1 Timoti 3
3
Basololi ba Mbungano
1Ngaaza makani meni meni, na muntu ulazanda kuba Bishopu wa mbungano, wezo ati wasala mulimo wa bulemu. 2#Tai 1:6-9Musololi wambungano ulyeelele kubula kampenda, ulyeelele ati katwele mukaintu womwi bulyo, ushitikile mu mizeezo ulimwi kali shicamba ulilemeka uutambula kabotu beenzu ulimwi abe mwiiyi mubotu, 3teelele kuba cakolwa naa muntu mulwati, pele ulyeelele kuba mubonhu monzo shiluumuno, teelele kuzandisha mali. 4Ulyeelele kulela mukwashi wakwe kabotu ulimwi banakwe balyeelele kumuteelela u kumulemeka mu shiyanza shoonse. 5Nkaambo na kuti muntu talozha kulela mukwashi wakwe kabotu, no ulakonzha kweendelezha buti imbungano ya Leza? 6Teelele kuba mweenzu mu lushomo, nkaambo ulaba naalisumpula amana ulawa bwakawa Shaatani. 7Ulyeelele kuba muntu ulemekwa ku bantu batali ba mu mbungano, kwaamba atakasampuki u kuwila mukooze ka Shaatani.
Ba Dikoni ba Mbungano
8Ba dikoni abo umbona balyeelele kuba bantu bakwete bulemu batali ba shimukanwa ulimwi bashomeka batakolwa mukuku, naa kufwunisha mali. 9Balyeele kukwatisha lushomo lwini lwini lwakazubululwa u Leza, u mizeezo iluleme. 10Abataangune basunkwe, bayanwa ati bayina kampenda bapewe mulimo wabu dikoni. 11Benabo balyeelele kukwata shimo shibotu ulimwi tabeelele kuba bahwizhi, balyeelele kuba bashitikile mizeezo ulimwi bashomeshi mu shintu shoonse. 12Dikoni ulyeelele kwaamba katwele bulyo mukaintu womwi, ulimwi ulyeelele kweendelezha kabotu banakwe u mukowa wakwe. 13Babo ba dikoni boosebeza kabotu mulimo wabo balakwata shiimo shibotu ulimwi balakonzha kwaamba cakutatiya makani a lushomo lwabo mwa Kilisito Jeso.
Maseseke Makando
14Nikuba ati ndakanza kwiza kumuswaya ca kufwambaana, ndamulembela malailile aza kwaamba, 15na ndemuka kwiza, malailile ali mu luŋwalu lolu amuyohwe mbumweelele kulilemeka muŋanda ya Leza ili njimbungano ya Leza upona, musemu u kwatilile lushinizho. 16Cini cini cakutazuluzha, aza makani maseseke a bukombi bwesu makandosha nkaambo,
Wakalibonya umubili wa buntu,
wakatondezhewa ati uliluleme u Moza,
amana wakabonwa u baanjelo.
Wakakambaukwa mashi oonse,
wakashomwa inshi yoonse mbwiibelele,
amane wakatolwa kwizeulu mu bulemu.
Currently Selected:
1 Timoti 3: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.