ó bhá si, njok ane tîk á chə̂p njəm á káre Obhasi na oyámá-ḿbə́ŋé. Ka ebhú áji, ndûm i mbíbha-ebhín a kí fap. Á yími sê nne nnyó a kpó a tán. 4Nne nnyó a kí gyimi okpóŋe na chénchén iyîm mbi ane á jígha, á təma arúŋ á kará. A kí kep biji se yê a fâŋ a chíŋi iyîm chénchén, ta a kí gyimi ka ókʉ́rí achot Obhasi a súmá obhô-ngaŋ se yê a ri Obhasi.#Dan 11.36; Ese 28.2.
5To o nyə́ne o tirá ên sê ń səre ên achot mmá chénchén ebhú n di ágo na ên? 6Ó məŋe ên nne nnyo á gbʉa se ta ebhú é bhîk kən á tóŋe nne nnyó jáé. 7Ikom í mbíbha-ebhín nnyó ta í roghe etûm ka kəma-kəma, kən nne nnyo á gbʉa yê a kí joé ta á yighi yê. 8Ebhú á yighí mân, ndûm i mbíbha-ebhín nnyó tîk a fâp. Kən ebhú Ńtâ Jisos á bha, a kí ko efébhe nnyo ejê ńjə́ne-njənê, a yúi yê. A kí ko fə́ne ekpatə́m ejík ejê a bhíbhi ikom ifê í mân oman.#Asa 11.4. 9Ndûm i mbíbha-ebhín nnyó a kə́ bha na ikom í Satan, a kí yim iyîm okpógha-biji ka mkpák ka mkpák a rirá ane. A kí toŋe fə́ne ekpatə́m í biriŋ áfúbhí.#Mat 24.24. 10A kí ko kpe bhaghé mbá amoe a ríri ane mba ta á kí tan á jak. É kí bhip ábho ka jen? Á ká yubhi mfoné nchot Obhasi. Á ká kot fə́ne ńnyə́ne eyúghúm, nnyi kə́n a kí yim ábho á sém. 11Nji á kí firi na nchot nnyí, Obhasi a tûm ábho ekpatə́m echiri nji é yim ábho á kâm na áfúbhí. 12Nji é rî mân áfo a ri se, kpe énê nnyo á ka kam na mfoné nchot Obhasi, nnyo se obhí nâ ó nóbhe ó chîŋ, esup Obhasi é rî é bhíp yê.
Obhasi a sáŋe ên se ó sém ên ka obhí
13Atem-abhon-í-nnyen, e fonê ekúbhúm Obhasi chénchén ebhú ka obhô obhə́né, ên mba Ńtâ Jisos a korê. Echî aŋ? Obhasi a sáŋe ên ta ka eróghá-ndə́p se yê a yim ên ó sém. Esémém njí é kí dʉ ka ikom Ebhare Ntʉgantʉ owe nnyo a kí yim ên o chə́bhe ane abhê, mba akôp á ká fon. É kí dʉ fə́ne ka ekamám nji o kamê ên na mfoné nchot eye. 14Nâ ejûm nji Obhasi a yaghê ên se ó bhá fôn ên nkiri ka ejík í Ntûfâm owəré Jisos Krayis. A yághe ên ka otîp ogyebhá-ḿbə́ŋé obhê mbi e sə́re ên nná. 15Atem-abhon-í-nnyen, nâ gyími ên mân akát á sí nsi. Fiî ên erû nji e kpíi ên ka ekpak e sə́re ên na ekpak e séŋe e káre ên.
16Ntûfâm owəré Jisos Krayis, yê ḿfoné, na Ńsé owəré Obhasi á toŋe êt okot. Ka onobhá-eji Obhasi, a káre êt okaghá-ḿbə́ŋé mbi ó bhó man, na osoná-ḿbə́ŋé se é chîk onono mbi ó kə́ bha. 17Deê ábho á kâk ên ḿbə́ŋé, á káre ên ikom mfi kpe bhaghé ejûm nji o kí chot ên na nji o kí yim ên, é jóe nono.
Ejagham New Testament © Bible Society of Nigeria and Bible Society of Cameroon, 1996.