Ə́rɨ́b nùb tómé yi ə́llé 15

Ɓáhɨ́r ə́mní jíri Yèrúsàlèèm

1Nɨ̀ŋgwáàb kù yi éíwo Jùdéè ɨ́ féìn Àŋtìyôs, ŋgáb ɨ́ yà tɔ̀ɔ̀nɨ mwin yàáb ɨnè: «Nyí ɨ́ dù ndɨ̀ lə́wa hȩ ɓíì Mòyíìs du tàniì, Mèín tɨ̀ nɨ nyí ɓátɨ̀r.» 2Ɨ́dù Pôl ɓe Bàrnàbâs ɨ́ yòm bɨ́ tɔ̀ɔ́ ŋgábè kɨ́, kí á ŋgáb ya téhe ɓe ɨ́r yùúm kíì, ɗà ɨ́ nàɓà nɨ́ ŋgáb mɨ̀ndárè kàm jíri. Á kùb yi ta Pôl, Bàrnàbâs ɓe nùb Àŋtìyóòs kù ɓa gìnɨ Yèrúsàlèm yɨ́ nùb tómé ɓe kɨ̀jííb duré, nyìnnyààŋnɨ àm kɨ́ ku á. 3U̧ á mɨ̀kwìn nùb ə́mní ya nyaaŋna ŋgáb gùr kɨ́, ŋgáb ɨ́ ə́llê. Ŋgáb ɨ́ ndóŋdôŋ ɗɔ̀ɔ́b Fènìsî ɓe Sàmàríì no ŋgáb a átɨce hȩ nùb yi du Jwîf séé yi ɓandɨcuré Mèín nóò. Kìn kɨ́ ɨ́ nàɓà nùb ə́mní lâs mɨ̀tɔ̀k kàm jíri. 4Ɓwâ ŋgáb yi féín Yèrúsàlèm kwe, á mɨ̀kwìn nùb ə́mní ɓe nùb tómé ɨ́ kɨ̀jííb yi gam ŋgáb. Ŋgáb ɨ́ átɨ̀nà nùb kɨ́ nɨ́ɨ́b lâs Mèín ya na ŋgáb nyòm ŋgáb ndɨŋndé. 5Ɨ́dù Fàrísààb yi ə́mne bɨ́ Yésùù ɨ́ éíwî còóm, ŋgáb ɨ́ tà: «Á ɗúnɨ kùb lə́nà nùb ə́mní du Jwîf séé ndɨ̀, kùb a kpɔ́hè ŋgáb, ŋgáb jə̀ŋ ɓíì Mòyíìs.» 6Kí á nùb tómé ɓe kɨ̀jííb ya ɓáhe cànɨ àm kɨ́. 7Ŋgáb ɨ́ ndáŋɓà bɨ́ nȩ̀ȩ́, á Píyéèr yi éíwú còóm ŋgə́ ɨ́ tà: «Mwin yàáb ə́mní, nyí ɗəəŋɓahaá ɨnayâna á cɨ̀ nȩ̀ȩ́ Mèín ya cahó̧ mɨ mvókín nyínè no, mɨ ɓéènà nùb du Jwîf séé Kìn Nyɔ̧ɔ̧́, àm ŋgáb óktɨ́ Kìn kɨ́, ŋgáb a ə́mnè Kékéé ye! 8Mèín nò ɗəəŋce mɨ̀lə́m nɨ̀vɨ́tɨ̀bì yi naɓwéetɨ́ nùb du Jwîf séé Nyéhè Sarîn hȩ ŋgə́ ya na nɨ́m nùb du Jwîf, túùmnɨ ɨnayâna ní ə́əmndéé ŋgáb kpánȩ́ȩ́. 9Ŋgə́ ya nɨ́ gɔ̀ kɨ́kléwa mvókín nɨ́me ŋgábè: ŋgə́ ya ákíí cum ŋgábè sumíì àm ŋgáb ya ə́mne Kékéé. 10Ɗàrò, àm níì á nyí duce nòòmnɨ Mèín ɓe njóhèé nyí du njóòwúnànɨ nùb ə́mní ha̧á̧ kàm jíri yi yɔ́k nɨ́me tákɨ̀rɨ́b hànnɨ rè ŋgwéé? 11U̧ rɨ nɨ́m ɗəəŋnátɨ́, Mèín ya ɓátií nɨ́m ɓe ndɨ̀ŋnyàáŋ Yésù nò du Kéké nɨ́mè hȩ ŋgə́ ɓátɨɓwéhe ŋgábè.»

12Á nùb lâs yi kere yɨrɨ́b, óknɨ hȩ Bàrnàbâs ɓe Pôl du átɨ̀nɨ lìím bɨ ɓe nɨ́ɨ́b sɨ̀sɨ̀rí lâs Mèín ya na ŋgáb nyòm ndɨŋndé mvókín nùb du Jwîf séé noò. 13Ɓwâ ŋgáb ya átɨcáaŋndé á Jâk#15.13 Jâk mwi̧ Ə́.N.T gɔ̀ 12.17 rɨ á. gam nyindí, ŋgə́ ɨ́ tà: «Mwin yàáb ə́mní, ókná nɨ́m mɨ du nyí tànànɨ rè! 14Sìmèyôŋ átií hȩ yànɨ yàllì Mèín ya pə́wú nùb du Jwîf séé íí ya, àm ní cahó̧ mvókín ŋgábè no gbàŋ ók ɓe níì. 15Nyindí tɨ́kɨ̀nɨ́bí á cè nɨ́ ɗóògènɨ ɓe sà̧à̧ kɨ́ hàrák, ɓetí káàtà Mèèín á wáànɨ ɨnè:

16‹Kéké ta: cùr kɨ́ no mɨ ɓa cùwònɨ á,

mɨ a ɓáàcù gbàŋ Dàvíìt yi njaré.

Nùb cutɨ́b yi meré, mɨ a tààmcù ŋgáb njɔ̧̀,

ɗà mɨ a nyàŋcù ŋgáb.

17Ɓwâ kɨ́ á nùb meré lâs ɓa mánɨ Kéké,

dùgɨ̀ gbàŋ ɗɔ̀bɨ́nné mɨ ya ɓéɓa gò óknɨ ɓe mɨ rɨ.

Nɨ́m Kéké wáaré á kí,

18ŋgə́ nò ya ndɨŋ kùb ɗə̀ŋhɨ̀ nɨ́ɨ́b kɨ́ kúríí.›

19Jâk ɨ́ tà àm kɨ́ á ní du nɨ́ ɗúwa kùb jábɨ̀ nùb du Jwîf séé yi ɓandɨcuré Mèèín noò. 20Ɨ́dù vúm tɨ̀nnà ŋgáb, tànànɨ ŋgáb ɨnayâna ŋgáb tɨ̀ taŋ bɨ́ fè kùb mób mèín saai ɓe kíí du nɨ́ ɗúwa kùb tàŋtɨ rɨ, dùgɨ̀ kɨ́ kùb du téin téínwaá, dùgɨ̀ tɨ́m, ŋgáb tɨ̀ ɓei bɨ́ ɓíì du ɓe ɨ́r ŋguŋnì. 21Ɓetí yànɨ ɓwâ yi kúríí, nɨ̀vɨ́tɨ̀b á ɓéènɨ ɓíì Mòyíìs kwɨ́íbìn, kùb a faince ɓíhɨ̀b kɨ́ dúhɨ́b mɨ̀yú̧ú̧ no ye Sàbáà lâs yáá.»

Kùb tómnatɨ́ nùb ə́mní yi du Jwîf séé káàtà

22Kí á nùb tómé ɓe kɨ̀jííb, ɓáhîn ɓe mɨ̀kwìn nùb ə́mní yi ta á ɗúnɨ vúm càhó̧ nùb kù mvókín vúmè no, vúm a tôm Pôl ɓe Bàrnàbâs ɨ́ nùb kɨ́ Àŋtìyôs ku. Á ŋgáb ca Sílàs ɓe Jûdə̀ nò kùb ya ɓékom Bàrsàbâs, ɓetí ŋgáb bɨrɨ́b lâs yaá ɓe sɨr só mvókín mwin yàáb, 23Á kùb ya tɨin káàtà kɨ́ nàrénɨ nùb nààsɨ̀b lè ŋgáré, káàtà kɨ́ yaá ɨnè:

«Mwin yàáb nyínè Nùb Tómé ɓe kɨ̀jííb nyindɨsotɨ́ mwin yàáb ə́mní du Jwîf séé du dùnɨ ɗɔ̀ɔ́b Sìlìsíì, ɓe nùb du Àŋtìyôs ɗɔ̀ɔ́b Sìríì rɨ. 24Nɨ́m tɨ óktɨ́ ɨnayâna nùb éíso nɨ́mè hò̧neè tɨ gií nyí tùklɨ̀kɨ́nɨ kɨ̀cáàb, nànɨ nyí yəré ɓe nyindí ŋgábè ɓɔ̧ne na, nɨ́m tɨ nɨ ŋgáb tóóm kù u̧ tómwa. 25Àm kɨ́ á nɨ́m bɨ ɓɔ̧ cànɨ nùb nɨ́m tómsona nyínè ru. Ŋgáb ɓa háàsònɨ Bàrnàbâs ɓe Pôl nùb nɨ́mè ɗûnɨ́mí á. 26Ŋgáb nùb ya kaikɨ́ síí ŋgábè ɓe ɨ́r ə́r Yésù Krístù nò du Kéké nɨ́mè. 27Jûdə̀ ɓe Sílàs á nɨ́m tómsona nyí ɗàrɨ́, ŋgáb tànànyààŋɓà nyí ɓe ɓɔ̧ nɨ́m nɨ́m tɨin tɨín ndè. 28Ɓetí Nyéhè Sarîn ɓe nɨ́m nɨ̀miib nɨ́m ta, nɨ ɗúwa nà nyí ha̧á̧ lúhîn kù ɓè du nɨ́ kɨ́ nɨ́m ta: 29Nyí nɨ fè kùb mób mèín saai ɓe kíí tàŋ, dùgɨ̀ nyàm kùb du téin téínwaá, dùgɨ̀ tɨ́m, nyí nɨ ɓíì du ɓe ɨ́r ŋguŋnì ɓèì rɨ séé. Nyí ɨ́ jə̀ŋ ɓíhɨ̀b kɨ́ lâs, nyí ma ndɨŋtɨ́ nyɔ̧ɔ̧́ á. Nɨ́m nyindɨsoó nyí!»

30Kí á kùb mbɨ́kgi Sílàs, Jûdə̀, Bàrnàbâs ɓe Pôl ə́llénɨ, á ŋgáb gɨ Àŋtìyôs. Féín ku, ŋgáb ɨ́ ɓáhè mɨ̀kwìn nùb ə́mní lâs nànɨ ŋgáb káàtà kɨ́. 31Kùb ɨ́ fàìn káàtà kɨ́, á nùb lâs ya ók mɨ̀tù ɓe nyindí tàmé njɔ̧̀ yi du nó kwe. 32Jûdə̀ ɓe Sílàs yi du ŋgáb nɨ̀miib tɨ́kɨ̀nɨ́b Mèèín ɨ́ nyìnnàɓà mwin yàáb nȩ̀ȩ́ tààmnɨ ŋgáb njɔ̧̀ ɓe gə́gə́ə́b. 33Ŋgáb yi gúntɨ́ ɓè jíìb faín, ŋgáb ɨ́ gɨ̀cù yá nùb ya tómwo ŋgábè. Mwin yàáb ɨ́ nyìndè ŋgáb ŋgáb gɨ̀ ləm. [ 34Ɨ́dù Sílàs ɨ́ tà ní mekɨ́so nɨ ɓè á yáá.] 35Pôl ɓe Bàrnàbâs ɨ́ dùcùɓàyè bɨ́ Àŋtìyôs ku. Ɓáhîn ɓe nùb kù, ŋgáb ɨ́ yà tɔ̀ɔ̀nɨ ŋgáb a ɓéece Kìn yi du ɓe ɨ́r Kékéé.

Pôl ɓe Bàrnàbâs yi gɔɔtɨ́

36Jíìb kù no, Pôl ɨ́ tànà Bàrnàbâs ɨnè: «Nɨ́m gɨ̀tèècù kwɨ́í bɨ lâs yɨ́ nɨ́m yi tateekɨ́so Kìn du ɓe ɨ́r Kékéé rɨ lɨ́ŋnɨ mwin yàáb, nɨ́m a pə́cè hȩ ŋgáb duré.» 37Á Bàrnàbâs yi ɗú gègènɨ Jâŋ kùb yi ɓékom Máàrk. 38Ɨ́dù Pôl ɨ́ tà vúm bɨ ŋgə́ gè ɓetí ŋgə́ ya mbɨ́kkɨ́soó vúm Pàmfìlî há̧á̧ ŋgə́ ɨ́ nyàhȩ̀ vúm háàndóŋnɨ gwɨ̀ì ə́ré yáá. 39Á ŋgáb yi ndai mɨ̀ndárè há̧á̧ ŋgáb ɨ́ gɔ̀klè. Bàrnàbâs ɨ́ ɓê Máàrk ŋgáb ɨ́ lê bɨ́ kwáìn gìnɨ Cîpɨ̀rə̀. 40Cùr mwin yàáb ə́mní ya naré Pôl Mèín nò du ɓe ndɨ̀nyàáŋ lâs ŋgáréè, ŋgə́ ɨ́ ɓécè kɨ́ noò Sílàs, ɓe kùùŋ ɨ́ ə́lléɓwêcê. 41Ŋgáb ɨ́ ndôŋ ɗɔ̀ɔ́b Sìrî ɓe Sìlìsíì ŋgáb a taamnace nùb ə́mní njɔ̧̀.

Currently Selected:

Ə́rɨ́b nùb tómé yi ə́llé 15: NTV

Highlight

Compare

Copy