Nùb róòm Yààr káàtà Pôl yi tɨnna nùb Róòm
Yààr káàtà Pôl yi tɨnna nùb Róòm
Ɓwâ Pôl yi tɨnna nùb Róòm káàtà rèè, ŋgə́ yi cuwo gwɨ̀ì gwì taarɨ́bí ŋgə́ yi gɨ ɓéèsénɨ Kìn Nyɔ̧né á. Ŋgə́ á ɗúnɨ gwɨ̀ì cùrìì ní féín há̧á̧ Rôm yɨ́ ŋgə́ yi du féínyèwáá, ŋgə́ á gɨ̀ndóŋɓàcéyè tíí péín mvii lə́ré há̧á̧ Èspânyə̀, ɓéèséɓwênɨ Kìn Nyɔ̧ɔ̧́ ku (Gɔ̀ 15.22-24). Káàtà ŋgə́ du tɨ̀ìnsònànɨ nùb Róòm kɨ́, ŋgə́ ɗú tàsònànɨ ŋgáb àm gùr ní du gɨ̀sònɨ kíì á, nàsòɓwênɨ nùb ə́mní kwe tɔ̀ɔ́ nóò.
Káàtà Pôl tɨnna nùb Róòm kɨ́ du sà̧à̧ Kìn ŋgə́ du ɓéènɨ rè á. Njàb sà̧à̧ kíì á ɨnè: «Nò du Mèèín íhín ɗɨ́ɗɨ̧́ ɓe àm ə́mní kwá ɓáí.» (Gɔ̀ 1.17).
Kìn ŋgə́ du ɓéènɨ kɨ́ njàb á no taarɨ́b:
Yàrénɨ gɔ̀ 1 há̧á̧ 8: gbɨ́ktèìn kɨ́ no ŋgə́ á tànɨ ní ɨ́ du mvókín jə̧̀ə̧́ ɓíhɨ̀b ɓe péín ə́mní ɓe ə́ə́m kùb ə́mne Mèín nò Yésù Krístù ta á mè ku na rè. Nùb mɨ̀kwìn ə́mní Róòm noò ví̧i̧ bɨ Jwîf sé. Ɨ́dù Jwîf bɨ á ɓà Rôm ku ví̧i̧, nùb kù seicií bɨ́ nùb ə́mní, ɨ́dù ŋgáb á háyè bɨ́ jə̀ŋnɨ ɓíhɨ̀b ə́ə́m Jwíìf. Ma ɗú nùb du bɨ́ Jwîf séé yi sei bɨ́ nùb ə́mní rè jə̀ŋɓwê ɓíhɨ̀b kɨ́ á hàye? Fɔ́ kɨ́ tuklɨɓatɨ́ mɨ̀kwìn nùb ə́mní bɨ heé cei. Pôl ta nùb lâs cɨcóòm á. Dùgɨ̀ Jwîf, dùgɨ̀ Jwîf sé. U̧ kɨ́ ɓíì kù nɨ kùb ákɨ́nɨ nì̧ì̧ cumí no ɗàà. Ɨ́dù, ɓe nyòm Nyéhè Sarɨ́nne, á sàmàìn nɨ̀vɨ́tɨ̀b lâs kwa ɓə́rì; ɓetí Yésù Krístù á ŋgáb gènɨ yɨ́ Mèèín.
Yàrénɨ gɔ̀ 9 há̧á̧ 11: Gbɨ́ktèìn kɨ́ no ŋgə́ á tànɨ nɨ́m du ndóŋnɨ mvókín Ísràyéèl, gbàŋ Mèín yi caré ɓe nùb ə́mní. Ə́ə́m Krístùù du nɨ hȩ yɔ̀ á. Ɗɔ̀ɔ́b Jwîf no, gwàŋnɨ́b ŋgéé á bɨ ɗàá cɨ́ɨmndȩ́ȩ. U̧ kɨ́ gbàŋ Jwîf bɨ̂ŋ nɨ sèìwá nùb ə́mní. Pôl taá ɨnayâna Mèín á nɨ gɨ̀háyènɨ tíí ɗúnɨ Jwîf bɨ, ŋgə́ a ɓéce ŋgáb gbàŋ níì. Ye kù gbàŋ no kɨ́, ɓáhîn ɓe gbàŋ bɨ kù, ŋgáb ɓa ɗə̀ə̀ŋcùnɨ nyàŋnjɔ̧̀ Mèín túumna nɨ̀vɨ́tɨ̀b Yésù Krístù yaà á.
Yàrénɨ gɔ̀ 12 há̧á̧ 15: Gbɨ́ktèìn kɨ́ á tànɨ i̧ á kùb fɨ́tɨ dùnɨ ɓwâ wu du mɨ̀kwìn nùb ə́mní Yésù Krístùù noò. Pôl á tànɨ hȩ kùb fɨ́tɨ ɗómnɨ Mèèín, hȩ kùb fɨ́tɨ dùnɨ ju ɗóóŋ ɓe kùŋ mwin yàá. Ŋgə́ ta nùb du ɓe ə́ə́m tamnìí ɗə̀ŋhɨ̀ hȩ ŋgáb fɨ́tɨ óknɨ nùb du ɓe ə́ə́m gó̧ne. Ŋgə́ ta Mèín á áhó̧kɨ́nɨ nɨ̀vɨ́tè nì̧ì̧ cumí ɓe kɨ́ cwéé no. Ɗàrò, ɓe nyòm Nyéhè Sarɨ́nne, á sàmàìn ŋgáb du ɓaín mvókín ŋgábè no, dugɨ ɓe Krístù.
Pôl cáaŋtɨ́ káàtà ŋgə́ tɨnna nùb Róòm ndè ɓe nyìndí bɨ ví̧i̧ (Gɔ̀ 16). Ŋgə́ ɓétɨ́ ɨ́ì nɨ̀vɨ́tɨ̀b ví̧i̧ nɨ̀ŋgwáàb ɓe nɨ̀gub cúk. U̧ á du nùb ə́mní ya tíí du ɓáànɨ ɓe nùb ə́mní jíìb mwánnè.
Currently Selected:
Nùb róòm Yààr káàtà Pôl yi tɨnna nùb Róòm: NTV
Highlight
Copy
Compare
Share
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon