MATTHIEU 14

Fio ko Jean Zui-bíí

(Zɔk Mk 6.14-29; Lk 9.7-9)

1Ŋgimbi'i Herod wannu Galilee, zia nyɛrɛmɔ ko Jesu, 2ɓɛɛ tɔ̧ ha̧ o ŋgaiwi kɔ‘i: «Wi’ɛ nɛ́ Jean Zui-bíí nɛ̀ kpasa mgbara o fio. Mɛ̀ nɛ́ hegɔ n'aa a̧a̧ nɛ̀ ŋgai mɛ de o mɔɔ-kifi.»

3Herod bàà so Jean hɛr pi̧ kɔ̧ zɔɓɔ wen zu Herodiad, kóò ko Filip, nya-a̧ n'aa bàà so,#Lk 3.19-20 4wen Jean duka so tɔ̧ ha̧ Herod'e: «Heembea e war ha̧ mɛ mɛ ba kóò ko nya-mɛ na.»#Lev 18.16; 20.21 5Herod kɔ̧ɔ̧ so mɛ gbɛ Jean, ɓɛɛ a̧ dee nɛ kíì giiwi wen o bíí zɔka Jean hee ŋma wi-tɔ̧-wen oi nú Sɔ̧ ga.

6Ŋma wese, Herod dee gbaŋa wese nɛ̀ wa kòó nɛ̀ a̧, ɓɛɛ boko-bem ko Herodiad yɔ yɔyɛ ti o bíí. Boko-bem’ɛi dee tɛ Herod nyɛmna, 7ɓɛɛ a̧ kan mɔ‘e, mɔ nɛ̀ boko-bem’ɛi tɛ ak er wi lɛŋ, wi tɛ ha̧ ha̧ a̧. 8Nɛ́ mɔ'ɔ nɛ̀ nàà ko boko-bem’ɛi aa wen ha̧ a̧ mɛ nɛ̀ɛ́ tɔ̧ ha̧ Herod'e: «Ɛ̀nɛ̀ há̧ nɛ gɔ̀ɔ́-zu Jean Zui-bíí ha̧‘m kɔ̧́ tasi kinii.» 9See wannu ɗaŋa; ɓɛɛ wen zu kanamɔ n'aa kànà in wen zu foe yí o bíí n'aa sàà so'i, a̧ tɔ̧ɔ̧ ha̧ wa mɛ ha̧ zu Jean ha̧ boko-bem’ɛi. 10Nɛ́ mɔ'ɔ n'aa toma bíí nɛnɛ nɛ́ɛ̀ ɓir zu Jean kɔ̧́ zɔɓɔ mɛ, 11ɓɛɛ wa ba zu Jean e kɔ̧́ tasi ba tɛnɛ ha̧ boko-bem ko Herodiad, ɓɛɛ a̧ ba nɛnɛ ha̧ nàà kɔ̧-a̧. 12O ŋgaiwi ko Jean nɛ̀ɛ̀ ba wɔr-aa gun, ɓɛɛ nɛ́ɛ̀ we ɗoŋ fio kɔ̧-a̧ ha̧ Jesu.

Jesu ha̧a̧ nyɔŋmɔ ha̧ bíí booro-mɔɔrɔ

(Zɔk Mk 6.30-44; Lk 9.10-17; Jn 6.1-14)

13Ɗoŋ nɛ̀ Jesu zia nyɛrɛ fio ko Jean, a̧ yee kombon ku yì si kur, ɓɛɛ daŋ si ŋma fara nɛ̀ bíí bo na. O bíí zia nyɛrɛ yaka-a ko Jesu, ɓɛɛ wa kur nɛ̀ ye kɔ-wa nɛtɛ nɛtɛ, nɛ́ ɗoŋ-aa nɛ̀ naŋ. 14Ŋgimbi nɛ̀ Jesu zira nɛ̀ kɔ̧́ kombon, a̧ zɔka giiwi, ko dea a̧ ha̧ wa, ɓɛɛ a̧ kpasi o wi-zɛɛ nɛ̀ yaa mgbara wa.

15Ɓɛɛ mɛ ga̧a̧mɔ, o ŋgaiwi ko Jesu nɛ̀ɛ̀ tɛ a̧ ɓɛɛ tɔ̧ ha̧ a̧: «Fara’ɛ nɛ́ géé zaŋbɛɛ, ŋgimbi yaka kaɗi, ɛ̀nɛ̀ tɔ̧́ ha̧ o giiwi mɛ yak sitɛ o be-ye mɛ hi̧fi nyɔŋmɔ.» 16Ɓɛɛ Jesu kifi nú ha̧ wa: «Wa tɛ yak bɔɔ kinii héé ge? Ɛ́nɛ́ nɛ̀ tɛ‘nɛ́ ɛ̀nɛ̀ há̧ nyɔŋmɔ ha̧ wa.» 17Ɓɛɛ wa kifi nú: «Mɔ nɛ̀ a̧a̧ er yɛ nɛ́ brɛt mɔɔrɔ in zoro yiitoo ɓɛɛ.» 18Ɓɛɛ Jesu tɔ̧: «Ɛ̀nɛ̀ bá tɛnɛ ha̧‘m.» 19Ɓɛɛ a̧ tɔ̧ ha̧ o giiwi mɛ ya nù zu zɔ̧. Nɛ́ mɔ'ɔ n'aa kaia brɛt mɔɔrɔ in zoro yiitoo'i, ɓɛɛ ɓer yí si yiwese, de osoko ha̧ Sɔ̧ ɓɛɛ ha̧ ha̧ o ŋgaiwi kɔ̧-a̧ mɛ kɛ̧ nɛ̀ giiwi. 20O bíí lɛŋ nyɔŋa mɔ zaŋ sur, ɓɛɛ wa ndɛm oi nyɔŋmɔ dun gɛsɛ ɓu-zua-yiitoo. 21O bíí nɛ̀ nyɔŋa mɔ nɛ́ wiwii hee booro-mɔɔrɔ ga, wi tɔr okoo in obem na.

Jesu nɛ̀ɛ́ nɔ̀ zu tɔp

(Zɔk Mk 6.45-52; Jn 6.15-21)

22Mɔ tɛ de kpaa na, ɓɛɛ Jesu tɔ̧ ha̧ o ŋgaiwi kɔ‘i mɛ ye kombon yak ti si kur mɛ, wen ha'i mɛ tɔ̧ ha̧ o giiwi mɛ si ɗoŋ saaye sɛ́. 23Ɓɛɛ ɗoŋ nɛ̀ Jesu foo o giiwi sinɛ kaɗi, a̧ daŋa si zu kaya mɛ kɔfi Sɔ̧, ɓɛɛ duk hi̧i̧ ɛ̀nɛ́-a hegɔɔ zɛ de nɛnɛ. 24Ŋgimbi nɛ̀ o ŋgaiwi ko Jesu hɔɔ si see-yì mɛ kaɗi, pɛŋa-yì dee ŋmaa in wa wen wa we nɛ́ ti búk nɛnɛ. 25Mɛ́ gɔna ndaa-zan o ŋgaiwi ko Jesu zɔka a̧ fara nɛ́ɛ́ nɔ̀ nɛ̀ zu yì tɛnɛ. 26Zɔka Jesu nɛ̀ wa zɔka fara nɛ́ɛ́ nɔ̀ nɛ̀ zu yì, kíì dee wa ɓɛɛ wa tɔ̧: «Nɛ́ hɔɔ-tɛ-bíí!» Kíì dee wa nyɛmna, ɓɛɛ wa a nú-wa tɛ hiɗimɔ. 27Ɓɛɛ Jesu tɔ̧ ha̧ wa: «K’ɛ́nɛ́ de kíì na; ɛ̀nɛ̀ nɔ́ ŋgiɗi! Mɛ̀ nɛ́ mi.» 28Pierre zia hegɔ, ɓɛɛ kifi nú ha̧ a̧: «Gasa Wan kà nɛ́ bòò nɛ́ ɛ́nɛ́ nɛ̀ mbetɛ, ɛ̀nɛ̀ tɔ̧́ ha̧‘m nɛ́ nɔ̀ nɛ̀ zu yì sitɛ‘nɛ́.» 29Ɓɛɛ Jesu tɔ̧ ha̧ a̧: «Mɛ̀ tɛ̀.» Ɓɛɛ Pierre zir nɛ̀ kɔ̧́ kombon ɓɛɛ ku naŋ nɛa-a sitɛ a̧. 30Pierre zɔka i̧i̧ nɛ̀ búk ɓoɓi nɛnɛ‘i nyɛmna, kíì dea a̧, ɓɛɛ a̧ ku̧ naŋ yee yì; a̧ hiɗa mɔ: «Gasa Wan, ɛ̀nɛ̀ kpás'am!» 31Ɓɛɛ soɓee, Jesu nyɛi̧a er ba a̧, ɓɛɛ tɔ̧: «Mɛ́ nɛ̀ kɔ̧ɔ̧ɗɔɔwen kɔ-mɛ dɔk na’ɛ, mɛ si bɔɔ kafɛ hegɔ wen ge?»

32Jesu in Pierre yee kombon, ɓɛɛ búk ga̧ dezeŋ. 33O wi nɛ̀ yaa kɔ̧́ kombon guu nù ti Jesu, ɓɛɛ tɔ̧: «Ɛ́nɛ́ nɛ́ Bem ko Sɔ̧ nɛ mbetɛ.»

Jesu kpasa o wi-zɛɛ sɛn nú Gɛnɛzarɛt

(Zɔk Mk 6.53-56)

34Wa kuu yì hɔ Gɛnɛzarɛt, 35ɓɛɛ ŋgimbi nɛ̀ o bíí nù‘i iŋa'e nɛ́ Jesu a̧ hɔa'i wó, wa pɛsa nyɛrɛ-a dam fara'i lɛŋ. Wa mgbɔɔ o wi-zɛɛ lɛŋ tɛnɛ tɛ a̧, 36ɓɛɛ wa ai nú ha̧ a̧ mɛ e ha̧ o wi-zɛɛ nɔ‘i mɛ fo nɛ́ géé nú laa kɔ̧-a̧; hegɔ, o wan nɛ̀ foo nú laa kɔ̧-a̧ kpasa lɛŋ.

Currently Selected:

MATTHIEU 14: GB11DC

Highlight

Copy

Compare