Ə́rɨ́b nùb tómé yi ə́llé 22
22
1«Mwin yàá bɨ, tá bɨ, óknáam nɨ́m mɨ du nyí nyìnnànɨ kààŋnɨ síí móò noò.» 2Hȩ ŋgáb yi ók Pôl ŋgáb nyìnnànɨ ɓe nyindí Jwîf rèé, ŋgáb ɨ́ dùɓàgɨ̀ yɨrɨ́b, á Pôl tana ŋgáb: 3«Mɨ Jwîf á, kùb fein mɨ Táàrsə̀ á, ɗɔ̀ɔ́b Sìlìsíì no. Ɨ́dù mɨ ham mɨ Yèrúsàlèm hò̧ á. Gàmàlíyêl ɨ́ duce nò yi tɔɔna mɨ ɓíhɨ̀b tákɨ̀rɨ́b nɨ́mè mɨ ɗəəŋɓa lâs hàrák lè ru. Mɨ yaácè ɗúɓwêɓànɨ àm Mèèín cei hȩ nyí lâs nyí duce mwáín ndè u̧. 4Nùb lâs ya tukom jɨ̀r Kékéé, mɨ ya jóktií ŋgáb há̧á̧ cwéé. Mɨ ya bihií nɨ̀ŋgwáàb ɓe nɨ̀gub cúk, mɨ ɨ́ ɗènndê ŋgáb dúú nìrì. 5Á sàmàìn nɨ̀gáŋ satɨgàà ɓe ɓáhɨ́r kɨ̀jííb Dúú Jíri Mèèín ə́əmna mɨ àm kíì. Mɨ yi gií Dàmâs bììnɨ nùb ə́mní gèwònɨ ŋgáb Yèrúsàlèm àm kùb a túmnè ŋgáb jábɨ́rí. Káàtà kɨ̀jííb Dúú Jíri Mèèín ya tɨinsona Jwîf bɨ Dàmâs kwe àm bihɨ nùb ə́mní kɨ́ ya gɨɓacéye mo ŋgáré á.»
Pôl á átɨ̀nɨ hȩ ŋgə́ ya sei nò ə́mní
(Góòmɓwê Ə́.N.T 9.1-19; 26.12-18)
6«Mɨ yaá gùrí jȩ̀ȩ̀, mɨ yi ŋgóobcií ɓe Dàmâs. Péín mvii ŋgwéé na, mɨ sɨ̀rɨ̀cɨ̀ mwa kàm kù nyə́əŋsótɨ́ mɨ ya. 7Mɨ ɨ́ gù. Á mɨ ók kúu nyindíí kù mɨ fɔ́nɨ ɨnè: ‹Sôl, Sôl, wu túumce mɨ jábɨ́r ɓe ní?› 8Mɨ ɨ́ fɔ́cùsò ɨnè: ‹Wu cè wú na á, Kéké?› Kúu kɨ́ ɨ́ pììcù ɨnè: ‹Mɨ Yésù nò Nàsàréèt á, nò wu du túùmnɨ jábɨ́r ɗàrɨ́.› 9Nùb mo gùrí yi péé mwa kɨ́, ɨ́dù ŋgáb ɨ́ dù bɨ́ kúu yi nyinnakom mɨ kɨ́ ókwa. 10Kí á mɨ fɔ́gi ɨnè: ‹Mɨ ma ndɨ̀ŋcé i̧, Kéké?› Á Kéké tana mɨ: ‹Éíwúum còóm, wu a gì Dàmâs. Ku á kùb ɓa wu tànànɨ nɨ́ɨ́b lâs Mèín du ɗúnɨ wu ndɨ̀ŋte.› 11Hȩ íí ya ɓoŋ nɨ́ mɨ ɓe nyə́ŋhȩ̀ȩ́ mwa kàm ndèè rèé, nùb mo gùrí ɨ́ ɗààmgè mɨ há̧á̧ Dàmâs.
12«Nɨ̀ŋgwá kù ɨ́r yi du Ànàníyàs yi du yóŋɓànɨ Mèín ceí, ŋgə́ a jəŋce ɓíì Mèín yi na nɨ́mè yaá Dàmâs ku. Jwîf bɨ kwé kwe yaá ŋgə́ ɗúɓànɨ cei. 13Nɨ̀ŋgwá kɨ́ ɨ́ gò mɨ kwànɨ. Ŋgə́ ɨ́ ə́ŋhȩ̀ ɓe mɨ yɨ́k, ŋgə́ ɨ́ tà: ‹Sôl, mwin yàá moò, pə́cum íhín!› Ɓè mu̧u̧, íí moò ɨ́ kùmnè ɗà mɨ ɨ́ pê ŋgə́. 14Ŋgə́ ɨ́ tàkwà: ‹Mèín tákɨ̀rɨ́b nɨ́mè ya yóŋkomndé ya cakɨ́yaye nɨ́ wu àm wu a ɗə̀ŋhȩ̀ nɨ́m ŋgə́ du ɗúniì. Wu péé nò ɗɨ́ɗɨ̧́ wu a ókcê ŋgə́ nɨ̀mɨr nyìnnɨ. 15Ɓetí á ɗúnɨ wu dù mɨ̀námé ŋgéé nɨ̀vɨ́tɨ̀b lâs tíí, wu a nyìn nɨ́ɨ́b lâs wu pə́ré ɓe kɨ́b wu óklé. 16Ɗàrò wu a móŋndóŋkwacɨ ní? Éíwúum kùb kɔ̀ɔ̀ wu kɔ ə́mní wu a ɓéce ɨ́r Kékéé ŋgə́ ákɨ́nà wu cum wó sóò.› »
Kéké túumnatɨ́ Pôl ɗú ŋgə́ gɨ̀ɓwê yɨ́ nùb du Jwîf séé á
17«Féíncùwò móò Yèrúsàlèm, mɨ á cè mɨ̀yú̧ú̧ Dúú Jíri Mèèín no, á mɨ pə́ nɨ́m kù hȩ ndɨŋ mɨ wum ndɨ́ u̧. 18Mɨ ɨ́ pê Kéké, ŋgə́ ɨ́ tànà mɨ ɨnè: ‹Kɔ́klɨm, fó̧kɨ́ wu Yèrúsàlèm hò̧, ɓetí nùb kwé hò̧neè tɨ̀ bɨ nɨ́m wu du nyìnnɨ ɓe ɨ́r moò ɗàrɨ́ ə́mnɨ̀r.› 19Á mɨ pihe ɨnè: ‹Kéké, ŋgáb ɗəəŋɓatɨ́ mîn mɨ yaákòm gɨ̀tèènɨ dúú mɨ̀yú̧ú̧ nùb yi du wú ə́ə̀mniì lâs no. Mɨ a ndɨ̀ŋ kùb jɨ̀m ŋgáb, nùb kù mɨ a kɨ́klécè dúú nìrì. 20Ɓwâ kùb yi kwíiɓacéye Étèn nò yi ə́əŋna wu mɨ̀náméé, mɨ yaá ɓwê ɓè, mɨ ɨ́ gə́tɨ̀ɓàcéyè júúb ŋgábè. Mɨ ɨ́ tà ŋgə́ kúɓa gbák á.› 21Á Kéké tanagɨ mɨ: ‹Gɨm, mɨ ɓa wu tómɓànɨ cóo yɨ́ nùb du Jwîf séé á!› »
Pôl ta ní nò Róòm á
22Nɨ̀vɨ́tɨ̀b ɨ́ ókɓàhâ nyindí Pôl yi nyinndé lâs, ɨ́dù sɨ̀ɨ̀ŋ nyindíí cáŋhɨ̀rí rè ya na, ŋgáb ɨ́ yàréɓà bɨ́ gbə̀mnɨ ɨnè: «Nyááŋ ti hȩ kɨ́ rè u̧ duce ɗɔ̀bín ɓe ní? Kwíìná ŋgə́!» 23Ŋgáb ɨ́ yà gbə̀mnɨ ŋgáb a njeileewúce júúb ŋgábè còóm còóm, ŋgáb a wúbwúɓwéece mvútúúb còóm.#22.23 Njèìlèèwúnɨ júk còóm ɓe wúbwû mvútúúb còmné, kɨ́ Jwîf ɓoò yɨɨ́m túúm njù̧ú̧ á. 24Á nò kɨ́ɨ́ mvènnɨ́b sójàbì rè yi ta kùb gèré Pôl dúú ó̧o̧ tamnì rè no. Kùb a jɨ̀m ŋgə́ ɓe lòré àm ŋgə́ a wèì ɓɔ̧, ní yè ɗəəŋtɨ́ àm níì á nɨ̀vɨ́tɨ̀b du ŋgə́ ya gbə̀mndénɨ u̧. 25Ɨ́dù ɓwâ kùb yi kwéícáŋhȩ Pôl àm jɨ̀mnì, á ŋgə́ fɔ́ mvèìn sójàbì yi du ɓèé ɨnè: «Á hàrák kùb jɨ̀m nò Róòm u̧ kùb ŋgə́ ŋgwìnwá à?» 26Hȩ mvèìn sójàbì rè ók u̧nèé, á ŋgə́ gi tànànɨ nò kɨ́ɨ́ ŋgábè ɨnè: «Nɨ̀ŋgwá tɨ hwè nɨ nò Róòm á yáà, wu tɨ̀ ndɨŋ i̧!» 27Kí á nò kɨ́ɨ́ mvènnɨ́b sójàbì rè gainwo Pôl, ŋgə́ ɨ́ fɔ̂ ŋgə́ ɨnè: «Tanaye mɨ, wu nò Róòm á à?» Pôl ɨ́ tà: «I̧i̧!» 28Á nɨ̀ŋgwá rè tagi: «Ɓe ɨ́r mɨ sèì nò Róòm, mɨ yi njáaɓatɨ́ mòné ví̧i̧.» Á Pôl tacu: «Kɨ́ moò, mɨ ma duɓa mɨ fɨnni á.» 29Ɓè mu̧u̧ nùb yi ɓa ŋgə́ jɨ̀mnɨ àm ŋgə́ a wèì ɓɔ̧ rè ɨ́ nə̀ŋkî bɨ́ gə́nȩ̀ȩ́; nò kɨ́ɨ́ mvènnɨ́b sójàbì rè nɨ̀mɨr, hȩ ŋgə́ ɗə̀ə̀ŋgɨ̀nɨ Pôl nɨ nò Róòm á, ní tɨ taceé kùb kpàllé ŋgə́ háínkòb ŋgáré rèé, vùù ɨ́ bɨ̀ɓàgɨ̀ nɨ́ ŋgə́ cei.
Pôl á ŋgwìn jírií
30Nò kɨ́ɨ́ mvènnɨ́b sójàbì rè yi ɗú ɗə̀ə̀ŋnyààŋɓànɨ nɨ́m Jwîf bɨ yi du tàrénɨ Pôl só rè mîn; àm kɨ́ á kpíí nó kwe, ŋgə́ ta kùb ákɨ́ Pôl háínkòb ŋgáré. Ŋgə́ ɨ́ tà mvènnɨ́b nùb na satɨgàà ɓe nùb ɓáhɨ́r ŋgwìn jírií ɓáàtɨ. Á ŋgə́ geso Pôl ɓo tíí.
Currently Selected:
Ə́rɨ́b nùb tómé yi ə́llé 22: NTV
Highlight
Share
Compare
Copy
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon
