GALATIYA 6

1Yɛ̧ɛ̧dɛ mi wɛ, nɛ́ dum doo za gi mat a hinha̧a̧l du, nɛɛ dood zaadɛ wɔ nɛ ɛmbik anyɔ Bɛt ha̧a̧ge, ɗunsinɛge hi zulhɔniki nɛ ɗaasige nɛ wɛnzig a gbɔnɔ rɔb du. Mɔɔ be oom zul mɔ an bɔ loorɛha̧a̧l gi maatumɔ. 2Ɗaatinnɛ hinɗɔmn nɛ pɛɛtingo, nɛ woo anbɔ nɛ da̧a̧sig hinyɔ Kristu maakdɔglɔ raa giya. 3Doo za gi gi mɔkig a gii gi doo gbɔɔlɛ, wɛɛ gi doo tɔsi gi maatig zulɔ ha̧a̧ltɔnɔ. 4An bɔ nɛ hɛw, gi see woosɔ; woosɔ bɔ gi rii, gi dag gbɔlumsɔ a hinyɔ woo hi zulɔ gedu. Bɔgi gòksin woosɔ hi doo za ɔnɛ. 5Ya̧a̧nɛ, bɔbe gi pɛɛ hinɗɔmnɔyɔ gi gi zulha giya, bɔ gi gòksin naaza ɔnɛ bɔ.

6Gi an za̧a̧nyɔ hi gisig Bɛtdɔgl goko gi gɛ̧ɛ̧ rɔ̧ɔ̧sɔ wɔ gin sɛw hi za̧a̧nyɔ gisig hingoko. 7Bɔnɛ maat zul nɛ! Doo ɗɛ̄ɛ̄ an gi kpɛ̧ɛ̧l Bɛt gɛ. Bɛt yɔ ɔɔg gɛ! Hinyɔ doo lug sɛw, gi wɛɛ gi ɓɛr hinɔ giya. 8Za̧a̧nyɔ lugs ɗɔkumɔ ha̧a̧l wɔ hin a gi kpoos du, ɗɔkum ha̧a̧l wɔrɔ hi gaa humlya̧ gɛ: wɔrko. Yɛrɛ za̧a̧nyɔ lugs Bɛt Mɔkilɔ hin a gi kpoos du be, Bɛt Mɔkil bɔ gi gaa humlɔ gɛ: za̧a̧tig faa. 9Yɛwɛ waa hinrɔb wooko, bɔwɛ mɔɔ. Ɔ̧tyɔ Bɛt dɛ̧ɛ̧ giro, gid wɛ ā̧ps muul wɛ gɛ, ɔ̧tɔ gɔ gi rii wɛ ha̧b woos wɛ bɔ humlɔ.

10Yɔ anbɔ, Bɛt gi gaawɛ gbɔnɔ, yɛwɛ woos dood sɛw hinrɔbo, wɛɛ yɛwɛ woos zɛnɛ wɔ hi ɗɔbs Yeesu an wɛɛ hinrɔb gi daarlɛl be. 11Seen hinbi̧i̧k gbɔlɛ wɔ mi bi̧i̧sin hi naan mi ta̧! 12Dood wɔ hi tɛk an dood zaadɛ hi ta̧a̧hi an dood riitɛ, ha̧a̧hi an hi fɛ̧ɛ̧n nɛ nabɔ an bɔ̄ Yahuduya wɔ hi kamsihi ya̧a̧kɛtil a Kristu wɔrkɔ bɔ a dɔ̧ɔ̧r muul dɔglɔ bɔ gi dɔŋgo. 13Dɔms-dɔglya wɔ hɛw hi fɔ̄b Bɛtmaakdɔgl gɛ, ha̧a̧hi an nɛ nabɔ an hi pɛɛ zulya̧ a hinyɔ nɛ woo gi dɔŋg kpɔd.

14Minɛ, an Bɛt gi yantsim zul mi pɛɛk a hinyɔ gi sɛw gi dɔŋgo, gɛ gɔ mi pɛɛ zul mi a dɔ̧ɔ̧r bɔ hi doo Waar wɛ Yeesu Kristu hage gi dɔŋgo, anyɔ mi mɛɛ a waalmɔkil wɔ hi wɔsim a dɔ̧ɔ̧r bɔ hage, mii be mi gi an wɔrko, mi ɔɔ waalmɔkil wɔ da̧a̧da̧. 15Yɔ anbɔ, dɔms gi hintɔsyɔ, kpaarums gi hintɔsi be. Hin gbɔɔl gɛ: Bɛt wɛ̍ɛ̍nɛ dood segdɛ. 16An Bɛt gi gaa dood wɔ hi fɔk gbɔnɔ yɛrɛ sɛw boolumi gi mɛɛsihi ya̧a̧rɛ. Hii gi Bɛt Israhila ɔ̧ɔ̧ rɔbo, hii gi Bɛt doodɔ. 17Gɔ gi kuudu, bɔ doo za gi zɛksimi! Mi gin Yeesu táálɔ a mi muulɛ. 18Yɛ̧ɛ̧dɛ mi wɛ, an Waar wɛ Yeesu Kristu gɛmsilɔ gi oo mɔkil nɛ. Aanbɔ!

Currently Selected:

GALATIYA 6: NTD

Highlight

Copy

Compare