Ə́rɨ́b nùb tómé yi ə́llé 16

Tìmòtê háagetɨ́ Pôl ɓe Sílàs

1Pôl yi féíntɨ́ Dêrbə̀, ɗà ŋgə́ ɨ́ ndôŋ Lîstɨ̀rə̀. Nɨ̀fuùb kù ɨ́r yi du Tìmòtéè yaá Lîstɨ̀rə̀ ku; ŋgə́ yaám mwin nɨ̀gwi Jwîf kù ya sei nò ə́mní á, ɨ́dù tá noò ya nɨ́ Gɨrêk á. 2Nùb ə́mní ya dukom Lîstɨ̀rə̀ kwe ɓe nùb Ìkòníyòòm yaá ɓà Tìmòtê kúùmnɨ. 3Pôl ɨ́ tà ní ɗú nɨ́ vúme ŋgə́ gètèèlɨ́ŋnɨ yáá, á ŋgə́ á nɨ́ ŋgə́. Ŋgə́ ɨ́ ndɨ̀ŋ kùb lə́nà nɨ̀ŋgwá kɨ́ ndɨ̀ àm Jwîf bɨ yi du ŋgɨ̀ŋgɨ́ŋ ɗɔ̀ɔ́b kɨ́ noò tɨ̀ jábɨ ŋgéé, ɓetí ŋgáb lâs ŋgáb ya ɗəəŋtɨ́ ɨnayâna tá noò nɨ Gɨrêk#16.3 Kɨ́ Gɨrêk bɨ ŋgáb ya bɨ́ ndɨ̀ lə́kòm, àm kɨ́ á Tìmòtê ya du nɨ́ u̧ ndɨ̀ lə́wa ru. á. 4Kwɨ́ì ŋgáb yi du nó ndóŋtèèniì lâs, ŋgáb yaá tùnànɨ nùb ə́mní nɨ́ɨ́b nùb tómé ɓe kɨ̀jííb du Yèrúsàlèèm tawo ŋgáb ndɨ̀ŋte. Ŋgáb yaá tànàɓànɨ nùb ə́mní kɨ́ ŋgáb jə̀ŋ nɨ́ɨ́b kɨ́ lâs. 5Kpáín nùb ə́mní yaá kwànɨ nyòme ə́ə́m ŋgábè no, ŋgáb a víndóŋce ye lâs.

Nɨ́m yi ndóŋ ɓe Pôl Tɨ̀ròwáàs

6Nyéhè Sarîn ya harií ŋgáb tàá Kìn Mèèín ŋgɨ̀ŋgɨ́ŋ ɗɔ̀ɔ́b Àsíì no, á ŋgáb ɓàŋndóŋhô̧ bɨ́ mvókín ɗɔ̀ɔ́b Fɨ̀rìjî ɓe Gàlàtíì no. 7Ɓwâ ŋgáb yi féín jɔ̀ Mìsíì noò, ŋgáb ɨ́ ɗû gìnɨ Bìtìnî, ɨ́dù Nyéhè Yésùù ɨ́ dù nɨ́ ŋgáb mbɨ́kwa gìnɨ. 8Á ŋgáb yi téínndóŋ Mìsî gìnɨ sɔ̀ Tɨ̀ròwáàs no. 9Sɔ̀ɔ́ ku, cɨ́ɨ́m, á Pôl yi pə́ nɨ̀ŋgwá Màsèduwáàn kù no tíí ə́ŋhîn hȩ nɨ́m ndɨŋ wumné rɨ u̧. Nɨ̀ŋgwá kɨ́ ɨ́ tà: «Yée, ndóŋwom Màsèduwân nɨ́m kpɔ́knɨ!» 10Cùr nɨ́m kɨ́ yi ndɨŋndé ɓè mu̧u̧, á nɨ́m yi má pèndóŋsònɨ Màsèduwân ku, ɓetí nɨ́m ɗəəŋɓatɨ́ mîn ɨnayâna Mèín ta nɨ́m gènà nùb ɗɔ̀ɔ́b kɨ́ no kwe Kìn Nyɔ̧ɔ̧́ na á.

Kwɨ́í kùb ɓé Fìlîb lɨ no, nɨ̀gwi kù ɨ́r du Lìdíí ə́əmtɨ́ Kéké

11Nɨ́m ɨ́ lê kwáìn Tɨ̀ròwâs ku gìnɨ tɨ́kwá̧ Sàmòtɨ́ràs no. Kpíí kɨ́ no, nɨ́m ɨ́ féìn Nèyàpòlîs. 12Ə́rè ɓèé á nɨ́m gɨndóŋ Fìlîb. Fìlîb kɨ́ yaá gɔ̀ ɗɔ̀bí tíí ti Màsèduwáàn no. Nùb Róòm ya kɨ́kkom bɨ́ kwɨ́í kɨ́ ru. Nɨ́m ɨ́ gwîn ɓè jíì ví̧i̧. 13Ye Sàbáà, nɨ́m ɨ́ mbɨ̂ kúr, nɨ́m ɨ́ gì gín mvúmí, nɨ́m yè tɨ̀ kwa yɨ́ Jwîf bɨ yóŋlɨ́ŋ Mèèín kè. Nɨ́m ɨ́ dùrê ɗàá yɨ́ nɨ̀gub yi ɓáaré, nɨ́m ɨ́ nyìnnà ŋgáb. 14Nɨ̀mwi̧ ŋgáb noò ɨ́r yaá Lìdí. Ŋgə́ yi go Tìyàtíìr á, ŋgə́ yaá sə́rɨ̀tèènɨ júúb jandɨ́b yi du júúb mònéè, ŋgə́ yaácè jə̀ŋnɨ Mèín. Ŋgə́ yaá óknɨ nɨ́m nɨ́m yi du nyìnniì, á Kéké yi na ŋgə́ kɨ̀cáàb ŋgə́ gə́ŋhȩ tóó, óknɨ nɨ́m Pôl yi du tàniì. 15Á kùb kɔhe ŋgə́ kɔ ə́mní ŋgə́ ɓe nùb no yóò lâs. Ɗà ŋgə́ ɨ́ ɓê nɨ́m, ŋgə́ ɨ́ tà: «Hȩ nyí pə́ mɨ ə́əmmeɓatɨ́ Kékéé, gonáam mo yó, nɨ́m dùhó̧náyè jíìb ti ŋgób.» Ŋgə́ ɨ́ kpɔ́hè nɨ́m nɨ́m ə́ə̀mháa.

Kùb kɨ́kléé Pôl ɓe Sílàs dúú nìrì Fìlîb ku

16Ye kù, nɨ́m á cè gìnɨ yɨ́ mɨ̀yú̧ú̧ á nɨ̀gwi kù yi du nò ə́ré gainwo nɨ́m: ŋgə́ yaá ɓe nyéhè ɓáŋhîn só yi du ndɨ̀ŋnɨ ŋgə́ nómɨ̀ ŋgámí. Vùùm mwèìn ŋgámí kɨ́ cè, ŋgə́ a gènà tá ə́ré bɨ noò. 17Ŋgə́ ɨ́ yà nɨ́me Pôl tùnɨ ŋgə́ a tace kúu còóm ɨnè: «Nɨ̀ŋgwáàb lè bɨ nùb ə́ré Mèín nò du còóm cóo á! Ŋgáb túumna nyí jɨ̀r nyí fɨ́tɨ tùnɨ nyí a kwà ɓə́rì á!» 18Ŋgə́ ɨ́ ndɨ̀ŋɓà nɨ́ nɨ́m kɨ́ jíìb ví̧i̧. Hȩ ya ndóoŋcɨré á Pôl ya ók njù̧, ŋgə́ ɨ́ ɓàndɨ̀cùrê ŋgə́ no, ɗà ŋgə́ ɨ́ tànà nyéhè ɓáŋhîn ndè ɨnè: «Ɓe ɨ́r Yésù Krístùù, mɨ taá wu éíkɨ́ nɨ̀gwi rèè só!» Ɓè mu̧u̧, nyéhè kɨ́ ɨ́ éíkî. 19Ɓwâ tá bɨ ə́ré nɨ̀gwi rèè yi pə́ bɨ́ ŋgə́ tɨ̀ nɨ vúm mòné kwànàcɨ̀wáá, á ŋgáb bɨnjóoge Pôl ɓe Sílàs laŋtaŋ ŋgù̧ní ya, yá nùb kɨ́ɨ́ tií duré. 20Ŋgáb ɨ́ nàrê ŋgáb tɨ́ŋgù̧ú̧ bɨ yi du nùb Róòm ŋgáré, ŋgáb ɨ́ tà: «Nɨ̀ŋgwáàb lè ndóoŋtɨ́ nɨ́m nɨ́mè kwé hò̧. 21Ŋgáb bɨ Jwîf á, ŋgáb á cè bɨ́ tɔ̀ɔ̀nɨ ɗɨ́m bɨ ɓíì nɨ́m nùb Róòm du kààŋnɨ nɨ́m ndɨ̀ŋtɨ rɨ.»

22Mɨ̀kwìn nɨ̀vɨ́tɨ̀bì ɨ́ gbə̀mndéɓwê Pôl ɓe Sílàs ya. Tɨ́ŋgù̧ú̧ bɨ ɨ́ tà kùb wòòbɨ̀kɨ́ ŋgáb júk só kùb a sàŋ ŋgáb yáá. 23Sàŋcáŋhȩ̀ȩ́ ŋgábè, kùb ɨ́ ɗènndê ŋgáb dúú nìrì. Kùb ɨ́ tà nò gə́tɨ dúú kíì góòmɓà ŋgáb íí ya mîn. 24Jɔ̀ kùb tànànɨ nɨ̀ŋgwá rè u̧nèé, ŋgə́ ɨ́ njóòrésò ŋgáb há̧á̧ ndúkín dúú nìrì, lúùm cáŋhɨ̀rí no, ɗà ŋgə́ ɨ́ kóllê ŋgáb gurub nàmȩ́ȩ́. 25Péín cɨ́m tə̧né, Pôl ɓe Sílàs yaá yóŋnɨ Mèín ŋgáb a soŋce wààì ŋgəm Mèín nóò; nùb nìrì yi duɓwée yó kwe a ókce ŋgáb. 26Ŋgáb sɨ̀rɨ̀cɨ̀ na ɗɔ̀ɔ́b jɨɨɓatɨ́ ɓe dúú nìrì cúk. Ɓè mu̧u̧ ɓavɨ̀ì ɨ́ kùùmtèèɓà ɓe síí, nàmé bɨ yi nùb nìrì gureè lâs ɨ́ pàrɨ̀tèèɓà ɓe síí. 27Ɓwâ nò gə́te dúú nìrì yi səəmndé ŋgə́ ɨ́ pê ɓàvɨ̀ì lâs á bɨ fuuŋ, á ŋgə́ ɗamhó̧ jì̧í̧ nóò àm ní kwíikɨ́ síhé, ɓetí ŋgə́ yi lə́mne ɨnayâna nùb nìrì lâs luú bɨ́. 28Á Pôl pámso ŋgə́ ɓe nyòme cúk, ŋgə́ ɨ́ tà: «Wu wu síí wóò ɓáŋhîn ndɨ̀ŋ! Nɨ́m lâs, nɨ́m á nɨ kaín!» 29Kí á nɨ̀ŋgwá rè ta kùb tòŋwònà ní wa. Ŋgə́ ɨ́ lə́sòkɔ́hè lúmnìn ŋgə́ a bɨ́ndɨgece ɓe vùù; ŋgə́ ɨ́ gì gùcáàmsénɨ Pôl ɓe Sílàs ɓusiín. 30Ɗà ŋgə́ ɨ́ tà ŋgáb fó̧tɨ, ŋgə́ ɨ́ fɔ́gì ŋgáb ɨnè: «Tá bɨ, ní á mɨ fɨ́tɨ ndɨ̀ŋnɨ ɗà Mèín a ɓátè mɨ?» 31Ŋgáb ɨ́ pììnà ŋgə́ ɨnè: «Ə́mnɨm Yésù nò du Kékéé ɗà Mèín a ɓátè nyíne nùb wo yóò.» 32Á ŋgáb tanagi ŋgə́ ɓe nùb no yóò lâs Kìn du ɓe ɨ́r Kékéé. 33Sɨ́mnɨ̀r kɨ́ no ɓè mu̧u̧ nɨ̀ŋgwá rè ɨ́ gè ŋgáb, ŋgə́ ɨ́ sènà ŋgáb ɓààì yi ŋgábè sóò. Ŋgə́ ɓe nùb no yóò ɨ́ kwàcê kɔ ə́mní ɓè mu̧u̧. 34Ŋgə́ ɨ́ gèwû Pôl ɓe Sílàs no yó, ŋgə́ ɨ́ nà ŋgáb cɔŋ. Nɨ̀ŋgwá rè ɓe nùb no yóò lâs ɨ́ ókɓà mɨ̀tù àm ŋgə́ yi ə́mne Mèín kɨ́.

35Ɓwâ ye yi sallé, á tɨ́ŋgù̧ú̧ bɨ yi tómso nùb ə́ré tànànɨ nò gə́tɨ dúú nìrì ɨnè: «Mbɨ́khóom nùb ɗàrɨ́.» 36Á nɨ̀ŋgwá rè yi gi tànànɨ Pôl ɨnè: «Tɨ́ŋgù̧ú̧ bɨ tawotɨ́ mɨ mbɨ́khó̧ nyí. Á sàmàìn nyí fó̧ré nyí a gì, nyí nɨ àm kù mácɨ̀r.» 37Ɨ́dù Pôl ɨ́ tànà nùb kùb yi tómso kɨ́ ɨnè: «Nɨ́m nùb du nùb Róòm, ŋgáb ndɨŋtɨ́ kùb jɨ̀m nɨ́m mɨ̀kùnín kùb nɨ́m ŋgwìnwá, Ŋgáb ɨ́ njóòrê nɨ́m dúú nìrì! Ɗàrò ŋgáb a ɗúgì nɨ́m mbɨ́kcùhó̧nɨ yoó à? Nɨ́m kɨ́ nɨ u̧ ndɨ̀ŋnɨ ɗàà, ŋgáb nɨ̀miib ŋgáb gòɓàhá nɨ́m mbɨ́khó̧nɨ!» 38Á nùb ə́ré ya gecuna tɨ́ŋgù̧ú̧ bɨ nyindí kɨ́. Ɗà vùù ɨ́ bɨ̀ɓà nɨ́ ŋgáb ɓwâ ŋgáb yi ók ɨnayâna Pôl ɓe Sílàs du bɨ nùb Róòm á na rè. 39Kí á ŋgáb go ɓwèìnɨ Pôl ɓe Sílàs tɨ́ɨ́r, ɗà ŋgáb ɨ́ mbɨ́khó̧gì ŋgə́ ɓe kùùŋ, ŋgáb ɨ́ tà: «Yée, gɨ̀ná nɨ!» 40Ɓwâ Pôl ɓe Sílàs ya fó̧ré, ŋgáb ɨ́ gì yá Lìdíí. Ŋgáb ɨ́ ɓàìntèècù ɓe mwin yàá bɨ ə́mní tààmnɨ ŋgáb njɔ̧̀. Cùr kɨ́ no, ŋgáb ɨ́ gì bɨ́.

Currently Selected:

Ə́rɨ́b nùb tómé yi ə́llé 16: NTV

Highlight

Compare

Copy