MATTHIEU 12

Wese-ɔm-tɛ

(Zɔk Mk 2.23-28; Lk 6.1-5)

1Ŋma wese-ɔm-tɛ, Jesu in o ŋgaiwi kɔ‘i ɓira yak nɛ̀ kpɛɛfɔ alkamaari. Wɔ gbɛɛ o ŋgaiwi kɔ̧-a̧, ɓɛɛ wa hik alkamaari a kɔ̧̀ nú-wa.#Wee-ɗoŋ-he 23.26 2O Fariziɛn zɔka mɔ‘i, ɓɛɛ tɔ̧ ha̧ Jesu: «Ɛ̀nɛ̀ zɔk, o ŋgaiwi k’ɛ́nɛ́ de nɛ mɔ nɛ̀ heembea dor bíí tɛ dea-a wese-ɔm-tɛ.» 3Ɓɛɛ Jesu kifi nú ha̧ wa: «Ɛ́nɛ́ tɔr mɔ nɛ̀ David dee so ŋgimbi nɛ̀ wɔ gbɛɛ so nɛ̀ a̧ in o ŋgaiwi kɔ̧-a̧ na nde?#1 Sam 21.1-7 4Bó nɛ́ David in o ŋgaiwi kɔ‘i nyɛma so mɛ nyɔŋ brɛt-ɗafi-sɔ̧ na, kànà nɛ́ o wan-ɗafi-sɔ̧ a̧ nyɛma mɛ nyɔŋ ɓɛɛ. Ɓɛɛ nɛ́ mɔ'ɔ nɛ̀ David yee kɔ̧́ Tua ko Sɔ̧ in o ŋgaiwi kɔ‘i, ɓɛɛ wa nyɔŋ brɛt-ɗafi-sɔ̧.#Lev 24.9 5O wi-ɗafi-sɔ̧ nɛ̀ ɗafi sɔ̧ kɔ̧́ Tua ko Sɔ̧ wese-ɔm-tɛ gbin nɛ́ heembea-wese-ɔm-tɛ, ɓɛɛ tom-ɗafa-sɔ̧ nɛ̀ wa de'i bó nɛ́ ɗaŋmɔ na. Bó nɛ́ ɛnɛ tɔra hegɔ zaŋ heembea ko Moisɛ na nde?#Tɔra-bíí 28.9-10 6Ɓɛɛ mi tɔ̧ h’ɛ́nɛ́, ŋma bíí a̧a̧ hɛ̧ɛ̧ nɛ̀ gana Tua ko Sɔ̧. 7K’ɛ̀nɛ̀ zii so gba̧a̧ wen nɛ̀ tɔ̧a̧‘e: ‹Nɛ́ deeko a̧‘m kɔ̧a̧, nɛ̀ bó nɛ́ ɗafa-sɔ̧ na,› gáà, bó nɛ́ ɛ́nɛ́ tɛ̀ɛ́ tɔ̧ so wen tɔ̧ɔ̧ a zu o bíí nɔ'ɔ nɛ̀ de ɗaŋmɔ na’ɛ na.#Mt 9.13; Os 6.6 8Wen nɛ́ Bem ko bíí a̧ duk zu wese-ɔm-tɛ.»

Jesu kpasa ŋma wan-mɔka-er

(Zɔk Mk 3.1-6; Lk 6.6-11)

9Jesu kura fara'i, ɓɛɛ nɛ́ɛ̀ ye kɔ̧ tua-mɔi̧a-a kɔ-wa. 10Ŋma wan-mɔka-er a̧a̧ so hi̧i̧, nɛ́ mɔ'ɔ nɛ̀ o ŋma bíí aka Jesu'e: «Heembea ee ha'i mɛ kpasi bíí wese-ɔm-tɛ nde?» Wa aka a̧ hegɔ ha̧ wa mɛ ba a̧ nɛ̀ wen. 11Ɓɛɛ Jesu kifi nú ha̧ wa: «Nɛ́ o mgbara'nɛ́ nɛ̀ a̧a̧ nɛ̀ sami kɔ‘i kpɔk, ɓɛɛ kà sami'i tik kɔ̧̀ wese-ɔm-tɛ, a̧ beka nɛ́ɛ̀ dak a̧ gbonɛ na o nde?#Lk 14.5 12Bó nɛ́ bíí gana sami nyɛmna na nde? Hegɔ, heembea ee war ha̧ bíí mɛ de demɔ wese-ɔm-tɛ.» 13Ɓɛɛ Jesu tɔ̧ ha̧ wan-mɔka-er'i: «Mɛ̀ nyɛ́í̧ er-mɛ.» A̧ nyɛi̧a er-a, ɓɛɛ er-a kpa ŋgai hee ɓii-aa ga. 14O Fariziɛn gboo zan kaɗi, ɓɛɛ wa ba keta, kíí nɛ̀ yuwar mɛ gbɛ Jesu yinɛ.

Jesu, wi-de-tom ko Sɔ̧

15Jesu zia'e wa kɔ̧ɔ̧ mɛ gbɛ wi wó, ɓɛɛ a̧ e fara'i duk. O bíí gara nɛnɛ ɗoŋ-aa nɛ̀ dɔka-a, ɓɛɛ a̧ kpasi o wi-zɛɛ lɛŋ, 16ɓɛɛ mbo nú-wa nɛ̀ ŋgaya-a wen ká wa tɛɛ tɔ̧ wen-aa ha̧ ŋma bíí, 17ha̧ mɔ nɛ̀ Esaii wi-tɔ̧-wen oi nú Sɔ̧ bàá tɔ̧ so mɛ hɔ gba̧a̧:

18«Wi-de-tom kɔ‘m n'am hoka nɛ́ mɔ'ɔ:

a̧ nɛ́ wi n'am kɔ̧ɔ̧ nyɛmna,

desee kɔ‘m lɛŋ a̧a̧ zu a̧.

Mi tɛ e Ɔmi kɔ‘m zu a̧,

ɓɛɛ a̧ tɔ̧ɔ̧ wen gɔna kita kɔ‘m ha̧ o tugun bíí.#Es 42.1-3

19A̧ beka kii wen in bíí na,

a beka hiɗi mɔ na;

bíí beka zii tiger-a fara tɔ̧ɔ̧ wen nɛ̀ bee-gara nɛnɛ na.

20A̧ beka gbin nuka-tòrò na;

a̧ beka bi lamba nɛ̀ wee-aa ɓɔna fara ba-a na,

hɔ fara nɛ̀ yuwar kpasawen tɛ yor;

21o tugun bíí tɛ e ta nɛ nin-a.»

Jesu in Bɛlzebul

(Zɔk Mk 3.20-30; Lk 11.14-23)

22Wa mgbɔɔ ŋma wi-boma-yí nɛ̀ duk nɛ́ mukɛ̧ nɛ̀ a̧a̧ nɛ̀ ɗaŋ-sɔ̧ sɛn tɛ̀ mbɛt tɛnɛ ha̧ Jesu, ɓɛɛ Jesu kpas'a. Wi’ɛi ku̧u̧ naŋ zɔka mɔ in tɔ̧ɔ̧ wen mbɛt. 23Ɗɛɗɛ giiwi gɔna, ɓɛɛ wa tɔ̧: «Mɔ'ɔ wi’ɛ bó nɛ́ Bem ko David na?» 24O Fariziɛn zia mɔ‘i, ɓɛɛ tɔ̧: «Nɛ́ ŋgai ko Bɛlzebul, wan ko o ɗaŋ-sɔ̧ a̧ wi’ɛ ndak nɛ̀ o ɗaŋ-sɔ̧.»#Mt 9.34; 10.25 25Jesu iŋa taamɔ kɔ-wa, ɓɛɛ tɔ̧ ha̧ wa: «Kà ŋma wan nɛ́ duka kpɔk, ɓɛɛ kà kɛ̧́ yiitoo mɛ kpɛr in ŋmaa, wan'i yaia kaɗi. Kóó nɛ́ ŋma ye, kóó nɛ́ ŋma nàm a̧ kɛ̧́ mɛ kpɛr in ŋmaa, wa beka yor ɓɔna. 26Kà Satan nɛ́ kifa tɛ, ndak Satan yinɛ, bó nɛ́ a̧ kɛ̧ɛ̧ yiitoo kaɗi na nde? Wan kɔ̧-a̧ tɛ yor so ɓɔ nde? 27Kà bó nɛ́ ŋgai ko Bɛlzebul a̧‘m ndák nɛ̀ ɗaŋ-sɔ̧ yinɛ, ɓɛɛ nɛ̀ ko o ŋgaiwi k’ɛ́nɛ́, wa ndak ɗaŋ-sɔ̧ nɛ̀ ŋgai ko o nde? Nɛ́ bòò hegɔ, nɛ́ o ŋgaiwi k’ɛ́nɛ́ a̧ tɛ gɔn kita zu'nɛ́. 28Kà‘m nɛ́ ndaka ɗaŋ-sɔ̧ yinɛ nɛ̀ ŋgai ko Ɔmi ko Sɔ̧, ɓɛɛ mɛ̀ nɛ́ wen nɛ̀ tɔ̧‘e, Wan ko Sɔ̧ hɔɔ tɛ‘nɛ́ kaɗi.

29«Ŋma bíí nyɛma so mɛ ye tua ko ŋma ŋga-wi mɛ zu̧ mɔ kɔ̧-a̧, kà a̧ nɛ́ hɛra wi’ɛi nɛti na nde? A̧ tɛ hɛr ŋga-wi'i kaɗi, sɛka a̧ kaia mɔ kɔ̧́ tua kɔ̧-a̧ lɛŋ.

30«Wi nɛ̀ ndaɗi in am na, sɛn nɛ‘m; wi nɛ̀ mɔi̧ mɔ in am na, pɛsi nɛ́ mɔ a taŋ.#Mk 9.40 31Wen hegɔ, mi tɔ̧ h’ɛ́nɛ́: ɗaŋmɔ nɛ̀ bíí de lɛŋ, kóó nɛ́ ɗaŋa nin Sɔ̧ mbɛt, Sɔ̧ tɛ e ha̧ wa; ɓɛɛ kà bíí nɛ́ tɔ̧ɔ̧ ɗaŋ wen zu Sa̧a̧ Ɔmi, Sɔ̧ beka e ɗaŋmɔ‘i ha̧ wi’ɛi na. 32Kà ŋma bíí nɛ́ ɗaŋa nin Bem ko bíí, Sɔ̧ tɛ e ɗaŋmɔ‘i ha̧ a̧; ɓɛɛ kà a̧ nɛ́ tɔ̧ɔ̧ ɗaŋ wen zu Sa̧a̧ Ɔmi, Sɔ̧ beka e ɗaŋmɔ‘i ha̧ a̧ zaŋnu’ɛ na, kóó ɗoŋ fio na mbɛt.»#Lk 12.10

Wi iŋ ti te nɛ waya-a

(Zɔk Lk 6.43-45)

33«Kà te nɛ́ bòò nɛ́ de te, a̧ wai nɛ́ de waya-a; kà te nɛ́ bòò nɛ́ ɗaŋ te, ɓɛɛ a̧ wai nɛ́ ɗaŋ waya-a mbɛt; wen wi iŋ ti te nɛ̀ waya-a.#Mt 7.20; Lk 6.44 34Ɛ́nɛ́ o kpar be-kóró, o ɗaŋwi, ɛ́nɛ́ tɛ tɔ̧ de wen héé ge? Wen nɛ́ mɔ nɛ̀ duna kɔ̧́ see-wi a̧ nú-wi tɔ̧.#Mt 3.7; 23.33; 15.18; Lk 3.7; 6.45 35Wi-de-demɔ de nɛ́ demɔ nyɛm nɛ̀ ɗoŋ demɔ nɛ̀ a̧a̧ kɔ̧́ see-aa; ɓɛɛ wi-ɗaŋ de nɛ́ ɗaŋmɔ nyɛm nɛ̀ ɗoŋ ɗaŋmɔ kɔ̧́ see-aa. 36Ɓɛɛ mi tɔ̧ h’ɛ́nɛ́, wese-kita, kóó o ndé tɛ we ɗoŋ géé wen lɛŋ n'aa tɔ̧ɔ̧ so. 37Wen nɛ́ wen kɔ-mɛ a̧ tɛ kpasi mɛ, ɓɛɛ kànà nɛ́ wen kɔ-mɛ a̧ tɛ de ha̧ kita mɛ tik mɛ mbɛt.»

Aka mɔɔ-kifi

(Zɔk Mt 16.1-4; Mk 8.11-12; Lk 11.29-32)

38Nɛ́ mɔ'ɔ nɛ̀ o ŋma wi-usi-heembea in o Fariziɛn tɔ̧ɔ̧ ha̧ Jesu: «Wan-usi-mɔ, ɛ́ɛ́ kɔ̧a̧ ɛ̀nɛ̀ dé ŋma mɔɔ-kifi h’ɛ́ɛ́ zɔk.»#Mt 16.1; Mk 8.11; Lk 11.16 39A̧ kifa nú ha̧ wa: «O ɗaŋ tugun bíí-de-ŋgazu nɛ̀ ak mɔɔ-kifi mɛ zɔk’ɛ! Ɛ́nɛ́ a̧ kɔ̧ɔ̧ mɛ zɔk mɔɔ-kifi, ɛ́nɛ́ beka zɔk ŋma mbe-a gan zu wan nɛ̀ dea so in wi-tɔ̧-wen oi nú Sɔ̧ Jɔnas na!#Mt 16.4; Mk 8.12 40Hee mɔ'ɔ nɛ̀ Jɔnas duka so kɔ̧́ zaŋ gasa zoro zɛ taar ga, Bem ko bíí tɛ duk kànà ɗɔɔ nù zɛ taar hegɔ mbɛt.#Jn 1.17 41Wese-kita, o bíí Ninivɛ tɛ kur ŋgɔn mɛ pi̧ wen zu tugun bíí'ɛ, wen wa kpaia so duka-a kɔ-wa ŋgimbi nɛ̀ Jɔnas tɔ̧ɔ̧ nɛ̀ wen ko Sɔ̧ ha̧ wa; ɓɛɛ nɛ̀ k’ɛ́nɛ́, ŋma mɔ#12.41 ŋma mɔ: Jesu tɔ̧́ nɛ́ wen tɛ̀-wí nɛ̀ tɛ̀-wí.#Jɔn 3.5 a̧a̧ mgbara'nɛ́ hɛ̧ɛ̧ nɛ̀ gana Jɔnas. 42Wese-kita, ŋma okoo nɛ̀ ɔɔ so wan nɛ̀ ká̧-zan-mɛ́-ɗɔɔ tɛ kur ŋgɔn mɛ pi̧ wen zu tugun bíí'ɛ mbɛt, wen a̧ tɛ̀ɛ̀ so kɔ̧-a̧ nɛ̀ nduti-nù mɛ zii iŋa-mgbara-mɔ ko Salomɔŋ. Ɓɛɛ nɛ̀ k’ɛ́nɛ́, ŋma mɔ a̧a̧ mgbara'nɛ́ hɛ̧ɛ̧ nɛ̀ gana Salomɔŋ.»#1 Wan 10.1-10; 2 Kal Ny 9.1-12

Pia-ɗoŋ ko ɗaŋ-sɔ̧

(Zɔk Lk 11.24-26)

43«Kà ɗaŋ-sɔ̧ gbo tɛ ŋma bíí yak ɓɛɛ a̧ yambala nɛ̀ ŋga-gbárà nɛnɛ kíí nɛ̀ fara-ɔm-tɛ. Kà a̧ kpá fara-ɔm-tɛ na, 44ɓɛɛ a̧ tɔ̧a̧: ‹Mi tɛ si ɗoŋ si fara n'am duka so sɛnɛ nɛti.› Nɛ́ mɔ'ɔ n'aa sii ɗoŋ, nɛ́ɛ̀ kpa tua nɛ̀ wa mbia kɔ̧́ a̧, ɗafi mɔ lɛŋ a nɛ̀ war-a. 45A̧ nɛ̀ɛ̀ kai o ŋma ɗaŋ-sɔ̧ mɔɔrɔ-ɗoŋ-yiitoo nɛ̀ gana a̧ nɛ̀ ɗaŋ tɛnɛ, ɓɛɛ mbe duka-a ko wi’ɛi ɗaŋ gan kuti-a. Mɔ tɛ de kànà hegɔ in ɗaŋ tugun bíí'ɛ mbɛt.»

Kpasa nàm ko Jesu

(Zɔk Mk 3.31-35; Lk 8.19-21)

46Jesu ɓɔna fara tɔ̧ wen ha̧ o giiwi, ɓɛɛ nàà kɔ̧-a̧ in o nya-a̧ hɔ ya zan, kii nɛ̀ war mɛ tɔ̧ wen in a̧. 47Nɛ́ mɔ'ɔ nɛ̀ ŋma bíí nɛ̀ɛ̀ tɔ̧ ha̧ Jesu'e: «Nàà k’ɛ́nɛ́ in o nya'nɛ́ hɔɔ zan'i. Wa kɔ̧ɔ̧ mɛ tɔ̧ wen in'nɛ̀ɛ́.» 48Ɓɛɛ Jesu kifi nú ha̧ wi’ɛi: «Nàà kɔ‘m in nya'm nɛ́ o?» 49A̧ usa er sitɛ o ŋgaiwi kɔ̧-a̧, ɓɛɛ tɔ̧: «Nàà kɔ‘m in o nya'm nɛ́ o wi nɔ'ɔ; 50kóó o ndé nɛ̀ de mɔ nɛ̀ Dáà kɔ‘m nɛ̀ a̧a̧ yiwese kɔ̧a̧, wi’ɛi nɛ́ nya'm in boko-nya'm in nàà kɔ‘m.»

Currently Selected:

MATTHIEU 12: GB11DC

Highlight

Copy

Compare