GALATIYA 5

1Kristu tuus zul wɛ a Muusa maakdɔgl bɔ wɛ waak nɛ gedu an wɛ dag zul wɛ aakil du hi rɔbo. Oon zul nɛ nɛ er bɛttɔnɔ, bɔnɛ ɔɔ doo za gi wɛɛ gi ha̧bsin gbɔŋgil durk du ɓɛ gi wɛɛnin gbaarɛ. 2Laginɛ! Mii Pol , mi raasinɛ, an nɛ ta̧a̧ dood wɔrɔ dɔglya̧ nɛ́ nabɔ an nɛ wɛɛ an Yahuduya wɔ, yɔ anbɔ, nɛ see an Kristu wɛɛsin hintɔsyɔ. 3Mi wɛɛ mi gisin dɔglɔ raak hi naat ɓɛ: a za̧a̧nyɔ nabɔ an gi wɛɛ Yahuduya gin Bɛt belkɔ gi zulha, gi an gi fɔ Bɛtmaakɗɔglɔ wɔ sɛw giya. 4Nɛ́ mɔkig a be tuur doo rɔb a Bɛt muutdu a maakɔdɔglɔ fɔk dɔŋgo, nɛ hɛɛtin hi Kristu da̧a̧da̧ ma ɔnɛ; nɛ waks Bɛt rɔbsɔ waksɔ.

5Wɛ́ɛ́ be, anyɔ Bɛt Mɔkilɔ gisɛ ɗaako, wɛ wɛɛ wɛ ɗɔbsig Yeesu Kristu be, wɛ ook ɔ̧t rɔb yɔ wɛ gbaa mɔkil wɛ hage hi kpoos wɛ sɛw an wɛ lag Bɛt gi raasɛ a wɛ gi hinriit wookyaadɛ a ɗɔbsig wɛ bɔ gi dɔŋgo. 6Za̧a̧nɔ gi ɔks hi Yeesu Kristu hi nàge, hi nāg gɛ hɛw, taa hinɗɔbti. Hin gbɔɔl gɛ: a ɗɔ̀bsig yɔ gi wooyyik hi ha̧a̧tig a dood muulɛ. 7Nɛ da nɛ fɔk gbɔnɔ nɛ bɛttɔnɔ. Yɛrɛ bɔ esin an nɛ ɔɔ rɔbdɔgl bɔ ta̧a̧kɔ? 8Bɛt ēsin anbɔ gɛ, gii elinɛ an nɛ fɔb rɔ́b gbɔnɔ.

9Nɛ nɛ mɛɛ a hɛ̧ɛ̧t kaasi gɔ ɗuks kok sɛw ma mi?

10Anyɔ wɛ ɔks gbunu hi Waar Yeesu , mi mɛɛ a nɛ taan mɔkil za dɔɔmi, wɛɛ za̧a̧nyɔ gi zɛmrik mɔkil nɛ, an bɔ nɛ hɛw, Bɛt gi gbaasig dɔglɛ. 11Yɛrɛyɔ, yɛ̧ɛ̧ɗɛ mi wɛ, an mi gi dɔk dɔmsdɔgl tɛ̧, nɔ hi waa hi gim ya̧a̧kɛtingo? À gi nɛ anbɔ, yɔ mi gisihi dɔk Kristu wɔrkɔ bɔ a dɔ̧ɔ̧r ha dɔglɔ, yɔ wɛ̄ɛ̄sihi dɔɔsiŋk lɛl ma gɛ.

12Minɛ ha̧a̧m an dood wɔ hi gin mɔɔsig hi dɔms-dɔglɛ hi sɔɔ muulya̧! 13Yɛ̧ɛ̧dɛ mi wɛ, Bɛt el nɛɛ an nɛ dag zul nɛ aakil du. Yɛrɛya, anyɔ nɛ dag zul nɛ aakil du, bɔnɛ ɔɔ ɗɔkum ha̧a̧l nɛ wɔ hi ka̧n a gbɔnɔ ha̧a̧l du anyɔ ha̧a̧hi. Taa anbɔ. Wootinnɛ woos hi hat gbɔɔlɛ. 14Ya̧a̧nɛ, Bɛtmaakdɔglɔ ɛ̄r hinza eer gɛ, gɛ

a gi ha̧a̧mɔ namɔza ge an zul mɔ kpɔd.

15Yɛrɛ gid nɛ lɔmtingo be, nɛ tɔbtingo be an nam hɛtum ha̧a̧lɛ, yɔ anbɔ bɛ̄r ma gɛ. Oon zul nɛ an bɔnɛ i̧i̧tin buudu.

16Yɛrɛ mi gin raako: a ɔɔn Bɛt Mɔkilɔ gi kaŋk waabil nɛ, bɔnɛ ta̧a̧ hinyɔ ɗɔkum nɛ ha̧a̧l wɔ hi ɗɔkingo. 17Ya̧a̧nɛ ɗɔkum nɛ ha̧a̧l wɔ hi ɗɔkingo hinyɔ Bɛt Mɔkilɔ ha̧a̧g nɛ gɛ zaŋ giya, wɛɛ Bɛt Mɔkilɔ bɔ gi ɗɔkingo hinyɔ mɔkil nɛ ha̧a̧l wɔ ha̧a̧hi nɛ gɛ zaŋ be. Bɛt Mɔkilɔ bɔ hi ɗɔkum ha̧a̧l nɛ wɔ, hi eerɛ, hi lɔlhɛ̧ɛ̧tingo. Yɔ anbɔ nɛ ɗɛ̄ɛ̄ an nɛ woo hinyɔ ha̧a̧n wook ma gɛ. 18Yɛrɛ Bɛt Mɔkilɔ gi gin kaŋk a gbɔnɔ rɔb du be, nɛ taa a Bɛtmaakdɔgl waabil du ma.

19Mɔkil ha̧a̧l wɛ woosya̧ hi gi a lɔlgbar gaattɔnɔ gɛrɛ: an mansi, ɓi̧i̧limi, seemha̧a̧lɛ, 20maakɗɔbsigi, tɔɔsɛ, lɔlhɛ̧ɛ̧ki, gābsɛ, kublɛ, nɔɔtigi, gbaato, ya̧a̧gɛ̧ɛ̧ki, ya̧a̧faltingo, 21zulgbɔŋki, bumwɔ-niki, hi zɛlk ha̧a̧lɛ, hi hin zaadɛ wɔ hi riitin an hin wɔrɔ. Yɛrɛ mi raasinɛ anyɔ mi da mi raasin amntɔnɔ, zɛnɛ wɔ hi wook hin wɛrɛ hi taa Bɛt wáátɔ dako.

22Yɛrɛ hinyɔ fu̧u̧z a Bɛt Mɔkilɔ tɛŋk du an tɛ̧ɛ̧huml yɔ gi tuuk a tɛ̧ɛ̧nɔɔ muul gɛrɛ: ha̧a̧tigi, hato, boolumi, hinmɔŋki, rɔbgɔki, kpoosrɔbo, ɗɔbsigi, 23zultiisigi, hi zul-wa̧a̧ki. Maakdɔgl zayɔ gɔ gi a̧a̧n hin wɛrɛ wookɔ, taaro. 24Za̧a̧nyɔ wɛɛ Yeesu Kristu dooɔ, do̍o̍ ɗɔkum ha̧a̧l wɔ sɛw a Yeesu dɔ̧ɔ̧rha an hi wagɔ. 25Wɛ dag ma za̧a̧tig wɛ a Bɛt Mɔkil bɔ ge, ɗɛwɛ ɛmb hi Bɛt Mɔkil bɔ be. 26Bɔwɛ pɛɛ zulɛ, bɔ hin gi nɔɔtinwɛ, bɔwɛ gɔtin ka̧a̧si. Bɔ hin wɔrɔ lab gigi wɛ teesdu nɛ zaŋ.

Currently Selected:

GALATIYA 5: NTD

Highlight

Copy

Compare