Myeelwe 4
4
Milimo ya Bakohati
1Yaahwe wakaambila Mozesi u Aloni ati, 2“Amubale banakwe Kohati kuhwa akati ka banakwe Levi, munhubo shabo, mu maanda a maushabo, 3kuhwa ukwete myaka makumi otatwe (30) kushikila myaka makumi osanwe (50) a kuzhalwa, babo bakonzha kwiza kunchito, kwiza kusebeza mulimo mwitente lya kuswaanganina. 4Wezu ngu mulimo wa banakwe Kohati mwitente lya kuswaanganina: shintu shisalalisha. 5Lelyo inkambe niilonga, Aloni u banakwe balakanjila u kwaangulula chishitilizho u kuchihumbya ikwati lya bumboni. 6Bamana balakabika isalu lyampongo, ezeulu alindilyo, mulembo wa chilambo cha chikambwe. Bamana balakanjizha milongo yalyo. 7Ezeulu etebulu lya chinkwa cha Kubushu balakazala mulembo wa chilambo cha chikambwe, alindilyo balakabika mitiba iselebele, mitiba ihwangomene, yiinkapu sha chipo chakunwa; chinkwa cha kutondezha buzuba u buzuba acho chikabe wo. 8Bamana bakashihumbe mulembo u subila pyu, awo bakoohumbe isalu lyampongo u kunjizha milongo ya lyo. 9Balakabweza mulembo wa chilambo cha chikambwe u kuhumba ilambe lya kumunika, malambe a cho, lumano lwa yo, shikaye sha yo, ulimwi u shisebezho shoonse sha mafhuta shisebezhewa alyo. 10Balakalibika u shisebezho sha lyo shoonse mwisalu lyampongo u kulibika a fhulemu wa lyo wakusempulila. 11Iinzho achipaililo cha goludi, balakazala mulembo wa chilambo cha chikambwe ulimwi yiisalu lyampongo, bamana bakanjizha milongo ya lyo. 12Balakabweze shintu shakapewa kwa Leza shoonse shisebezhewa Mwakukala Leza u kushibika mu mulembo wa chilambo cha chikambwe. Balakahumba wo isalu lyampongo u kushibika a fhulemu wakusempulila. 13Balakapeela itwe kuhwa achipaililo u kuhumba wo mulembo wa chilambo cha shichisu mubizusha. 14Balakabika wo shisebezho shoonse sha chipaililo, shesho shisebezhewa wo: tusenke twa kulapila mulilo, infholoko, mafhosholo, mitiba ihongomene mishoonto u shisebezho shoonse sha chipaililo; bamana balakahumba wo isalu lyampongo u kunjizha milongo yalyo. 15Iinzho Aloni u banakwe bamana bulyo kwiihumba Iŋanda ya Leza u shisebezho shoonse sha Mwakukala Leza, ndilelyo inkambe niikaakanka kulonga, banakwe Kohati nibati bakezhize kubweza shoonse sheshi shintu, pele batakashikwati shintu shakapewa kwa Leza, bulyo balakafhwa. Sheshi nshi shintu sha mwitente lya kuswaanganina nshibati bakabweza banakwe Kohati.
16“Eliyezali mwanakwe Aloni mupaizhi, nguuti akabe mweendelezhi wa mafhuta a kumunisha, tununkilizho, chipo cha maila cha buzuba u buzuba, mafhuta a kunanika, ulimwi u kukweendelezha shoonse shetente Mwakukala Leza u shesho shoonse shili mukati kalyo, Iŋanda ya Leza u shintu shakapewa kwa Leza sha lyo.” 17Yaahwe wakaambila Mozesi u Aloni ati, 18“Mutaleka mushobo wanhubo sha Bakohati kwaamba uzonaunwe kuhwa akati ka Balevi, 19pele kwaamba bakakwate bumi, batakafhwi lelyo nibaswena kufhwaafhwi u shintu shakapewa kwa Leza, mbubolya mbumukaachita: Aloni u banakwe balakenjila u kupa umwi wuumwi, mulimo u mukuli wakwe mwini. 20Pele balo batakenjili kuya kulanga ashintu sha kapewa kwa Leza nikaba kaindi kashoonto, bulyo balakafhwa.”
Milimo ya Bagelishoni
21Yaahwe wakaambila Mozesi ati, 22“Bala banakwe Gelishoni, mu maanda a maushabo u munhubo shabo. 23Kuhwa bakwete myaka makumi otatwe (30) kushikila bakwete myaka makumi osanwe (50) a kuzhalwa. Ulakababala boonse bakonzha kwiza kunchito, kwiza kusebeza mwitente lya kuswaanganina. 24Wezu ngu mulimo wa luhubo lwa Bagelishoni, mu kusebeza u kubweza mikuli. 25Balakaakubweza shishitilizho shetente Mwakukala Leza yiitente lya kuswaanganina u shakuhumbya ezeulu lya yo, shakuhumbya shesalu lyampongo lili ezeulu a lyo u chishitilizho cha kumulyango wetente lya kuswaanganina, 26shilengelela a lubanza, shishitilizho sha kumulyango wa manjililo a mu lubanza luzhingulukile itente Mwakukala Leza u chipaililo, yiintambo u shisebezho shoonse sha mulimo wabo. Balakachita shoonse shizandika kuchitwa abo. 27Yoonse milimo ya banabo Bagelishoni ilakaakuli mu matashi aka Aloni u banakwe, shoonse shesho nshibati bakaakubweza u shesho shoonse nshibati bakaakuchita. Ndiwe nuuti ukaakubapa shoonse shesho nshibati bakaakubweza. 28Wezu ngu mulimo wanhubo sha banabo Bagelishoni mwitente lya kuswaanganina, inchito yabo njakusebeza malailile aka Itamali mwanakwe Aloni mupaizhi.”
Milimo ya Bamelali
29“Iinzho banakwe Melali, ulakababala munhubo shabo u maanda a maushabo. 30Kuhwa ku myaka makumi otatwe (30) kushikila myaka makumi osanwe (50) ya kuzhalwa. Ulakabala woonse ukonzha kwiza kunchito, kwiza kusebeza mwitente lya kuswaanganina. 31Mulimo wabo woonse uli mwitente lya kuswaanganina, ubobo chechi nchibapewa kubweza: shikunguzho sha mwitente Mwakukala Leza, milongo ya lyo, shaanda, shikalilo, 32shaanda shizhingulukile lubanza u shikalilo sha yo, inembe shetente yiintambo, shoonse shisebezho u shintu bulyo shoonse sha lyo. Muntu umwi wuumwi akapewe shintu shesho nshaaelele kubweza. 33Wezu ngu mulimo wanhubo sha banakwe Melali, woonse wezu mulimo ngwa mwitente lya kuswaanganina, ku malailile aka Itamali mwanakwe Aloni mupaizhi.”
Kubalwa kwa Balevi
34Mozesi, Aloni u basololi bambungano bakabala banabo Bakohati, munhubo shabo u maanda a maushabo, 35kuhwa bakwete myaka ili makumi otatwe (30) kushikila myaka ili makumi osanwe (50) ya kuzhalwa, woonse wakaakukonzha kwiza kunchinto, kwiza kusebeza mwitente lya kuswaanganina. 36Babo bakabalwa munhubo kabali shuulu shobile u myaanda ili chiloba u makumi osanwe (2,750). 37Wezu ngu mweelwe wanhubo sha Bakohati, boonse babo bakasebezela mwitente lya kuswaanganina, babo Mozesi u Aloni mbubakabala kwiingaina u malailile a Yaahwe kwa Mozesi. 38Babo bakabalwa banakwe Gelishoni, munhubo shabo u maanda a maushabo, 39kuhwa bakwete myaka makumi otatwe (30) kushikila myaka makumi osanwe (50) ya kuzhalwa, babo boonse bakaakukonzha kwiza kunchito, kusebeza mwitente lya kuswaanganina. 40Babo bakabalwa munhubo shabo u mu maanda a maushabo kabali shuulu shobile u myaanda ili chisambomwi u makumi otatwe (2,630). 41Wezu ngu mweelwe wanhubo sha banakwe Gelishoni, boonse babo bakaakusebeza mwitente lya kuswaanganina, babo Mozesi u Aloni mbubakabala kwiingaina u malailile a Yaahwe. 42Babo bakabalwa banhubo sha banakwe Melali, munhubo shabo u mu maanda a maushabo, 43kuhwa bakaakukwete myaka ili makumi otatwe (30) kushikila myaka ili makumi osanwe (50), woonse wakaakukonzha kwiza kunchito, kwiza kusebeza mwitente lya kuswaanganina, 44babo bakabalwa munhubo kabali shuulu shotatwe u myaanda yobile (3,200). 45Wezu ngu mweelwe wanhubo sha banakwe Melali, babo Mozesi u Aloni mbubakabala kwiingaina u malailile a Yaahwe kwa Mozesi. 46Boonse babo bakabalwa Balevi, babo Mozesi, Aloni u basololi ba Izilaili mbubakabala, munhubo shabo u mu maanda a maushabo, 47kuhwa bakaakukwete myaka makumi otatwe (30) kushikila myaka makumi osanwe (50) a kuzhalwa, woonse wakaakukonzha kwiza kunchito, kwiza kusebeza u kubweza mikuli mwitente lya kuswaanganina. 48Babo bakabalwa kabali shuulu shili lusele u myaanda yosanwe u makumi aali lusele (8,580). 49Bakalembwa, umwi wuumwi u mulimo wa kuchita na chakubweza, kwiingaina u malailile a Yaahwe kwiita mwa Mozesi. Ubobo wakababala, mbubona Yaahwe mbwaakalailila Mozesi.
Bible Society of Zambia