Esita 3
3
Hamani Wakanza Kuzonauna Bajuda
1Nishakamana sheshi, mwami Ahasuyelusi wakasumpula Hamani Muagagi, mwanakwe Hamedata u kumubika achuuna chikando kubaala beendelezhi boonse mbuchakaakulyaabo. 2Boonse batwangaakwe mwami, babo bakaakuli kumanjililo aŋanda ya bwami, bakamulemeka u kumufhukamina u kubika bushu anshi kumbele lyaka Hamani, nkaambo mwami mbwaakalailila. Pele Modekayi wiina ukafhukama u kubika bushu anshi na kumulemeka. 3Ngoona batwanga ba mwami, babo bakaakuli kumanjililo aŋanda ya bwami, bakaambila Modekayi ati, “Nkaamboonzhi tuchilila malailile a mwami?” 4Lelyo nibakaakumwaambila, buzuba u buzuba, walo katabateeleli. Ubobo bakashimwina Hamani kwaamba babone na mazwi aka Modekayi ngabwini, nkaambo wakabashimwina ati kali Mujuda. 5Iinzho Hamani naakabona kwaamba Modekayi wiina kufhukama u kubika bushu anshi na kumulemeka, Hamani wakalemana chini-chini. 6Nkaambo kashimwininwe kale kwaamba Modekayi Mujuda, Hamani wiina ukazanda kuyaya bulyo Modekayi iche. Ubobo wakazanda kuzonauna Bajuda boonse, bantu baka Modekayi, mu bulelo boonse bwaka Ahasuyelusi.
7Mu mwezhi wakutaanguna, nguwena ngu mwezhi wa Nisani, mu mwaka wekumi u myaka yobile (12) ya mwami Ahasuyelusi, kabauma inkakata kumbele lyaka Hamani buzuba u buzuba; a mwezhi a mwezhi, kushikila mwezhi wekumi u myezhi yobile (12), nguwena ngu mwezhi wa Adali. 8Ngoona Hamani wakaambila mwami Ahasuyelusi ati, “Kuli bantu bamwi bazandeele akati ka bantu mu shooko shoonse sha bulelo bwako, ulimwi balalyaandaanya. Milawo yabo ilyaandeene kuhwa kuli yezho ya bantu boonse, ulimwi tabasunga milawo ya mwami. Ubobo tachikaboti kwaamba balekwe bulyo. 9Kuti na chilamubotela mwami, akulembwe mulawo kwaamba bazonaunwe, ulimwi ndakalipila matalanta a siluva aali shuulu ikumi (10,000), mu matashi a babo bapelwe mulimo wakweendelezha makwebo a mwami, kwaamba babike mu shizobolelo sha mwami.” 10Ubobo mwami wakakusha chikanto chakwe kuhwa kwitashi lyakwe u kuchipa Hamani Muagagi, mwanakwe Hamedata, shinkondo wa Bajuda. 11Amane mwami wakaambila Hamani ati, “Bajuda u mali abo shoonse nshako, chita kufhumbwa chikubotela.” 12Ngoona balembi ba mwami bakoompololwa mu buzuba bwekumi u mazuba otatwe (13) bwa mwezhi wa kutaanguna, kwiingaina ushesho shoonse nshakalailila Hamani, mulawo wakalembwa ku beendelezhi ba mwami, ku beendelezhi ba shooko shoonse, ku beendelezhi ba bantu boonse, ku chooko chimwi u chimwi mu bulembe bwa cho chini uku chishi chimwi u chimwi mu mulaka wa cho chini. Wezu mulawo wakalembwa mwizhina lya mwami Ahasuyelusi u kukantwa u chikanto chakwe. 13Maŋwalu akatumwa ku shooko shoonse sha mwami u malailile akuzonauna, kuyaya u kuzonauna chakumaninina Bajuda boonse, bana bakubushi u bachembele, bakaintu u bana bashoonto, mu buzuba bomwi, mu buzuba bwekumi u mazuba otatwe (13), bwa mwezhi wekumi u mazuba obile (12), nguwena ngu mwezhi wa Adali, ulimwi u kusaala lubono lwabo. 14Bulembulule bwa mulawo bwakapewa ku shooko shoonse kwiita mukwaambilizhiwa ku bantu boonse, kwaamba balibambile ku buzuba bobo. 15Bashimposo bakatumwa chakufhwambaana kwiingaina u malailile a mwami, ubobo mulawo wakapewa mu chizubilo chizumu cha Susa. Mwami u Hamani bakakala u kunwa, pele mu munzhi mukando wa Susa mwakaba lupyopyongano.
Bible Society of Zambia