Ə́rɨ́b nùb tómé yi ə́llé 25

Pôl ta ŋgù̧ú̧ gɨ̀ndóŋ mvèìn kàm jírií tíí

1Jíì taarɨ́b cùr Fèstûs ya féín Sèsàrê gàmnɨ ə́ré, á ŋgə́ éí ɓè gìnɨ Yèrúsàlèm. 2Ku á mvènnɨ́b nùb na satɨgàà ɓe Jwîf bɨ ɨ́r sóò ya go dɨ̀ɨ̀nɨ Pôl ŋgéé tíí. Ŋgáb ɨ́ yóŋkpɔ́ɔ̀ɓà ŋgə́, 3ŋgə́ ndɨ̀ŋhá kùb gèèwònà vúm Pôl Yèrúsàlèm hò̧. Kí du ŋgáb yi lə́kíí kúúr vúm a bì Pôl jȩ̀ȩ̀ kwíìnɨ. 4Ɨ́dù Fèstûs ɨ́ tà Pôl á nɨ nìrì Sèsàrê, ní nɨ̀mɨr ní ɓace nɨ́ gɨ̀cùɓwênɨ ɗàrò á. 5Ŋgə́ ɨ́ tàkwà ɨnè: «Ɗúú nɨ́me mvènnɨ́b nyínè gɨ̀ɓàcéyè Sèsàrê ku cúk á, ŋgáb a dɨ̀hè ŋgə́ ɓè ŋgə́ tɨ ndɨŋ ɓáŋhɨ́nne.» 6Fèstûs ɨ́ jə́bɗóhè nɨ́ ɓe ŋgáb sàmàìn jíì sə́r ɓe cóóŋ, á ŋgə́ gɨcu nɨ́ Sèsàrê. Kpíí nó kwe, ŋgə́ ɨ́ gì dúú ŋgù̧ní dùrénɨ; á ŋgə́ ta kùb gèwò Pôl. 7Ɓwâ Pôl yi féínndé, á Jwîf bɨ yi go Yèrúsàlèèm kɨre ŋgə́. Ŋgáb ɨ́ yà ŋgə́ àám kàtɨ́b ɓáŋhɨ́b só tàrénɨ; yi nɨ́ sàmàìn ŋgáb túumce àmɨɨr àám kíì ɗàà. 8Ɨ́dù Pôl ɨ́ kàŋhȩ̀ síí, ŋgə́ ɨ́ tà: «Mɨ mɨ ɓíì Jwîf ɓèìwá, mɨ dɨmɨɨr Dúú Jíri Mèèín ɓáàŋkɨ́wa, mɨ cè mɨ́ mvèìn kàm jíri jààŋkɨ́wa.»

9Hȩ Fèstûs yi ɗú njɔ̧̀ nyàŋ Jwîf bɨ ɓɔ̧ne, ŋgə́ ɨ́ fɔ̂ Pôl ɨnè: «Wu ɗú ŋgwìn àm ndèè gɨ̀ Yèrúsàlèm mɨ nɨ̀mɨrí tíí à?» 10Pôl ɨ́ pìhè ɨnè: «Mɨ á ə́ə̀ŋnɨ mvèìn kàm jírií tíí, ku á du ɗúnɨ kùb ŋgwìn mɨ ru. Mɨ mɨ Jwîf bɨ rè nɨ́m ɓáŋhîn kù ndɨ̀ŋwá hȩ wu nɨ̀mɨr wu ɗəəŋɓa ɗàrɨ́. 11Àm ɨ́ bì mɨ, kɨ́ kù mɨ yè ndɨɨ́ŋ nɨ́m ɓáŋhîn kù du ɗúnɨ kùb kwíì mɨ noò kè, mɨ mɨ mvúwa cwé. Ɨ́dù nɨ́ɨ́b ŋgáb du mɨ́ tàrénɨ só kɨ́ àmɨɨr kù ɨ́ dù nɨ́ no ɗàà, sàmàìn nò kù naré mɨ ŋgábè ŋgáréè nɨ ɗàà. Ŋgwìn ndè gɨ̀ nɨ mvèìn kàm jírií tíí.» 12Á Fèstûs nyinye ɓe nùb no sóŋní u̧u̧, ŋgə́ ɨ́ tàgì: «Hȩ wu ta wú ŋgù̧ú̧ gɨ̀ nɨ mvèìn kàm jírií tíí rèé, wu á wu gìnɨ ku.»

Fèstûs á átɨ̀nànɨ Àgɨ̀rɨ̀pâ nò du mvèìn jírií sà̧à̧ Pôl sóò

13Jíìb kù no, á Àgɨ̀rɨ̀pâ nò yi du mvèìn jírií féínso Sèsàrê; ŋgə́ ɓe mȩȩ́gwi nóò Bèrènîs, gìnɨ nyìndɨ̀nɨ Fèstûs. 14Hȩ ŋgáb ya gwín ɓè jíì ví̧ne á Fèstûs átɨna mvèìn jíri sà̧à̧ Póòl, ŋgə́ ɨ́ tànà ŋgə́ ɨnè: «Nɨ̀ŋgwá kù Fèlîks mbɨ́kkɨ́so dúú nìrì á hò̧. 15Ɓwâ mɨ tɨ gɨ Yèrúsàlèèm, mvènnɨ́b nùb na satɨgàà ɓe kɨ̀jííb Jwîf ɓoò tɨ gotɨ́ ŋgə́ dɨ̀ɨ̀nɨ mo tíí. Ŋgáb ɨ́ yóŋkpɔ́ɔ̀ɓà mɨ, mɨ ndɨ̀ŋ àm a bì ŋgə́. 16Á mɨ tana mɨ́ ŋgáb naá, kɨ́ nùb Róòm, ŋgáb bɨ gɔ̀ksòkɨ́nɨ nɨ̀vɨ́tè u̧ ɗàà. Ɗúye nɨ nyíne nùb wo àmnì fó̧nɨ ŋgù̧ní á, wu a kwà mvókín wu kaŋhɨ síhé. Cùr kɨ́ no, kùb a ɗə̀ə̀ŋgì hȩ kùb téín àmnì. 17Kí á nɨ́me ŋgáb go hò̧, mɨ ndɨ́ɨ̀bwá. Kpíí nó kwe, mɨ ɨ́ gì dùrénɨ ju ŋgù̧ní, mɨ ɨ́ tà kùb gèwò nɨ̀ŋgwá kɨ́. 18Nùb no àmnì ɨ́ fô̧, ɨ́dù nyindí ŋgáb nyinndé ŋgə́ sóò ɨ́ dù nɨ́ ɓáŋhîn hȩ mɨ tɨ du lə́ə̀mniì ɗàà. 19Ŋgáb ya ndáŋkomɗóo bɨ ɓe ɨ́r mɨ̀yú̧ ŋgáb nɨ̀mibi á. Ɓe ɨ́r nɨ̀ŋgwá kù ɓwê, nɨ́m ma ók ɨ́r yaá Yésù na, ya kú nɨ́ kú̧u̧ Pôl duce nɨ́ tànɨ á cù nɨ jáŋ na rè. 20Mɨ tɨ mɨ ɗə̀ə̀ŋwá hȩ mɨ fɨ́tɨ cànɨ àm kíì, àm kɨ́ á mɨ tɨ fɔ́ Pôl ŋgə́ yè ɗú nɨ́ ŋgwìn àm kíì gɨ̀cù Yèrúsàlèm á kè. 21Ɨ́dù Pôl ɨ́ tà nɨ́ ní gɨ nɨ mvèìn kàm jírií tíí á. Ŋgə́ ɨ́ tà kùb gə́tɨ̀bɨ̂ŋ ní nìrì há̧á̧ hȩ mvèìn kàm jíri ɓa ténnɨ àm níì ŋgwéné. Á mɨ tɨ tace kùb gə́tɨ̀ ŋgə́ há̧á̧ hȩ mɨ ɓa ŋgə́ tómndóŋnànɨ mvèìn kàm jírií.» 22Àgɨ̀rɨ̀pâ ɨ́ tànà Fèstûs: «Á ɗúnɨ nɨ́me ŋgə́ ɓàìntɨ.» Fèstûs ɨ́ tàcè: «I̧i̧, yȩȩ́ nyíne ŋgə́ ɓa ɓànnɨ á.»

Kùb gewotɨ́ Pôl Àgɨ̀rɨ̀pâ ɓe Bèrèníìs tíí

23Ye saín á cè Àgɨ̀rɨ̀pâ ɓe Bèrènîs goɓáhe ŋgábe nùb kɨ́ɨ́ mvènnɨ́b sójàbì ɓe nùb ɨ́r sóò kwé tə̧né. Kùb ɨ́ gàm ŋgáb ɓe jɨ̧ cúk. Fèstûs ɨ́ tà kùb gèwò Pôl yáá. 24Á Fèstûs ta: «Àgɨ̀rɨ̀pâ, nɨ̀mɨr tií, ɓe nyí lâs du ɓe nɨ́m hò̧ rè, nyí péé nɨ̀ŋgwá rè, dùgɨ̀ Yèrúsàlèm, dùgɨ̀ hò̧, Jwîf bɨ lâs tɨ goó dɨ̀ɨ̀nɨ ŋgə́ mo tíí ŋgáb a gbəmce ɨnè: ‹Nɨ ɗúwa mbɨ́k ŋgə́ jáŋ!› 25Kɨ́ moò, ɓáŋhîn kù ŋgə́ ndɨŋ du ɗúnɨ kùb kwíìré ŋgə́ noò mɨ mɨ pə́wa. Ɨ́dù hȩ ŋgə́ nɨ̀mɨr ŋgə́ ta nɨ́ ŋgù̧ú̧ gɨ̀ndóŋhá nɨ mvèìn kàm jírií tíí na rèé, á mɨ ɓwáíce mɨ́ ŋgə́ tómnɨ ku. 26Àm ɓà jɨ́k ŋgéé sóò mɨ ɓa mɨ́ tɨ̀ìnsònànɨ mvèìn kàm jírií nɨ ɗàà. Àm kɨ́ á mɨ ndɨŋ ŋgə́ gò nyínè tíí hò̧ síí kààŋnɨ ru. Mɨ ndɨŋvíi ŋgə́ gò ə́ə̀ŋnɨ wo tíí á; wu Àgɨ̀rɨ̀pâ, nɨ̀mɨr tií. Àm ɓwâ kùb ɓa ŋgə́ fɔ́nɨ fɔ́ɔ́, mɨ a kwà nɨ́m mɨ tɨnndé. 27Mɨ péé mɨ́ nɨ mîn kùb tómndóŋ nò nìrì yɨ́ kù u̧, kùb àm no sóò tàsònyààŋwá ɗàà.»

Currently Selected:

Ə́rɨ́b nùb tómé yi ə́llé 25: NTV

Highlight

Compare

Copy