Esita 9
9
Bajuda Bazonauna Bashinkondonokwabo
1Iinzho mu mwezhi wekumi u myezhi yobile (12), nguwena ngu mwezhi wa Adali, mu buzuba bwekumi u mazuba otatwe (13), lelyo malailile u mulawo wa mwami nishakaakuzanda kuchitwa, mu buzuba mbubona bashinkondonokwabo Bajuda nibakaakuzanda kubazunda, shintu shakachincha: Bajuda bakabazunda babo bakaakubaswile. 2Bajuda bakabungana antoomwi mu minzhi mikando yabo, mu shooko shoonse sha mwami Ahasuyelusi, kwaamba balwishe babo bakaakuzanda kubachisa. Kwiina wakakonzha kubalwisha, nkaambo bantu boonse bakafhwa bukandu. 3Boonse beendelezhi ba shooko, basololi u beendelezhi ba bwami abo bakayohwa Bajuda, ukaambo kakutiya Modekayi. 4Nkaambo Modekayi kali mukando chini-chini muŋanda ya mwami, ulimwi impuwo yakwe yakazuwa mu shooko shoonse, ubobo Modekayi wakaakuya bukwata insana chini-chini. 5Bajuda bakayaya bashinkondonokwabo boonse yiicheba, bakayaya, bakazonauna u kuchita chakababotela kuli babo bakaakubaswile. 6Mu chizubilo chizumu cha Susa mwaloolona, Bajuda bakayaya u kuzonauna balombwana bali myaanda yosanwe (500), 7ulimwi bakayaya Palishandata, Dalifoni, Asipata, 8Polata, Adaliya, Alidata, 9Palamashita, Alisayi, Alidayi u Vayizata, 10bana bali ikumi baka Hamani mwanakwe Hamedata, nshinkondonina Bajuda, pele baina nibakabweza sha kusaala.
11Mbubona buzuba bobo bakamushimwina mwami mweelwe wababo bakayaiwa mu chizubilo chizumu cha Susa. 12Ngoona mwami wakaambila mwami mukaintu Esita ati, “Mu chizubilo chizumu cha Susa mwaloolona, Bajuda bayaya u kuzonauna balombwana bali myaanda yosanwe (500), ulimwi u banakwe Hamani bali ikumi (10). Anu nchiinzhi nchibachita mu shooko sha mwami shashaala? Iinzho chiinzhi nchuuzanda? Ulapewa. Ulimwi nchiinzhi chimwi nchuukumbila? Chilazuzukizhiwa.” 13Esita wakaamba ati, “Kuti na chilamubotela mwami, leka Bajuda bali mu Susa abo zona bahumizhiwe kuchita kwiingaina u mulawo wezu wa bono buzuba. Ulimwi leka mitunta ya banakwe Hamani bali ikumi (10) bakatungwe a shisamu.” 14Ubobo mwami wakalailila kwaamba chechi chichitwe. Mulawo wakaambilizhiwa mu Susa, banakwe Hamani bali ikumi (10) bakatungwa a shisamu. 15Bajuda bakaakuli mu Susa bakabungana abo mu buzuba bwekumi u mazuba one (14) bwa mwezhi wa Adali bakayaya balombwana mu Susa bali myaanda yotatwe (300), pele baina kukabweza sha kusaala. 16Iinzho Bajuda bakashaala, babo bakaakuli mu shooko sha mwami, abo bakabungana kwaamba balikobelele u kulyookezha kuhwa kubashinkondonokwabo u kuyaya babo bakaakubaswile bali shuulu makumi chiloba u shuulu shosanwe (75,000), pele baina kubweza sha kusaala. 17Chechi kachili mu buzuba bwekumi u mazuba otatwe (13) mu mwezhi wa Adali, ulimwi mu buzuba bwekumi u mazuba one (14) bakalyookezha u kubuchita bobo buzuba kuba buzuba bwepobwe u kubotelwa. 18Pele Bajuda bakaakuli mu Susa, bakabungana mu buzuba bwekumi u mazuba otatwe (13) u mu buzuba bwekumi u mazuba one (14). Bakalyookezha mu buzuba bwekumi u mazuba osanwe (15), bobu bwakaba buzuba bwepobwe u kubotelwa. 19Ubobo Bajuda bakaakukala mu minzhi mishoonto u mu tunzhi-tunzhi, balabubamba buzuba bwekumi u mazuba one (14), mu mwezhi wa Adali, mbuzuba bwepobwe, kubotelwa u kulyookezha, ulimwi mbuzuba bwakutumizhanya shipo sha shakulya kuli umwi wuumwi.
Ipobwe Lya Pulimu
20Modekayi wakaalemba makani a shintu sheshi u kutuma maŋwalu ku Bajuda boonse bakaakuli mu shooko shoonse sha mwami Ahasuyelusi, shakaakuli kufhwaafhwi u kulaale. 21Wakabashimwina kwaamba baakubamba buzuba bwekumi u mazuba one (14) u buzuba bwekumi u mazuba osanwe (15) mu mwezhi wa Adali, mwaka u mwaka, 22kwiingaina u mazuba azo Bajuda ngubakalyookezha kuhwa ku bashinkondonokwabo, kwiingaina u mwezhi wezo wakasandula kuusa kwabo kuba kubotelwa u kulila kwabo kuba kulyookezha; kwaamba mazuba azo abe epobwe u kubotelwa, mazuba a kutumizhanya shipo sha shakulya kuli umwi wuumwi u kupa shipo ku bapushi.
23Ubobo Bajuda bakachihumina checho nchibakakanka kuchita u checho Modekayi nchaakabalembela. 24Nkaambo Hamani Muagagi, mwanakwe Hamedata, nshinkondonina Bajuda boonse, wakaakukanzile kulwisha Bajuda kwaamba abazonaune, kaumine inkakata (Puli), kwaamba alete lupyopyongano u kubazonauna. 25Pele lelyo makani aza naakaateelela mwami, wakapa malailile mu bulembe kwaamba makanze akwe mabiyabi a kulwisha Bajuda, apiluke amutwi wakwe mwini, walo u banakwe batungwe a shisamu. 26Ubobo aza mazuba bakaaulika izhina lya Pulimu (inkakata), kuhwa kwizhina lyankakata. Ukaambo ka shesho shoonse shakaakulembelwe muluŋwalu lolu, shesho nshibakabona mu makani aza u shesho shakabachitikila, 27Bajuda bakalibikila mulawo beni u balunungu lwabo u babo boonse bakabasangana, kwaamba baakubamba mazuba aza obile achiindi chisale amwaka a amwaka, kwiingaina u shesho shakaakulembelwe. 28Mazuba aza alyeelele kuzhibalukwa u kubambwa mu mazhalane oonse, munhubo shoonse, mu shooko u mu minzhi mikando, kwaamba mazuba aza a Pulimu batakaleka kwaabamba akati ka Bajuda na kuleka kwaazhibaluka munungu shabo shoonse.
29Ngoona mwami mukaintu Esita, mwanakwe Abihaili u Modekayi Mujuda, bakahumizha mu bulembe, kuzuzukizha luŋwalu lwabili lwaamba sha Pulimu. 30Maŋwalu akatumwa ku Bajuda boonse, ku shooko shili mwaanda u makumi obile u shooko chiloba (127) sha bulelo bwaka Ahasuyelusi, mu mazwi a luumuno u bushomeshi, 31kwaamba aza mazuba a Pulimu alyeelele kubambwa achiindi chisale cha wo, mbubona Modekayi Mujuda u mwami mukaintu Esita mbubakabaambila, mbubona mbubakalibikila mulawo lwabo beni uku lunungu lwabo, kukwatikizha kuliimya kulya u kutengula. 32Malailile a mwami mukaintu Esita, a shiyanza sheshi sha Pulimu, akazuzukizhiwa ulimwi akalembwa mwibuka.
Bible Society of Zambia