MATTHIEU 17

Tɛ Jesu kpaia duk hee gasa sa̧a̧mɔ ga

(Zɔk Mk 9.2-13; Lk 9.28-36)

1Zɛ mɔɔrɔ-ɗoŋ-kpɔk ɗoŋ mɔ‘i, Jesu mgbɔɔ Pierre in Jak in Jean nya Jak nɛnɛ in a̧ si zu ŋma kusa kaya.#2 Pi 1.17-18 2Tɛ-a kpaia ti wa, saŋa-yí-a toka lak-lak hee wese ga, ɓɛɛ laa kɔ̧-a̧ kifi nɛ̀ bu-a ndáká-ndáká hee sa̧a̧mɔ ga. 3Kà wa zɔk wó, Moisɛ in Elii nɛ́ mɔ'ɔ nɛ̀ ya tɔ̧ nɛ̀ wen in a̧'ɛ. 4Ɓɛɛ Pierre tɔ̧ ha̧ a̧: «Gasa Wan, daden n’ɛɛ a̧a̧ k’ɛɛ hɛ̧ɛ̧! K’ɛ̀nɛ̀ nɛ́ kɔ̧a̧, ɓɛɛ mi dee o gbáksák taar sɛn hɛ̧ɛ̧, k’ɛ́nɛ́ kpɔk, ko Moisɛ kpɔk, ko Elii kpɔk.» 5Pierre tɛ kaɗi tɔ̧ɔ̧ wen hɔ̧ɔ̧ na, ɓɛɛ ŋma bu-zan nɛ̀ tok tok kpe zu wa, ɓɛɛ tiger tɔ̧ wen nɛ̀ tɛ bu-zan tɛnɛ‘e: «Wi’ɛ nɛ́ Bem kɔ‘m n'am kɔ̧ɔ̧ nyɛmna, see-am lɛŋ a̧a̧ zu a̧. Ɛ̀nɛ̀ zíí wen nú-a.»#Ku̧u̧ 22.2; Wee-ɗoŋ-he 18.15; Gima 2.7; Es 42.1; Mt 3.17; 12.18; Mk 1.11; Lk 3.22 6Kíì dee o ŋgaiwi ko Jesu nyɛmna tɛ tiger nɛ̀ wa zia'i, ɓɛɛ wa hɔ̧fi̧ tik nù, kai yí-wa gu nù hirr. 7Ɓɛɛ Jesu nɛ́ si katɛ wa, fo wa, ɓɛɛ tɔ̧: «Ɛ̀nɛ̀ kúr! K’ɛ́nɛ́ de kíì na.» 8Kà wa tɛ́ bà yí-wa nɛ̀ ŋgɔn wó, ɓɛɛ wa zɔk nɛ́ Jesu kpɔk ɓɛɛ.

9Hee mɔ'ɔ nɛ̀ wa biti zira kaya ga, Jesu mboo nú-wa wen ka wa tɛɛ tɔ̧ mɔ nɛ̀ wa zɔka ha̧ ŋma bíí, hɔ ŋgimbi nɛ̀ Bem ko bíí tɛ kur mgbara o fio kaɗi sɛ. 10Ɓɛɛ wa ak a̧: «Wen nɛ̀ o wi-usi-heembea tɔ̧ bɔɔ‘e, Elii tɛ tɛ kaɗi sɛ wó'ɛ, hee ge?»#Mal 3.23 11Ɓɛɛ Jesu kifi nú: «Íì, Elii tɛ tɛ kànà mɛ ɗafi mɔ lɛŋ nɛ̀ war-a. 12Ɓɛɛ mi tɔ̧ h’ɛ́nɛ́, Elii'i tɛ̀ɛ̀ kaɗi, ɓɛɛ nɛ́ iŋa a̧ a̧ o bíí iŋ na. Wa usa bɔnɛ ha̧ a̧ yak kaɗi hee mɔ'ɔ nɛ̀ see-wa kɔ̧ɔ̧ ga, ɓɛɛ Bem ko bíí tɛ zɔk bɔnɛ er-wa mbɛt.»#Mt 11.14

13Hegɔ, sɛka o ŋgaiwi kɔ̧-a̧ bé tɛ̀ɛ́ iŋ‘e, mɛ̀ nɛ́ wen ko Jean Zui-bíí a̧ a̧ tɔ̧a̧.

Jesu kpasa ŋma wi-doe

(Zɔk Mk 9.14-29; Lk 9.37-43)

14Jesu in o ŋgaiwi kɔ‘i sii ɗoŋ sitɛ giiwi; nɛ́ mɔ'ɔ nɛ̀ ŋma bíí wee ti a̧, gbɛ zugur nù ti a̧, 15ɓɛɛ tɔ̧ ha̧ a̧: «Gasa Wan, ɛ̀nɛ̀ dé ko ha̧ bem kɔ‘m nɛ̀ doe dak dak pi̧ nù; ɓan na, ɓɛɛ daka a̧ pi̧ tɛ wee kóó ɗɔɔ yì kaɗi. A̧ zɔk nɛ́ bɔnɛ nyɛmna. 16Mi mgbɔɔ a̧ nɛnɛ tɛ o ŋgaiwi k’ɛ́nɛ́, ɓɛɛ wa nyɛm mɛ kpas'a na.» 17Ɓɛɛ Jesu tɔ̧: «Ɛ́nɛ́ o ɗaŋ tugun bíí nɛ̀ kɔ̧ɔ̧ɗɔɔwen k’ɛ́nɛ́ bo na’ɛ! Mi tɛ duk in'nɛ̀ɛ́ hɔ ge ŋgimbi ge? Mi tɛ nɔ ŋgiɗi tɛ mɔ k’ɛ́nɛ́ hɔ ge ŋgimbi ge? Ɛ̀nɛ̀ mgbɔ́ bem’ɛi tɛnɛ ha̧‘m.» 18Jesu dee ŋmaa in ɗaŋ-sɔ̧, ɓɛɛ ɗaŋ-sɔ̧ gbo tɛ bem’ɛi yak, ɓɛɛ bem’ɛi kpasi tɛ́ kale ŋgimbi'i.

19Nɛ́ mɔ'ɔ nɛ̀ o ŋgaiwi ko Jesu nɛ̀ɛ̀ si katɛ a̧, ɓɛɛ ak a̧ ɛ̀nɛ́-a: «Nɛ́ ge s’ɛɛ nyɛm bɔɔ mɛ ndak ɗaŋ-sɔ̧ yinɛ tɛ bem’ɛi na ge?» 20Jesu kifa nú ha̧ wa: «Nɛ́ wen nɛ̀ kɔ̧ɔ̧ɗɔɔwen k’ɛ́nɛ́ dɔk na. Nɛ́ kpasawen a̧‘m tɔ̧ h’ɛ́nɛ́; kɔ̧ɔ̧ɗɔɔwen k’ɛ́nɛ́ a̧ bó só benaŋ kɛ̧́ɛ̧́ hee gba̧a̧ sunu ga,#17.20 sunu: texte tɔ̧̀ɔ̧́ nɛ́ graine de moutarde.#Mt 21.21; Mk 11.23; 1 Kɔr 13.2 ɛ́nɛ́ nyɛma so mɛ tɔ̧ ha̧ gasa kaya’ɛ‘e: ‹Mɛ̀ kúr hɛ̧ɛ̧, mɛ̀ nɛ́ si mɛ‘i!› Ɓɛɛ kaya tɛ̀ɛ́ kur yak; ɓɛɛ ŋma mɔ nɛ̀ tɛ̀ɛ́ gan'nɛ́ bo na. [ 21Kànà nɛ́ kɔfa-sɔ̧ in zima-yì a̧ nyɛma mɛ ndak pɛrti ɗaŋ-sɔ̧'ɛ yinɛ tɛ bíí.]»

Jesu tɔ̧ɔ̧ wen fio kɔ‘i

(Zɔk Mk 9.30-32; Lk 9.43-45)

22Ŋgimbi nɛ̀ Jesu mɔi̧a in o ŋgaiwi kɔ‘i sɛn nú Galilee mɛ, a̧ tɔ̧ɔ̧ ha̧ wa: «Wa tɛ de ha̧ Bem ko bíí mɛ ye er o bíí; 23wa tɛ gbɛ a̧, ɓɛɛ ɗoŋ zɛ taar a̧ kura ŋgɔn.» O ŋgaiwi kɔ̧-a̧ kpaa dita-see nyɛmna tɛ wen n'aa tɔ̧a̧‘i.

Jesu gboo garama Tua ko Sɔ̧

24Jesu in o ŋgaiwi kɔ‘i hɔɔ Kafarnaum, ɓɛɛ nɛ́ mɔ'ɔ nɛ̀ o wi-ba-garama Tua ko Sɔ̧ nɛ̀ɛ̀ tɛ Pierre ɓɛɛ ak a̧: «Wan-usi-mɔ k’ɛ́nɛ́ gbo kɔ‘i garama Tua ko Sɔ̧ na nde?»#Gboa-a 30.13; 38.26 25Ɓɛɛ Pierre kifi nú: «A̧ gbo gboo!» Ɓɛɛ ŋgimbi nɛ̀ Pierre hɔɔ kɔ̧́ tua, Jesu aka a̧: «Simɔŋ, mɛ́ ta bɔɔ kɔ-mɛ hee ge? O wannu ba garama er o bíí kɔ-wa náà, kóó er o gɛnɛ nde?» 26Ɓɛɛ Pierre kifi nú ha̧ a̧: «Wa ba er o gɛnɛ.» Ɓɛɛ Jesu tɔ̧: «Hegɔ, ɓɛɛ o bíí kɔ-wa beka gbo kɔ‘i garama na gɔ. 27Ɓɛɛ wen ká o wi nɔ'ɔ tɛɛ tik wen zu yɛ, mɛ̀ nɛ́ nú tɔp, mɛ̀ pí̧ gɛ̧i̧; kuti zoro nɛ̀ mɛ tɛ dak'i, mɛ̀ ɓá nú-a, ɓɛɛ mɛ́ tɛ kpa sede sɛnɛ. Mɛ̀ bá sede'i nɛnɛ gbo nɛ̀ garama kɔ‘m in kɔ-mɛ.»

Currently Selected:

MATTHIEU 17: GB11DC

Highlight

Copy

Compare