Esita 4
4
Modekayi wakumbila kuyohwewa kuhwa kwa Esita
1Lelyo Modekayi nakateelela shoonse shesho shakachitika, Modekayi wakazapaula shakusama shakwe, wakasama masaka u kubika itwe amutwi wakwe. Wakaya akati-kati ka munzhi mukando, wakapozomoka u kulila chabukali. 2Wakaliza kuya kumanjililo aŋanda ya bwami. Pele wiina ukenjila nkaambo kwiina wakaakuhumizhiwa kunjila busamine masaka. 3Mu shooko shoonse, koko koonse malailile a mwami u bulembe bwa mulawo nkubwakashika, kwakaba kulila chini-chini akati ka Bajuda, ukuliimya kulya, kulila chakuliluba u kutengula, banji-banji bakasama masaka u koona mwitwe.
4Lelyo banatulindu baka Esita u bazhibe bakwe nibakamushimwina, mwami mukaintu wakapenga chini-chini mu monzo. Wakatuma shakusama shakusamika Modekayi, kwaamba asamunune masaka, pele wakashikaka. 5Ngoona Esita wakoompolola Hataki, womwi wa bazhibe ba mwami, wezo wakaakusalilwe kumusebezela. Wakamulailila kwaamba akuya kwa Modekayi akateelele chakachitika ulimwi ukaamboonzhi. 6Hataki wakaya kwa Modekayi kwibunganino lya munzhi mukando, kumbele kumanjililo aŋanda ya bwami, 7Modekayi wakamushimwina shoonse shakamuchitikila u mali azo Hamani ngaakashomezha kulipila mu shizobolelo sha mwami kwaamba Bajuda bazonaunwe. 8Ulimwi Modekayi wakamupa Hataki bulembulule bwa mulawo wezo, bobo bwakaambilizhiwa mu Susa, bwakuzonaunwa kwabo, kumutondezha u kumupandulwila, kwaamba Esita akuya ku mwami kukumbila choolwe u kulyeenzelela kwakwe mu busena bwa bantu bakwe. 9Hataki wakaya u kumwaambila Esita shesho Modekayi nshaakaamba. 10Ngoona Esita wakamwaambila Hataki u kumulailila kwaamba akuya kwa Modekayi u kwaamba ati, 11“Boonse batwangaakwe mwami u bantu ba shooko sha mwami balizhi kwaamba ati mulombwana na mukaintu wenjila mukati mu lubanza lwa mwami chakutoompololwa, kuli bulyo mulawo womwi, ulyeelele kuyaiwa, chita bulyo wezo mwami ngwaatondeka musako wa goludi kwaamba akwate bumi. Pele ume, ndiina koompololwa kunjila mu mwami aza mazuba aali makumi otatwe (30).”
12Bakamushimwina Modekayi checho nchaakaamba Esita. 13Ngoona Modekayi wakabaambila kumwiingula Esita ati, “Utatelaiki ati mbuuli muŋanda ya mwami, uwe ulakafhutuka kubaala Bajuda bamwi. 14Nkaambo kuti na uliinze bulyo achiindi chechi, kuyohwewa u kuhunwa kwa Bajuda kulakahwa ku busena bunji, pele uwe u baŋanda yaka uso, mulakaloba. Nguni uzhi, ndiza nchiwakazhila mu bulelo ku chiindi chili ukoya chechi?” 15Ngoona Esita wakabashimwina kumwiingula Modekayi ati, 16“Koya, bunganya Bajuda boonse bali mu Susa, amuliimye kulya u kunwa mu busena bwangu, mutakalyi nikuba kunwa kwa mazuba otatwe (3), mashiku u muunza. Ume u banatulindu bangu, aswe tulakaliimya kulya ukoya umwe. Ndamana ndakaya ku mwami, nikuba ati tooli mulawo, kuti na ndaloba, ati ndaloba mbubona bobo.” 17Ngoona Modekayi wakaya kuchita shoonse mbubona Esita mbwakamulailila.
Bible Society of Zambia