Myeelwe 2
2
Mishobo mbuyakazaka u mbuyakaakulonga
1Yaahwe wakaambila Mozesi u Aloni ati, 2“Bantu ba Izilaili balakazaka inkambe, inkamu imwi yiimwi kumbali yiindembela ya yo, antoomwi u shikwankwani sha maanda a maushabo. Balakakala munkambe bulangene Yiitente lya Kuswaanganina mu mabali oonse. 3Babo bakaazaka inkambe kuluya kwiwe, koko kuhwila izuba, balakaba Bahibulu yiindembela yabo, munkamu shabo. Musololi wa bantu ba Juda ngu Nashoni, mwanakwe Aminadabu. 4Inkamu yakwe yakabalwa keeli shuulu makumi chiloba u shuulu shone u myaanda chisambomwi (74,600). 5Babo bakaazaka inkambe ichilila balakaba ba mushobo waka Isakali. Musololi wa bantu baka Isakali ngu Natanyele, mwanakwe Zuwali. 6Inkamu yakwe yakabalwa keeli shuulu makumi osanwe u shuulu shone u myaanda yone (54,400). 7Kwamana mushobo waka Zebuluni, musololi wa bantu ba Zebuluni ngu Eliyabu, mwanakwe Heloni. 8Inkamu yakwe yakabalwa keeli shuulu makumi osanwe u shuulu chiloba u myaanda yone (57,400). 9Boonse babo bakabalwa munkambe ya Juda, munkamu shabo, kabali shuulu mwaanda u makumi lusele u shuulu chisambomwi u myaanda yone (186,400). Baba mbubati bakaakusolola chiindi cha kulonga.
10“Kuluya lwa kuchibizhi kulakaakuli indembela yankambe yaka Lubeni, munkamu shabo, musololi wa bantu baka Lubeni ngu Elizuli mwanakwe Shedeyuli. 11Inkamu yakwe yakabalwa keeli shuulu makumi one, shuulu chisambomwi u myaanda yosanwe (46,500). 12Inkambe ichilila ilakaakuli ya mushobo waka Simiyoni, musololi wa bantu baka Simiyoni ngu Shelumiyeli, mwanakwe Zulishadayi, 13inkamu yakwe yakabalwa keeli shuulu makumi osanwe, shuulu ifhuka u myaanda yotatwe (59,300). 14Kuhwaawo mushobo wa Bagadi. Musololi wa bantu ba Gadi ngu Eliyasafu, mwanakwe Luweli. 15Inkamu yakwe yakabalwa keeli shuulu makumi one, shuulu shosanwe u myaanda chisambomwi (45,600). 16Boonse babo bakabalwa bankambe yaka Lubeni, munkamu shabo, kabali shuulu myaanda makumi osanwe, chuulu chomwi u myaanda yone u makumi osanwe (151,450). Baba balakaakuli babili kulonga.
17“Lelyo nilikaalonga Itente lya Kuswaanganina, yiinkambe ya Balevi akati kankambe; mbubona mbubakaazaka inkambe, mbubona mbubati bakazhimuke, yiimwi inkambe mu busena bwa yo, mu indembela yiindembela ya yo.
18“Kuluya lwa kumbo, kulakaakuli indembela yankambe yaka Efulaimu, munkamu shabo, musololi wa bantu baka Efulaimu ngu Elishama, mwanakwe Amihudi. 19Inkamu yakwe yakabalwa keeli shuulu makumi one u myaanda yosanwe (40,500). 20Ukaachilila ulakaba mushobo waka Manase, musololi wa bantu baka Manase ngu Gamaliyeli, mwanakwe Pedazuli. 21Inkamu yakwe yakabalwa keeli shuulu makumi otatwe, shuulu shobile u myaanda yobile (32,200). 22Kwamana mushobo waka Benjamini, musololi wa bantu baka Benjamini ngu Abidani, mwanakwe Gidiyoni. 23Inkamu yakwe yakabalwa keeli shuulu makumi otatwe u shuulu shosanwe u myaanda yone (35,400). 24Babo boonse bakabalwa munkambe ya Efulaimu, munkamu shabo, kabali shuulu myaanda lusele u mwaanda womwi (108,100). Baba balakaba batatu kulonga.
25“Kuluya lwa kumbala kulakaba indembela yankambe yaka Dani, munkamu shabo, musololi wa bantu baka Dani ngu Ahiyezeli, mwanakwe Amishadayi. 26Inkamu yakwe yakabalwa keeli shuulu makumi chisambomwi u shuulu shobile u myaanda chiloba (62,700). 27Babo bakaazaka inkambe kumuchilila mba mushobo waka Asheli, musololi wabo ngu Pagiyeli, mwanakwe Okulani. 28Inkamu yakwe yakabalwa keeli shuulu makumi one u chuulu chomwi u myaanda yosanwe (41,500). 29Kwamana mushobo wa Nafutali, musololi wabo ngu Ahila, mwanakwe Enani. 30Inkamu yakwe yakabalwa keeli shuulu makumi lusele u myaanda yone (53,400). 31Boonse babo bakabalwa munkambe yaka Dani kabali shuulu mwaanda u makumi osanwe u shuulu chiloba u myaanda chisambomwi (157,600). Baba balakaakushaalila kulonga, indembela yiindembela.”
32Baba mbu bantu ba Izilaili mbuli mbubakabalwa mu maanda a maushabo. Boonse babo bakabalwa munkambe, munkamu shabo, kabali shuulu myaanda chisambomwi u shuulu shotatwe u myaanda yosanwe u makumi osanwe (603,550). 33Pele Balevi baina ukabalwa akati ka bantu ba Izilaili, mbubona Yaahwe mbwaakalailila Mozesi. 34Mbubobo bantu ba Izilaili mbubakachita. Kwiingaina shesho shoonse Yaahwe nshaakalailila Mozesi, mbubona mbubakazaka inkambe mundembela shabo, ulimwi mbubona mbubakaakulonga, umwi wuumwi munhubo yakwe, kwiingaina iŋanda ya maushabo.
Bible Society of Zambia