1 Timoti 2
2
Makani a Kukomba
1Ca kutaanguna ndazanda kumuzumya zumya kwaamba, mukombele bantu boonse, kukomba kwenu kube kwa kukumbilila bamwi, u kulumba Leza kucitilwe bantu boonse, 2mukombele bami u beendelezhi, kwaamba tuukupona kabotu muluumuno u kupona bumi buleta bulemu kwa Leza munzhila iluleme. 3Ceci ncibotu ulimwi cilamwiinina Leza mufwutuli wesu. 4Leza ulazanda ati woonse muntu akanununwe ulimwi akazhibe lushinizho. 5Nkaambo kuli bulyo Leza womwi, ulimwi kuli muzhiminizhi womwi uleta Leza u bantu antoomwi, wezo muntu ngu Kilisito Jeso. 6Walo wakalyaaba kwaamba abafwutule boonse bantu bali ano anshi. Ceci cakaba citondezho aciindi ceelele, kwaamba Leza ulazanda kunununa bantu boonse. 7#2 Tim 1:11Nkaambo ceci ncindakasalilwa kuba mutumwa u muiyiyi wa bantu bakunze, kukambauka Mulumbe wa lushomo u lushinizho. Nshibeyi, ndaamba meni meni!
8Inzho ndazanda ati mu masena a kubunganina boonse balombwana bakomba, batambike matashi asalala mwizeulu cakutalemana nikuba kuzumanikizhanya, 9#1 Pita 3:3abo bakaintu balyeelele kusama kabotu ca bulemu shisani sheelele, kutali kupeswa masusu munzhila yakulikolaika ciitilila, naa kusama inkaya sha goludi, nibuba bulungu budula munshingo u shisani shidula. 10Bakaintu baliboshe u milimo mibotu bucita bakaintu batiya Leza. 11Bakaintu baiye buliinzile cakulibozha. 12Nshihuminya bakaintu kuyiisha naa kweendelezha balombwana, balyeelele kuliinza bulyo. 13#Mata 2:7; Mata 2:21, 22Nkaambo Adamu nguwakataanguna kulengwa naaya alengwe Eva. 14#Mata 3:1-6Ulimwi tali Adamu wakacengwa, mukaintu nguwakacengwa ukuusotoka Mulawo waka Leza. 15Pele mukaintu ulakafwutulwa kwiita mukuzhala bana kuti watolelela kushoma u lufwuno u busalazhi cakulibonzha.
Currently Selected:
1 Timoti 2: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.