Myeelwe 3
3
Banakwe Aloni Balombwana
1Aza ngu mazhalane aka Aloni u Mozesi lelyo Yaahwe naakabandika u Mozesi alupili lwa Sinayi. 2#Mye 26:60Aza ngu mazhina a banakwe Aloni: Nadabu, mwana mutaanzhi, Abihu, Eliyazali u Itamali. 3Aza ngu mazhina a banakwe Aloni, babo bakananikwa kuba bapaizhi. 4#Bale 10:1, 2; Mye 26:61Pele Nadabu u Abihu bakafhwa kumbele lya Yaahwe, lelyo nibakapa mulilo uutahumizhiwa kumbele lya Yaahwe, mu lukula lwa Sinayi, ulimwi kabaina bana. Ubobo Eliyazali u Itamali mbubakaba bapaizhi mu bumi bwaka Aloni ushabo.
Balevi Basalwa Kusebeza Mwakakula Leza
5Iinzho Yaahwe wakaambila Mozesi ati, 6“Leta afhwaafhwi mushobo waka Levi. Bazhimike kumbele kwaka Aloni mupaizhi, kwaamba bamusebezele. 7Balakaakumulinda lwakwe mwini ulimwi yiimbungano yoonse ili kumbele lyetente lya Kuswaanganina, antoomwi u kusebeza mwitente Mwakukala Leza. 8Balakaakulinda shisebezho shoonse sha mwitente lya kuswaanganina, ulimwi u kulinda bantu ba Izilaili lelyo nibasebeza mwitente Mwakukala Leza. 9Upe Balevi kwa Aloni u banakwe; balo bapewa kwakwe chakumaninina kuhwa akati ka bantu ba Izilaili. 10Musale Aloni u banakwe kwaamba babukwabilile bupaizhi bwabo. Kuti na muntu muhwamashi waswena afhwaafhwi, ulakafhwa.”
11Yaahwe wakaambila Mozesi ati, 12#Kul 13:2“Bona, ndababweza Balevi kuhwa akati ka bantu ba Izilaili mu busena bwa mwana mutaanzhi kuzhalwa woonse, wezo uyalula ifhu akati ka bantu ba Izilaili. Balevi balakaba bangu, 13nkaambo boonse bana bataanzhi kuzhalwa mbangu. Mu buzuba indakayaya boonse bana bataanzhi munshi ya Ijipiti, ndakalisalalizha kuba bangu boonse bana bataanzhi kuzhalwa mu Izilaili, ku muntu na ku munyama. Balakaba bangu: Ndime Yaahwe.”
Kubalwa kwa Balevi
14Iinzho Yaahwe wakaambila Mozesi mwisokwe lya Sinayi ati, 15“Babale banakwe Levi balombwana, mu maanda a maushabo u munhubo shabo, woonse mulombwana ukwete mwezhi womwi (1) wakuzhalwa kuya kumbele abalwe.” 16Ubobo Mozesi wakababala kwiingaina izwi lya Yaahwe, mbubona mbwaakalaililwa. 17Aza ngu mazhina a banakwe Levi: Gelishoni, Kohati u Melali. 18Aza ngu mazhina a banakwe Gelishoni munhubo shabo: Libini u Shimeyi. 19Banakwe Kohati munhubo shabo: Amulamu, Izhali, Hebuloni u Uziyeli. 20Banakwe Melali munhubo shabo: Mahali u Mushi. Sheshi nshiinhubo sha Balevi, mu maanda a maushabo. 21Kwa Gelishoni nkukwakahwa luhubo lwa Balibini u luhubo lwaka Shimeyi; sheshi kashili inhubo sha Bagelishoni. 22Bakabalwa kwiingaina u mweelwe wa balombwana bakwete mwezhi womwi (1) wakuzhalwa kuya kumbele kooli shuulu shili chiloba u myaanda yosanwe (7,500). 23Inhubo sha Bagelishoni shakazaka inkambe kumbo, kumanuma etente Mwakukala Leza, 24antoomwi u Eliyasafu, mwanakwe Layeli wakaakuli musololi muŋanda ya maushabo ya Bagelishoni. 25Banakwe Gelishoni kabakwete mulimo wa kulinda mwitente lya Kuswaanganina, kubikilizha yiitente Mwakukala Leza u shakuhumba ezeulu shalyo, ilembo lya kushitilizha kumulyango wetente lya kuswaanganina, 26shishitilizho sha lubanza, ilembo lya kushitilizha mulyango wa lubanza lwakaakuzhinguluka itente Mwakukala Leza u chipaililo, yiintambo sha lyo u shesho shoonse shakusebezha. 27Kwa Kohati nkukwakahwa luhubo lwa Baamulamu, luhubo lwa Baizhali, luhubo lwa Bahebuloni u luhubo lwa Bauziyeli; sheshi nshiinhubo sha Bakohati. 28Kwiingaina u mweelwe wa balombwana boonse, kuhwa kuli bakwete mwezhi womwi (1) wakuzhalwa u kuya kumbele, kooli shuulu lusele u myaanda chisambomwi (8,600), babo bakaakulinda Iŋanda ya Leza. 29Inhubo sha banakwe Kohati shakazaka inkambe yabo kuluya lwa kuchibizhi lwetente Mwakukala Leza, 30antoomwi u Elizafani mwanakwe Uziyeli, wezo wakaakuli musololi muŋanda ya maushabo, munhubo sha Bakohati. 31Mulimo wabo wa bulindizhi kookwatilizha ikwati lya chihuminano, itebulu, chikalilo chelambe, shipaililo u shintu shisalala shesho bapaizhi nshibakaakusebezha, chishitilizho u shimwi bulyo. 32Eliyazali mwanakwe Aloni mupaizhi, nguwakaakuli musololi a basololi ba Balevi. Nguwakaakusololela balindizhi Baŋanda ya Leza. 33Kwa Melali nkukwakahwa luhubo lwa Bamahali u luhubo lwa Bamushi: sheshi nshiinhubo sha Bamelali. 34Bubale bwabo kwiingaina u mweelwe wa balombwana boonse kuhwa ku mwezhi womwi (1) wakuzhalwa kuya kumbele kooli shuulu shili chisambomwi u myaanda yobile (6,200). 35Musololi waŋanda ya maushabo munhubo shaka Melali kali Zuliyeli mwanakwe Abihaili. Baba bakazaka inkambe yabo ku luya ku kumbala lyetente Mwakukala Leza. 36Mulimo wa banakwe Melali kookwatilizha shikunguzho shetente Mwakukala Leza, milongo, shaanda, shikalilo u shimwi shoonse shesho shakuzasha itente, 37antoomwi u shaanda shizhingulukile lubanza u shikalilo, inkanka shetente, yiintambo. 38Babo bakaakuzakile inkambe kuluya kwiwe kuhwila izuba, kumbele lya Mwakukala Leza, kumbele lyetente lya kuswaanganina, kabali: Mozesi, Aloni u banakwe, bakaakulinda Iŋanda ya Leza, kukwabilila bantu ba Izilaili. Kufhumbwa muhwamashi wakaakuswena afhwaafhwi, kayaiwa. 39Boonse babo bakabalwa akati ka Balevi, babo Mozesi u Aloni mbubakabala mbuli malailile aka Yaahwe, munhubo shabo, boonse balombwana kuhwa ku mwezhi womwi (1) wakuzhalwa kuya kumbele, kabali shuulu shili makumi obile u shuulu shobile (22,000).
Balevi Babweza Busena bwa Bana Bataanzhi
40Yaahwe wakaambila Mozesi ati, “Bala boonse bana bataanzhi balombwana ba bantu ba Izilaili, bakwete mwezhi womwi (1) wakuzhalwa kuya kumbele, ubweze mweelwe wa mazhina abo. 41Ulakambwezela Balevi mu busena bwa bana bataanzhi kuzhalwa boonse akati ka bantu ba Izilaili, yiiŋombe sha Balevi mu busena bwa shana intaanzhi kuzhalwa akati kaŋombe sha bantu ba Izilaili. Ndime Yaahwe.” 42Ubobo Mozesi wakabala boonse bana bataanzhi kuzhalwa akati ka bantu ba Izilaili, mbubona Yaahwe mbwaakamulailila. 43Boonse bana bataanzhi kuzhalwa balombwana, kwiingaina u mweelwe wa mazhina, kuhwa mwezhi womwi (1) wakuzhalwa kuya kumbele, mbuli mbubakabalwa, kabali shuulu shili makumi obile u shuulu shobile u myaanda yobile u makumi aali chiloba u bana botatwe (22,273). 44Ngoona Yaahwe wakaambila Mozesi ati, 45“Bweza Balevi mu busena bwa bana bataanzhi boonse akati ka bantu ba Izilaili, yiiŋombe sha Balevi mu busena bwaŋombe sha bantu ba Izilaili. Balevi mbangu: Ndime Yaahwe. 46Iinzho muulo wakunununa bana bataanzhi kuzhalwa ba bantu ba Izilaili bali myaanda yobile u makumi chiloba u bana botatwe (273), babaala a mweelwe wa Balevi balombwana, 47ulakabweza mashekele osanwe (5) a shimutwi womwi (1); ulakababweza kwiingaina uma shekele a muŋanda ya Leza (ishekele lyomwi magela makumi obile). 48Mali a siluva azo ulakaapa Aloni u banakwe kwaamba ube muulo wakunununa babo baitilila a mweelwe.” 49Ubobo Mozesi wakabweza mali a siluva a kununuzha babo bakaitilila a mweelwe wa babo bakanununwa u Balevi. 50Kuhwa ku bana bataanzhi kuzhalwa ba bantu ba Izilaili, wakabweza mashekele a siluva aali chuulu chomwi u myaanda yotatwe u makumi aali chisambomwi u mashekele osanwe (1,365), kwiingaina u mashekele a Muŋanda ya Leza. 51Ubobo Mozesi wakapa mali a siluva a kununuzha kwa Aloni u banakwe, kwiingaina izwi lya Yaahwe, mbubona Yaahwe mbwaakalailila Mozesi.
Bible Society of Zambia