Esita 8
8
Bajuda Bashimwinwa Kulikobelela
1Mu buzuba bobo mwami Ahasuyelusi wakapa mwami mukaintu Esita iŋanda yaka Hamani, shinkondonokwabo Bajuda. Ngoona Modekayi wakeza kumbele lya mwami, nkaambo Esita wakamushimwina mwami mbwakaakuli musazhiina. 2Amane mwami wakakusha chikanto chakwe, checho nchaakananga Hamani u kuchipa Modekayi. Ngoona Esita wakabika Modekayi kweendelezha iŋanda yaka Hamani.
3Ngoona Esita wakaambila mwami alimwi. Wakoona kumatende akwe u kulila chakuliluba. Wakalyeenzelela kwakwe kwaamba mwami aleshe makanze mabiyabi aka Hamani Muagagi, kulwisha Bajuda. 4Lelyo mwami naakatondeka musako wakwe wa goludi kwa Esita, Esita wakazhimuka u kuzhima kumbele lya mwami. 5Wakaamba ati, “Kuti na chilamubotela mwami, kuti na ndayana choolwe mu menso akwe, kuti na chili kabotu kumbele lya mwami, ulimwi ndabotezha mu menso akwe, leka malailile alembwe akasha kuhwililila maŋwalu azo akalembwa u Hamani Muagagi, mwanakwe Hamedata, kwaamba azo ngaakalemba kwaamba Bajuda bali mu shooko shoonse sha mwami bazonaunwe. 6Anu ndachikonzha buti kubona ipenzhi lelyo lizhiza ku bantu bangu? Na ndachikonzha buti kubona kuzonaunwa kwa lunungu lwangu?” 7Ngoona mwami Ahasuyelusi wakaambila Esita mwami mukaintu u Modekayi Mujuda ati, “Bona, ndapa Esita iŋanda yaka Hamani, ulimwi bamutunga achisamu, nkaambo kazanda kuyaya Bajuda. 8Pele mulakonzha kulembela Bajuda, mbubona mbuchikamubotela, mwizhina lya mwami u kukanta chikanto cha mwami, nkaambo mulawo wezu walembwa mwizhina lya mwami u kukantwa uchikanto cha mwami, tookonzha kuchinchiwa.”
9Achiindi checho balembi ba mwami bakoompololwa, mu mwezhi watatu (3), mwezhi wa Sivani, mu buzuba bwa makumi obile u mazuba otatwe (23). Mulawo wakalembwa, kwiingaina ushesho shoonse Modekayi nshakalailila kukwatikizha Bajuda, ku beendelezhi ba mwami, basololi u beendelezhi ba shooko, kuhwa ku Indiya kushikila ku Isopiya, shooko shili mwaanda u makumi obile u shooko chiloba (127), chooko chimwi uchimwi mu mulaka u mushobo wacho, ulimwi uku Bajuda boonse mu milaka u mishobo yabo. 10Modekayi wakalemba maŋwalu mwizhina lya mwami Ahasuyelusi, wakaakanta uchikanto cha mwami. Ngoona wakaatuma maŋwalu u batumwa baliza imbizhi shilukankisha, shesho nshakaakusebezha mwami, shizhale kumbizhi inombwana sha bwami. 11Aza ngumalailile a mwami: Bajuda bali mu minzhi mikando yoonse bahumizhiwa kubungana antoomwi kwaamba bakwabilile bumi bwabo. Bahumizhiwa kuzonauna, kuyaya u kuzonauna chakumaninina bashikalumamba ba busena buli boonse na bantu babo bakaabalwisha. Balakachita mbubona bobo ku bana uku bakaintu bankamu ya bashikalumamba babo. Ulimwi Bajuda bahumizhiwa kusaala lubono lwa bashinkondonokwabo, 12mu buzuba bomwi mu shooko shoonse sha mwami Ahasuyelusi, mu buzuba bwekumi u mazuba otatwe (13) mu mwezhi wekumi u myezhi yobile (12), nguwena ngumwezhi wa Adali. 13Bulembulule bwa mulawo wezo wakalembwa, bwakaambilizhiwa mbubona mu shooko shoonse u kutondezhewa ku bantu boonse. Ubobo Bajuda bakalibambila kuchita inzholi a bashinkondonokwabo bobo buzuba. 14Ngoona bashimbizhi bakaliza imbizhi shabo shakaakusebezhewa umwami, shesho shilukankisha. Bakaya chakufhwambaana kwiingaina u malailile a mwami. Mulawo wakaambilizhiwa mu chizubilo chizumu cha Susa.
15Ngoona Modekayi wakahwa ku bushu bwa mwami, kasamine munganjo wa bwami, wa chilambo cha chikambwe u kutuba, mushini mulemu wa goludi u munganjo wa butonge bubotusha bwa chilambo cha shichisu mubizusha. Mu munzhi mukando wa Susa mwakaba iyowe u kutangala. 16Bajuda bakasapwa, bakabotelwa, bakatangala ulimwi bakalemekwa. 17Mu shooko shoonse u mu minzhi mikando yoonse, koonse koko malailile u mulawo wa mwami nkuwakateelelwa, kwakaba kubotelwa u kutangala akati ka Bajuda, ubobo bakanwa u kulyookezha. Bantu ba shishi shinji-shinji shanshi yezho, bakalyaamba kuba Bajuda, nkaambo bukandu bwakutiya Bajuda bwakabenjila.
Bible Society of Zambia