Esita 6
6
Mwami Walemeka Modekayi
1Mashiku azo ngoona, mwami wakakwata chilabila. Ubobo wakalailila kwaamba kuletwe ibuka lya chizhibalusho cha makani aakachitika kale-kale. Ubobo lyakabalwa kumbele lyakwe. 2Mwakayana mulilembelwe mbuli Modekayi mbwaakazubulula makanze aka Bigitana u Teleshi, bazhibe ba mwami bobile, babo bakaakulinda kumulyango, babo bakaakuzanda kuyaya mwami Ahasuyelusi. 3Ngoona mwami wakaamba ati, “Anu nchiinzhi nchaakachitilwa Modekayi ali chechi?” Bana bakubushi bakaakumusebezela mwami bakamwambila ati, “Kwiina nchaakachitilwa.” 4Ngoona mwami wakaamba ati, “Nguni uli mu lubanza?” Iinzho Hamani nakenjila mu lubanza lwaansengwe lwaŋanda ya bwami kwaamba ashimwine mwami kwaamba Modekayi atungwe achisamu checho nchaakamubambila. 5Bana bakubushi ba mwami bakamwaambila ati, “Hamani nguuliko, ulizhimine mu lubanza.” Ngoona mwami wakaamba ati, “Amuleke anjile.” 6Ubobo Hamani wakenjila, mwami wakamwaambila ati, “Nchiinzhi cheelele kuchitwa ku mulombwana wezo mwami ngwaabotelwa kupa bulemu?” Hamani wakalyaambauzha mukamwini ati, “Nguni mwami ngwaabotelwa kupa bulemu kubaala ume?” 7Hamani wakamwaambila mwami ati, “Mulombwana wezo mwami ngwaabotelwa kumupa bulemu, 8akuletwe mingaanjo ya bwami, yezho mwami njakaakusama, imbizhi yezho mwami njakaakuliza, yezho ikwete mushini wa bwami amutwi wayo. 9Leka mingaanjo yiimbizhi shipewe kuli womwi wa basololi balemekwa ba mwami. Leka bamusamike mulombwana wezo ngwaabotelwa kupa bulemu, bamana bamusololele ambizhi kwiita mwibunganino lya munzhi mukando u kwaambilizha kumbele lyakwe ati, ‘Mbubolya mbukukaachitwa ku mulombwana wezo mwami ngwaabotelwa kupa bulemu.’” 10Ngoona mwami wakaambila Hamani ati, “Fhwambaana; bweza munganjo yiimbizhi, mbubona mbuwaamba, chita bobo kwa Modekayi Mujuda, wezo ukala amanjililo aŋanda ya bwami. Utashiyi nichiba chomwi ali shesho nshiwabanda.” 11Ubobo Hamani wakabweza mingaanjo yiimbizhi, wakamusamika Modekayi u kumusololela kwiita mwibunganino lya munzhi mukando, kaya bwaambilizha kumbele lyakwe ati, “Mbubolya mbuchikaachitwa ku mulombwana wezo mwami ngwaakaabotelwa kupa bulemu.”
12Ngoona Modekayi wakapiluka kumanjililo aŋanda ya bwami. Pele Hamani wakaya chakufhwambaana kuŋanda yakwe, bulihumbile ku mutwi, ulaya bulila chakulyeetezha. 13Hamani wakaambila Zeleshi mwinakwe u banakufhunwa bakwe boonse shesho shakamuchitikila. Ngoona balombwana bakwe basongo u Zeleshi mwinakwe bakamwaambila ati, “Wakanka kubula insana kwa Modekayi. Ngwa lunungu lwa Bajuda, ubobo tukakonzha kumuzunda pe! Nchobeni ulakakuzunda.”
Esita Wazubulula Makanze aka Hamani
14Lelyo nibakakuchibandika aze, bazhibe ba mwami bakashika chakufhwambaana kutola Hamani kwipobwe lelyo Esita ndyaakabamba.
Bible Society of Zambia