Ə́rɨ́b nùb tómé yi ə́llé 24

Jwîf bɨ á tȩ́ȩ̀wúnɨ Pôl àám só

1Jə́b jíì ŋgiì á nɨ̀gáŋ satɨgàà ɨ́r du Ànàníyàs féínso Sèsàrê, ŋgə́ ɓe kɨ̀jííb kù ɨ́ nɨ̀ŋgwá kù ɨ́r du Tèrtúlùs ŋgáb ya geso ŋgáré gɨ̀ vúm ə́ə̀ŋnànɨ tíí àm kɨ́ noò. Ŋgáb ɨ́ gì Fèlîks nò yi du gómnàà tíí dɨ̀ɨ̀nɨ Pôl àm ŋgù̧ní. 2Á kùb ɓéwo Pôl kɨ́, ɗà Tèrtúlùs ɨ́ yà ŋgə́ tȩ́ȩ̀rénɨ àám só ɨnè: «Tá, ɓe ɨ́r woò á nɨ́m du dùɓà nɨ kerîn ndu. Ɓe kɨ̀cáàb wu du ŋgáŋnɨ ɓe kíí á nɨ́m pə́ nɨ́ɨ́b ví̧i̧ cə́ndɨtɨ́ ɓe ɨ́r nyɔ̧ɔ̧́ ti rèè. 3Nɨ́m á wu sáktɨ̀ɓànɨ cei ɓe ɨ́r nɨ́ɨ́b nɨ́m du kwànɨ yɨ́ lâs, ɓwâ lâs cè rè. 4Ɨ́dù mɨ tɨ̀ mɨ nɨ́m kàm kù nȩ̀ȩ́ nyìn, àm kɨ́ á mɨ ta wu jíìyè ŋgób óknyààŋnɨ ru. 5Nɨ́m tɨ péé nɨ́ nɨ̀ŋgwá rè duɓa nɨ nò ɓáŋhîn á: ŋgə́ á gèrénɨ tutwi mvókín Jwîf bɨ lâs no. Ŋgə́ ɨ́ duce ŋgwé tíí ɓáhɨ́r kúúr nùb Nàsàréèt lu. 6Ŋgə́ ɗúɓacéyetɨ́ ɓáàŋkɨ́nɨ dɨmɨɨr Dúú Jíri Mèèín, á nɨ́m bɨce nɨ́ ŋgə́. [Nɨ́m tɨ ɗú ŋgə́ ŋgùnnɨ hȩ ɓíì nɨ́mè du ɗúniì á, 7ɨ́dù Lìsíyàs nò kɨ́ɨ́ mvènnɨ́b sójàbì ɨ́ gò nɨ́ ŋgə́ gàhó̧kɨ́nɨ nɨ́mè ŋgáré. 8Ŋgə́ ɨ́ tà nùb no àmnì gò wo tíí hò̧ yáá.] Wu ɨ́ fɔ́nyàŋhȩ̀ nɨ̀ŋgwá rè, wu ɓa pə́mèɓànɨ àmɨɨr nɨ́m nɨ́m du ŋgə́ tàrénɨ só rè á.» 9Á Jwîf bɨ ta: «Àám kɨ́ lâs, á mèɓà u̧.»

Pôl á kààŋnɨ síí Fèlîks tíí

10Kí á Fèlîks nò yi du gómnàà na Pôl nyindí, á Pôl ta: «Mɨ ɗəəŋtɨ́ á ɓàcɨ̀ dáín ví̧i̧, wu ɨ́ du tɨ́ŋgù̧ú̧ ti rè noò, àm kɨ́ á mɨ du kààŋnɨ síí móò wo tíí hò̧ ɓe gíí sumí ru. 11Ndóŋyèwá jíì cóóŋ ɨ́ bɨrɨ́b, á mɨ féín Yèrúsàlèm, mɨ ɨ́ gì mɨ̀yú̧ú̧ Dúú Jíri Mèèín no, á sàmàìn wu nɨ̀mɨr wu fɔ́nyaaŋndé. 12Kùb mɨ kwàkɨ́yèwá Dúú Jíri Mèèín no nɨ́me nò kù ndáŋnɨ, kɨ́ kù wútɨ̀nɨ nɨ̀vɨ́tɨ̀b dúhɨ́b mɨ̀yú̧ú̧ no, dùgɨ̀ kwé tə̧ə̧́. 13Ɗàrò nùb lè sàmàìn túumna wu àmɨɨr nɨ́ɨ́b ŋgáb du mɨ só tàrénɨ ɗàrɨ́ ɗàà. 14Nɨ́m mwi̧, wo tíí hò̧, nɨ́m mɨ ɗəəŋndé á rè: mɨ á éínànɨ Mèín tákɨ̀rɨ́b nɨ́mè ya yóŋkomndé ɓe tùú jɨ̀r Kékéé. Jɨ̀r kɨ́ á nùb gewo mɨ hò̧ rè ta bɨ́ nɨ hàrák ɗàwá ru. Ɨ́dù mɨ á mɨ ə́ə̀mnɨ ɓíì Mòyíìs dùgɨ̀ nɨ́ɨ́b tɨ́kɨ̀nɨ́b ya tɨnndé. 15Gíí ŋgáb du ɓe kí ɨnayâna Mèín kwá səəmcuhó̧ nùb lâs cwéé, dùgɨ̀ nùb ɓáŋhɨ́b, dùgɨ̀ nùb nyɔ̧ɔ̧́ rè, mɨ á ɓwê ɓe kí. 16Àm kɨ́ á mɨ du lɨ̀ɨ̀ŋnɨ ɨnayâna njɔ̧̀ moò nɨ mɨ nɨ́m kù yètɨ̀r, dùgɨ̀ Mèèín tíí dùgɨ̀ nɨ̀vɨ́tɨ̀bì tíí ru.

17«Á dáín ví̧i̧ hȩ mɨ ya fó̧kɨ́ Yèrúsàlèèm, á mɨ cuwogi rè. Mɨ go kpɔ́knɨ gbàŋ Jwîf ɓe mòné á. Mɨ goɓwée nànɨ Mèín satɨgà á, ɨ́dù satɨgà kɨ́ mɨ a móbè kùb ndɨ̀ŋnà mɨ. 18Nɨ́m mɨ tɨ ndɨŋkom Dúú Jíri Mèèín no ɓwâ ŋgáb tɨ kwa mɨ kwe á kí: mɨ ɨ́ ndɨ̀ŋhácè ə́rɨ́b sàtèé síhé Mèèín tíí u̧, kùŋkùŋ nɨ̀vɨ́tɨ̀bì kù mo gə́nȩ̀ȩ́ ɗàà, tutwi kù cè ɗàà. 19Ɨ́dù Jwîf bɨ kù ɗɔ̀ɔ́b Àsíì tɨ á ɓè, ŋgáb ɨ́ du nùb tɨ fɨ́tɨ gònɨ ə́ə̀ŋnɨ wo tíí hò̧ tàrénɨ mɨ àám só ru, ɓè ŋgáb duce ɓe àm ɓe mé. 20Duce u̧ ɗàà, nùb dukɨ́ hò̧ rè, ŋgáb tàsé wo tíí hò̧ ɓáŋhîn ŋge á mɨ tɨ ndɨŋ, ɓwâ mɨ tɨ du ɓáhɨ́r ŋgwìn jírií no kààŋnɨ síí móò, 21duce kɨ́ mɨ tɨ taɓa ɓo tíí wááŋ ɨnayâna: ‹Àm mɨ du mɨ́ ə́ə̀mnɨ sə̀ə̀mcùhô̧ nɨ̀kwíbí rè á kùb gehó̧ mɨ ŋgù̧ní› rè sé!»

22Kí á hȩ Fèlîks ya ɗəəŋɓa nɨ́ àm jɨ̀r Kékéé mîn ndèé, ŋgə́ ɨ́ gècù ŋgù̧ú̧ cùrì, ŋgə́ ɨ́ tà: «Ɓwâ Lìsíyàs nò kɨ́ɨ́ mvènnɨ́b sójàbì ɓa gòniì, mɨ a téíngì àm kɨ́.» 23Á ŋgə́ ta mvèìn sójàbì yi du Pôl gə́tɨ̀niì gècùsò ŋgə́ dúú nìrì ku gə́tɨ̀nɨ, ɨ́dù ŋgə́ a mbɨ́knàhâ ŋgə́ mvókín ti, ŋgə́ a dùcè nɨ́ nùb go yá ŋgéé ɓe nùb gewona ŋgə́ nɨ́m ti tuŋ ŋgéé hàrɨ̀r.

Fèlîks ɓe Dɨ̀rùsîl á sà̧nì ɓe Pôl

24Jíìb kù no á Fèlîks ɓe gwi noò Dɨ̀rùsîl féínso, gwi no kɨ́ yɨɨ́m Jwîf á. Fèlîks ɨ́ tôm kùb ɓéwònà ní Pôl, ní yè óktɨ́ ní á ŋgə́ ɗúɓaye tànɨ ə́ə̀mnɨ Yésù Krístù na rè. 25Ɨ́dù hȩ Pôl yi yaré tànɨ àm ju ɗɨ́ɗɨ̧́ɨ̧́, bìí múb síhé ɓe ŋgwìn Mèín kwá ŋgunndé rèé, vùù ɨ́ bì Fèlîks, ŋgə́ ɨ́ tà: «Ɗàrò, á sàmàìn wu gɨkɨ́yeré, ɓwâ mɨ ɓa wu ɓécùniì, wu a gòcùgì.» 26Ŋgə́ yaácè nɨ́ ɗúnɨ Pôl nà ní mòné, àm kɨ́ á ŋgə́ ya ɓéwolɨ́ŋ nɨ́ ŋgə́ gùr sà̧nì ru. 27Dáín bɨrɨ́b yi ndóŋtɨ́, Pòrsìyús Fèstûs nò yi du gómnà yi ɓace cə́ndɨ̀nɨ Fèlîks ɨ́ wɨ́ícù. Hȩ Fèlîks ya ɗú njɔ̧̀ nyàŋɓà Jwîf bɨ rèé, ŋgə́ ɨ́ mbɨ́klə́kɨ́sò nɨ́ Pôl dúú nìrì ku.

Currently Selected:

Ə́rɨ́b nùb tómé yi ə́llé 24: NTV

Highlight

Compare

Copy