2 Ane tesaronika, echî 3
3
Gorê ên Obhasi ka echî ejə́ré
1Atem-abhon-í-nnyen, ka ejeghé nchot, deê ó góre ên Obhasi ka echî ejə́ré. Gorê ên Obhasi sê a kak êt ikom é nôk otîp mbi Ńtâ Jisos ó jên wát-wát ó jábhe ngûm, ó fôn ejík noŋ ó yími ka ekam ejə́né. 2Gorê ên fə́ne Obhasi sê deê a kâ kâm ane abhí á yîm êt ejûm, ka ane chénchén asík nâ á káme na otîp obhê. 3Kən Ńtâ Jisos a kí yim nji a chimî, tîk a kâk ên ikom, a nyáŋe ên ka obhô nne-ndibhí. 4Ka ekpin ejə́ré na Ńtâ Jisos, é ka fon kpe efup ka ḿbə́ŋé na ên. É məŋe sê o ri ên ágo o yimá ên chénchén iyîm mbi é səra ên, sê tîk o yimá ên o jak ochî.
5Deê Ńtâ Jisos a yim ên ó tʉ́ri oməŋé ên okot Obhasi na okə́bhá-ḿbə́ŋé mbi yê Jisos Krayis á kará ane.
6Atem-abhon-í-nnyen, é ko mbiŋ nnyi Ńtâ Jisos Krayis é səre ên sê deê o kâ chə̂m ên biji na ane mba á kíi ḿbə́ŋé na Jisos kən á chə́bhe ajan, ejûm á yíma cháŋ, á bhó top achot mma e sə́re ên. 7Ên áfoné ó tʉri oməŋé ên nono sê o ri ó yîm ên ka ekpak êt e yimî. Ka ebhú e ri ágo, é ka jan ojan. 8É ka fə́t abhô e kî sê ane á kə̂p êt iyîm okəp, kən e gyée ka etûm na echî-echî, atʉ́ na efín, sê é fôn édî êt áfoné, e kâ káre ên oseŋe. 9E kamê ekpatə́m etûm njí, cháŋ sê é ka fon ikom mfi kə́n e bhə̂p ên ogye obhə́ré, kən e yimî sê é kpí ên erû nji o kí top ên. 10Ebhú e ri ágo na ên, e sə́rá ên sê nne nnyo á to se yê á bhó yim etûm, a kâ káre yê fə́ne édî.
11É chorá áno nchot nnyí, ka é yuk sê etʉ̂ ane abhə́né á rî mba á jána ojan, ejûm etat cháŋ nji ábho á yíma é ká chiŋi a ri nnyo ekaghám ka nchot ane etat. 12Ka ikom í Ńtâ Jisos Krayis, e kí tʉ ntʉ́ghi ane mbá obhô ka otûŋ sê á yóŋé ên ekpin, á nôk ekpak á kí yim etûm á gyê biji.
13Kən atem-abhon-í-nnyen, deê o kâ kêt ên ono eyimím. 14Ebhú tat nne yót tîk a jóe ka echəme ejə́né nnyo se yê á bhó yuk otîp obhə́ré ka osêŋ mbí. Ó yen ên nne ntʉ́ghi nnyó, məŋê ên yê nobhé-nobhé, o kâ chə̂m ên biji ibhə́né na yê. Tîk echî é yûp yê. 15Kən deê o kâ bhân ên yê, tʉ ên yê obhô ka otûŋ, ka yê a ri ntem-mmon-i-nnyen eróŋ.
Ejeghé nchot.
16Deê Ńtâ Jisos yê ḿfoné nnyo a ri nâ echî enare a karé ên enare ejê chénchén ebhú kpe ka bhaghé ejûm. Deê a joé na ên chénchén.
17Na obhô obhámé mme ḿfoné, mme Pol, n kí seŋ ń kúp ên. Kpe mbə́n osêŋ obhámé mbi n kí seŋ mbâ nne nâ ekpak nji ń seŋa.
18Deê Ntûfâm owəré Jisos Krayis a tóŋé ên chénchén onobhá-eji.
Ejagham New Testament © Bible Society of Nigeria and Bible Society of Cameroon, 1996.