MATTHIEU 15

Gba̧‘a̧ usamɔ ko o zɔmdáa

(Zɔk Mk 7.1-13)

1O ŋma mgbara o Fariziɛn in o wi-usi-heembea mɛ Jerusalɛm tɛ̀ɛ́ tɛ Jesu ɓɛɛ tɔ̧ ha̧ a̧: 2«Wen ge sa o ŋgaiwi k’ɛ́nɛ́ e bɔɔ yuwar ɗafa-war-tɛ ko o zɔmdáa tɛ geemɔ ge? Wen wa tai er nɛti sɛka wa nyɔŋa mɔ na.» 3Jesu kifa nú ha̧ wa: «Nɛ̀ k’ɛ́nɛ́, wen ge s’ɛnɛ e bɔɔ heembea ko Sɔ̧ tɛ geemɔ, h’ɛ́nɛ́ mɛ ndak nɛ́ ɗoŋ yuwar deemɔ ko o zɔmdáa k’ɛ́nɛ́ ge? 4Wen Sɔ̧ tɔ̧ɔ̧ so'e: ‹A̧‘i tú̧ tɛ dáà in nàà kɔ‘i,› ɓɛɛ, ‹Wi nɛ̀ foma dáà kɔ‘i kóó nàà kɔ‘i, a̧‘i gbɛ́ wi’ɛi yinɛ.›#Gboa-a 20.12; 21.17; Wee-ɗoŋ-he 5.16; Lev 20.9 5Ɓɛɛ k’ɛ́nɛ́, ɛ́nɛ́ tɔ̧‘e, wi nɛ̀ tɔ̧ ha̧ dáà kɔ‘i kóó ha̧ nàà kɔ‘i ndé, mɔ nɛ̀‘i tɛ̀ɛ́ ha̧ so gbak nɛ̀ wa, wi ha̧a̧ ha̧ Sɔ̧ kaɗi, wó, 6ɓɛɛ ɛ́nɛ́‘e wi’ɛi beka gbak dáà kɔ‘i ɓɔna. Mɛ̀ nɛ́ tɛ́ mɔ‘i ɛ́nɛ́ ee nɛ̀ wen ko Sɔ̧ tɛ geemɔ, h’ɛ́nɛ́ mɛ ba nɛ́ yuwar deemɔ ko o zɔmdáa k’ɛ́nɛ́. 7Ɛ́nɛ́ o wi nɛ̀ a̧a̧ nɛ̀ see yiitoo, Esaii tɔ̧ɔ̧ wen oi nú Sɔ̧ zu'nɛ́ nyɛm sɛnɛ, ŋgimbi n'aa tɔ̧ɔ̧ nɛnɛ‘e:

8‹Dukbíí'ɛ zɔn am nɛ̀ ndàrá-nú,

ɓɛɛ see-aa ɔ nyɛi̧a nɛ‘m.#Es 29.13

9Wa gas'am sɔɔ géè,

wen usamɔ kɔ-wa nɛ́ o geŋa ko bíí ɓɛɛ.› »

Mɔ nɛ̀ de ha̧ war-tɛ-bíí mɛ ɗaŋ

(Zɔk Mk 7.14-23)

10Jesu saa o bíí pii katɛ wi, ɓɛɛ tɔ̧ ha̧ wa: «Ɛ̀nɛ̀ yéŋ zer'nɛ́, ɛ̀nɛ̀ zíí mgbara wen’ɛ nɛ̀ sa̧a̧-a̧. 11Bó nɛ́ mɔ nɛ̀ ye kɔ̧̀ nú-wi a̧ ɗaŋ war-tɛ-bíí na, ɓɛɛ nɛ́ mɔ nɛ̀ gbo nɛ̀ kɔ̧̀ nú-wi.»

12Nɛ́ mɔ'ɔ nɛ̀ o ŋgaiwi kɔ̧-a̧ nɛɛ si katɛ a̧ ɓɛɛ tɔ̧ ha̧ a̧: «Ɛ́nɛ́ iŋ‘e o Fariziɛn sakala batɛ tɛ wen n’ɛ̀nɛ́ tɔ̧a̧'ɛ na nde?» 13Jesu kifa nú: «Gùn nyɔnɔ lɛŋ nɛ̀ Dáà kɔ‘m nɛ̀ a̧a̧ yiwese gún na, wi tɛ zuɗi pi̧ nù. 14Ɛ̀nɛ̀ é o wi nɔ‘i duk! Nɛ́ o wi-boma-yí a̧ usi yuwar ha̧ o ŋmaa! Kà wi-boma-yí usi yuwar ha̧ ŋma ɓii-aa, wa tɛ tik kɔ̧̀ yiitoo lɛŋ.»#Lk 6.39 15Pierre tɔ̧ɔ̧ ha̧ a̧: «Ɛ̀nɛ̀ kɛ̧́ mgbara lizaŋ‘i h’ɛ́ɛ́.» 16Ɓɛɛ Jesu kifi nú ha̧ wa: «Ɛ́nɛ́ mbɛt, ɛ́nɛ́ tɛ iŋ mgbara mɔ na hɔ kinii nde? 17Ɛ́nɛ́ iŋ‘e, mɔ nɛ̀ ye kɔ̧̀ nú-wi zir zir si kɔ̧́ zaŋ-wi, ɓɛɛ gboo a nù na nde? 18Ɓɛɛ mɔ nɛ̀ nú-wi tɔ̧ tɛ́ nɛ̀ kɔ̧́ see-wi; mɛ̀ nɛ́ mɔ‘i a̧ ɗaŋ war-tɛ-bíí;#Mt 12.34 19wen nɛ́ o ɗaŋ taamɔ nɛ̀ tɛ́ nɛ̀ kɔ̧́ see-wi a̧ de ha'i mɛ gbɛ zu, ha'i mɛ de dàlà, ha'i mɛ de mɔ de na, ha'i mɛ zu̧ mɔ, mɛ de sedaako-ndela in ee ɗɔra tɛ ŋmaa. 20Nɛ́ o mɔɔ nɔ‘i a̧ ɗaŋ war-tɛ-bíí; ɓɛɛ ka'i nɛ́ taia er-wi nɛti sɛka'i nyɔŋa mɔ na, i̧i̧ hi̧i̧ ɗaŋ kɔ‘i war-tɛ-bíí na.»

Kɔ̧ɔ̧ɗɔɔwen ko ŋma okoo Kanaŋ

(Zɔk Mk 7.24-30)

21Jesu kura yak fara'i si nù Tir in Sidɔŋ, 22ɓɛɛ ŋma okoo Kanaŋ, zɔŋa nù‘i hiɗi mɔ‘e: «Gasa Wan, Bem ko David, ɛ̀nɛ̀ dé ko ha̧‘m! Ɗaŋ-sɔ̧ nukuri nɛ́ boko-bem kɔ‘m nyɛmna.» 23Ɓɛɛ Jesu tɔ̧ wen kpɔk sitɛ a̧ na. O ŋgaiwi ko Jesu nɛɛ si katɛ Jesu ɓɛɛ tɔ̧ ha̧ a̧: «Ɛ̀nɛ̀ fó a̧ yaknɛ wen a̧ hiɗi nɛ́ mɔ tɛnɛ ɗoŋ yɛ.» 24Ɓɛɛ Jesu kifi nú: «Sɔ̧ toma'm tɛnɛ mɛ kpasi nɛ́ dukbíí Israɛl nɛ̀ duk hee o sami nɛ̀ yɔa ga ɓɛɛ.» 25Nɛ́ mɔ'ɔ nɛ̀ kóò‘i tɛɛ gu nù ti Jesu, ɓɛɛ tɔ̧: «Gasa Wan, ɛ̀nɛ̀ gbák am!» 26Ɓɛɛ Jesu kifi nú ha̧ a̧: «Bó nɛ́ ɔ dee mɛ ba nyɔŋmɔ ko o bem pi̧ nù ha̧ o be toyo na.» 27Ɓɛɛ kóò‘i tɔ̧: «Nɛ́ mɔ‘i, Gasa Wan, ɓɛɛ o be toyo nyɔŋ kànà nɛ́ ɓúsú nyɔŋmɔ nɛ̀ a nù er wan kɔ‘i.» 28Jesu kifa nú ha̧ a̧: «Kóò'ɛ, kɔ̧ɔ̧ɗɔɔwen kɔ-mɛ ɔ gasa. Mɔ nɛ̀ mɛ kɔ̧a̧‘i a̧ dé ha̧ mɛ.» Ɓɛɛ tɛ boko-bem kɔ̧-a̧ hai tɛ kpɔk kale ŋgimbi'i.

Jesu kpasa o bíí nɛ̀ dɔka-a

29Jesu kura hi̧i̧ yak si ká̧ nú ŋgere tɔp Galilee. A̧ daŋa zu kaya ɓɛɛ duk nù. 30O gba giiwi nɛ̀ɛ̀ tɛ a̧, ɓɛɛ wa kai o wi-kum, o wi-boma-yí, o kara-wi, o mukɛ̧ in o ŋma wi-zɛɛ nɛ̀ dɔka-a nɛnɛ ha̧ a̧. Wa aa wa ti naŋ-a ɓɛɛ a̧ kpasi wa lɛŋ. 31Ɗɛɗɛ o bíí gɔna nyɛmna wen wa zɔka o mukɛ̧ nɛ̀ tɔ̧ so wen na fara tɔ̧ wen, gba̧a̧-tɛ o kara-wi nyafa a yí ŋmaa ŋgai, o wi-kum nɛɛ nɔ̀ nɛ̀ de-a, in o wi-boma-yí zɔka mɔ mbɛt; ɓɛɛ wa zɔn Sɔ̧ ko Israɛl.

Jesu ha̧a̧ nyɔŋmɔ ha̧ bíí booro-naar

(Zɔk Mk 8.1-10)

32Nɛ́ mɔ'ɔ nɛ̀ Jesu saa o ŋgaiwi kɔ‘i, ɓɛɛ tɔ̧ ha̧ wa: «Ko de'm dee ha̧ o wi nɔ'ɔ nyɛmna wen kinii dee nɛ́ zɛ taar nɛ̀ wa ya nɛnɛ katɛ‘m, ŋma mɔɔ-nyɔŋ bo na. Mi kɔ̧ mɛ e ha̧ wa mɛ si nɛ̀ wɔ si fara kɔ-wa na, wen ká wa tɛɛ tik ŋgata nɛ̀ yuwar.» 33Ɓɛɛ o ŋgaiwi kɔ̧-a̧ tɔ̧ ha̧ a̧: «Ɛɛ tɛ kpa bɔɔ nyɔŋmɔ nɛ̀ tɛ nyɛm gba giiwi hee mɔ'ɔ ga déè zaŋbɛɛ'ɛ ge?» 34Ɓɛɛ Jesu ak mɔ: «Ɛ́nɛ́ a̧a̧ nɛ̀ brɛt géè?» Ɓɛɛ wa kifi nú: «Ɛɛ a̧a̧ nɛ̀ brɛt mɔɔrɔ-ɗoŋ-yiitoo in be zoro tikiɗi.» 35Ɓɛɛ Jesu tɔ̧ ha̧ o giiwi mɛ ya nù. 36Nɛ́ mɔ'ɔ n'aa kaia brɛt mɔɔrɔ-ɗoŋ-yiitoo in be zoro'i, de osoko ha̧ Sɔ̧, ɓɛɛ gbin brɛt ha̧ o ŋgaiwi kɔ̧-a̧, ɓɛɛ wa kɛ̧ nɛ̀ o giiwi. 37O bíí lɛŋ nyɔŋa mɔ zaŋ sur, ɓɛɛ wa ndɛm oi nyɔŋmɔ dun gɛsɛ mɔɔrɔ-ɗoŋ-yiitoo. 38O bíí nɛ̀ nyɔŋa mɔ nɛ́ wiwii booro-naar, wi tɔr okoo in obem na. 39Nɛ́ mɔ'ɔ nɛ̀ Jesu ee ha̧ giiwi mɛ si ɗoŋ fara kɔ-wa, ɓɛɛ ye kɔ‘i kombon yak si nú Magadan mɛ.

Currently Selected:

MATTHIEU 15: GB11DC

Highlight

Copy

Compare