Ə́rɨ́b nùb tómé yi ə́llé 27

Sójààb gendóŋtɨ́ Pôl Rôm

1Ɓwâ Fèstûs yi ta nɨ́m lə́ kwáí jírií gìnɨ Ìtàlíì, á kùb ɓé Jùlìyûs mvèìn sójàbì kùb ɨ́ ɗòblê ŋgə́ Pôl ɓe nùb nìrì kù cùrì, gə́tɨ̀gènɨ ŋgáb. Jùlìyûs kɨ́ yɨɨ́m nò du kɨ́ɨ́nɨ kúùŋ sójààb Róòm kùb yi ɓékom «Kúùŋ sójàbì mvèìn kàm jírií» rɨ á. 2Kwáí jíri kù yi éíwo Àdɨ̀ràmíìt yaá ndóŋnɨ gìnɨ péín sɔ̀ ɗɔ̀ɔ́b Àsíì, nɨ́m ɨ́ lê kwáí kɨ́ no, nɨ́m ɨ́ gì. Àrìstârk yaá ɓwê ɓe nɨ́m, ŋgə́ yɨɨ́m nò Tèsàlòníìk á, ŋgɨ̀ŋgɨ́ŋ ɗɔ̀ɔ́b Màsèduwáàn no. 3Ye saín, nɨ́m ɨ́ féìn Sìdôŋ. Hȩ Jùlìyûs yi du nɨ́ gə́tɨ̀ɓànɨ Pôl ɓe nyàŋnjɔ̧̀ rèé, ŋgə́ ɨ́ mbɨ́knà ŋgə́ mvókín ŋgə́ gɨ ɓwàjììb noò lɨ́ŋtèènɨ àm ŋgáb na ŋgə́ nɨ́m ŋgə́ ɗúré. 4Éíndôŋ ɓèé, nɨ́m ɨ́ gì nɨ́ ɓàŋnɨ tɨ́kwá̧ Cîpɨ̀rə̀ cùrì ɓetí kəŋmbə́r yaá nɨ́ nɨ́m no lócùnɨ. 5Nɨ́m ɨ́ ɓàŋndôŋ ɗɔ̀ɔ́b Sìlìsíì ɓe Pàmfìlíì há̧á̧ nɨ́m ɨ́ gì féínnɨ Mírà, ɗɔ̀ɔ́b Lìsíì no. 6Nɨ́m féín ɓè, nɨ́m ɨ́ kwà kwáí jíri kù yi éíwo Àlèksàndɨ́rî gònɨ gìnɨ Ìtàlíì. Á sójà kɨ́kléndóŋ nɨ́m no, nɨ́m ɨ́ gì. 7Ə́rè Míràà, nɨ́m ɨ́ jə́bɓà nɨ́ jȩ̀ȩ̀ jíì ví̧i̧ ɓetí nɨ́m yaá nɨ gɨ̀ɓànɨ còò. Nɨ́m yi nomɓacɨ nɨ noóm á nɨ́m ɨ́ féìn nɨ́ Kɨ̀nîdə̀ ru, nɨ́m ɨ́ dù nɨ́ ɓè ə́ə̀ŋwá. Hȩ kəŋmbə́r yi harɨ nɨ́ nɨ́m gìnɨ péín kɨ́ rèé, nɨ́m ɨ́ téíncùsê nɨ́ péín Sàlmònéè yi du njúndì tɨ́kwá̧ Kɨrêtə̀, gìnɨ ɓàŋmbàìgènɨ tɨ́kwá̧ kɨ́ cùrì. 8Nɨ́m ɓàŋgènɨ tɨ́kwá̧ kɨ́ gìnɨ féínnɨ yɨ́ kùb ɓé «Sɔ̀ nyɔ̧ɔ̧́» gín Làséè rɨ, nɨ́m yi nomɓacɨ nɨ noóm á.

9Ye jùrúb ákî cumí#27.9 Jùrúb ákî cumí yɨɨ́m jùrúb Jwîf ɓoò á. Jùrúb kɨ́ no á nɨ̀gáŋ satɨgàà yi nakom satɨgà àm ákî cum gbàŋ Ísràyéèl ru. Kùb ya jɔkom jùrúb kɨ́ Mɨjam ya kɨ́ kù ɓwâ Sɨɓwin fó̧ heé rɨ́ á, ɓetí jíìb kɨ́ no á gùr kwánnè yi dulɨ́ŋ nɨ́ ɓáŋhîn ɓe àm mbɨ̀ɨ̀ŋ ndu. yi ndóŋcií nɨ́. Kwàré kórì yaá nɨ́ tàmndóŋnɨ tíí tíí, á nɨ́m jə́b nɨ́ ɓè jíì ví̧i̧. Àm kɨ́ á Pôl yi tana ŋgáb ɨnè: 10«Ɓwàjììb moò, mɨ péé mɨ́ gùr lè ɓa nɨ dùɓànɨ ɓáŋhîn á. Kwáí kàm ndè ɓa nɨ wúùbnɨ á, nɨ́ɨ́b á ɓáàŋɓà bɨ́ no cei. Dùgɨ̀ nɨ nɨ́m nɨ̀miib, á sàmàìn nɨ́m ɓa nɨ́ mə̀mnánɨ mèè.» 11Ɨ́dù sójà Róòm ndè yi ákíí nɨ́ tó nyindí Póòl ya, ŋgə́ ɨ́ sə̀ŋbɨ̂ŋ nɨ́ gíí ɓe kɨ́ nɨ̀mɨr kórì ɓe tɨ́kór yi nyinndé. 12Sɔ̀ ŋgáb yi du nó kɨ́ yi nɨ́ sɔ̀ kùb du nó ɓwâ mbɨ̀ŋnì sé, àm kɨ́ á nùb kù ví̧i̧ kwáí kɨ́ noò yi ta vúm éíkɨ́ bɨ ɓè. Ŋgáb ya ɗúú kə̀knɨ ndáŋnɨ vúm yètɨ̀ féín Fènîks kè, vúm a dù bɨ́ ɓè móŋnɨ mbɨ̀ɨ̀ŋ cɔ̧́tɨ na á. Fènîks kɨ́ yɨɨ́m sɔ̀ tɨ́kwá̧ Kɨ́rêt á, ŋgə́ yaá ɓandɨcurȩ́ȩ mɨ̀kwehɨ̀rí péín mvii lə́ré ŋgɨ̀ɨ̀sénɨ siín, ɓe péín mvii lə́ré ŋgɨ̀ɨ̀wúnɨ haár.

Kəŋmbə́r jíri

13Cɨ́cɔ̧̂ ti kù ɨ́ yà fùwúnɨ péín sunné, ŋgáb ɨ́ lə́mnè vúm ɓa gìnɨ hȩ vúm tɨ ɓwállé á yáá. Á ŋgáb ɗamwúkɨ́ tú̧ bɨ kórì, ŋgáb ɨ́ ə́llê. Ŋgáb ɨ́ yà ɓàŋgènɨ tɨ́kwá̧ Kɨ́rêt yɨ́k yɨ́k. 14Ɨ́dù mvin ŋgób na, kəŋmbə́r kàm tamnì kù ɨ́ ə́tɨ̀wò péín mvii fó̧ré, péín haré ŋgób, ɗà ɨ́ lámpèèwòɓà tɨ́kwá̧ rè kááŋ. 15Kəŋmbə́r kàm kɨ́ ɨ́ yà njóknɨ kór, jɨ̀r nɨ́m ɗə́əŋ kórì ɨ́ yɔ̂ nɨ́m. Nɨ́m ɨ́ mbɨ́khácè nɨ́ ŋgə́ nɨ́m hàìnsénɨ. 16Nɨ́m ɨ́ gì ndóŋnɨ tɨ́kwá̧ ti kù ɨ́r du Kòdâ rɨ péín sunné. Ŋgə́ yaá nɨ́m ɗènnàhánɨ kəŋmbə́r ŋgób. Ɓe jábɨ́r kàm jíri á nɨ́m ndáŋɓa bɨ̀jɨ́ɨ̀mcùwònɨ kwáí ɓə́rì ru. 17Nùb ə́ré ɨ́ hàìncùrówò kwáí ɓə́rì rè kɨ́ jírií no, ɗà ŋgáb ɨ́ súŋjɨ́mnè ɓur kwáí jírií kɨ́. Hȩ ŋgáb ya du óknɨ vùù gìnɨ júbnɨ kwin saséé yi du swaàr Lìbíì yaà rèé, ŋgáb ɨ́ pàrè gbɨ́ktèìn kàm yɔ̀ yi ndɨŋkom kór a tù gwín kəŋmbə́rì, ɗà ŋgáb ɨ́ lèèrê mvúúm. Ŋgáb ɨ́ mbɨ̂ kəŋmbə́r ɗə́ə̀ŋsé kór. 18Hȩ kəŋmbə́r ya ndóoŋɓacɨ nɨ́ nɨ́m ɓe lɨ́láme rèé, ye saín ŋgáb ɨ́ yà wààténndékɨ́nɨ haain kù mvúúm. 19Ye turéré, ŋgáb nɨ̀miib ŋgáb ɨ́ kpə̀ŋtɨ̀kî nɨ́ɨ́b kù kórì ya wààrékɨ́nɨ mvúúm. 20Kəŋmbə́r kàm ndè ɨ́ fùɓà nɨ́ jííb jííb, jɨ̀r nɨ́m pə́ mvii, dùgɨ̀ káŋyerɨ̀bì yi nɨ́ ɗàɓàwá. Nɨ́m yi nɨ́ ɓàcɨ̀ ɓe gíí nɨ́m ɓa ɓániì ɗàà.

21Jíìb yi víɓacií, nùb kwáí kɨ́ noò nɨ́m kù tàŋwá. Á Pôl éíwú ŋgábè tíí ŋgə́ ɨ́ tà: «Ɓwàjììb moò, nyí tɨ ókyè àm mo ɓɔ̧ne, nɨ́m yètɨ nɨ́ tɨ́kwá̧ Kɨ́rêt péín ndɨ éíwòwá. Nɨ́m yè nɨ́ vùùm nɨ́ɨ́b ɓáŋhȩ rè mə̀mnáwa. 22Ɨ́dù ɗàrò, tamnáam njɔ̧̀, nɨ̀vɨ́tè mwi̧ mvókín nyínè no tɨ̀ nɨ mè noò mə̀m, jɔ̀sé kwáí lè mwi̧ ɨ́ ɓa nɨ́ ɓáàŋnɨ ru. 23Ɓetí sɨ́mnɨ̀r ndóŋkɨ́ rè no, dùgal Mèín mɨ ók ɓe kí mɨ duce ə́nàniì tɨ goó mɨ kwànɨ, ŋgə́ ɨ́ tànà mɨ: 24‹Pôl, wu wu vùù ô, á ɗúnɨ wu féínmè mvèìn kàm jírií tíí. Mèín cè, ɓe nyàŋnjɔ̧̀ ŋgə́ du ɓe ɨ́r woò, ə́əmnatɨ́ nùb wo gùrí mè.› 25Àm kɨ́ á, ɓwàjììb moò, mɨ ta nyí tàm njɔ̧̀, ɓetí mɨ ɗəəŋtɨ́ nɨ́m Mèín ta ndɨ̀ŋtɨ kɨ́ ɓa ndɨ̀ŋmènɨ á. 26Ɨ́dù kəŋmbə́r ɓa nɨ́m gènɨ swaàr tɨ́kwá̧ kù ya á.»

27Yɨɨ́m cɨ̀ jíì cóóŋ ɨ́ nààsɨ̀bì kəŋmbə́r yi du nɨ́m njóktèènɨ mɨ̀kwehɨ̀r kùb du ɓénɨ Mèdìtèrànê yaà á. Péín cɨ́m tə̧né á nùb ə́ré kwáí kɨ́ noò ta á hȩ nɨ́m ŋgóobtɨ́ ɓe ɗɔ̀ɔ́b yáá. 28Ŋgáb ɨ́ súŋndê nɨ́m ti lúhîn kù líí ya, ŋgáb ɨ́ lèèrê mvúúm pénɨ lɨ́lé mvúmí, ŋgáb ɨ́ kwà á métà vɨríí ɨ́ cóóŋ ɨ́ tɨ́ɓaám, ŋgáb ɨ́ ɗàmcùhô̧ lí kɨ́. Ŋgáb ŋgɨɨso kór tíí, ŋgáb ɨ́ lèècùrê, kí á ŋgáb kwa á métà vɨríí ɨ́ sə́r. 29Hȩ ŋgáb ya du bɨ́ óknɨ vùù kwáí nɨ́mè tɨ̀ gɨ nɨ́ jóbnɨ ɓéé kù rèé, ŋgáb ɨ́ lèèrê tú̧ bɨ kórì nààsɨ̀b mvúúm péín cùrìì móŋnɨ ye ɓè. 30Ɨ́dù nùb ə́ré kwáí jírií yaá bɨ́ ɗúnɨ lùnɨ, á ŋgáb leeré kwáí ɓə́rì mvúúm, vúm ma gɨ bɨ kɨ́knyààŋnɨ tú̧ bɨ kórì péín tíí á na. 31Á Pôl tana sójààb ɓe nò kɨ́ɨ́ ŋgábè ɨnè: «Nùb lè ɨ́ dù bɨ́ kwáìn hò̧ dùwá, nyí tɨ̀ nɨ ɓâr.» 32Kí á sójààb ya téínleerékɨ́ kwáí ɓə́rì kɨ́ mvúúm.

33Ye ɓànɨ sànnɨ, Pôl ɨ́ tà ɗú nùb lâs tàŋ cɔŋ á yáá, á ŋgə́ ta ɨnè: «Jíì cóóŋ ɨ́ nààsɨ̀b á cɨ̀ mwáín ndè, nyí á cè dùhá nɨ u̧ nɨ́m kù tàŋnɨ ɗàà. 34Mɨ ta nyí lâs nyí tàŋ cɔŋ, àm nyí a kwà nyòm nyí ɓa ɓáínɨ ɓe kíí. Vùùm nyínè lâs, nò kù tɨ̀ nɨ jábɨ́r kù pə̂r.» 35Cáŋhȩ̀ȩ́ nyindí kíì, á Pôl á bɨ̀rê. Ŋgə́ ɨ́ sáktè Mèín ŋgábè tíí ɓè. Ŋgə́ ɨ́ kùm, ɗà ŋgə́ ɨ́ yàrê tàŋnɨ. 36Á njɔ̧̀ tamcu vùùm ŋgábè lâs, ŋgáb ɨ́ tàŋɓwê cɔŋ. 37Kwáí jíri rè no, nɨ́m yaá lâs nɨ̀vɨ́tɨ̀b təmərì bɨrɨ́b ɨ́ yɔ̀k vii taarɨ́b ɨ́ cóóŋ ɨ́ tínmwi̧. 38Ɓwâ ŋgáb ya taŋfublé, ŋgáb ɨ́ lùùŋndékî fàrîn mvúúm àm kór a wáŋnèé.

Kór wúubtɨ́

39Ɓwâ ye ya sallé, nùb ə́ré kwáí jírií ɨ́ dù bɨ́ ɗɔ̀ɔ́b ɗə̀ə̀ŋcùwá, ɨ́dù ŋgáb ɨ́ pə́sòhâ sɔ̀ kù ɓe kwin saséé. Á ŋgáb ta vúm kə̀k njókhó̧nɨ kór ku, yè ɓa ndə̀rɨ̀nɨ kè yáá. 40Ŋgáb ɨ́ pàrɨ̀mbɨ́klékɨ́sò tú̧ bɨ kórì mvúúm. Ŋgáb ɨ́ pàrɨ̀hó̧kî kòr ŋgáb ya ɗə́əŋkom kór ɓe kíí. Ŋgáb ɨ́ súŋwû júk yáin kù còóm péín tíí àm kəŋmbə́r léé no a njókɗə́ə̀ŋgè kór há̧á̧ sɔ̀ɔ́. 41Ɨ́dù kór yaá nɨ gìnɨ mvókín ŋgɨ́r mvúmí bɨrɨ́b no há̧á̧, ɨ́ gì júbnɨ kwin kàm saséé, ɨ́ ə́ə̀ŋndê ya. Péín tíí rè ɨ́ lə́ɓà nɨ́ sasȩ́ȩ́ lȩ́ȩ sàmàìn kór yi jɨɨɓacéyeré ɗàà, péín cùrìì ɨ́ wòbtɨ̀cè ɓe láhèé tɔkain mvúmí. 42Sójààb ɨ́ ɗû kwíìkɨ́nɨ nùb nìrì lâs àm nò kù tɨ̀ ɔ̧ɓaye ŋgə́ á lùníì. 43Ɨ́dù hȩ nò kɨ́ɨ́ sójàbì rè ya ɗú nɨ́ ɓátɨ̀nɨ Pôl lèé, á ŋgə́ ta ŋgáb nɨ́m kɨ́ ndɨ̀ŋwá. Ŋgə́ ɨ́ tà nùb ɗəŋhȩ ɔ̧hí̧ síìmndéyàyè mvúúm gànnɨ ɗɔ̀ɔ́b. 44Nùb meceré a wúútèè gbɨ́ktèìn mɨ̀ɓámí ɓe kumsiì kórì ya, gàìnɓwênɨ ɗɔ̀ɔ́b yáá. U̧ á ŋgáb lâs ya fó̧ ŋgwàrí nɨ́m kù ŋgáb ndɨ̀ŋwá.

Currently Selected:

Ə́rɨ́b nùb tómé yi ə́llé 27: NTV

Highlight

Compare

Copy