Ə́rɨ́b nùb tómé yi ə́llé 23
23
1Pôl ɨ́ kpáàŋndê nùb ɓáhɨ́r ŋgwìn jírií íí no, ŋgə́ ɨ́ tà: «Mwin yàáb, ɓe njɔ̧̀ ɗàá fàb á nɨ́me Mèín du há̧á̧ mwáín ndu.» 2Á nɨ̀gáŋ satɨgàà ɨ́r yi du Ànàníyàs yi ta nùb yi du gín Póòl láà ŋgə́ ɓɔ̧ɔ̧ yáá. 3Kí á Pôl yi tana ŋgə́ ɨnè: «Wu rè, wu hȩ leè kùb miiwú píím ya àm a pə́ɓà mɨ́nne rè, wu du ɓè àm wu ŋgwin mɨ hȩ ɓíì du ɗúniì á. Ɗàrò, nɨ́m wu ndɨŋ ndè, wu ɓeicutɨ́ wú ɓíì! Kɨ́ ɗàrɨ́ Mèín nɨ̀mɨr tɨ̀ láacuɓa nɨ wu!» 4Nùb yi du gín Póòl ɨ́ fɔ̂ ŋgə́: «Wu andɨ nɨ̀gáŋ satɨgàà Mèèín á hà ye!» 5Pôl ɨ́ pìhè ɨnè: «Mwin yàáb, mɨ tɨ mɨ ɗə̀ə̀ŋwá ɓè du nɨ̀gáŋ satɨgàà. Ɓetí Káàtà Mèèín á tànɨ: ‹Wu kwá tɨ̀ wu ɓe ɨ́r mvèìn wo gbàŋné nyìnɓáŋhɨ̀r!› »
6Pôl yi ɗəəŋtɨ́ ɨnayâna ɓáhɨ́r ŋgwìn jírií rè no nùb kù yɨɨ́m Sàdúsààb á, nùb kù cè Fàrísààb. Àm kɨ́ á ŋgábè tíí ɓè ŋgə́ yi tawúɓa kúu còóm ɨnè: «Mɨ du mɨ Fàrísà á, mwin Fàrísàà cè. Àm mɨ du sə̀ŋnɨ gíí ɓe sə̀ə̀mcùhô̧ cwéé nɨ̀kwíbí rè á kùb gehó̧ mɨ ŋgù̧ní ru.» 7Nyìnné ŋgə́ nyin u̧nèé, á Sàdúsààb ɓe Fàrísààb yaré péènɨ ɓɔ̧ ɗà ɓáhɨ́r ŋgwìn jírií ɨ́ gɔ̀ɔ̀rê tə̧ə̧́ bɨrɨ́b. 8Sàdúsààb á bɨ tànɨ nɨ̀kwííb kwá bɨ sə̀ə̀mcùr, dùgallɨb Mèèín yoo, nyéhɨ̀b yoo, nɨ́m kù nɨ ɗàà. U̧ kɨ́ Fàrísààb á bɨ ə́ə̀mnɨ nɨ́ɨ́b kɨ́ lâs. 9Nɨ̀vɨ́tɨ̀b ɨ́ yà gbə̀mndóŋɓàgɨ̀nɨ tíí tíí. Á nɨ̀gááŋ káàtàbì kù yi du Fàrísààb cùrìì éíwú còóm, ŋgáb ɨ́ yà pààŋnɨ, ŋgáb a tace ɨnè: «Ɓáŋhîn kù nɨ̀ŋgwá rè ndɨŋndé nɨ́m nɨ pə́wa, yè nyéhè kè, kɨ́ kù dùgal Mèèín kù wenaháá nɨ́ ŋgə́ ɓɔ̧!» 10Péhèé ɓɔ̧ɔ̧ rè ɨ́ tàmndóŋɓàgì nɨ́, á vùù yi bɨ nò kɨ́ɨ́ mvènnɨ́b sójàbì, ŋgə́ ɨ́ lə́mnè kùb ɓa bɨ njá̧à̧kɨ́nɨ Pôl á. Àm kɨ́ á ŋgə́ yi tómséso sójààb noò gɨ̀ gàhókɨ́nɨ Pôl mɨ̀kwìn kɨ́ no, ɗà a gècùrê nɨ́ ŋgə́ dúú jíri ó̧o̧ tamnì rè no. 11Cɨ́ɨ́m á Kéké go kwànɨ Pôl ŋgə́ ɨ́ tànà ŋgə́ ɨnè: «Wu ə́əŋtɨ́ mɨ̀námé móò Yèrúsàlèm hò̧, á ɗúnɨ wu gɨ̀ ə́ə̀ŋɓwênɨ mɨ̀námé móò Rôm, wu wu vùù ô, tamnɨm njɔ̧̀.»
Jwîf bɨ lə́réé Pôl kúúr ya
12Ye saín á Jwîf bɨ kù lə́ré Pôl kúúr ya: ŋgáb ɨ́ sàbɓà jìnɨ ɓɔ̧ há̧á̧ hȩ vúm ɓa ŋgə́ kwíìniì. 13Nùb yi lə́ kúúr kíì ya aaŋtɨ́ nɨ̀vɨ́tɨ̀b vii bɨrɨ́b. 14Ŋgáb ɨ́ gì kwànɨ mvènnɨ́b nùb na satɨgàà ɓe kɨ̀jííb, ŋgáb ɨ́ tà: «Nɨ́m sabɓatɨ́ jìnɨ ɓɔ̧ há̧á̧ hȩ nɨ́m ɓa kwíìnɨ Póòl. 15Kɨ́ nyí nùb ɓáhɨ́r ŋgwìn jírií cè, ɓweináam nò kɨ́ɨ́ mvènnɨ́b sójàbì ŋgə́ gèwònà nyí Pôl, nyí a tà vúm ɗúú ɗə̀ə̀ŋnyààŋnɨ àm no sóò jɨ́k jɨ́k á. Kɨ́ nɨ́mè, nɨ́m á cè nɨ́ nyaaŋkí̧i̧, ŋgə́ tɨ̀ nɨ hò̧ féínɓàcéyè ɓè nɨ́m kwíhe ŋgéé.»
16Ɨ́dù mwin mȩȩ́gwi Póòl kù ɨ́ ô nɨ́ àm kúúr kíì. Ŋgə́ ɨ́ gì dúú ó̧o̧ tamnì rè no ku, ŋgə́ ɨ́ tàkɨ́nà nɨ́ Pôl àm kɨ́. 17Kí á Pôl yi ɓé mvèìn sójàbì kù, ŋgə́ ɨ́ tànà ŋgə́ ɨnè: «Gesom mutí wàánjí rè yɨ́ nò kɨ́ɨ́ nyínè, ŋgə́ á ɗúnɨ ŋgə́ nyìnnànɨ nɨ́m kù.» 18Mvèìn sójàbì rè ɨ́ gèsò mutí wàánjí rè yɨ́ nò kɨ́ɨ́ ŋgábè, ŋgə́ ɨ́ tànà ŋgə́ ɨnè: «Pôl du nìrì rɨ tɨ ɓésotɨ́ mɨ, ŋgə́ ɨ́ tà mɨ gèwònà wu mutí wàánjí rè, ŋgə́ ɗúú wu nyìnnànɨ nɨ́m kù yáá.» 19Nò kɨ́ɨ́ mvènnɨ́b sójàbì ɨ́ ɗàmhô̧ mutí wàánjí rè gə́nȩ̀ȩ́, ŋgə́ ɨ́ fɔ̂ ŋgə́ ɨnè: «Ní á wu ɗú mɨ tànànɨ?» 20Á ŋgə́ ta: «Jwîf bɨ léé bɨ́ kúúr ku ɓwèìnɨ wu gèsò Pôl yɨ́ ɓáhɨ́r ŋgwìn jírií, a dù hȩ ɓáhɨ́r kɨ́ ɨ́ ɓéso ŋgə́ ɗə̀ə̀ŋnyààŋnɨ àm no sóò jɨ́k jɨ́k lu. 21Ɨ́dù wu wu àm ŋgábè kɨ́ ə́mnɨ̀r! Ɓetí mvókín ŋgábè no, nɨ̀vɨ́tɨ̀b vii bɨrɨ́b aŋhîn ɓa bɨ yòknɨ jȩ̀ȩ̀ àm bɨ ŋgéé á. Ŋgáb sabɓatɨ́ bɨ́ jìnɨ ɓɔ̧ há̧á̧ hȩ vúm ɓa ŋgə́ kwíìniì. Ŋgáb á cɨ̀ bɨ nyaaŋkí̧i̧, ŋgáb móŋkɨ́hácɨ bɨ pìí wóò á.» 22Á nò kɨ́ɨ́ mvènnɨ́b sójàbì rè tana mutí wàánjí rè kpáb! Ŋgə́ nɨ àm kɨ́ tíí tàndôŋ. Ŋgə́ mbɨ̂ nɨ́ mwɨi lè gɨ̀cùnɨ.
Kùb tómndóŋtɨ́ Pôl yɨ́ Fèlîks nò yi du gómnàà
23Cùr kɨ́ no, nò kɨ́ɨ́ mvènnɨ́b sójàbì rè ɨ́ ɓê mvènnɨ́b sójàbì bɨrɨ́b, ŋgə́ ɨ́ tànà ŋgáb: «Ɓáanáam sójààb təmərì bɨrɨ́b, nùb ɗə̧́ní vii taarɨ́b ɨ́ cóóŋ, nùb pánɨ́bí cè təmərì bɨrɨ́b ɓwê, nyí a dùkî lâs nyaaŋkí̧i̧, gùr Sèsàréè á mwáín cɨ́ɨ́m mvii ɓwécɔ̧́. 24Nyààŋkɨ́náɓwê ɗə̧́nɨ́b ɓa gènɨ Pôl há̧á̧ yɨ́ Fèlîks nò du gómnàà, nɨ́m kù ŋgə́ jȩ̀ȩ̀ ndɨ̀ŋwá.» 25Á ŋgə́ tɨin káàtà ɨnè:
26«Mɨ Kùlôdə̀ Lìsíyàs, mɨ nyindɨsoó Fèlîks nò du gómnàà, ŋgə́ nò du nɨ̀mɨr tií. 27Jwîf bɨ tɨ bií nɨ̀ŋgwá rè, ŋgáb ɨ́ ɗû ŋgə́ kwíìnɨ. Ɓwâ mɨ tɨ ók ɨnayâna ŋgə́ nò Róòm á na rèé, á nɨ́me sójààb moò tɨ gɨ ŋgə́ ɓátɨ̀nɨ. 28Hȩ mɨ tɨ ɗúce ɗə̀ə̀ŋnyààŋnɨ nɨ́m Jwîf bɨ taré ŋgə́ sóò rèé, á mɨ tɨ ge ŋgə́ ɓáhɨ́r ŋgwìn jírií Jwîf ɓoò tíí. 29Mɨ ɨ́ pê mɨ́ nɨ́m ŋgáb tɨ taré ŋgə́ só kɨ́ góomɓa nɨ ɓíì ŋgáb nɨ̀mibi á, mɨ ɨ́ dùcè mɨ́ pə́wa ɓáŋhîn ŋgə́ tɨ ndɨŋ ŋgáb tɨ ɓa ŋgə́ no kwíìrénɨ kɨ́ kù kɨ́klénɨ dúú nìrì kɨ́. 30Á ɓwâ kùb tana mɨ ɨnayâna Jwîf bɨ lə́réé ŋgə́ kúúr ya na, mɨ ɨ́ tà mɨ́ éì, mɨ tómsònàyè mɨ wu ŋgə́. Mɨ ɨ́ tànàcè mɨ́ nùb no àmnì ŋgáb gàìnɓà bɨ ŋgə́ wo tíí ku.»
31Sójààb ɨ́ jə̀ŋ ɓíì kùb tɨ na ŋgábè, á ŋgáb ge Pôl mɨ̀sɨ́mnɨ̀r kɨ́ no há̧á̧ Àŋtìpàtɨ̀rî. 32Ye saín, á sójààb yi du gìnɨ ɓe gurubi ɓandɨcu, gòcùnɨ dúú ó̧o̧ tamnìí. Nùb yi duce ɗə̧́ní ɨ́ gɨ̀ndôŋ ɓe Pôl. 33Féínsò ŋgábè Sèsàrê kwe, sójààb ɨ́ nà gómnà káàtà rè. Ŋgáb ɨ́ nàrékɨ́sòcè Pôl ŋgéé ŋgáré. 34Gómnà ɨ́ fàìnhácè káàtà kɨ́. Á ŋgə́ fɔ́ Pôl kóo ŋgə́ cè nò ɗɔ̀ɔ́b ŋge noò á yàà. Hȩ Pôl tana ŋgə́ ní nò ɗɔ̀ɔ́b Sìlìsíì á na rèé, 35ŋgə́ ɨ́ tà: «Nùb wo àmnì féínntɨ́, mɨ a fɔ́gì wu fɔ́.» Á ŋgə́ ta kùb gɨ̀ gə́tɨ̀nɨ Pôl haam ya Hèrôdə̀ no yáá.
Currently Selected:
Ə́rɨ́b nùb tómé yi ə́llé 23: NTV
Highlight
Share
Compare
Copy
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon
