Ə́rɨ́b nùb tómé yi ə́llé 17
17
Pôl ɓe Sílàs á Tèsàlònîk
1Ŋgáb ɨ́ ndóŋdôŋ Àmfìpòlîs ɓe Àpòlònî, ŋgáb ɨ́ gì féínnɨ Tèsàlònîk yɨ́ ŋgáb yi kwa dúú mɨ̀yú̧ú̧ Jwîf ɓoò. 2Pôl ɨ́ gì dúú mɨ̀yú̧ú̧ no ɓetí yɨɨ́m ɗɨ́m nóò á. Ŋgə́ ɓe nùb yi du ɓèé ɨ́ yà tùlɨ́ŋnɨ sà̧à̧ há̧á̧ Sàbâ taarɨ́b ŋgáb a ndáŋháce ɓe ɨ́r Kìn Mèèín yi du tɨín káàtà Mèèín noò. 3Ŋgə́ ɨ́ yà ŋgáb tànànɨ njàb nɨ́ɨ́b du tɨín kíì, túùmnànɨ ŋgáb ɨnayâna tɨtɨnné kɨ́ ya tacií nɨ́ ɨnayâna Mèsî kwá pə́ jábɨ́r ɗà ŋgə́ a sə̀ə̀mcùhô̧ mvókín nɨ̀kwíbí. Ŋgə́ yaá ŋgáb tànànɨ ɨnè: «Yésù mɨ du nyí tànànɨ rè, ŋgə́ ɨ́ du Mèsî kɨ́ ru.» 4Nùb kù mvókín ŋgábè no ɨ́ ə́mnè àm kɨ́, ŋgáb ɨ́ ə́ə̀ŋndê Pôl ɓe Sílàs cùrì. Gɨrêk bɨ ví̧i̧ yi jəŋkom Mèèín, dùgɨ̀ nɨ̀gub ɨ́r sóò ɨ́ ndɨ̀ŋɓwê u̧. 5Ɨ́dù njɔ̧̀ ɨ́ ɓáàŋɓà nɨ́ Jwîf bɨ cei, ŋgáb ɨ́ ɓáhè nyinyáàb kù ŋgáb yi kwa ə́ə̀ŋtèèniì, ŋgáb ɨ́ wútè mɨ̀kwìn nùb kíì ndɨ̀ŋtèènɨ ŋgwé ɓáŋhîn kúr bɨ̂ŋ. Ŋgáb ɨ́ gì jóblénɨ ɓavɨ̀r Jàsóòŋ, mánɨ Pôl ɓe Sílàs yó ku àm vúm ge ŋgáb yá nùb lâs ɓáaré. 6Hȩ ŋgáb yi du Pôl ɓe Sílàs kwàwáá, ŋgáb ɨ́ bì Jàsôŋ ɓe mwin yàá bɨ ə́mní yi du yó kwe, gèsònɨ ŋgáb yá nùb kɨ́ɨ́ tií. Féín nùb kíì tíí, ŋgáb ɨ́ yàrê kɨ́ɨ̀ŋnɨ ɨnè: «Nɨ̀ŋgwáàb lè ɓáaŋkíí ɗɔ̀ɔ́b lè bɨ̂ŋ, á ŋgáb féínwo hò̧ rè! 7Jàsôŋ tɨ gamndéé ŋgáb no yó! Nɨ́ɨ́b ŋgáb du ndɨ̀ŋniì lâs nɨ ɗóònɨ ɓe ɓíì mvèìn kàm nɨ́mè jírií ɗàà, ɓetí ŋgáb á bɨ tàɓànɨ wááŋ mvèìn jíri kù á ndóŋ nɨ ku, ɨ́r á Yésù.» 8Nyindí kɨ́ ɨ́ wútɨ̀ndóŋɓàgì mɨ̀kwìn nɨ̀vɨ́tɨ̀bì ɓe nùb kɨ́ɨ́ tií. 9Jàsôŋ ɓe nùb noò ɨ́ njáàbɓàyè bɨ́ mòné, ɗà kùb ɨ́ mbɨ́kgì ŋgáb.
Pôl ɓe Sílàs gɨndóŋtɨ́ Bèrê
10Jɔ̀ sɨ́mnɨ̀r sɨ́ɨ̀mnɨ ɨnè, á mwin yàá bɨ ə́mní ndɨŋ Pôl ɓe Sílàs ə́llé bɨ gìnɨ Bèrê. Ɓwâ ŋgáb yi féín kwe, ŋgáb ɨ́ gì dúú mɨ̀yú̧ú̧ Jwîf ɓoò no. 11Jwîf bɨ Bèrê kwe yaá bɨ ɓe ɗɨ́m nyɔ̧ɔ̧́ ndôŋ kɨ́ nùb Tèsàlòníìk; ŋgáb yi ə́əmtɨ́ bɨ́ Kìn Mèèín Pôl yi tanakom ŋgábè ɓe njɔ̧̀ mwi̧. Ye lâs ŋgáb yaá cànyààŋnɨ Kìn Mèèín yi du tɨín káàtààb Mèèín noò pénɨ nɨ́m Pôl du nyìnnɨ kɨ́ yè á àmɨɨr kè. 12Nùb ví̧i̧ mvókín ŋgábè no ɨ́ ə́mnè Yésù. Mvókín Gɨrêk bɨ no cè nɨ̀gub ɨ́r sóò ví̧i̧ ɓe nɨ̀ŋgwáàb kù ɨ́ ə́ə̀mɓwê. 13Ɨ́dù ɓwâ Jwîf bɨ Tèsàlòníìk yi ók ɨnayâna Pôl á tànɨ Kìn Mèèín Bèrê ɓwê na, á ŋgáb éíso gìnɨ wútɨ̀ɓwênɨ mɨ̀kwìn nɨ̀vɨ́tɨ̀bì ŋgáb ndɨ̀ŋ ŋgwé ɓáŋhîn kwé ku. 14Ɓwâ ŋgáb yi féínndé, á mwin yàáb ə́mní yi ndɨŋ Pôl éíkɨ́kɔ́ɔ̀nɨ gìnɨ péín mɨ̀kwehɨ̀rí; ɨ́dù Sílàs ɓe Tìmòtê ɨ́ mèkɨ́sò bɨ́ Bèrê ɓè. 15Nùb ya háaso Pôl ɨ́ gè ŋgə́ há̧á̧ Àtên. Ɗà ŋgáb ɨ́ cùwò Bèrê ɓe pénè Pôl yi tómwona Sílàs ɓe Tìmòtê ɨnayâna ŋgáb tùwò ní kɔ́klîn yáá.
Pôl féíntɨ́ Àtên
16Ɓwâ Pôl yi du Àtên ku móŋnɨ Sílàs ɓe Tìmòtê rè, kɨ̀cáàb yaá ɓà ŋgə́ ŋgwȩ́ȩ́ tuklɨkí̧i̧ ɓe pê ŋgə́ yi pə́ mèín nyaŋhɨ́b kwé fá̧à̧ rè. 17Ŋgə́ ɓe Jwîf bɨ ɓe nùb yi du Jwîf séé ya jəŋkom Mèèín yaá ndáŋlɨ́ŋnɨ dúú mɨ̀yú̧ú̧ no, dùgɨ̀ laŋtaŋ jírií ya ye lâs, ŋgə́ ɓe nùb ɓe ŋgáb ya ɓainkom kwe. 18Tá tɔ̀hí bɨ kù yi du nùb Èpìkúùr bɨ, nùb kù cè nùb Sɨ̀tòwáà ɨ́ yàréɓwê nyìnnɨ ɓe ŋgə́. Nùb kù yaá fɔ́nɨ ɨnè: «Nèìn ndè nyinye ní?» Nùb kù yi duce óknɨ hȩ Pôl yi du ɓéènɨ àm Yésùù ɓe sə̀ə̀mcùhô̧ cwéé#17.18 Ɓwâ Gɨrêk bɨ ya ók bɨ́ Pôl tànɨ «Yésù» ɓe «sə̀ə̀mcùhô̧ cwéé» rèé, ŋgáb ɨ́ lə́mnè bɨ́ mèín nɨ̀gwi á ku, ɨ́r ŋgéé ɨ́ du nɨ́ «sə̀ə̀mcùhô̧ cwéé» ru. Ŋgə́ yaákòm yə̀ŋnɨ ɓe «Yésù» nò yi duce mèín nɨ̀ŋgwáà. yaá cè tànɨ ɨnè: «Á hȩ ŋgə́ ɗú nɨ́ nɨ́m tànànɨ àm mèín bɨ nɨ́m du nɨ́ ɗə̀ə̀ŋwáá ye», 19Á ŋgáb ya ɓége ŋgə́ ŋgwìn Àrèyòpâjə̀#17.19 Yɨɨ́m ɨ́r ŋgòm kù á. Ŋgòm kɨ́ yaá Àtên. Tɨ́ŋgù̧ú̧ bɨ ya gɨkom ŋgòm kɨ́ ya ŋgùnnɨ nɨ̀vɨ́tɨ̀b. Á ŋgáb ya bɨ́cɨ bɨ́ ɨ́r ɓáhɨ́r ŋgwìn ŋgábè kíì: «Àrèyòpâjə̀», dùgɨ̀ nɨ ɓwâ ŋgáb du bɨ́ ŋgòm kɨ́ ya ɓáàwáá. no, ŋgáb ɨ́ fɔ̂ ŋgə́ ɨnè: «Tɔ̀ɔ́ heé wu duye nɨ́m tànànɨ rè macè kɨ́ ŋge? 20Ɓetí nɨ́m nɨ ókkɨ́yèwá nɨ́m wu du nɨ́m tànànɨ kɨ́, á nɨ́m ɗú wu tànànyààŋ nɨ́m njàb kɨ́ ru.» 21(Kí du nùb Àtên tə̧né ɓe nùb go go̧né yi dukomhácɨ ju ŋgáb átɨtee ŋgáb a ókteece nɨ́ɨ́b heé kíì á.) 22Pôl ɨ́ éíwúgì còóm ŋgábè tɨŋtɨ̧̀ɨ̧́, ŋgə́ ɨ́ tà: «Nùb Àtéèn, mɨ péé mɨ́ nyí á nɨ jə̀ŋɓànɨ mèín bɨ ví̧i̧. 23Ɓetí ɓwâ mɨ tɨ yəŋteekom kwé tə̧né, mɨ a góomteece yɨ́ mɨ̀yú̧ú̧ bɨ nyínè, mɨ tɨ kwatɨ́ yɨ́ mɨ̀yú̧ú̧ kù ma̧á̧ ɓe sɨɨ, nɨ́m kù cè ya tɨín ɨnè: ‹kɨ́ rè kɨ́ mèín kùb ɗə̀ə̀ŋwáá á.› Àà! Nɨ́m nyí ɗə̀ə̀ŋwáá nyí du jə̀ŋnɨ kɨ́, kí ma á mɨ go mɨ́ nyí tànànɨ rè. 24Mèín nò ya nyaŋhȩ ɗɔ̀ɔ́b ɓe nɨ́ɨ́b du nó kwe lâs ɨ́ du Kéké ɓɨɨr ɓe ɗɔ̀bí ru, ŋgə́ nɨ dùtèènɨ dúhɨ́b nɨ̀vɨ́tɨ̀b óŋnaɓa Mèèín no ɗàà. 25Nɨ tàwá nɨ́m kù á ŋgə́ tùŋnɨ ɨ́ tà nɨ̀vɨ́tɨ̀b kpɔ́k ŋgə́ na, ŋgə́ ɨ́ du nɨ́ nànɨ nùb lâs mè ɓe nɨ́ɨ́b lâs lu. 26Yàwòó nɨ̀vɨ́tè mwi̧í̧ ya á ŋgə́ ya nyaŋhȩ gbàŋ lâs, ŋgə́ ɨ́ kɨ́ktèè ŋgáb ɗɔ̀ɔ́b bɨ̂ŋ. Ŋgə́ ɨ́ ɓwáítèènà ŋgáb jíìb dáín ɓe sɨ́ɨ̀mí, ŋgə́ ɨ́ ndìntèènàɓwê ŋgáb jɔ̀ ɗɔ̀ɔ́b ŋgáb ɓa dùtèènɨ noò. 27Ŋgə́ yi ndɨŋ u̧ àm nɨ̀vɨ́tɨ̀b a mátèè ŋgə́, ŋgáb yè tɨ kwa ní kè na á, u̧ kɨ́ mvókín nùb lâs, ŋgə́ nɨ ɓàcéyè cóo ɓe nɨ̀mwi̧ ɗàà. 28Ɓetí,
‹Ɓe ŋgə́ á nɨ́m du kwànɨ mè ru, nɨ́m á tɨ̀ŋnɨ, nɨ́m á cè dùnɨ.›
Nùb kù mvókín nyínè no yi taɓacéyetɨ́ ɨnè:
‹Nɨ́m duɓwée munɨ́b ŋgéé á.›
29Hȩ nɨ́m dùnɨ munɨ́b ŋgéé, nɨ ɗúwa nɨ́m lə́mnɨ̀ ɨnayâna Mèín du nɨ hȩ nɨ́m nɨ̀vɨ́tè cábɓa ŋgə́ nɨ̀mɨr nyààŋnɨ ɓe gôl kɨ́ kù ɓe sɨɨ á. 30Mèín nɨ góòmcɨ̀ nɨ nɨ́m yi ndóŋ ɓwâ nɨ̀vɨ́tè yi duye nɨ́m kù ɗə̀ə̀ŋwáá íí ya ɗàà. Ɨ́dù ɗàrò, ŋgə́ ɗúú nùb lâs, wu dùgɨ̀ yɨ́ ŋge, wu ɓàndɨ̀ sum. 31Ɓetí ŋgə́ ɓwáícií nɨ́ ye ŋgə́ ɓa ŋgùnnɨ nùb ɗɔ̀bɨ́nné lâs ŋgwìn ɗɨ́ɗɨ̧́ɨ̧́, nò ŋgə́ yi caré ɨ́ ɓa dùnɨ tɨ́ŋgù̧ú̧ ru. Ŋgə́ túumhó̧ɓatɨ́ laŋtɨ̧ɨ̧́ ní ɓa ndɨ̀ŋmènɨ nɨ́m kɨ́ á, ɓe sə̀ə̀mnèé ŋgə́ səəmcuhó̧ nɨ̀ŋgwá kɨ́ mvókín nɨ̀kwíbí rè!»
32Ɓwâ nùb kɨ́ yi ók Pôl nyìnnɨ àm sə̀ə̀mcùhô̧ mvókín nɨ̀kwíbí kɨ́, nùb kù ɨ́ yà ŋgə́ sɔ̀knɨ, nùb kù ɨ́ tàcè: «Nɨ́m tɨ̀ óknacɨ wu kɨ́ ɗàrɨ́ ɓwâ kù.» 33Yɨ́ kɨ́ á Pôl éímbɨ́kkɨ́so nɨ́ ŋgáb. 34Ɨ́dù nùb kù ɨ́ ə́ə̀ŋndéhâ bɨ́ no cùrì, ŋgáb ɨ́ ə́mnè bɨ́ Yésù. Dènîs yi duɓwéhe tɨ́ŋgù̧ú̧ Àrèyòpâjə̀#17.34 Góòmɓwê gɔ̀ 17.19 ɓe nɨ̀gwi kù ɨ́r yi du Dàmàríìs, ɨ́ nùb kù tèè yaá ɓwê kpáín nùb yi ə́əŋndé no cùrì kɨ́ no.
Currently Selected:
Ə́rɨ́b nùb tómé yi ə́llé 17: NTV
Highlight
Share
Compare
Copy
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon
