Esita 7
7
1Ubobo mwami u Hamani bakaya kwipobwe lya mwami mukaintu Esita. 2Mu buzuba bwabili, lelyo nilyakamana ipobwe, bakaakuchinwa waini. Ngoona mwami alimwi wakaambila Esita ati, “Nchiinzhi nchuuzanda, mwami mukaintu Esita? Ulapewa. Nchiinzhi nchuukumbila? Nichiba chisela cha bulelo, chilakazuzukizhiwa.” 3Ngoona mwami mukaintu Esita wakaingula ati, “Kuti na ndayana choolwe ku menso ako, U mwami, ulimwi kuti na chilamubotela mwami, ndakumbila bumi bwangu u bumi bwa bantu bangu bwatazonaunwa. 4Nkaambo twakauzhiwa, ume u bantu bangu, kwaamba tuzonaunwe, tuyaiwe, tuzonaunwe chakumaninina. Kuti na nitwakauzhiwa bulyo mu buzhike, balombwana u bakaintu, indaliinza bulyo, nkaambo nshikonzha kumupenzha mwami yiipenzhi lili bolya.” 5Ngoona mwami Ahasuyelusi wakaambila mwami mukaintu Esita ati, “Nguni wezo, ngulikwi, wezo uzanda kuchita chechi?” 6Esita wakaamba ati, “Shinkondo, shikulwisha! Nguwezu Hamani usofhweele!” Ngoona Hamani wakatiya chini-chini kumbele lya mwami u mwami mukaintu.
Hamani Wayaiwa
7Ahasuyelusi mwami wakazhimuka chabukali kuhwaawo ngakaakunwa waini ukuya ku muunda wa maluba-luba waŋanda ya bwami, pele Hamani wakashaala kwaamba alyeenzelele ku mwami mukaintu Esita, nkaambo wakabona kwaamba mwami ulazandisha kumuchita chibiyabi. 8Lelyo mwami naakapiluka kuhwa ku muunda wa maluba-luba waŋanda ya bwami, kwiza mu busena mubakaakunwina waini, wakayana Hamani waliwaala achuuna awo akaakuli Esita. Ngoona mwami wakakwiila ati, “ulazanda kumoona mwami mukaintu mu menso angu, ulimwi muŋanda yangu ndimwini?” Nakaakuchaamba bobo mwami, batwangaakwe bakabuhumba bushu bwaka Hamani. 9Ngoona Halabona, womwi wa bazhibe bakaakusebezela mwami, wakaamba ati, “Kuli chisamu checho Hamani nchaakabambila Modekayi, wezo wakafhutula mwami, chilishimpilwe kuŋanda yaka Hamani, tukokola makumi osanwe (50) kuya mwizeulu.” Ngoona mwami wakaamba ati, “Amukamutunge chisamu ku matako kushikila chikapole amutwi.” 10Ubobo Hamani bakamutunga achisamu checho nchaakakubambilile Modekayi. Ngoona bukali bwa mwami bwakamana.
Bible Society of Zambia