2 Ane tesaronika, echî 1
1
Ekûp
1Nwet nnyí a dʉ mbâ êt, Pol na Siras na Timoti. E séŋe e tûm mbâ echəme atóbhá Jisos ka Tesaronika. Ó chəm ên na Obhasi Ńsé owəré na Ńtâ Jisos Krayis.#Etûm 17.1. 2Deê Obhasi Ńsé owəré na Ńtâ Jisos Krayis á tóŋé ên onobhá-eji, á káre ên fə́ne enare.
Esup é rî ofú mbi Ńtâ Jisos Krayis a kə́ bha
3Atem-abhon-í-nnyen, e fonê ka ekarám ekûp mbâ Obhasi chénchén ebhú ka echî ejə́né. Ekûp nji e kí karé é ká tan mbá. Echî aŋ? É yen sê ḿbə́ŋé nnyi o kíi ên na Jisos Krayis a kí kui kpe-eji. Okot obhə́né fə́ne mbi o fonê ên na atem ó kí son ó bhak. 4Nâ ńjə́ne é bhak ochot nchot eyəné ka echəme ane Obhasi kpe njə́n, é sumá obhô-ngaŋ. É suma obhô-ngaŋ ka kpe noŋ ngun á kará áno ên onyʉk na ekpatə́m oseŋe, ó ka maghé ên nchot Obhasi, o ri o kík ên ḿbə́ŋé na Jisos Krayis. 5Ka obhô mbí, ó bhik ên ka eyéném otúi obhê mbi mfá-mfá ó yena ên áno oseŋe. É toŋe sê ekpak Obhasi a kí taŋ ngun, é kí joé fə́ne jáé.
6Obhasi a kí yim nji é rî ka nnyen-i-mbá. Tîk a káre oseŋe mbâ ane mba á séŋa ên áno mfá-mfá. 7Tîk a káre ofeghá-ḿbə́ŋé mbâ eyəné mba á rî ka oseŋe, na êt eróŋ. Tîk a yîm njí ka ofú mbi Ńtâ Jisos a kí dʉ ósô a bhák na arûm baénjel abhê. 8Ka ofú mbí, a kə́ bha fə́ne na erəmta-ngûn, a bhá kpəré ane mba á ká məŋé Obhasi, na mba á bhó jighi otîp ogyebhá-ḿbə́ŋé obhê. 9Ntʉ́ghi ane mbá, ngom ábho a ri ekpatə́m oseŋe mbi ótúm-ótúm. Tîk á yíghi ábho ka eji ekumi Ńtâ Jisos na eji ekpatə́m ejík ogyebhá-ḿbə́ŋé ejê.#Asa 2.10. 10Ofú ábhi, mbi Ńtâ Jisos a kə́ bha, ane mba á kíi ḿbə́ŋé na yê á chə́bhe ane abhê, tîk á káre yê ejík na nkat ka ekpatə́m ogyebhá-ḿbə́ŋé mbi á fóne. Ên eróŋ mba o kamê ên na otîp obhê mbi e sə́re ên, tîk o jóe ên ka echəme njí.
11Nâ echî é gorá Obhasi chénchén ebhú ka obhô obhə́né. E kí goré sê a yim ên ó bhîk ka efonóm ekpin nji yê a sáŋe ên se ó fôn. Se ka ikom ifê, a nyáŋé ên ó yîm ên ono chénchén mbi ó rî ên ka ḿbə́ŋé. A yim ên fə́ne ó jéghe ên etûm ejə́né nji é dʉ̂ ka ḿbə́ŋé nnyi o kíi ên na Jisos. 12É gorá áno sê deê Ntûfâm owəré Jisos Krayis a fon ejík ka obhô obhə́né, ên fə́ne ó fôn ên ejík ka ochî obhê. Chénchén mbí í kí fap ka yê na Obhasi owəré á toŋe êt onobhá-eji.
Ejagham New Testament © Bible Society of Nigeria and Bible Society of Cameroon, 1996.