Ə́rɨ́b nùb tómé yi ə́llé 26

Pôl á kààŋnɨ síí Àgɨ̀rɨ̀pâ tíí

1Àgɨ̀rɨ̀pâ ɨ́ tànà Pôl ɨnè: «Á sàmàìn wu nyin nɨ́m wó ɓɔ̧ne.» Á Pôl gam nyindí, ŋgə́ ɨ́ yàrê kààŋnɨ síí, ŋgə́ ɨ́ tà: 2«Àgɨ̀rɨ̀pâ, nɨ̀mɨr tií, mɨ á mwáín ɓe mɨ̀tù àm mɨ go ə́ə̀ŋnɨ wo tíí hò̧, kààŋnɨ síí móò ɓe ɨ́r nɨ́m Jwîf bɨ du tàrénɨ mɨ só rè. 3Mɨ̀tɔ̀k kɨ́ duɓa ví̧i̧ àm wu ɗəəŋnyaaŋɓa ɗɨ́m Jwîf ɓoò ɓe sɨ̀ɨ̀ŋ nyindíí ŋgáb ndáŋlɨ́ŋ yáà rè á. Mɨ yóŋtɨ́ wu, wu jíì óknyààŋɓànɨ nɨ́m mɨ ɓa nyìnniì.

4«Jwîf bɨ lâs ɗəəŋtɨ́ hȩ ɗɨ́m móò ya duré, yàwòó wàánjɨ́ɨ́l moò no. Yàwòó yàllì, ɗɨ́m juu mɨ ya dukom ɓe kí mo ti̧í̧, dùgɨ̀ Yèrúsàlèm, Jwîf bɨ lâs ɗəəŋtɨ́. 5Ŋgáb ya ɗəəŋɓa bɨ mɨ kúríí. Kpáín nùb mɨ̀yú̧ú̧ du tùɓànɨ ɓíì jɨ́k jɨ́k kùb du ɓénɨ Fàrísààb lɨ, mɨ yaá no. Á sàmàìn ŋgáb ə́əmna mé, ɓè ŋgáb ɗúré. 6Ɗàrò kùb dɨɨ mɨ ŋgù̧ní àm mɨ du móŋkɨ́ɓànɨ ɓe gíí ɓwáár Mèín ya ɓwáína tákɨ̀rɨ́b nɨ́mè rè á. 7Gbàŋ bɨ nɨ́mè cóóŋ ɨ́ bɨrɨ́b lè á cè móŋnɨ yúklèé ɓwáár kíì, ɓe éínàá Mèín ɓwâ lâs ɓe nyòme cúú. Ɓe ɨ́r gíí kíì á cè Jwîf bɨ du mɨ àám ndè só tàrénɨ ru, tá! 8Nyí Jwîf bɨ rè, àm níì á nyí duce ə́ə̀mnɨ àm Mèín ɓa sə̀ə̀mcùhó̧nɨ nɨ̀kwííb á na kɨ́ ɗà? 9Mɨ nɨ̀mɨr mɨ ya lə́əmɓacéyetɨ́ ɓáàŋkɨ́nɨ ɨ́r Yésù nò Nàsàréèt kɨ́, ndɨŋgi ɨna. 10Mɨ ɨ́ ndɨ̀ŋmècè nɨ́m kɨ́ Yèrúsàlèm. Mvènnɨ́b nùb na satɨgàà ya naréɓacéyetɨ́ mɨ káàtà ə́r kíì ŋgáré. Mɨ ya njóoréé nùb ə́mní ví̧i̧ dúú nìrì. Mɨ yaá ə́ə̀mɓàcéyènɨ kùb kwíì ŋgáb. 11Mɨ yaá ŋgáb túùmlɨ́ŋnɨ jábɨ́r dúhɨ́b mɨ̀yú̧ú̧ no, mɨ a ndɨ̀ŋ ŋgáb càm ə́ə́m ŋgáb yi ə́mne Yésùù. Ɓe njùŋ kàm yi mó sumí ɓe ɨ́r ŋgábèè, mɨ yaá ŋgáb njóndɨ̀sòɓànɨ há̧á̧ kùbè kwé.»

Pôl á átɨ̀nɨ hȩ ŋgə́ ya sei nò ə́mní

(Góòmɓwê Ə́.N.T 9.1-19; 22.6-16)

12«U̧ á cè, ɓwâ mɨ yi gi Dàmâs, mvènnɨ́b nùb na satɨgàà ya ɗob mɨ ə́r bììhèé nùb ə́mní, ŋgáb ɨ́ tɨ̀nndê mɨ káàtà ŋgáré, nànɨ mɨ nyòm mɨ ndɨŋ nɨ́m kíì. 13Kí du nɨ̀mɨr tií, mɨ yaá jȩ̀ȩ̀ gìnɨ Dàmâs. Á mvii ŋgwéé na, mɨ ɨ́ pə́cì mwa kàm kù aaŋɓa nɨ́ kɨ́ mvihɨri lomsówotɨ́ ɓɨllin nɨ́me nùb mo gùrí ya. 14Nɨ́m lâs nɨ́m ɨ́ gù. Á mɨ ók kúu kù mɨ tànànɨ ɓe nyindí Jwîf ɨnè: ‹Sôl, Sôl, wu túumce mɨ jábɨ́r ɓe ní? Wu nyɨɓa wu hȩ ndèìn sakkɨ́ ŋgɨ́ŋ tá noò sam á.› 15Mɨ ɨ́ fɔ́cùsò ɨnè: ‹Wu cè wú na á, Kéké?› Kéké ɨ́ pìhè ɨnè: ‹Nò wu du túùmnɨ jábɨ́r ɗàrɨ́, mɨ Yésù á. 16Ɨ́dù, éíwúum còóm. Mɨ túumna wu síí ndɨ̀ŋnɨ wu sèì nò ə́ré moò á; wu ɓa dùnɨ mɨ̀námé móò á, wu a átɨ̀nà nùb kù hȩ wu tɨ pə́ mɨ mwánnè, wu a tànàkwà ŋgáb nɨ́m mɨ ɓa wu túùmnàkwàniì. 17Mɨ ɓa wu céínhó̧nɨ dùgɨ̀ Jwîf bɨ ŋgáré, dùgɨ̀ nùb du Jwîf séé mɨ ɓa wu tómsònɨ yɨ́ kíí ŋgáré á. 18Mɨ tóm wu àm wu a ndɨ̀ŋ ŋgáb pée á, wu a ákî ŋgáb mɨ̀sɨ́mnɨ̀rí, gèhó̧nɨ ŋgáb mwahí, wu a ácùhó̧kî ŋgáb nyòm Sátààìn no gènànɨ Mèín. Ɓwâ kɨ́ ŋgáb a kwà tɨ́ɨ́r cum ŋgábè ɓe mɨ̀yɨ́ juu mvókín nùb ók ɓe Mèèín no, ɓe ə́ə́m ŋgáb ɓa mɨ ə́ə̀mniì.› »

Pôl á átɨ̀nɨ sà̧à̧ ə́rɨ́b noò

19«Mɨ ɨ́ dùcè mɨ́ jààŋkɨ́wa nɨ́m mɨ yi pə́ sónɨ ɓɨllin kɨ́, tá. 20Ɨ́dù nùb Dàmáàs á mɨ ɓéenayaye Kìn Mèèín, ɨ́ tùrégì nùb Yèrúsàlèèm, nùb ɗɔ̀ɔ́b Jùdéè ɓe nùb ti kù noò du bɨ́ Jwîf séé. Mɨ ɨ́ tànà ŋgáb, ŋgáb ɓàndɨ̀ sum ŋgáb a ɓàndɨ̀cùrê Mèín no; ŋgáb a ndɨ̀ŋcè nɨ́ɨ́b du túùmmèɓànɨ ɨnayâna ŋgáb ɓandɨtɨ́ sumí. 21Àm kɨ́ maá ɓwâ mɨ tɨ du Dúú Jíri Mèèín noò, Jwîf bɨ tɨ bií mɨ, ŋgáb ɨ́ tà vúm yè kwíitɨ́ mɨ ru. 22Ɨ́dù Mèín ɓátií mɨ há̧á̧ mwáín. Mɨ á cè mɨ́ tàsénàhánɨ nɨ̀vɨ́tɨ̀b lâs àmɨɨr, wu dùgɨ̀ na. Nɨ́m kù mɨ du ŋgáb tànàniì nɨ ɗàà, cóóŋ sé kɨ́ tɨ́kɨ̀nɨ́b* ɓe Mòyîs ya ta ɓa ndɨ̀ŋnɨ rɨ. 23Ŋgáb ya ta: Á ɗúnɨ Mèsî pə́ jábɨ́r, ŋgə́ a kû. Ŋgə́ a dù nò tíí ɓa sə̀ə̀mcùhó̧yàyènɨ mvókín nɨ̀kwíbí, ŋgə́ a tànàcè nɨ̀vɨ́tɨ̀b ɨnayâna, ɓwâ Mèín kwá ɓátɨ gbàŋ nɨ́mè ɓe nùb tɨb kù noò du bɨ́ Jwîf séé, ɓə́r kwá du hȩ mwa.»

Pôl ɗúú ndɨ̀ŋnɨ Àgɨ̀rɨ̀pâ ə́mnɨ̀ Yésù

24Hȩ Pôl yi du gɨ̀séhánɨ tíí ɓe kàŋhȩ̀ȩ́ síhé, á Fèstûs yi wámsona ŋgə́ ɨnè: «Wu á wú yɨŋmîn, Pôl. Wu fobɨɓatɨ́ wú cei, kí á yɨɨŋkɨ́ nɨ́ wu ru!» 25Pôl ɨ́ pììnà ŋgə́ ɨnè: «Mɨ mɨ yɨŋmîn ɗàà, nɨ̀mɨ́r tií. Mɨ nyinɓa mɨ nɨ́m du àmɨrìí á. Mɨ á cè mɨ́ ɓe kɨ̀cáàb moò hàrák. 26Àgɨ̀rɨ̀pâ nò du mvèìn jírií óktɨ́ àm kɨ́, á sàmàìn mɨ nyinɓacéye ɓe gíí no tíí hò̧. Mɨ lə́mne ŋgə́ ɗəəŋtɨ́ nɨ́ɨ́b tɨ ndóŋndé lâs, ɓetí nɨ́ɨ́b kɨ́ tɨ bɨ ndúkín kù no yoó ndɨ̀ŋwá. 27Àgɨ̀rɨ̀pâ, mɨ ɗəəŋtɨ́ wu á ə́ə̀mnɨ nɨ́ɨ́b tɨ́kɨ̀nɨ́b Mèèín yi taré!» 28Kí á Àgɨ̀rɨ̀pâ fɔ́ Pôl ɨnè: «Wu lə́mne wu ɓa ndɨ̀ŋnɨ mɨ sèì nò Krístùù u̧ kɔ́klîn á à?» 29Pôl ɨ́ tàcù ɨnè: «Dùgɨ̀ ɗàrò, dùgɨ̀ ɓwâ ŋge, mɨ á yóŋnɨ Mèín ɨnayâna wu sèìɓwê hȩ mɨ, dùgɨ̀ nyí lâs dukɨ́ hò̧ mɨ óknɨ rè. Ɨ́dù ɓe háínkòb lè ŋgáré sé!»

30Á mvèìn jíri, ɓe gómnà, ɓe Bèrènîs ɨ́ nùb yi du ɓèé lâs yi éíwú bɨ́ còóm. 31Ŋgáb ɨ́ éíkî ɓè. Ŋgáb ɨ́ yà nyì̧ì̧tèènɨ mvókín ŋgábè no ɨnè: «Ɓáŋhîn kù nɨ̀ŋgwá rè ndɨŋ ɨ́ tà kùb kwíì ŋgə́, kɨ́ kù kɨ́klé ŋgə́ dúú nìrì na nɨ ɗàà.» 32Á Àgɨ̀rɨ̀pâ tanagɨ Fèstûs ɨnè: «Nɨ̀ŋgwá rè tɨ dùyè tàwá ŋgù̧ú̧ gɨ̀ndóŋ mvèìn kàm jírií tíí naa, kùb yè mbɨ́ɨ́ bɨ́ ŋgə́.»

Currently Selected:

Ə́rɨ́b nùb tómé yi ə́llé 26: NTV

Highlight

Compare

Copy