Esita 5
5
Esita watamba mwami u Hamani kwipobwe
1Mu buzuba bwatatu (3) Esita wakasama shakusama shakwe sha bwami u kuzhima mukati mu lubanza lwaŋanda ya bwami, kumbele lya shimpetu sha mwami, lelyo mwami kashite achuuna cha bwami chakwe mukati ka chimpetu cha bwami, bulangene umanjililo aŋanda ya bwami. 2Lelyo mwami nakamubona Esita mwami mukaintu ulizhimine mu lubanza, wakayana choolwe mu menso akwe, wakamutondeka Esita musako wa Goludi wezo wakaakuli mwitashi lyakwe. Ngoona Esita wakaswena afhwaafhwi u kukwata kunsonga ya musako. 3Mwami wakamwaambila ati, “Anu nchiinzhi, mwami mukaintu Esita? Nchiinzhi nchuukumbila? Chilapewa kwako, nichikaba chisela cha bulelo bwangu.” 4Esita wakaamba ati, “Kuti na chilamubotela mwami, leka mwami u Hamani beze bwasunu kwiipobwe lelyo ndindabambila mwami.” 5Ngoona mwami wakaamba ati, “Amumulete Hamani chakufhwambaana, kwaamba tuchite mbubona Esita mbwaakumbila.” Ubobo mwami u Hamani bakeza kwipobwe lelyo Esita ndyaakabamba. 6Lelyo ipobwe nilyakamana, bakaakuchinwa waini, ngoona mwami wakabuzha Esita ati, “Nchiinzhi nchuuzanda? Ndakupa. Ulimwi nchiinzhi nchuukumbila? Nichikaba chisela cha bulelo bwangu, chilazuzukizhiwa.” 7Ngoona Esita wakaingula ati, “Kuzanda kwangu u kukumbila kwangu nkukoku: 8Kuti na ndayana choolwe mu menso a mwami, ulimwi kuti na chilamubotela mwami kumpa nchinzanda u kuzuzukizha kukumbila kwangu, leka mwami u Hamani bazhize kwipobwe lelyo ndiinti nkababambile, zona ndakachita mbubona mwami mbwaamba.”
Hamani Wakanza Kuyaya Modekayi
9Hamani wakahwa butangele bobo buzuba u kubotelwa mu monzo. Pele lelyo Hamani naakabona Modekayi kumanjililo anda ya bwami, kwaamba wiina kuzhimuka na kuzhangama kumbele lyakwe, wakazula bukali kwa Modekayi. 10Nikuba bobo, Hamani wakookwata monzo, wakaya kuŋanda yakwe. Wakatuma koompolola banakufhunwa u Zeleshi mwinakwe. 11Hamani wakabapandulwila a buhubi bwakwe, mweelwe wa banakwe, bulemu bwakamupa mwami lelyo naakamusumpula, mbwaakamulemeka kubaala beendelezhi u batwanga ba mwami. 12Ngoona Hamani wakaamba ati, “Aze mwami mukaintu Esita kwiina unji ngwaatamba kwiza u mwami kwiipobwe lelyo ndyakabamba, chita bulyo ume u mwami. Uzona alimwi, ndatambwa antoomwi u mwami. 13Nikuba bobo, chechi choonse chiina bulumbu kwangu, ndaakuchimubona Modekayi Mujuda kukala a amanjililo aŋanda ya bwami.” 14Ngoona Zeleshi mwinakwe u banakufhunwa boonse bakamwaambila ati, “Akushimpwe shisamu shilampa tukokola makumi osanwe (50) kuya mwizeulu. Chifhumo-fhumo ukamwaambile mwami kwaamba Modekayi akatungwe shisamu ku matako kushikila shikapole amutwi. Wamana ukaye umwami butangele kwipobwe.” Muzeezo wezu wakamubotela Hamani, ubobo shisamu shakashimpwa.
Bible Society of Zambia