Ə́rɨ́b nùb tómé yi ə́llé 28

Nɨ́m yi féínna Pôl tɨ́kwá̧ Mâltə̀ noò

1Ɓáíhô̧ nɨ́mè á nɨ́m ók ɨ́r tɨ́kwá̧ kíì á Mâltə̀. 2Nùb tɨ́kwá̧ kɨ́ noò ɨ́ gàmɓà nɨ́m ɓe nyàŋnjɔ̧̀. Hȩ nàá yi yaré nàniì, ndoŋnɨr yaá ndɨ̀ŋnɨ. Á ŋgáb latɨ wa kàm kù, ɗà ŋgáb ɨ́ ɓáàsò lâs wa kɨ́ ònnɨ. 3Pôl ɨ́ ɓáàwò ɓwáté gònɨ wààrénɨ wa̧á̧, á nyó̧ó̧ kù yi laŋhó̧ nó ɓe mɨ́màáŋ waá; ɗà ŋgə́ ɨ́ nómmèrê Pôl ŋgáré. 4Ɓwâ nùb tɨ́kwá̧ kɨ́ noò yi pə́ nyó̧ó̧ rè Pôl ŋgáré sóŋtèèniì, ŋgáb ɨ́ yà nyìntèènɨ mvókín ŋgábè no ɨnè: «Nɨ̀ŋgwá rè tɨ̀ duhá nɨ́ nò kwíhe nɨ̀rì, ɓetí dugɨ hȩ ŋgə́ ɓáíhó̧ mɨ̀kwehɨ̀rí rè, mèín lɔ̧̀ɔ̧́ síhé nɨ ə́ə̀mháwa ŋgə́ dùtɨ.» 5Ɨ́dù Pôl ɨ́ mììlèèrékî nɨ́ nyó̧ó̧ rè wa̧á̧, ɗà ŋgə́ ɨ́ dùndôŋ nɨ́ ju noò. 6Nùb kɨ́ yaá lə́ə̀mnɨ vúm ɓa pénɨ ŋgáár Póòl múnnɨ á, kɨ́ kù ŋgə́ gùséɓàcéyènɨ ɗàá kúri á yoo. Ɨ́dù hȩ ŋgáb móŋ bɨ́ nȩ̀ȩ́ nɨ́m kù nɨ ŋgə́ ndɨ̀ŋwá rèé, ŋgáb ɨ́ cə́ndɨ̀cì bɨ́ ɓɔ̧, á ŋgáb ta: «Ŋgə́ nɨ mèín á.»

7Gə́nȩ̀ȩ́ ɓè, nò jíri kù ɨ́r yi du Pùbɨ́lɨ́yùs yaá ɓe dúú nóò. Ŋgə́ ɨ́ gàmɓà nɨ́m ɓe ɗûnɨ́m, á nɨ́m jə́b no yó há̧á̧ jíì taarɨ́b. 8Tá Pùbɨ́lɨ́yùs kíì yaá nɨ́ yó ɗàá gwîn, ɓetí cɨ̀mcɨ̀m yaá ŋgə́ ndɨ̀ŋnɨ, ŋgə́ a njínce. Á Pôl yi gi ŋgə́ pénɨ, ŋgə́ ɨ́ yôŋ Mèín, ŋgə́ ɨ́ kɨ́kwû ŋgə́ ŋgáár só ɗà ŋgə́ ɨ́ wáŋhȩ̀ ŋgə́. 9Cùr kɨ́ no, nɨ̀yáàb tɨ́kwá̧ kɨ́ noò ɨ́ ɓáàwòɓwéhè. Pôl ɨ́ wáŋhȩ̀ ŋgáb. 10Nyər ŋgáb yi nakom nɨ́mè yaá túùmɓànɨ jɨ̧ ŋgáb du nɨ́m jə̀ŋniì. Ɓwâ nɨ́m yi du lénɨ kwánnè, ŋgáb ɨ́ nà nɨ́m nɨ́ɨ́b lâs yi du nɨ́m ɗúnànɨ ɓe ɨ́r gùr kíì.

Pôl féíntɨ́ Rôm

11Cùr njumi taarɨ́bí á nɨ́m lə́ndóŋ kwáí jíri kù yi éíwo Àlèksàndɨ́ríì no, ɨ́r kwáí kíì yaá: «Mèín bɨ nyɔɔb».#28.11 Kàstɔ́ɔ̀r ɓe Pólùs yɨɨ́m nyɔɔb nyɨ́ŋní Gɨrêk ɓoò á. Nùb ə́ré kwáí jírií ɓwâ ya kɨ́ yaá ŋgáb ánɨ hȩ mèín bɨ gə́tɨtee ŋgáb mvúmné Mbɨ̀ɨ̀ŋ ya bɨréɓwéetɨ́ ŋgə́ tɨ́kwá̧ kɨ́ no ɓè. 12Nɨ́m ɨ́ féìn Sìràkûs, á nɨ́m jə́b ɓè jíì taarɨ́b. 13Ə́rè ɓèé, nɨ́m ɨ́ ɓàŋgè swallì swallì, nɨ́m ɨ́ gì féínnɨ Règíyò. Ye saín, cɨ́cɔ̧̂ sunné ɨ́ yà fùwúnɨ, ɗà ɨ́ gèkɔ́hè nɨ́m jíì bɨrɨ́b há̧á̧ Pùjóòl. 14Kwɨ́í kɨ́ no, nɨ́m ɨ́ kwà mwin yàáb ə́mní ɓè, á ŋgáb ta nɨ́me vúm jə́bhó̧ jíì tɨ́ɓaám yáá. Nɨ́m yi ndóŋ ɓe nɨ́m há̧á̧ nɨ́m ɨ́ gì féínnɨ Rôm á kí. 15Mwin yàáb ə́mní Róòm yi ók àm nɨ́m du gòniì ɨ́ gò nɨ́m móŋnɨ há̧á̧ yɨ́ kùb yi ɓékom «Mákə́tì Àpìyúùs» lɨ. Nùb kù ɨ́ mècê nɨ́m móŋnɨ yɨ́ kùb yi ɓékom «Dúhɨ́b nɨ̀gwíbí taarɨ́b» lɨ. Pêé Pôl yi pə́ ŋgábè, ŋgə́ ɨ́ sáktè Mèín, ɗà njɔ̧̀ ɨ́ tàmcù ŋgə́. 16Ɓwâ nɨ́m yi féín Róòm, á kùb ta Pôl dùɓà nɨ ŋgə́ mwi̧, jɔ̀sé ɓe sójà duce ŋgə́ gə́tɨ̀niì yáá.

Pôl á Rôm tànɨ Kìn Mèèín

17Cùr kɨ́ no, jíì taarɨ́b, kɨ̀jííb Jwîf ɓoò yi du Róòm, Pôl ɨ́ ɓéwò ŋgáb no yó. Ɓwâ ŋgáb yi ɓáaworé, ŋgə́ ɨ́ tànà ŋgáb ɨnè: «Mwin yàáb, dugɨ hȩ mɨ du mɨ́ nɨ́m kù ndɨ̀ŋɓáàŋwá ɓe péín gbàŋ nɨ́mè, dùgɨ̀ ɓe péín ɗɨ́m tákɨ̀rɨ́b nɨ́mè, Jwîf bɨ tɨ bií mɨ Yèrúsàlèm. Ŋgáb ɨ́ â mɨ gɔ̀kkɨ́nànɨ nùb Róòm. 18Nùb Róòm kɨ́, cùr ŋgáb tɨ fɔ́ mɨ nɨ́m tɨ ndóŋndé, ŋgáb ɨ́ ɗû mɨ mbɨ́kcùnɨ, ɓetí ŋgáb tɨ bɨ àmɨɨr kù ŋgáb ɓa mɨ no kwíìniì pə́wa. 19Ɨ́dù Jwîf bɨ ɨ́ dù bɨ́ ə́ə̀mwá àm kùb mbɨ́k mɨ na kɨ́. Á mɨ tɨ ta duú u̧ naá, ŋgù̧ú̧ gɨ̀ndóŋ mvèìn kàm jírií tíí yáá. Tɨm cè nɨ́ àm mɨ ɗú gònɨ dɨ̀ɨ̀nɨ ti mɨ nɨ̀mɨ́rí sé, mɨ tɨ go mɨ kààŋnɨ síí á. 20Nɨ́m tɨ ɗú nɨ́me nyí ɓàntɨ mɨ a nyìnnà nyínè du kí á, ɓetí ɓe àm gíí gbàŋ Ísràyéèl du ɓe kí rè á mɨ du nìrì ru.» 21Á ŋgáb tana ŋgə́ ɨnè: «Nɨ́m nɨ kwàwá káàtà kù go Jùdê kùb tɨinwo àm wo sóò nokwe. Mwin yàáb nɨ́mè kù cè bɨ́ ku éíwòwá gònɨ nɨ́m tànànɨ nɨ́m tɨ ndóŋ ɓe wé, kɨ́ kù nyìŋɓáàŋnɨ ɓe ɨ́r woò. 22Ɨ́dù nɨ́m á ɗúɓànɨ wu tànà nɨ́m nɨ́m wu du lə́ə̀mniì. Ɓetí nɨ́m ɗəəŋtɨ́ yɨ́ lâs, kùb bɨ ɗúnɨ ɓáhɨ́r ə́ə́m wu du nó rè ɗàà.»

23Pôl ɓe ŋgáb ɨ́ ɓwáì ye ŋgáb ɓa ɓàìncùniì. Á ye kɨ́ ŋgáb yi goɓagɨ ví̧i̧, ŋgáb ɨ́ gò kwànɨ Pôl yá ŋgə́ ya jə́bkom kɨ́. Yànɨ yekɨ́rɨ̀b há̧á̧ lɨ́tɔ̧ɔ̧́, Pôl yaá ŋgáb tànànɨ àm Ŋgɔ̧́ɔ̧̀ Mèèín, ŋgə́ a tananyaaŋce ŋgáb njàb ya kwe. Ŋgə́ ɨ́ yà ŋgáb vùùŋtèècùnànɨ ɓíhɨ̀b Mòyíìs ɓe káàtààb tɨ́kɨ̀nɨ́b Mèèín, ndɨ̀ŋnɨ ŋgáb ə́ə̀m nɨ́m ní du nyìnnɨ ɓe ɨ́r Yésùù rè àmɨɨr á. 24Nùb kù ɨ́ ə́mnè nɨ́m ŋgə́ yi du nyìnnɨ kɨ́. Nùb kù ɨ́ mvúɓà ə́ə̀mnɨ. 25Hȩ ŋgáb ya du gɨ̀cùnɨ u̧ ŋgáb ɓɔ̧ mwi̧ ɗàwáá, á Pôl tanaɗóo ŋgáb ɨnè: «Èsáyà ɓɔ̧ɔ̧, ŋgə́ nò du tɨ́kìn Mèèín, Nyéhè Sarîn yi nyinwonaá tákɨ̀rɨ́b nyínè nyindí, nyindí kɨ́ á àmɨɨr. 26Ɓetí ŋgə́ ya wáaɓatɨ́ ɨnè:

‹Mèín ta: Gɨm tànànɨ gbàŋ kɨ́ ɨnè:

nyí kwá óknyaaŋɓa nɨ́m kùb du nyìnniì ɨ́dù nyí a dù nɨ́ njàb kɨ́ óo,

nyí kwá góomnyaaŋɓa, nyí a dù nɨ́ pə̂r.

27Ɓetí gbàŋ kɨ́, nɨ́m yɨ́ ŋgə́ sóò nɨ ɗàcɨ̀wá;

ŋgáb ɗonɨkíí tó,

vúm tɨ̀ ókɓaye.

Ŋgáb nyɨ́ɨmkíí íí,

vúm tɨ̀ pə́ɓaye,

vúm tɨ̀ kwaɓaye kɨ̀cáàb

vúm ɓandɨcuró mɨ noò. Hȩ ŋgáb ndɨŋ u̧ kɨ́, ŋgáb tɨ̀ bɨ ɓâr.›

28Pôl ɨ́ ɓààrékwà ɨnè: Ɗəəŋnáɓam ɨnayâna kìn ɓə́r Mèín du nàniì yi gona nɨ nùb du bɨ́ Jwîf séé á: kɨ́ ɓoò, ŋgáb ɓa bɨ óknɨ á!»

29[Hȩ Pôl nyìnnɨ u̧nèé, Jwîf bɨ ɨ́ éíjì̧ì̧rê gùr, ŋgáb a ndaigece.]

30Pôl yi ndɨŋtɨ́ ɓè dáín bɨrɨ́b, ŋgə́ a njáablɨ́ŋce mwèìn dúhéé. Yó ku á ŋgə́ ya gamkom nùb go ŋgə́ lɨ́ŋniì lâs lu. 31Vùù yi nɨ́ ŋgə́ bìnɨ ɗàà, nɨ́m kù yi nɨ́ ŋgə́ jáàbɓwênɨ ɗàà ɓe ɓéhèé àm Ŋgɔ̧́ɔ̧̀ Mèèín, dùgɨ̀ ɓe tɔ̀ɔ́ nyindí du ŋgèènɨ Yésù Krístù nò du Kékéé.

Currently Selected:

Ə́rɨ́b nùb tómé yi ə́llé 28: NTV

Highlight

Compare

Copy