Ə́rɨ́b nùb tómé yi ə́llé 11
11
Nɨ́m Píyéèr yi tuna nùb ə́mní Yèrúsàlèm
1 Nùb tómé ɓe nùb ə́mní yi du ti Jùdéè yi óó ɨnayâna nùb du Jwîf séé yi ə́əmɓwéetɨ́ nyindí Mèèín. 2Ɓwâ Píyéèr yi cuwo Yèrúsàlèèm á nùb ə́mní yi du Jwîf yi yote ŋgə́, 3ŋgáb ɨ́ tà: «Wu tɨ gií nùb ndɨ̀ lə́waá yó, nyíne ŋgáb ɨ́ tàŋɓáhè cɔŋ!» 4Kí á Píyéèr átɨnagi ŋgáb nɨ́ɨ́b tɨ ndóŋndé lâs láár. Ŋgə́ ɨ́ tànà ŋgáb ɨnè: 5«Mɨ yaá Jòpê Mèín yóŋnɨ, nɨ́m kù ɨ́ ndɨ̀ŋ mɨ hȩ mɨ jəəm wuúm ndɨ u̧. Mɨ ɨ́ pê pààm kàm yáin kù sónɨ ɓɨllin gònɨ gín móò hȩ nɨ̀vɨ́tɨ̀b nààsɨ̀b ɨ́ du bɨ̀ndə̀ə̀msówònɨ rɨ u̧. 6Mɨ ɨ́ yà góòmndényààŋnɨ pààm kɨ́ no, á mɨ pə́ nyèém kwéè ɓe kɨ́b káhȩ̀né cúk, mɨ ɨ́ pê nyó̧nɨ́b ɓe nyèém fɨ́te ŋgáb kwaá ya kwe, gààì ɓwê. 7Á mɨ ók kúu kù mɨ tànànɨ ɨnè: ‹Píyéèr, éíwúum còóm, kwíhɨm, wu a tàŋ!› 8Ɨ́dù mɨ ɨ́ pììnà kúu kɨ́ ɨnè: ‹Áì, ɗàwá Kéké, dùgɨ̀ nɨ́m jɨ̀rí yoo, dùgɨ̀ nɨ́m du nyɔ̧ɔ̧́ ɗàwá kùb tàŋtɨ rɨ yoo, ɓɔ̧ mo rè no lə́kɨ́yèwá.› 9Kúu tɨ hwè ɨ́ tàcùsónàkwà mɨ ɓɨllin ɨnè: ‹Nɨ́m Mèín ta kùb tàŋtɨ rɨ, wu wu nɨ́m kɨ́ hȩ nɨ́m kùb tàŋnde pə̂r.› 10Nɨ́m kɨ́ yi ndɨŋtɨ́ u̧ há̧á̧ gwì taarɨ́b, á nɨ́ɨ́b lâs yi wúícu ɓɨllin. 11Mvókín kɨ́ no ɓè mu̧u̧ á nɨ̀ŋgwáàb taarɨ́b féínwo. Kùb yi tómwo ŋgáb yɨ́ moò éíwòó Sèsàréè á. 12Á Nyéhè Sarîn yi ta nɨ́me ŋgáb gɨ̀ bɨ, mɨ mɨ ndɨ́bɨ̀r. Mwin yàá bɨ tínmwi̧ mɨ gewo hò̧ rè ɨ́ háàsò mɨ Sèsàrê, nɨ́m lâs nɨ́m ɨ́ lê Kɔ̀ɔ̀rnéì yó. 13Á ŋgə́ átɨna nɨ́m hȩ ŋgə́ tɨ pə́ dùgal Mèèín no yó ŋgə́ tànànɨ ɨnè: ‹Tómsom nɨ̀vɨ́tɨ̀b Jòpê ɓéwònànɨ wu Sìmôŋ kùb ɓé Píyéèr lɨ. 14Ŋgə́ ɓa wu tànànɨ nyindí nyíne nùb wo yóò lâs ɓa ɓáínɨ ɓe kíí á.› 15Mɨ yàrékɨ́cénɨ nyìnnɨ ɨnè á Nyéhè Sarîn só ŋgáb ya hȩ ya sónáɓwéece nɨ́m ya ye Pàŋtèkóòt lɨ. 16Á mɨ lə́əmcugɨ nɨ́m Kéké ya ta ɨnè: ‹Jâŋ yi kɔɔ kɔ ə́mní ɓe mvúm á ɨ́dù kɨ́ nyínè, Mèín ɓa nyí kɔ̀ɔ̀nɨ ɓe Nyéhè Sarîn á.› 17Kí du Mèín naɓwéetɨ́ ŋgáb nyər ŋgə́ ya na nɨ́m ɓwâ nɨ́m yi ə́mne Yésù Krístù nò du Kékéé rè á: mɨ ma tɨm cè na hàrɨ̀nɨ Mèín nɨ́m ŋgə́ ɗú ndɨ̀ŋniì?» 18Á ŋgáb yi gurɨgi. Ŋgáb ɨ́ yà kúùmnɨ Mèín ɓe ə́rɨ́b ŋgéé, ŋgáb a tace: «Á mè àmɨrì, Mèín naɓwéetɨ́ nùb du Jwîf séé nyòm ŋgáb ɓandɨ sum àm ŋgáb a kwà mèè.»
Nùb ə́mní Àŋtìyóòs
19Jábɨ́r ɓe ɨ́r ə́mní ya féínwo ɓwâ kùb yi kwíhe Étèn ɨ́ ndɨ̀ŋ nùb ə́mní ndììtɨ. Nùb kù mvókín ŋgábè no yi gií há̧á̧ Fènìsî, nùb kù ɨ́ gì Cîpɨ̀rə̀, nùb kù ɨ́ gɨ̀cè Àŋtìyôs, ɨ́dù sé Jwîf bɨ á ŋgáb yi du nyìnnànɨ àm Yésùù. 20Nɨ́m mwi̧ nùb ə́mní kù yi go Cîpɨ̀rə̀ ɓe Sìréèn ɨ́ gì Àŋtìyôs ɓéènàɓwênɨ nùb du Jwîf séé Kìn Nyɔ̧ɔ̧́ yi du ɓe ɨ́r Yésù nò du Kékéé. 21Nyòm Mèèín yaá cè nɨ́ ɓe ŋgáb, á nɨ̀vɨ́tɨ̀b ví̧i̧ yi ə́mne; ŋgáb ɨ́ ɓàndɨ̀cùrê Kéké no. 22Mɨ̀kwìn nùb ə́mní Yèrúsàlèèm yi óktɨ́ àm kɨ́, á ŋgáb tómso Bàrnàbâs Àŋtìyôs ku. 23Ɓwâ ŋgə́ yi féínso kwe, ŋgə́ ɨ́ pê hȩ Mèín yi fam nùb ə́mní. Ŋgə́ ɨ́ ókɓà mɨ̀tù; ŋgə́ ɨ́ sáktè ŋgáb tààmnɨ ŋgáb njɔ̧̀; ŋgə́ ɨ́ tà ŋgáb jə̀ŋhácɨ̀ Kéké sum mwi̧ yáá. 24Bàrnàbâs yaá ɓà ɓe ɗɨ́m nyɔ̧ɔ̧́. Ŋgə́ yaá yúklîn ɓe Nyéhè Sarîn; ŋgə́ ɨ́ dùkwà ɓe ə́ə́m sumí cei. Ɗà nùb ə́mní ɨ́ víndóŋnà Kéké tíí tíí.
25Bàrnàbâs ɨ́ gɨ̀ndôŋ Táàrsə̀ másénɨ Sôl. 26Ɓwâ ŋgə́ yi kwa ŋgéé, ŋgə́ ɨ́ gècùwò ŋgə́ Àŋtìyôs. Ŋgáb bɨrɨ́b lâs ŋgáb ɨ́ jə̂b ɓè dáín mwi̧ bɨ̂ŋ mɨ̀kwìn nùb ə́mní no, tɔ̀ɔ̀nànɨ ŋgáb àm Mèèín. Àŋtìyôs ɓè á kùb yi yaré ɓénɨ nùb ə́mní «nùb Krístùù» ru. 27Jíìb kɨ́ no á cè tɨ́kɨ̀nɨ́b ta àm cɨ́m yȩné yi éíwo Yèrúsàlèm gònɨ Àŋtìyôs lu. 28Á nɨ̀mwi̧ ŋgábè kpánéné ɨ́r yi du Àgàbûs yi éíwú còóm ɓe nyòm Nyéhè Sarɨ́nne, ŋgə́ ɨ́ tà: «Ŋgàk ɓa gùnnɨ ti rè bɨ̂ŋ á.» (Ŋgàk kɨ́ ɨ́ gùmècê ɓwâ kɨ́ Kùlôdə̀ á cè mvèìn kàm jíri). 29Nùb ə́mní ɨ́ bì ɓɔ̧, ŋgáb ɨ́ tà vúm lâs nɨ̀mwi̧ nà nɨ́m ŋgə́ fɨ́tɨ nàniì àm vúm kpɔ́kso mwin yàá bɨ vúmè du ti Jùdéè noò ɓe kíí yáá. 30U̧ á ŋgáb yi ndɨŋmece, ɗà ŋgáb ɨ́ tómsònà kɨ̀jííb nùb ə́mní ti Jùdéè noò nyər ŋgábè kɨ́ Bàrnàbâs ɓe Sôl ŋgáré.
Currently Selected:
Ə́rɨ́b nùb tómé yi ə́llé 11: NTV
Highlight
Share
Compare
Copy
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon
