MATTHIEU 16

O Fariziɛn in o Saduseɛn ak nɛ́ ŋma mɔɔ-kifi

(Zɔk Mt 12.38-39; Mk 8.11-13; Lk 12.54-56)

1O Fariziɛn in o Saduseɛn nɛ̀ɛ́ tɛ Jesu ha̧ wa mɛ ba wen zaŋ-aa. Wa tɔ̧ɔ̧ ha̧ a̧ mɛ de ŋma mɔɔ-kifi nɛ̀ tɛ́ nɛ̀ yiwese ha̧ wa mɛ zɔk.#Mt 12.38; Lk 11.16 2Ɓɛɛ Jesu kifi nú ha̧ wa: «Mɛ́ ga̧a̧mɔ ɛ́nɛ́ tɔ̧a̧‘e, yí-zan nɛ̀ gbɛ̧ɛ̧ bereŋ'ɛ, kaara tɛ yor mɔɔsa̧. 3Ɓɛɛ mɛ tutuyɛ, ɛ́nɛ́ tɔ̧a̧‘e, yí-zan nɛ̀ de na’ɛ, kórò tɛ hɔ sɔsɔɔ. Hegɔ, ɛ́nɛ́ iŋa kɛ̧ɛ̧ mgbara mɔɔ-yí-zan, ɓɛɛ ɛnɛ iŋ kɛ̧ɛ̧ mgbara mɔ nɛ de kinɛɛ na. 4O ɗaŋ tugun bíí-de-ŋgazu nɛ̀ ak mɔɔ-kifi mɛ zɔk’ɛ! Wa nɛ́ kɔ̧ɔ̧ mɛ zɔk mɔɔ-kifi, wa beka zɔk ŋma mbe-a gan zu wan nɛ̀ dee in Jɔnas na.» Ɓɛɛ a̧ e wa duk yak kɔ̧-a̧.#Mt 12.39; Lk 11.29

Hao ko o Fariziɛn in o Saduseɛn

(Zɔk Mk 8.14-21)

5Wa kuu yì si kur, ɓɛɛ tɛ o ŋgaiwi ko Jesu bíí so ɗoŋ kaia brɛt. 6Jesu tɔ̧ɔ̧ ha̧ wa: «Ɛ̀nɛ̀ mbó ta'nɛ́, ɛ̀nɛ̀ zɔ́k tɛ‘nɛ́ nɛ̀ de-a wen hao ko o Fariziɛn in ko o Saduseɛn!»#Lk 12.1 7Ɓɛɛ wa ta kɔ-wa'e, mɛ̀ nɛ́ wen nɛ̀‘i kai brɛt nɛnɛ na a̧ a̧ tɔ̧ nɛ̀ wen'i. 8Jesu kɔɓa taamɔ kɔ-wa ɓɛɛ tɔ̧ ha̧ wa: «Ɛ́nɛ́ nɛ̀ kɔ̧ɔ̧ɗɔɔwen k’ɛ́nɛ́ dɔk na’ɛ! Wen ge s’ɛnɛ ta mɔ‘e mɛ̀ nɛ́ wen zu brɛt n’ɛnɛ bo nɛnɛ na ge? 9Ɛ́nɛ́ tɛ iŋ mgbara mɔ'ɔ hɔ̧ɔ̧ na nde? Tɛ‘nɛ́ bìí ɗoŋ mɔ n'am dea’ɛ? Bó nɛ́ mi kɛ̧ɛ̧ brɛt mɔɔrɔ ha̧ o bíí booro-mɔɔrɔ, ɓɛɛ ɛnɛ mɔi̧ oi-aa dun gɛsɛ ɓu-zua-yiitoo na nde?#Mt 14.17-21 10Hɔ-ɗoŋ-aa bó nɛ́ mi kɛ̧ɛ̧ brɛt mɔɔrɔ-ɗoŋ-yiitoo ha̧ o bíí booro-naar, ɓɛɛ ɛnɛ mɔi̧ oi-aa dun gɛsɛ mɔɔrɔ-ɗoŋ-yiitoo na nde?#Mt 15.34-38 11Ɛ́nɛ́ tɛ̀ɛ́ iŋ so kànà mgbara-a'e, wen n'am tɔ̧ h’ɛ́nɛ́‘e, ɛ̀nɛ̀ zɔ́k tɛ‘nɛ́ nɛ̀ hao ko o Fariziɛn in o Saduseɛn wó‘i, bó nɛ́ wen brɛt a̧‘m tɔ̧ɔ̧ nɛnɛ na.»

12Nɛ́ hegɔ sɛka o ŋgaiwi ko Jesu biti iŋ gba̧a̧ wen n'aa tɔ̧a̧‘i: bó nɛ́ a̧ tɔ̧ɔ̧ nɛ́ wen zu hao-gi-brɛt na, ɓɛɛ nɛ́ zu usamɔ ko o Fariziɛn in o Saduseɛn.

Pierre tɔ̧a̧‘e Jesu nɛ́ Mɛsii

(Zɔk Mk 8.27-30; Lk 9.18-21)

13Nɛ́ mɔ'ɔ nɛ̀ Jesu hɔa zika-nù Sezaree ko Filip, ɓɛɛ a̧ ak o ŋgaiwi kɔ̧-a̧ nɛ̀ wen’ɛ: «Tɛ́ wen nɛ o bíí tɔ̧ nɛnɛ'ɛ, wa tɔ̧ bɔɔ‘e Bem ko bíí nɛ́ o?» 14Wa kifa nú: «O ŋma bíí‘e, a̧ nɛ́ Jean Zui-bíí, o ŋma'e, nɛ́ Elii, ɓɛɛ o ŋma tɔ̧ɔ̧ kɔ‘i'e, nɛ́ Jeremii, kóó a̧ nɛ́ ŋma kpɔk mgbara o wi-tɔ̧-wen oi nú Sɔ̧.»#Mt 14.1-2; Mk 6.14-15; Lk 9.7-8 15Sa a̧ ak wa: «Ɓɛɛ nɛ̀ k’ɛ́nɛ́, ɛnɛ tɔ̧ k’ɛ́nɛ́‘e, mi nɛ́ o?» 16Ɓɛɛ Pierre kifi nú: «Ɛ́nɛ́ nɛ́ Mɛsii, Bem ko Sɔ̧ nɛ̀ duk kpasa.»#Jn 6.68-69 17Ɓɛɛ Jesu tɔ̧ ha̧ a̧: «Simɔŋ, bem ko Jɔnas, mɛ̀ dúk nɛ̀ desee; wen nɛ̀ mɛ́ tɔ̧a̧‘i, bo nɛ́ mɛ́ kpàà tɛ ŋma bíí#16.17 bíí: zɔ́k 1 Kor 15.50 zú mɔ̀ kó mùr ín tɔ̀k. zu nù'ɛ na, ɓɛɛ nɛ́ Dáà kɔ‘m nɛ̀ duk yiwese mɛ a̧ usa ha̧ mɛ́. 18Ɓɛɛ kɔ‘m, mi tɔ̧ ha̧ mɛ, mɛ́ nɛ́ Pierre;#16.18a Pierre: mɛ̀ nɛ́ wen nɛ̀ tɔ̧́, ta. mɛ̀ nɛ́ see zu ta'i a̧‘m tɛ mbo tua#16.18b tua’ɛ mɛ̀ nɛ́ zúdùk bíí kó Krist Église. kɔ‘m sɛnɛ, ɓɛɛ kóó nɛ́ fio beka kpa ŋgai zu tua'i na. 19Mi tɛ ha̧ mɔɔ-hu̧i-nú tua Wan mɛ yiwese ha̧ mɛ. Mɔ lɛŋ nɛ̀ mɛ tɛ hɛr zaŋnu’ɛ tɛ duk nɛ̀ hɛra-a yiwese mɛ, ɓɛɛ mɔ lɛŋ nɛ̀ mɛ tɛ bur sɛn zaŋnu’ɛ tɛ duk nɛ̀ bura-a yiwese mɛ mbɛt.»#Mt 18.18; Jn 20.23

20Ɓɛɛ a̧ mbo nú o ŋgaiwi kɔ̧-a̧ nɛ̀ ŋgaya-a wen ká wa tɛɛ tɔ̧ ha̧ ŋma bíí ndé a̧ nɛ́ Mɛsii.

Usamɔ zu fio in kura-ŋgɔn ko Jesu

(Zɔk Mk 8.31—9.1; Lk 9.22-27)

21Nɛ́ ŋgimbi'i a̧ Jesu ku̧u̧ nɛ̀ naŋ tɔ̧a̧-a̧ ha̧ o ŋgaiwi kɔ‘i'e, wi tɛ nɛ̀ kànà si Jerusalɛm; o gasawi in o gasa wan-ɗafi-sɔ̧ in o wi-usi-heembea tɛ usi bɔnɛ ha'i nyɛmna; wa tɛ gbɛ wi yinɛ, ɓɛɛ ɗoŋ zɛ taar wi kura ŋgɔn. 22Pierre saa a̧ si katɛ wi, ɓɛɛ tɔ̧ ha̧ a̧: «Sɔ̧'ɔ̧ gú er zu'nɛ́, Gasa Wan! Mɔ‘i beka kpa'nɛ́ na!» 23Jesu zika ɗoŋ e ha̧ a̧, ɓɛɛ tɔ̧: «Mɛ̀ yú síɓí Satan! Mɛ̀ yák nɛ̀ ɗoŋ-am! Mɛ́ nɛ́ mɔɔ-kɔ̧-naŋ wen am, wen taamɔ kɔ-mɛ bó nɛ́ ko Sɔ̧ na, nɛ́ taamɔ ko bíí.» 24Ɓɛɛ a̧ tɔ̧ ha̧ o ŋgaiwi kɔ̧-a̧: «Kà ŋma bíí nɛ́ kɔ̧ɔ̧ mɛ tɛ ɗoŋ am, a̧ a̧ é tɛ tɛ geemɔ, a̧ a̧ túí te-diŋa kɔ̧-a̧, ɓɛɛ a̧ a̧ tɛ́ ɗoŋ-am.#Mt 10.38; Lk 14.27 25Wen kóó o ndé nɛ̀ kɔ̧ɔ̧ mɛ duk kpasa tɛ fe, ɓɛɛ wi nɛ tɛ fe wen zu'm tɛ kpasi.#Mt 10.39; Lk 17.33; Jn 12.25 26Kà ŋma bíí á̧ ha̧a̧ duka-kpasa kɔ‘i mɛ kpa mɔɔ-zaŋnu lɛŋ, ɓɛɛ kpaamɔ kɔ̧-a̧‘i tɛ de nɛ́ ge ha̧ a̧ ge? Nɛ́ ge a̧ a̧ tɛ ha̧ mɛ gɔn nɛ̀ zu duka-kpasa kɔ̧-a̧ woyo ge? 27Wen Bem ko bíí tɛ tɛ in o betom mɛ yiwese tɛ gasamɔ ko Dáà kɔ‘i; nɛ́ hi̧i̧ a̧ a̧ tɛ kɛ̧ nɛ̀ mɔ ha̧ bíí kpɔk kpɔk nyɛm nɛ̀ ɗoŋ tom kɔ-wa.#Mt 25.31; Gima 62.13; Rɔm 2.6 28Nɛ́ kpasawen a̧‘m tɔ̧ h’ɛ́nɛ́! O ŋma bíí a̧a̧ mgbara'nɛ́ nɛ̀ beka fe na hɔ ŋgimbi nɛ̀ wa tɛ zɔk Bem ko bíí fara tɛa-a nɛ̀ oi mɔɔ-wan kɔ‘i.»

Currently Selected:

MATTHIEU 16: GB11DC

Highlight

Copy

Compare