Ə́rɨ́b nùb tómé yi ə́llé 12

Kùb yi kwíikíí Jâk kùb ɨ́ kɨ́klê Píyéèr dúú nìrì

1Jíìb kù no, Hèrôdə̀ nò yi du mvèìn jírií ɨ́ yà túùmnɨ nùb ə́mní kù mɨ̀kwìn kɨ́ noò jábɨ́r. 2Kí á ŋgə́ ndɨŋ kùb cə́bkɨ́ Jâk mwin yàá Jáàŋ ɓe jì̧í̧. 3Cùr kɨ́ no, hȩ ŋgə́ pə́ Jwîf bɨ óktɨ́ mɨ̀tù ɓe nɨ́m ní yi ndɨŋ kíì, á ŋgə́ ndɨŋkwa kùb bɨ̀wò Píyéèr. Yɨɨ́m mvókín jùrúb kùb yi du ɓóŋnɨ bɨ̀rê mvùùŋ no ɗàwáá tàŋniì á. 4Ɓwâ kùb yi bɨwo Píyéèr, Hèrôdə̀ ɨ́ ndɨ̀ŋ kùb kɨ́klésò ŋgə́ dúú nìrì, ŋgə́ ɨ́ gɔ̀ɔ̀tèè kúùŋ sójàbì nààsɨ̀b nààsɨ̀b gə́tɨ̀nɨ Píyéèr. Ŋgə́ yaá lə́ə̀mnɨ ŋgə́ ŋgùnnɨ mɨ̀kùnín ɓwâ jùrúb Páskàà ɓa ndóŋniì. 5Píyéèr yaá gə́tîn dúú nìrì ku, ɨ́dù mɨ̀kwìn nùb ə́mní yaá ŋgə́ yóŋnàɓànɨ Mèín cei.

Dùgal Mèín yi ɓátɨhó̧tɨ́ Píyéèr dúú nìrì

6Ye Hèrôdə̀ yi ɓa ndɨ̀ŋnɨ kùb ŋgwìn Píyéèr mɨ̀kùnɨ́nné á hȩ yȩȩ́ u̧. Ŋgə́ yaá kwéin ɓe lí tú̧ú̧ bɨrɨ́b tɨŋtɨ̀ŋ sójààb bɨrɨ́b no, wumí. Nùb gə́tɨ ɓavɨ̀r dúú nìrì yaá cè ɓavɨ̀rì ɓè. 7Tií na, dùgal Kékéé sààró, ɗà mwa kàm ɨ́ sàrɨ̀kɨ́ɓà lúùm kɨ́ bɨ̂ŋ. Ŋgə́ ɨ́ jɨ̀ɨ̀sə̀ə̀mkî Píyéèr, ŋgə́ ɨ́ tànà ŋgə́: «Éíwúum còóm kɔ́klîn!» Á lí tú̧ú̧ yi ŋgéé ŋgárɨ̀bì parɨɓa ɓe síí. 8Dùgal ɨ́ tà: «Kwéin lí ŋgù̧né woò, wu a lê tə́b.» Píyéèr ɨ́ ndɨ̀ŋ nɨ́ɨ́b kɨ́ lâs, á dùgal tana ŋgə́: «Lə́rə́əm júk ndoŋnɨri woò, wu a tù mɨ.» 9Píyéèr ɨ́ fô̧ dúú nìrì ŋgə́ a tuce dùgal. Ŋgə́ yi nɨ́ ɗə̀ə̀ŋwá ɓè nɨ́m dùgal du ndɨ̀ŋnɨ rè dumeɓa àmɨrìí; ŋgə́ yi lə́mne ní jəəm nɨ wum á. 10Ŋgáb ɨ́ ndôŋ ɓavɨ̀r tíí yi du gə́tɨ́nne ya. Ŋgáb ɨ́ ndóŋkwà kɨ́ turé ré ya. Á ŋgáb féín ɓavɨ̀r jíri fó̧ laŋtɨ̧né yi du ɓe tú̧ú̧ ya. Ɓavɨ̀r kɨ́ ɨ́ kùùmɓà ɓe síí ŋgábè tíí, ŋgáb ɨ́ fô̧. Ŋgáb gɨ̀sénɨ jɨ̀r yáin kù no, Píyéèr sɨ̀rɨ̀cì na dùgal éílɔ̧́kíí nɨ́ ŋgə́.

11Píyéèr ɨ́ ɗə̀ə̀ŋgì ɨnayâna ní fó̧metɨ́, á ŋgə́ ta: «Ɗàrò mɨ pə́nyaaŋgií àmɨrì: Kéké tómwotɨ́ dùgal noò, ŋgə́ ɓátɨhó̧tɨ́ mɨ nyòm Hèrôdə̀ ɓe ɓáŋhɨ́b lâs gbàŋ Jwîf tɨ du mɨ ɓwánàniì no.»

12Ɓwâ Píyéèr yi ɗəəŋmeɓa ɨnayâna ní ɓáttɨ́ nɨ́ na, á ŋgə́ yi gi Màríyà yà Jáàŋ ɨ́r duɓwéhe Máàrk yó. Nɨ̀vɨ́tɨ̀b ví̧i̧ yi ɓáatɨ́ yó ku yóŋnɨ Mèín. 13Píyéèr ɨ́ kùtɨ̀résò ɓavɨ̀r hamni; kí á nɨ̀gwi ə́ré kù ɨ́r yi du Rôdə̀ éíhó̧ yó ku àm go kùùmnɨ ɓavɨ̀rì. 14Ŋgə́ ɨ́ ɗə̀ə̀ŋcù kúu nyindíí Píyéèr, ŋgə́ ɨ́ ókɓà mɨ̀tù cei. Ŋgə́ nɨ ní kùùmyè ɓavɨ̀r na tàwá, ŋgə́ ɨ́ lùcùréyè nɨ́ yó tə̧ə̧́ tànànɨ nùb yó kwe ɨnayâna Píyéèr á ɓavɨ̀rì. 15Kí á ŋgáb tana ŋgə́: «Wu á wu yɨŋmîn ye!» Ɨ́dù ŋgə́ ɨ́ nòmhácè àm kɨ́ nɨ àmɨɨr á. Á ŋgáb ta bɨ́ ɨnè: «Nyéhè noò á nɨ ru.» 16Mvókín kɨ́ no, Píyéèr á cè ɓavɨ̀r kùtɨ̀hánɨ. Ɓwâ ŋgáb yi kuumgi ɓavɨ̀rì, ŋgáb ɨ́ sə̂m Píyéèr ɗà ŋgáb ɨ́ gbɨ̀ɨ̀ŋɓà cei. 17Ŋgə́ ɨ́ mábsò ŋgáb ŋgáár ɗà ŋgə́ ɨ́ átɨ̀nàgì ŋgáb hȩ Kéké tɨ gehó̧ ŋgə́ dúú nìrì noò. Ŋgə́ ɨ́ tànàkwà ŋgáb ɨnè: «Tananáam Jâk#12.17 Jâk lè nɨ wúrúb Yésùù á, nɨ nò kùb ya kwíhe rɨ́ sé ɓe nùb ə́mní kù meré péìn kɨ́.» Á ŋgə́ fó̧gi, ŋgə́ ɨ́ gɨ̀ndôŋ nɨ́ yɨ́ ji. 18Ɓwâ ye ya sallé, gbɨ̀mgbɨ̀m ɨ́ sə̀m mvókín sójàbì. Ŋgáb ɨ́ yà mánɨ i̧ á ndɨŋ Píyéèr ɨ́ lɔ̧́hô̧. 19Hèrôdə̀ ɨ́ ndɨ̀ŋ kùb mátèè ŋgə́, ɨ́dù kùb ɨ́ dù bɨ́ ŋgə́ kwàwá. Ŋgə́ ɨ́ tà kùb fɔ́ sójààb hȩ tɨ ndɨŋndé ɗà kùb a kwíhè ŋgáb. Cùr kɨ́ no, Hèrôdə̀ ɨ́ éì Jùdê gìnɨ Sèsàrê, ŋgə́ ɨ́ jə́bwò ku jíìb ti ŋgób.

Cwá Hèrôdə̀ ya kúré

20 Hèrôdə̀ yaá óknàɓànɨ nùb Tíìr ɓe nùb Sìdóòŋ njù̧ cei. Nùb kɨ́ ɨ́ bì ɓɔ̧, ŋgáb ɨ́ mbə̀tɨ̀gè Bɨ̀làtûs nò yi du nò ə́ré jíri Hèrôdə̀, vúm gɨ̀ ŋgə́ ɓwèìnɨ ju kerîn ɓetí cɔŋ ŋgábè ti̧né lâs yi gokom nɨ Hèrôdə̀ kíì ti̧í̧ ku á. 21Hȩ ye kɨ́ ya ɗóoré, Hèrôdə̀ ɨ́ lə́wò gáàŋ mvènnì noò, ŋgə́ ɨ́ gò dùrénɨ kò ŋgù̧ní noò ya nyìnnànɨ ŋgáb nɨ̀vɨ́tɨ̀bì tíí. 22Á nùb Tíìr ɓe nùb Sìdóòŋ ya ta: «Kə́í, kɨ́ rè mèín ɨ́ du ɓa nyìnnɨ ru, nɨ nɨ̀vɨ́tè sé!» 23Mvókín kɨ́ no á dùgal Kékéé yi lóŋ Hèrôdə̀ yáb ɗə̀bì àm ŋgə́ ya áwú dɨmɨɨr ók nɨ́ ɓe Mèèín no sóò. Kí á ɗə̀b kɨ́ yi taŋkwíikɨ́ ŋgə́.

24Nɨ̀vɨ́tɨ̀b ɨ́ yà ə́ə̀mndóŋnɨ àm Mèèín tíí tíí. 25Ɓwâ Bàrnàbâs ɓe Sôl yi cáŋhȩ ə́rɨ́b ŋgábè Yèrúsàlèm, ŋgáb gɨ̀cùnɨ, á ŋgáb gecu Jâŋ kùb yi ɓékom Máàrk ŋgáré.

Currently Selected:

Ə́rɨ́b nùb tómé yi ə́llé 12: NTV

Highlight

Compare

Copy