Ə́rɨ́b nùb tómé yi ə́llé 13
13
Nùb ə́mní Àŋtìyóòs tómtɨ́ Bàrnàbâs ɓe Sôl ə́ré
1Mɨ̀kwìn nùb ə́mní Àŋtìyóòs no, nùb ɓéhèé Kìn Mèèín ɓe nùb tɔhɨ ə́mní yaá ku, nùb kɨ́ yɨɨ́m: Bàrnàbâs, Sìmèyôŋ (kùb yi ɓékom nò Sîn), Lùsíyùs (nò Sìréèn), Mànàyêŋ (nò yi hamwúɓáhe ɓe Hèrôdə̀ nò du gómnàà cúú), ɨ́ Sôl á. 2Ye kù ŋgáb yaá jìnɨ ɓɔ̧, ŋgáb á cè ɓáhîn mɨ̀yú̧ú̧, á Nyéhè Sarîn tana ŋgáb ɨnè: «Cahó̧kɨ́ná nɨ Bàrnàbâs ɓe Sôl gɨ́ní àm ŋgáb gɨ̀ yúùnɨ ə́rɨ́b mɨ ya ɓéwona ŋgábè.» 3Á ŋgáb ya ji ɓɔ̧, ŋgáb ɨ́ yôŋ Mèín, ɗà ŋgáb ɨ́ hèìwû Bàrnàbâs ɓe Sôl ŋgáár ŋgwéé tómnɨ ŋgáb gùr ə́ré. Ŋgáb ɨ́ mbɨ́kgì ŋgáb gìnɨ.
Bàrnàbâs ɓe Sôl á Cîpɨ̀rə̀
4Hȩ Nyéhè Sarîn tómnɨ Bàrnàbâs ɓe Sôl, á ŋgáb yi sé sɔ̀ Sèlə̀sî no lə́ndóŋnɨ tɨ́kwá̧ Cîpɨ̀rə̀ no. 5Ɓwâ ŋgáb yi féín Sàlàmíì, ŋgáb ɨ́ yà tànɨ kìn Mèèín dúhɨ́b mɨ̀yú̧ú̧ Jwîf ɓoò no. Jáŋ Máàrk yaá ɓe ŋgáb àm kpɔ́k ŋgábè. 6Ŋgáb ɨ́ pèɓà tɨ́kwá̧ rè kááŋ, há̧á̧ Pàfôs. Ɓè á ŋgáb yi kwa nɨ̀ŋgwá májɨ̀ɨ̀ kù ɨ́r yi du Bààryésù. Ŋgə́ yaám Jwîf á, ŋgə́ ɨ́ tà ní tɨ́kìn Mèèín á na. 7Ŋgə́ yɨɨ́m ɓwàjìrí Sèèrjíyùs Pólùs nò yi du gómnà tɨ́kwá̧ kíì á. Gómnà kɨ́ yaáɓà ɓe kɨ̀cáàb cei. Ŋgə́ ɨ́ tà kùb ɓéwònà ní Bàrnàbâs ɓe Sôl, ɓetí ŋgə́ yaá ɗúnɨ óknɨ kìn Mèèín. 8Ɨ́dù Èlìmâs (Ɓe nyindí gɨrêk, kí ta nò májɨ̀ɨ̀ na á) yi nɨ́ ɗúwa ŋgáb gòtɨ, ɓetí ŋgə́ yaá mánɨ ɓàndɨ̀kɨ́nɨ ə́ə́m Mèèín gómnàà sumí. 9Kí á Sôl kùb yi du ɓéɓwênɨ Pôl,#13.9 Ɨ́r nò tómé Sôl lè yɨɨ́m ɓe nyindí Jwîf á, Pôl cè ɓe nyindí Gɨrêk. yúklîn ɓe nyòm Nyéhè Sarɨ́nne, yi kpáaŋndé nɨ̀ŋgwá rè íí no. 10Ŋgə́ ɨ́ tà: «Ɓwà ti mbááŋ kɨ̀ mbááŋ, ɓáŋnjɔ̧̀ kɨ̀ ɓáŋnjɔ̧̀ rè, mwin Sátàìn sam ɓà, nò du jìnɨ nɨ́m du nyɔ̧né! Wu tɨ̀ mbɨ́khace ɓáàŋkî ɓwáár Kékéé à? 11Ɗàrò, ókye, Kéké ɓa wu lóŋnɨ yáb íhé á, íí a ɓòŋhó̧yè wu mvókín ti ŋgób, wu a dù wú mwa mvihɨri pə́cɨ̀r.» Ɓè mu̧u̧ íí ɨ́ sɨ́mnè Èlìmâs ndùúŋ, ŋgə́ nàkɨ̀ɨ̀m: ŋgə́ ɨ́ yà yáàtèènɨ ŋgáár péín ndè péín ndè, mánɨ nò ɓa ŋgə́ ɗààmgèniì. 12Hȩ gómnà yi pə́ nɨ́m yi ndɨŋ kíì, ŋgə́ ɨ́ ə́mnè àm Mèèín. Tɔ̀ɔ́ yi du ɓe ɨ́r Kékéé kɨ́ yi ɗiɓatɨ́ ŋgə́ sumí.
Pôl ɓe Bàrnàbâs á ndóŋcɨ̀ Àŋtìyôs du Pìsìdî rɨ no, tànɨ Kìn Nyɔ̧ɔ̧́
13Pôl ɓe nùb no gùrí ɨ́ éì Pàfôs gìnɨ Péèrjə̀ ti Pàmfìlíì no. Ɓè á Jáŋ Máàrk yi mbɨ́kkɨ́so ŋgáb, ŋgə́ ɨ́ gɨ̀cù nɨ́ Yèrúsàlèm. 14Ŋgáb ɨ́ éíndôŋ Péèrjə̀ ɓè, á ŋgáb gi féínnɨ Àŋtìyôs ti Pìsìdíì no. Ye Sàbáà, ŋgáb ɨ́ lə́sò dúú mɨ̀yú̧ú̧ no. Ŋgáb ɨ́ dùrê ɗàá. 15Ɓwâ kùb ya faincáŋhȩ káàtààb ɓíhɨ̀b Mòyíìs ɓe nɨ́ɨ́b tɨ́kɨ̀nɨ́b Mèèín ya tɨnndé, á mvènnɨ́b dúú mɨ̀yú̧ú̧ yi ta kùb tàndóŋsònà ŋgáb ɨnè: «Mwin yàáb, ɗàrò, óo nyí duú ɓe nɨ́m nyí nyinna nɨ̀vɨ́tɨ̀bì tààmnɨ ŋgáb njɔ̧̀ nokwe, á sàmàìn nyí nyinndé.» 16Á Pôl yi éíwú còóm, ŋgə́ ɨ́ mábsò nɨ̀vɨ́tɨ̀b ŋgáár ndɨ̀ŋnɨ ŋgáb dù néín, ŋgə́ ɨ́ tà: «Nùb Ísràyéèl ɓe nyí nùb du yóŋnɨ Mèèín, óknáam nɨ́m mɨ du tànɨ rè! 17Mèín gbàŋ Ísràyéèl du yóŋniì yi caá tákɨ̀rɨ́b nɨ́mè. Ŋgə́ ya víhií gbàŋ kɨ́ ɓwâ ŋgáb ya duye kùbè ti̧í̧ ti Èjíìbtə̀ noò, ɗà ŋgə́ ɨ́ ácùhô̧ ŋgáb ɓe nyòm noò. 18Ŋgə́ ɨ́ jíhè ŋgáb ŋgwàì ndɨ̀ŋnì sàmàìn dáín vii bɨrɨ́b. 19Ŋgə́ yi ndɨŋtɨ́ kùb ndùùkɨ́ gbàŋ tɨ́ɓaám ti Kànàâŋ no, kùb ɨ́ nàkî gbàŋ noò ɗɔ̀ɔ́b nùb kíì. 20Ŋgáb ɨ́ dù no sàmàìn dáín təmərì nààsɨ̀b ɨ́ yɔ̀k vii bɨrɨ́b ɨ́ cóóŋ.
«Cùr kɨ́ no, Mèín ɨ́ nà tákɨ̀rɨ́b nɨ́mè mvènnɨ́b, há̧á̧ ɨ́ gò féínnɨ ɓwâ yi Sàmíyèèl tɨ́kìn Mèèín. 21Á ŋgáb ya ɓwei mvèìn jíri, ɗà Mèín ɨ́ nà ŋgáb Sôl, mwin Kíìs yi fó̧ gbàŋ Bèìnjàmə̧́ə̧̀ noò. Ɗà Sôl kɨ́ ɨ́ gwîn mvèìn há̧á̧ dáín vii bɨrɨ́b. 22Hȩ Mèín mvúcùnɨ Sóòl, ŋgə́ ɨ́ bɨ̀cùwúnà ŋgáb Dàvît mvènnì. Ŋgə́ ɨ́ nyìn ɓe ɨ́r ŋgéé ɨnè: ‹Mɨ kwatɨ́ Dàvît mwin Jèséè; njɔ̧̀ moò á ŋgə́ ya, ŋgə́ ɓa yúùnɨ nɨ́ɨ́b lâs mɨ du ɗúnɨ ŋgə́ ndɨ̀ŋte á.› 23Yésù Mèín ya kɨ́k dù tɨ́céín gbàŋ Ísràyéèl hȩ Mèín nɨ̀mɨr ya ɓwállé rɨ duɓwée nyȩ Dàvíìt á. 24Jâŋ ya ɓéekɨ́nayayeé gbàŋ Ísràyéèl. Ŋgə́ ɨ́ tà ŋgáb ɓàndɨ̀ sum ŋgáb a kɔ̀k kɔ ə́mní. Ɓwâ kɨ́ kùb ya bɨ́ Yésù fèìnɓàyèwá. 25Mvókín Jâŋ yi du ə́r nóò no cáàŋniì, ŋgə́ yaá tànɨ ɨnè: ‹Nyí ma lə́əmce mɨ ma cè na? Nò nyí móŋ kɨ́ nɨ mɨ sé. Ɨ́dù óknáye, ŋgə́ á yè nɨ cùrì; mɨ ɓàcéyè ɗóhîn ɓe nò parɨkɨ́na ŋgə́ lí nó tə́bì ɗàà.›
26«Mwin yàáb, nyí nùb du nyȩrɨ́b Ábɨ̀ràháàm ɓe nyí nùb goce hò̧ gwɨ̀ì mɨ̀yú̧ Mèèín, nùb Mèín tómwona kìn ɓə́r ní du nɨ̀vɨ́tɨ̀b ɓátɨ̀nɨ rè, nɨ́me nyí á. 27Ɓetí nùb Yèrúsàlèèm ɓe mvènnɨ́b ŋgábè bɨ ɗə̀ə̀ŋwá na á du Yésù. Ŋgáb cè bɨ́ óknyààŋwá nɨ́ɨ́b tɨ́kɨ̀nɨ́b Mèèín yi tɨin kùb duce fàìnnɨ ye Sàbáà lâs lɨ, ɨ́dù ŋgáb ya yúutɨ́ bɨ́ nyindí kɨ́ ɓe kwíhèé ŋgáb ya kwíhe Yésùù. 28Dugɨ hȩ ŋgáb ya du kwàwá nɨ́m ŋgáb ə́əŋwo yá àm kwíhe ŋgéé, ŋgáb ɨ́ tà Pìlât ndɨ̀ŋhá kùb kwíhɨ̀ ŋgə́. 29Cùr ŋgáb yi ndɨŋ nɨ́ɨ́b yi du káàtààb Mèèín no tɨín ɓe ɨ́r Yésùù fó̧ hàráá, á ɓwàjììb noò yi ásó fín nóò bɨ̧̀ɨ̧́, gìnɨ kɨ́klénɨ sèrìn. 30Ɨ́dù Mèín yi səəmcuhó̧tɨ́ ŋgə́ mvókín nɨ̀kwíbí. 31Yésù yi túumnaá nùb ya háawo ŋgə́, yàwònɨ Gàlìlê há̧á̧ Yèrúsàlèm ndɨ síí, jíìb ví̧i̧ ɓàì. Nùb kɨ́ ɨ́ ducɨ ɗàrò mɨ̀námé du nyìnnànɨ gbàŋ Ísràyéèl àm ŋgéé ru. 32Kìn Nyɔ̧ɔ̧́ kɨ́ á nɨ́m nɨ̀miib nɨ́m gewona nyí ru; nɨ́m Mèín ya ɓwáína tákɨ̀rɨ́b nɨ́mè rɨ, 33nɨ́m nùb du nyȩrɨ́b ŋgábè, Mèín yúunatɨ́ nɨ́m nɨ́m kɨ́ ɗàrò ɓe sə̀mmèé ŋgə́ səəmcuhó̧ Yésù cwéé, hȩ nɨ́m du tɨín káàtà wàìbì no gɔ̀ bɨrɨ́bí ɨnè:
‹Wu ɨ́ du mwin móò ru,
yànɨ mwáín mɨ tá woò á› rɨ.
34Mèín yi ta ní kwá səəmcuhó̧ ŋgə́ mvókín nɨ̀kwíbí, àm ŋgə́ tɨ̀ kúcuré. Kɨ́ kíí ŋgə́ ya taɓatɨ́ ɨnè:
‹Mɨ ɓa nyí nàmènɨ faám
mɨ ya ɓwáína Dàvît lɨ á.›
35Àm kɨ́ á tɨtɨnné káàtà wàìbì du tànɨ gbɨ́ktèìn kù no ɓe ɨ́r Mèèín ɨnè ru:
‹Wu tɨ̀ wu ə́ə̀mwá nò ə́ré jɨ̧ɨ̧́ woò kútɨ, ŋgə́ a ɓwèìn sèrìn.›
36Kɨ́ Dàvíìt, ŋgə́ yi ndɨŋtɨ́ hȩ Mèín yi ɗúré ɗà ŋgə́ ɨ́ kû. Kùb ɨ́ vɨ́rè ŋgə́ gín tákɨ̀rɨ́b ŋgéé, ŋgə́ ɨ́ ɓwèìn, 37Ɨ́dù nò Mèín ya səəmcuhó̧ nɨ́ cwéé ya nɨ́ ɓwèìnwá. 38-39Mwin yàáb, á ɗúnɨ nyí ɗə̀ə̀ŋɓà ɨnayâna, ɓe ɨ́r Yésùù á nɨ́m du nyí tànànɨ àm tɨ́ɨ́r cumí ru; ɓe ɨ́r ŋgéé á nò ə́əmndé, Mèín du ŋgə́ céínhó̧nɨ cum ɓíì Mòyíìs yi du sàmàìn céínhó̧ nyí no ɗàwáá no ru. 40Nyí ma gə́tìi, àm nɨ́ɨ́b tɨ́kɨ̀nɨ́b Mèèín yi taré tɨ̀ féínna nyínè. Ŋgáb yi taá ɨnè:
41‹Óknáye, nyí nùb du nyìnɓáàŋkɨ́nɨ nɨ́m Mèín taré.
Sɨrɨnáam, nyí a éíkî mɨ íhín,
ɓetí ɓwâ nyí duye jáŋ ndè, mɨ ɓa ndɨ̀ŋnɨ kúúŋ nɨ́m kù du sàmàìn nyí ə́əmndé ɗàà ɓè kùb átɨna nyí átɨ́nne á!› »
42Ɓwâ Pôl ɓe Bàrnàbâs yi fó̧ dúú mɨ̀yú̧ú̧, á kùb ta ŋgáb cùwò ye Sàbáà cùrìì, gònɨ nyìncùhánɨ àm mwi̧ kɨ́. 43Cùr ɓáhɨ́r kíì, Jwîf bɨ ví̧i̧ ɓe nùb yi ɓandɨkɨ́ síí ɓóò Jwîf ɓe àm ə́mní ɨ́ háàsò Pôl ɓe Bàrnàbâs. Á Pôl ɓe Bàrnàbâs ya du ŋgáb nyìnnànɨ, ŋgáb ɨ́ tà nùb kɨ́ sə̀ŋhácɨ̀ gíí ɓe nyàŋnjɔ̧̀ Mèín túumna ŋgábè.
44Hȩ Sàbáà cùrìì ya ɗóoré, á nɨ̀vɨ́tɨ̀b ví̧i̧ kwɨ́í kɨ́ noò ya ɓáawo gònɨ óknɨ Kìn Kékéé. 45Ɓwâ Jwîf bɨ yi pə́ kùŋkùŋ kàm nɨ̀vɨ́tɨ̀bì rè, njɔ̧̀ ɨ́ ɓáàŋɓà ŋgáb. Ŋgáb ɨ́ yà pììɓáàŋnɨ nyindí Póòl, ŋgáb a andɨce ŋgə́. 46Kí á Pôl ɓe Bàrnàbâs ya tanagi ŋgáb ɨnè wááŋ: «Yi ɗú nyindí Mèèín gònàyàyè nyí á, ɨ́dù hȩ nyí mvú nɨ́ ə́ə̀mnɨ nyindí kɨ́, nyí ɨ́ tàcè nɨ́ vúm bɨ ɗóhîn ɓe mè mɨ̀cɨ̧̀ ɗàwá rèé, àà nɨ́m ɓacɨ nɨ gìnɨ ɗàrò yɨ́ nùb du bɨ́ Jwîf séé á. 47Ɓetí nɨ́m Kéké tana nɨ́mè á rè:
‹Mɨ kɨ́ɨ́ wu, wu dù hȩ mwa ɓe ɨ́r gbààŋ lâs,
àm nùb ɗɔ̀bɨ́nné lâs
a kwà ɓə́r ɓe ɨ́r woò.› »
48Ɓwâ nùb yi du Jwîf séé yi ók nyindí kíì, ŋgáb ɨ́ ô mɨ̀tù. Ŋgáb ɨ́ tà nyindí Kékéé á jíri. Nùb lâs Mèín yi ca ɓe ɨ́r mè mɨ̀cɨ̧̀ɨ̧́ ɨ́ sèì nùb ə́mní. 49Nɨ̀vɨ́tɨ̀b ɨ́ yà óksénɨ Kìn Nyɔ̧ɔ̧́ tíí tíí ɗɔ̀ɔ́b kɨ́ no. 50Ɨ́dù Jwîf bɨ ɨ́ wútè nɨ̀gub njɔdìì yi yóŋlɨ́ŋkom Mèèín, dùgɨ̀ nùb ɨ́r sóò yi du kwɨ́í kɨ́ noò; ŋgáb ɨ́ ndɨ̀ŋ kùb jábɨ̀ Pôl ɓe Bàrnàbâs, ɗà kùb ɨ́ jùkî ŋgáb ɗɔ̀ɔ́b kɨ́ no. 51Kí á Pôl ɓe Bàrnàbâs lámkɨ́sona ŋgáb mvútúúb ŋgábè gureè,#13.51 Lámkɨ́sòó mvútúúb gureè du túúm ɨnayâna mɨ kwá tɨ̀ mɨ cùwòcɨ̀r ɓetí mɨ yúutɨ́ mɨ́ ɓíì moò, nɨ́me wu nɨ ɓe àm kù ɗàcɨ̀wá yáá na á. ɗà ŋgáb ɨ́ gì bɨ́ Ìkòníyòm. 52Nùb ə́mní Àŋtìyóòs yaá yúklîn ɓe Nyéhè Sarîn, ɓe mɨ̀tù ɓwê.
Currently Selected:
Ə́rɨ́b nùb tómé yi ə́llé 13: NTV
Highlight
Share
Compare
Copy
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon
