1 TIMƆTE 1

1 TIMƆTE Ɗɛɛrwol biitir yɔ Pol bi̧i̧s Timɔte 1 TIMƆTE 1

1Mii Pol , mii bi̧i̧ ɗɛɛrwol yɛrɛ. Mi gi Yeesu Kristu tɔmsɔya an dɔglyɔ Bɛt Za̧a̧sigya wɛ gaami. Yeesu Kristu, za̧a̧nyɔ wɛ gbaak mɔkil wɛ a ge, gaam dɔglɔ hɛw. 2Mi bi̧i̧sig Timɔte yɔ gisim waa mi rɔb a Waar Yeesu ɗɔbsigɔ bɔ gedu. An Baa wɛ Bɛto hi Waar wɛ Yeesu Kristu hi gààmɔ gɛmsili hi ya̧a̧rmɛɛki hi boolumi.

3Yɔ mi ginɛ rek a Makeduniya, mi zɔ̧́m nɛ an mɔ kɔm hɔ a Efesu mɔ raa dood zaadɛ a bɔhi gog dɔgl ya̧a̧gɔ̧ɔ̧nya, 4wɛɛ, bɔhi mɔk bid lɔɔlɔ wɔ dɔglya̧ hi dood dɔ̧ɔ̧t wɔ mɔ̧ɔ̧kya̧ hi taan lɔɔsumlɛl gɛ dɔglya̧. Hin wɔrɔ anbɔ gɔ hi ɗuks hinfaltingo kpɔd, ɗɛ̄ɛ̄ an hi ɗaa Bɛt dood kaŋkig woos yɔ gi hi ɗɔbsig gɛ.

5Dɔgl yɔ Bɛt gaawɛ hinɔ gɔ gi seeko: gɛ hat yɔ gi fu̧u̧zig a kpoos gaat du, a kpoos yɔ er gedu, hi a ɗɔbsig rɔb du. 6Dood zaadɛ hi ɔɔ gbɔnɔ rɔb bɔ fɔkɔ, hi wɛɛ hi wag gbɔnɔ hi ya̧a̧boon tɔs wɔ hi fɔko. 7Hi seek zulya̧ an hi gi dood Bɛtmaakdɔglɔ gokyaadɛyɔ, wɛɛ hí kɛ̄m hinyɔ hi dɔk gɛ, hi hinwɔ hi dɔk hin hage hi tɛŋk gɛ.

8Wɛ mɛɛ a doo gi woon Bɛtmaakdɔglɔ hinɛ anyɔ fɔbɔ, Bɛtmaakdɔglɔ bɛrɔ. 9Hɔnɛ wɛ mɛɛ a Bɛt gāā maakɔdɔgl a dood hinrɔbwookya wɔ hi zul gɛ, gaa dood Bɛtmaakɗa̧a̧kya wɔ, zulɓaatilya wɔ, dood wɔ hi ɗɔbs Bɛt gɛ, hinha̧a̧lya wɔ, dood wɔ hi hɛml hi Bɛto hi hinyɔ gi gaat a Bɛt muutdu sɛw, dood wɔ hi gbɔŋk baaya̧ hi naaya̧, dood zulgbɔŋkya wɔ,

10hi dood mansnaakya wɔ, walɛ wɔ hi naakmans hi nayza walɛ, dood gbaarzebtigya wɔ hi ya̧a̧gɔ̧ɔ̧nya wɔ, hi dood hindɛŋglikya wɔ hi ya̧a̧gɔ̧ɔ̧nɛ, hi dood wɔ hi gɔk hinzaadɛ wɔ hi gi dɔɔmi hi faak hingok rɔb gaat bɔ. 11Hingok rɔb yɛrɛ fɔb Bɛt yɔ wɛ baanig Dɔgl Rɔbɔ bɔ gi zuunik Bɛt gbɔlumsɔ giya. Bɛt gaa mii Dɔgl Rɔb bɔ an mi kaŋkɔ.

12-13Mi baanik Waar wɛ Yeesu Kristu, Za̧a̧nyɔ gaam tɛŋko an mi woon woosɛ. Anyɔ da doosɛ mi da mi book nɛ ya̧a̧ha̧a̧l gi zulha, mi gig nɛ ya̧a̧kɛtingo, mi gig nɛ niik si̧, Bɛt mɛɛ nɛ a yɔ mí ɗɔ̄bs gɛ, mí mɛ̄ɛ̄ gɛ gii mi wook nɛ anbɔ, wɛɛ mɛɛsim ya̧a̧rɛ, wɛɛ sɔ̧ɔ̧m an ɗɔbsigɔya rɔbo gi gbaam a gi woos du. Ya̧a̧ giya, mi baanige. 14Waar wɛ Yeesu gɛmsim gbɔɔltɔnɔ daar hinha̧a̧l mi lɛl sɛw, wɛɛ baks hi ɗɔbsigi hi hat yɔ fu̧u̧z a ɔksig mi bɔ hi Yeesu Kristu gedu.

15Dɔgl yɛrɛ gi dɔgl rɔb an doo yɔ gi sɛw gi ta̧a̧ gɛrɛ: a Yeesu Kristu zaa waal du an gi za̧a̧s hinha̧a̧lyaadɛyɔ. Mii gi hinha̧a̧lya yɔ daarlɛlɛ a hi tees du. 16Hinyɔ Waar Bɛt mɛɛsim ya̧a̧r dɔŋgɔ ge gɛrɛ: ha̧a̧ge an Yeesu Kristu gi zuun hinmɔŋkɔ bɔ sɛw a mii yɔ mi gi hinha̧a̧lya gbɔɔl yɔ daarlɛl gi gbaŋgi, an hinɔ gi wɛɛs dood wɔ gɔ hi ɗɔbsige hi dag za̧a̧tig faa hinmɛɛnikya. 17Ɗɔbsigi hi gbɔlumsɛ hi gi a Bɛt ge faa hi faa. Gii gi wɛlɛ hi wɛl faa Waar i, taa wɔrkya, lɔl ɗɛɛg gbɛnikɔ gɛ, gi Bɛt gi gbunu. Aanbɔ.

18Mɔya waa mi Timɔte, dɔgl yɔ mi gim pɔ̧nuko, fɔb hinyɔ Bɛtya̧a̧kɛŋkya wɔ hi dɔg amntɔnɔ a mɔ zulha. Mɔkim mɔ mɛɛ dɔglya̧ an mɔ dagin tɛŋk a gabs rɔb yɔ mɔ wook gedu. 19Mɔ gi waak ɗɔbsig be, kpoos mɔ gi waak erk be. Dood zaadɛ wɔ hi ɔɔ kpoos-esig dɔglɛ hi wɛɛ hi kɛ̄ms mɔkil rɔb bɔ kpoos du gɛ, hi wag gbɔnɔ hi ɔɔ ɗɔbsigɔ. Hi riitin an lɛmb yɔ ha̧tir gi tii mɛmɛ. 20Himɛnɛyus hi Alegzandɛr hi gi hi teesdu, mi loohi mi gaahi Saydanu naan du an hi mɛɛ a bɔhi boo ya̧a̧ha̧a̧l a Bɛt zulha.

Currently Selected:

1 TIMƆTE 1: NTD

Highlight

Copy

Compare